Po o le a E ‘Savali Pea i le Agaga’?
Po o le a E ‘Savali Pea i le Agaga’?
“Ia outou savavali i la le Agaga, ona lē faia lea e outou o le tuʻinanau o le tino.”—KALATIA 5:16.
1. E faapefea ona aveesea le popole faapea ua agasala i le agaga?
E IAI se auala e aveesea ai lo tatou popole i le agasala i le agaga paia o Ieova. E ala lea i le faia o le mea na taʻua e le aposetolo o Paulo: “Ia outou savavali [pea] i la le Agaga, ona lē faia lea e outou o le tuʻinanau o le tino.” (Kalatia 5:16) Pe a tatou faataga le agaga o le Atua e taʻitaʻia i tatou, o le a lē mafai la ona manumalo faanaunauga sesē iā i tatou.—Roma 8:2-10.
2, 3. E faapefea ona aafia o tatou olaga i le savavali pea i la agaga?
2 A o tatou “savavali [pea] i la le Agaga,” o le a uunaʻia i tatou e le mana galue o le Atua e usiusitai iā Ieova. O le a tatou faaalia le amio Atua i la tatou faiva, i le faapotopotoga, i o tatou aiga, ma so o se vala o le olaga. O le a mātauina aafiaga o fua o le agaga i le auala e feagai ai ma a tatou paaga faaipoipo, fanau, uso talitonu ma isi.
3 E mafai ona tatou teena le agasala pe a tatou ola e tusa “ai i le agaga i la le Atua.” (1 Peteru 4:1-6) Pe afai o loo taʻitaʻia o tatou olaga e le agaga paia, o le a tatou lē faia la se agasala e lē mafai ona faamagalo. Ae o ā nisi auala aogā e aafia ai i tatou pe a faaauau ona tatou savavali i le agaga?
Ia Faalatalata Pea i le Atua ma Keriso
4, 5. E faapefea i le savavali i le agaga ona aafia ai o tatou manatu iā Iesu?
4 Ua mafai ona tumau la tatou faiā vavalalata ma le Atua ma lona Alo, ona ua tatou savavali i le agaga paia. Na tusi Paulo e faatatau i meaalofa a le agaga i ona uso talitonu i Korinito: “Ou te faailoa atu iā te outou [o ē sa ifo i tupua], e leai lava se tagata e tautala i le Agaga o le Atua na te taʻuanatemaina o Iesu; e leai foʻi se tasi na te mafaia ona taʻua o Iesu o le Alii, a lē se anoa le Agaga Paia.” (1 Korinito 12:1-3) O so o se agaga e uunaʻia tagata e fetuu Iesu, o lona uiga e faapogaia mai e Satani le Tiapolo. Ae i le avea ai o ni Kerisiano e savavali i le agaga paia, e tatou te talitonu na faatūina e Ieova Iesu mai le oti, ma avea o ia ma lē silisili i foafoaga uma. (Filipi 2:5-11) E tatou te faatuatua i le taulaga togiola a Keriso ma talia Iesu o le Alii ua tofia e le Atua e pule iā i tatou.
5 Na teena e nisi na faapea mai o ni Kerisiano i le uluaʻi senituri T.A. le manatu faapea na afio mai Iesu i le tino. (2 Ioane 7-11) O le talia o lenā manatu sesē na teena ai e nisi aʻoaʻoga moni e faatatau iā Iesu, le Mesia. (Mareko 1:9-11; Ioane 1:1, 14) O le savavali i le agaga paia e puipuia i tatou mai le fulitua i le upu moni. E tatou te maua pea le alofa tunoa o Ieova ma ‘savavali i le upu moni,’ pe a faaauau ona tatou mataala i aʻoaʻoga saʻo ma manatu o le Atua o loo i le Tusi Paia. (3 Ioane 3, 4) O lea ia tatou maumauaʻi e teena aʻoaʻoga uma e feteenaʻi ma le upu moni, ina ia mafai ona faatumau la tatou faiā malosi ma lo tatou Tamā i le lagi.
6. O ā uiga e faatupuina e le agaga o le Atua i ē savavali i le agaga?
6 Na faatulaga e Paulo le liliu ese e ifo i tupua ma maseiga, o ni uiga e aofia i “galuega a le tino” e pei o le faitaaga ma le mataʻitu. Ae na ia faamalamalama mai: “O ē o iā Keriso, ua faasatauroina e i latou le tino, ma ona manaʻo, ma ona tuʻinanau. Afai ua tatou ola i le Agaga, ia tatou savavali foʻi i le Agaga.” (Kalatia 5:19-21, 24, 25) O ā uiga e faatupuina e le mana galue o le Atua iā i latou e ola ma savavali i le agaga? Na tusi Paulo: “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā [pe pulea lelei].” (Kalatia 5:22, 23) Seʻi o tatou iloiloina nei fua o le agaga.
“Ia Tatou Fealofani”
7. O le ā le alofa, ma o ā nisi o ona uiga?
7 O le alofa, o se tasi o fua o le agaga lea e masani ona aofia ai faalogona loloto ma le manatu mamafa lē faapito mo isi, e ō faatasi ma se faiā māfana ma i latou. Ua faapea mai le Tusi Paia o le “Atua o le alofa lava ia” auā o ia o le puna silisili o lea uiga. Ua faaalia le alofa sili o le Atua ma lona Alo mo tagata i le taulaga togiola a Iesu Keriso. (1 Ioane 4:8; Ioane 3:16; 15:13; Roma 5:8) E pei o soo o Iesu, e mātaulia i tatou i le alofa tatou te faaalia i isi. (Ioane 13:34, 35) Auā na faatonuina i tatou “ia tatou fealofani.” (1 Ioane 3:23) Na faapea mai foʻi Paulo o le alofa e onosai ma mataalofa. E lē losilosi, e lē mitamita vale, e lē amio matagā, e lē saʻilia e ia ana lava mea. O le alofa e lē itagofie, e lē faitau leaga ua tuuina mai e nisi. E fiafia i le faamaoni, ae lē o le amio leaga. O le alofa e lavātia mea uma, e faatuatua, faamoemoe ma onosai i mea uma. E lē uma le alofa.—1 Korinito 13:4-8.
8. Aiseā e tatau ai ona tatou faaalia le alofa mo o tatou uso talitonu?
8 Pe a tatou faataga le agaga o le Atua e ati aʻe le alofa iā i tatou, o le a iai la lenā uiga i la tatou faiā ma le Atua ma o tatou tuaoi. (Mataio 22:37-39) Na tusi le aposetolo o Ioane: “O sē lē alofa i [lona] uso, o loo tumau ia i le oti. O i latou uma o ē ʻinoʻino i o latou uso, o fasioti tagata i latou; ua outou iloa foʻi e leai sē fasioti tagata e tumau iā te ia le ola e faavavau.” (1 Ioane 3:14, 15) O sē na fasioti tagata paʻivalea, sa mafai ona malupuipuia i se aai o sulufaʻiga o Isaraelu, pe afai e na te leʻi ita i le tagata ua oti. (Teuteronome 19:4, 11-13) O le a tatou faaalia le alofa mo le Atua, ma uso talitonu ma isi, pe a taʻitaʻia i tatou e le agaga paia.
“O le Fiafia iā Ieova o lo Outou Malosi Lea”
9, 10. O le ā le olioli, ma o ā ni māfuaaga e olioli ai?
9 O le olioli o se tulaga o le matuā fiafia. O Ieova o le “Atua manuia [pe fiafia].” (1 Timoteo 1:11; Salamo 104:31) E fiafia lona Alo e faia le finagalo o lona Tamā. (Salamo 40:8; Eperu 10:7-9) ‘O le fiafia iā Ieova o lo tatou malosi lea.”—Neemia 8:10.
10 O le olioli mai le Atua e maua ai le faamalieina sili pe a tatou faia le finagalo o le Atua e oo lava i taimi o faigatā, faanoanoaga po o sauāga. Maʻeu le fiafia e aumaia e le “poto i le Atua”! (Faataoto 2:1-5) O la tatou faiā fiafia ma le Atua e faavae i le poto saʻo ma le faatuatua iā te ia ma le taulaga togiola a Iesu. (1 Ioane 2:1, 2) O se fiafiaga foʻi le avea ma se vaega o le ʻauuso moni i le lalolagi aoao. (Sefanaia 3:9; Hakai 2:7) E tatou te olioli i lo tatou faamoemoe i le Malo ma le faaeaga sili o le talaʻia o le tala lelei. (Mataio 6:9, 10; 24:14) E tatou te olioli foʻi ona o le faamoemoe o le ola e faavavau. (Ioane 17:3) E tatau la ona tatou “olioli ai lava” ona o lea faamoemoe matagofie.—Teuteronome 16:15.
Ia Filemu ma Onosai
11, 12. (a) O le ā le uiga o le filemu? (e) O ā ni aafiaga o le filemu mai le Atua iā i tatou?
11 O le filemu, o se isi lea fua o le agaga, o se tulaga toʻafilemu ma e lē popolevale. O lo tatou Tamā i le lagi, o ia o le Atua o le filemu, ma ua faamautinoa mai iā i tatou: “E faamanuia e Ieova lona nuu i le filemu.” (Salamo 29:11; 1 Korinito 14:33) Na fetalai Iesu i ona soo: “Ou te tuuina atu iā te outou le manuia [filemu]; o loʻu manuia [filemu] ou te avatu ai iā te outou.” (Ioane 14:27) E faapefea ona fesoasoani lenā filemu i ona soo?
12 Na avatu e Iesu le filemu i ona soo lea na faatoʻafilemu ai o latou loto ma mafaufau ma faaitiitia o latou popolega. Aemaise i le taimi na latou maua ai le agaga paia na folafola mai. (Ioane 14:26) Ua tatou maua le tele o le manuia po o le filemu o le Atua, lea e faatoʻafilemu ai o tatou loto ma mafaufau, ona o le uunaʻiga a le agaga paia ma le taliaina o a tatou tatalo i aso nei. (Filipi 4:6, 7) E lē gata i lenā, ua fesoasoani mai le agaga o Ieova ina ia tatou toʻafimālie ma filemu ma uso talitonu ma isi.—Roma 12:18; 1 Tesalonia 5:13.
13, 14. O le ā le onosai, ma aiseā e ao ai ona tatou faaalia?
13 O le onosai e sootaga ma le filemu, auā e faasino atu i lo tatou onosaia o mea faatigā ma ni sesē, i le faamoemoe e iai se taimi toe faaleleia tulaga o mea. E onosai le Atua. (Roma 9:22-24) Na faaalia foʻi e Iesu lea uiga. E mafai ona tatou maua aogā o le faaalia e Iesu o lea uiga, auā na tusi Paulo: “O lenei lava le mea na alofaina ai aʻu, ina ia muamua ona faaalia mai iā te aʻu e Iesu Keriso le onosai tele lava, ia avea aʻu ma faataʻitaʻi o ē a faatuatua iā te ia amulī, e maua ai le ola e faavavau.”—1 Timoteo 1:16.
14 O le onosai e fesoasoani iā i tatou e lavātia ni tala po o ni gaoioiga lē mafaufau na faia e nisi. Na timaʻi Paulo i ona uso talitonu: “Ia outou onosai i tagata uma lava.” (1 Tesalonia 5:14) Ona o lo tatou tino augavale e tatou te faia ai ni mea sesē, ma e mautinoa tatou te mananaʻo ia onosaia e isi o tatou sesē i le auala tatou te feagai ai ma i latou. O lea ia tatou taumafai e ‘onosai ma le fiafia.’—Kolose 1:9-12.
Ia Faaalia le Mataalofa ma le Agalelei po o le Lelei
15. O le ā le uiga o le mataalofa, ma taʻu mai ni faataʻitaʻiga.
15 E faaalia le mataalofa pe a tatou naunau i isi e ala i uiga faaleuō, upu ma gaoioiga agalelei. O Ieova e mataalofa ma e faapena foʻi lona Alo. (Roma 2:4; 2 Korinito 10:1) E faatalitalia le mataalofa mai auauna a le Atua ma Keriso. (Mika 6:8; Kolose 3:12) E oo lava i tagata e lē o iai sa latou mafutaga māfana ma le Atua, ae ‘maʻeu lava se alofa’ o loo latou faaalia. (Galuega 27:3; 28:2) O lea la, e mafai ona tatou faaalia le mataalofa pe a tatou “savavali [pea] i agaga.”
16. O ā ni tulaga e tatau ona uunaʻia ai i tatou e faaalia le mataalofa?
16 E mafai ona faaalia le mataalofa e tusa pe saʻo le mea ua tatou ita ai ona o ni upu faatigā po o ni gaoioiga lē mafaufau a se tasi. Na faapea mai Paulo: “A outou ita, aua le agasala ai; aua neʻi goto le lā o ita pea outou. Aua foʻi neʻi tuuina atu e outou se mea e mautū ai le tiapolo. . . . Ia outou feagaleleiaʻi, ia femutimutivaleaʻi lo outou alofa, ia fefaamagaloaʻi outou, faapei ona faamagaloina outou e le Atua iā Keriso.” (Efeso 4:26, 27, 32) Aemaise lava le tatau ona faaalia le mataalofa iā i latou o loo fesagaʻia ma tofotofoga. O le mea moni, e lē faaalia e se toeaina Kerisiano le mataalofa, pe afai na te lē avatu se fautuaga mai le Tusi Paia i se tasi, ona e musu e faatigā faalogona o lenā tagata, lea ua manino mai lamatiaga o lona tuulafoaʻi o le ala ‘agalelei ma le amiotonu, ma le faamaoni.’—Efeso 5:9.
17, 18. O le ā le uiga o le agalelei, ma lana vaega e faia i o tatou olaga?
17 O le agalelei, o lona uiga o se tulaga e silisili ona lelei tau amio. O le Atua e lelei atoatoa. (Salamo 25:8; Sakaria 9:17) E amio lelei Iesu ma e maualuga pe silisili ana tapulaa tau amio. Ae na te leʻi talia le “Lelei” e avea o se tofi e pei ona valaau ai o ia “Le aʻoaʻo lelei.” (Mareko 10:17, 18) Auā na ia amanaʻia o le Atua o le faaaʻoaʻoga silisili o le agalelei.
18 E faalavelavea a tatou taumafaiga e agalelei ona o le agasala tuufaasolo. (Roma 5:12) Peitaʻi e mafai ona faaalia lea uiga pe a tatou tatalo i le Atua e ‘aʻoaʻo i tatou i le lelei.’ (Salamo 119:66) Na faapea atu Paulo i uso talitonu i Roma: “Oʻu uso e, ua ou mautinoa, o aʻu nei lava, ua tutumu outou foʻi i le agalelei, ua apepele i le poto uma lava.” (Roma 15:14) O se ovasia Kerisiano e tatau o sē “fiafia i le agalelei.” (Tito 1:7, 8, NW) Pe a taʻitaʻia i tatou e le agaga o le Atua, o le a mātaulia pe lauiloa i tatou o ni ē agalelei, ma o le a manatua e Ieova i tatou mo le agalelei ua tatou faia.—Neemia 5:19; 13:31.
“Faatuatua Faamaoni”
19. O le ā le uiga o le faatuatua e tusa ai ma le Eperu 11:1.
19 O le faatuatua o le isi fua lea o le agaga, “o le faalagolago lea i mea ua faamoemoe i ai, o le mautinoa lea o mea e lē o vaaia.” (Eperu 11:1) Afai tatou te faatuatua, e tatou te mautinoa la e faataunuu mea uma ua folafola mai e Ieova. Ona e malosi le faamaoniga o le moni o mea e lē o vaaia, o le ala lea ua faapea ai ua tutusa le faatuatua ma ia faamaoniga. O se faaaʻoaʻoga, o le iai o mea ua foafoaina e faamautinoa ai iā i tatou e iai Sē na faia. O le ituaiga faatuatua lenā tatou te faaalia pe afai e tatou te savavali pea i le agaga.
20. O le ā le “agasala e faalavelavegofie ai i tatou,” ma e faapefea ona tatou ʻalofia atoa ai ma galuega o le tino?
20 O le lē lava o le faatuatua o le “agasala e faalavelavegofie ai i tatou.” (Eperu 12:1) E manaʻomia ona tatou faalagolago i le agaga o le Atua, ina ia ʻalofia ai galuega o le tino, le matapeʻapeʻa, ma aʻoaʻoga sesē lea e mafai ona lepeti ai lo tatou faatuatua. (Kolose 2:8; 1 Timoteo 6:9, 10; 2 Timoteo 4:3-5) E ati aʻe e le agaga o le Atua i auauna a Ieova i aso nei le faatuatua e pei o molimau Kerisiano anamuā ma isi o loo i le Tusi Paia. (Eperu 11:2-40) O lo tatou “faatuatua faamaoni” e ono faamalosia ai le faatuatua o isi.—1 Timoteo 1:5; Eperu 13:7.
Faaali le Agamalu ma le Amio Lē Gaoiā
21, 22. O le ā le agamalu, ma aiseā e ao ai ona tatou faaalia?
21 O le agamalu e faasino atu i uiga ma gaoioiga e faatamālii. O le isi uiga lea o le Atua o le agamalu. E tatou te iloa lea tulaga ona o Iesu, sa avea ma se tane agamalu, na ia faaatagia atoatoa mai uiga o Ieova. (Mataio 11:28-30; Ioane 1:18; 5:19) O le ā la e manaʻomia mai iā i tatou o auauna a le Atua?
22 I le avea o ni Kerisiano, e manaʻomia ona tatou “faaali atu le agamalu uma i tagata uma lava.” (Tito 3:2) E tatou te faaalia le agamalu i la tatou talaʻiga. E avatu i le “loto o le agamalu” e i latou ua agavaa faaleagaga fautuaga e faasaʻo ai se Kerisiano ua faia se mea sesē. (Kalatia 6:1) E mafai ona tatou saosaolaumea uma i le autasi ma le filemu o Kerisiano, e ala i le faaalia o le ‘loto maulalo ma le agamalu.’ (Efeso 4:1-3) E mafai ona tatou faaalia le agamalu pe a tatou savavali pea i le agaga ma le lē gaoiā.
23, 24. O le ā le lē gaoia, ma e faapefea ona aogā iā i tatou?
23 O le lē gaoiā e mafai ona pulea lelei ai o tatou manatunatuga, faamatalaga, ma gaoioiga. Na “onosai” pea Ieova i tagata Ierusalema na faaaunuua i Papelonia. (Isaia 42:14) Na tuu e lona Alo se ‘faaaʻoaʻo mo i tatou’ i le faaalia o le lē gaoiā i le taimi o ona mafatiaga. Na fautua e le aposetolo o Peteru ona uso Kerisiano ina ia ‘faaopoopo le lē gaoiā i lo latou iloa.’—1 Peteru 2:21-23, LT; 2 Peteru 1:5-8.
24 E faatalitalia e lē gaoia toeaina Kerisiano. (Tito 1:7, 8) O le mea moni, e mafai e ē uma o loo taʻitaʻia e le agaga paia ona faaalia le amio lē gaoiā ma le pulea ma ʻalofia ai amioga lē mamā, upu leaga po o se isi lava mea e lē maua ai le finagalo malie o Ieova. Pe a tatou faataga le agaga o le Atua e ati aʻe iā i tatou le lē gaoiā, o le a iloa mai e isi na suiga e ala i a tatou upu ma gaoioiga.
Ia Savavali Pea i le Agaga
25, 26. E faapefea i le savavali i le agaga ona aafia ai a tatou faiā ma isi i le taimi nei, ma lo tatou faamoemoe i le lumanaʻi?
25 Afai tatou te savavali i le agaga, o le a avea i tatou ma tagata talaʻi maelega o le Malo. (Galuega 18:24-26) O le a avea ai i tatou o ni uō lelei, aemaise o le a fiafia ai tagata amio Atua i la tatou faauōga. O le a avea foʻi i tatou ma faalaeiau faaleagaga i isi auauna a Ieova, ona ua taʻitaʻia i tatou e le agaga paia. (Filipi 2:1-4) Pe e lē o le mea ea lenā e faanaunau uma i ai Kerisiano?
26 E lē faigofie ona savavali i le agaga, a o iai i lenei lalolagi ua pulea e Satani. (1 Ioane 5:19) Peitaʻi e faitau miliona o loo latou faia faapea i aso nei. Pe a tatou faatuatua iā Ieova ma o tatou loto atoa, o le a tatou ola fiafia i le taimi nei ma mafai ona tatou savavali pea e faavavau i ala amiotonu o Lē alofa na foaʻia mai le agaga paia.—Salamo 128:1; Faataoto 3:5, 6.
O le ā Lau Tali?
• E faapefea ona aafia la tatou faiā ma le Atua ma lona Alo i lo tatou “savavali i le agaga”?
• O ā uiga e aofia ai i fua o le agaga paia?
• O ā nisi o auala e faaalia ai fua o le agaga o le Atua?
• E faapefea ona aafia o tatou olaga i le taimi nei ma le faamoemoe i le lumanaʻi, ona o le savavali i le agaga?
[Fesili mo le Suʻesuʻega]
[Ata i le itulau 23]
E ati aʻe e le agaga paia o Ieova le alofa mo o tatou uso talitonu
[Ata i le itulau 24]
Ia faaalia le agalelei e ala i upu ma gaoioiga