Fesili Mai le ʻAufaitau

Talu ai na amata aloaʻia le seleselega ina ua auai uma tama tane o Isaraelu i le Tausamiga o Areto Lē Faafefeteina, o ai la na seleseleina uluaʻi fua o karite ia na aumai i le malumalu?

O le faatonuga lenei na avatu e le Tulafono a Mose iā Isaraelu: “E taʻi atu tolu i le tausaga ona iloa o tane uma lava o iā te oe i luma o Ieova lou Atua i le mea e filifilia e ia; o le tausamiga o areto e lē faafefeteina, ma le tausamiga o vaiasosa, i le ma le tausamiga o fale apitaga.” (Teuteronome 16:16) E amata mai le taimi o le tupu o Solomona, sa avea pea le malumalu i Ierusalema ma nofoaga na filifilia e Ieova mo ia tausamiga.

Na faia le uluaʻi tausamiga o tausamiga e tolu i le amataga o le tau e totogo ai mea. Sa taʻua o le Tausamiga o Areto Lē Faafefeteina, ma e amata i le aso pe a mavae le faamanatuina o le Paseka lea na faia iā Nisani 14, ma e faaauau mo le fitu aso seʻia oo iā Nisani 21. O le aso lona lua o le tausamiga, iā Nisani 16, e faailoga ai le amataga o le seleselega muamua o le tausaga e tusa ai ma le kalena faale-Tusi Paia. O le aso lenā e ave ai e le faitaulaga sili le ‘fusi karite ua faapolopoloina’ po o uluaʻi fua, ma lūlū “i luma o Ieova” i le malumalu. (Levitiko 23:5-12) Talu ai sa manaʻomia ona iai uma tama tane i le Tausamiga o Areto Lē Faafefeteina, o ai la sa faia lenei seleselega?

Sa avatu i le nuu le faatonuga e ofo atu uluaʻi fua o le seleselega iā Ieova i le taimi o le Tausamiga o Areto Lē Faafefeteina. E leʻi manaʻomia e tagata taʻitoʻatasi ona amata selesele ma aumai uluaʻi fua mo ia lava i le malumalu. Na i lo lea, sa faatonuina le nuu e fai e ala i ē sa tofia e fai ma sui o le nuu atoa. O lona uiga, o le seleseleina o le fusi karite mo le Tausamiga o Areto Lē Faafefeteina, atonu sa faia e nisi sa auina atu e fai ma sui o le nuu i se faatoʻaga karite lata ane. E tusa ai o lenei mea, na taʻua i le Encyclopaedia Judaica: “Afai ua matua le karite, na mafai ona maua mai Ierusalema; ae a leai na mafai ona maua mai i so o se vaipanoa i Isaraelu. E toʻatolu tane na seleseleina, e tofu le tagata ma lana mea e sele ai karite ma se ato.” A uma ona aumai lea o se fusi karite i le faitaulaga sili, o ia e ofoina iā Ieova.

O le manaʻoga e ofo atu uluaʻi fua po o faapolopolo o le seleselega, na maua ai e Isaraelu se avanoa sili ona lelei e faaali atu ai lo latou loto faafetai i faamanuiaga a le Atua i lo latou laueleele ma le seleselega. (Teuteronome 8:6-10) Ae o le itu sili ona tāua, o lenei taulaga sa fai ma “ata o mea lelei atalī.” (Eperu 10:1) O le mea mataʻina, na toe faatūina Iesu Keriso iā Nisani 16 i le 33 T.A., le aso sa ofo atu ai uluaʻi fua o le seleselega iā Ieova. Na taʻua e Paulo e faatatau iā Iesu: “Ua toe faatūina mai Keriso i ē ua oti, ua avea ma faapolopolo o ē ua momoe. . . . A e peitaʻi e taʻitoʻatasi ma lona lava tofi; o le uluai fua o Keriso ia, mulimuli ane o ē ua fai mona i lona toe afio mai.” (1 Korinito 15:20-23) O le fusi o uluaʻi fua lea sa lūlūina e le faitaulaga sili i luma o Ieova, sa faaata mai ai Iesu Keriso ua toe faatūina—o lē na muamua toe faatūina mai le oti i le ola e faavavau e lē toe oti lava. Na faaavanoa ai foʻi e Iesu le ala mo le laveaʻia o tagata mai le agasala ma le oti.

[Faamatalaga i Ata i le itulau 26]

© 2003 BiblePlaces.com