“Ua Fai Le Poto Ma Mamalu”

UA TAʻUA i le Faataoto 16:16: “Ia maua le poto, e sili ona lelei lea i le auro; ia maua foʻi le atamai, ia sili ona manaʻomia lea i le ario.” Aiseā e tāua tele ai le poto? Auā “ua fai le poto ma mamalu, ua fai foʻi tupe ma mamalu; a o le aogā lenei o le poto ua maua, e ola ai ē ua i ai.” (Failauga 7:12) E faapefea ona faaolaina e le poto ē ua iai?

O le maua o le poto mai le Atua, le poto saʻo lea o le Afioga a le Atua, le Tusi Paia, ma ola e ogātusa ai, e fesoasoani iā i tatou e savavali ai i le ala ua faamaonia e Ieova. (Faataoto 2:10-12) Ua taʻua e le tupu Isaraelu o Solomona: “O le ala tele o ē amio saʻo, o le ʻalo ese lea i le leaga; o lē na te leoleo lona ala, na te faasaoina ai lona ola.” (Faataoto 16:17) Ioe, e faasao e le poto ē ua iai mai ala leaga ma ola ai pea i latou! Ua faaalia i faamatalaga poto o loo otooto i le Faataoto 16:16-33 le aogā o le poto mai le Atua i o tatou uiga, upu e tautatala ai, ma gaoioiga. *

‘Ia Maulalo le Loto’

Ua faatusa le poto i se tagata e pei ona faapea mai: “O le faamaualuga, ma le loto fefete, . . . ou te ʻinoʻino i ai.” (Faataoto 8:13) E matuā eseese le loto fefete ma le poto. E ao ona tatou gaoioi ma le poto ma ia faaeteete ia aua neʻi ati aʻe se uiga faamaualuga pe faasausili. E tāua ona tatou faaeteete pe a tatou fiafia i ni mea ua taulau manuia ai i nisi vala o le olaga, po o ni tiute tauave foʻi ua tuuina mai i le faapotopotoga Kerisiano.

Ua lapataʻi mai le Faataoto 16:18: “E muamua le faamaualuga i le malaia; e muamua foʻi le loto faasiasia i le paʻū.” Seʻi manatu i le malaia sili ua i le lalolagi, le paʻū o se atalii na lelei atoatoa o le Atua, lea na ia faia o ia ma Satani le Tiapolo. (Kenese 3:1-5; Faaaliga 12:9) Pe na te leʻi faaalia ea se uiga faamaualuga a o leʻi malaia? E tusa ai o lea uiga, ua taʻua i le Tusi Paia e lē tatau ona tofia se tane faatoʻā liliu e vaaia le faapotopotoga Kerisiano, ina “neʻi faafefeteina lona loto, ona  paʻū lea o ia i le faasala a le tiapolo.” (1 Timoteo 3:1, 2, 6) Maʻeu le tāua o le puipui mai le uunaʻiga o le loto faamaualuga i isi, ma ia leoleo foʻi i tatou mai le ati aʻe o lea uiga!

Ua taʻua i le Faataoto 16:19: “E lelei ona maulalo o le loto faatasi ma ē ua agamalu; a e leaga ona tufa le vete faatasi ma ē faamaualuga.” Ua faaalia lenā timaʻiga poto i le tulaga o le tupu Papelonia o Nepukanesa. Na ia faamaualuga ma faatū se tupua tele i fanua laugatasi o Turu, atonu e faaatagia ai o ia. Atonu na tuu le tupua i luga o se faavae maualuga lea e oo i le 90 futu (27 mita) le umī. (Tanielu 3:1) Na avea lenei tupua tele o se faailoga ofoofogia o le malo o Nepukanesa. E ui e ono maofa tagata i mea maualuluga ma mamalu e pei o lenā faatagata, atoa foʻi ma faatusa ma fale tetele maualuluga, ae e lē maofa ai le Atua. Na pese le faisalamo: “O loo maualuga Ieova, a e silasila mai o ia i lē ua faamaulalo; a o lē ua faamaualuga, e silafia mamao mai e ia.” (Salamo 138:6) O le mea moni, “o le mea e sili ona lelei i tagata, e inosia lea i luma o le Atua.” (Luka 16:15) E sili atu la mo i tatou le “feoaʻi ma ē ua faamaulalo” na i lo le “manatu i mea sillisili.”—Roma 12:16.

Ia Tautala ma le “Faautauta” ma le ‘Mautinoa’

E faapefea i le mauaina o le poto ona aafia ai la tatou tautala? Ua taʻu mai iā i tatou e le tupu poto: “O lē ua faautauta i se mea, e maua e ia le mea lelei; o lē faatuatua foʻi iā Ieova, amuia o ia. O lē ua poto le loto, e taʻua ia o lē mafaufau; o le suamalie foʻi o laugutu e tupu ai pea lona poto [mautinoa]. O le puna o le ola le poto i lē ua i ai; a o le aʻoaʻo atu o ē valelea, o le valea lava lea. O le loto o lē ua poto, e poto ai lona gutu; e faaopoopoina ai foʻi le poto i ona laugutu.”—Faataoto 16:20-23.

E fesoasoani le poto e tatou te tautatala atu ai ma le faautauta ma i se uiga mautinoa. Aiseā? Auā o le tagata e poto le loto, e taumafai e “maua e ia le mea lelei” i se mataupu ma ‘faatuatua iā Ieova.’ Pe a tatou taumafai e talanoa i mea e lelei ai isi, o le a sili atu foʻi la ona tatou faamālō atu iā i latou. Na i lo le ʻinaʻinā ma faatautee, o le a logoleleia ma poto pe iai se uiga mautinoa i a tatou upu. O le faautauta i tulaga o isi, e fesoasoani e tatou te malamalama ai i faigatā e oo iā i latou ma le auala e latou te fesagaʻia ai.

E tāua foʻi le tautala ma le poto pe a auai i la tatou galuega o le talaʻia o le Malo ma le faia o isi ma soo. Pe a tatou aʻoaʻo atu le Afioga a le Atua i isi, o lo tatou sini e lē tau na o le faaoo atu o faamatalaga faale-Tusi Paia. O lo tatou sini ia pāʻia loto o tagata. E aofia ai le tautala ma le poto pe i se uiga mautinoa. Na faalaeiau Paulo i lana aumea o Timoteo ina ia “mautinoa” pea i mea na aʻoaʻoina ai o ia.—2 Timoteo 3:14, 15.

Ua taʻua i se Expository Dictionary of New  Testament Words a W. E. Vine, o le upu Eleni lea ua faaliliuina mo le “mautinoa” po o le faatalitonu, e uiga atu i le “faia o se suiga o le mafaufau e ala i taaʻiga mai mafaufauga po o manatunatuga i amioga tatau.” O le faatalitonu o ni feteenaʻiga lea e iʻu i se suiga o le mafaufau o se tasi e faalogologo mai iā i tatou, e manaʻomia ai le malamalama i ona mafaufauga, o mea e fiafia i ai, tulaga, ma lona talaaga. E faapefea ona tatou maua lea malamalamaga? Ua tali mai le soo o Iakopo: “Ia . . . faataalise ona faalogologo, ia faagesegese ona tautala atu.” (Iakopo 1:19) O le fai o ni fesili i lē o faalogologo ma uaʻi lelei atu i mea o ia taʻua, e tatou te iloa ai mea o loo ia mafaufau i ai.

E mataʻina le tomai o Paulo na ia faatalitonu ai isi. (Galuega 18:4) E oo foʻi i sē na tetee ane iā te ia, o Temetiu le fai mea ario, na ia faailoa mai: “E lē gata i Efeso, a ua tāli soo Asia uma lava, ona faaliliueseina ai e lenā Paulo le vao tagata e toʻatele i lona ōle.” (Galuega 19:26) Pe na manatu Paulo o ana taumafaiga na māfua ai ona taulau i lana talaʻiga? E leai. Na ia manatu i lana talaʻiga o se “faasino mai e le Agaga ma le mana [o le Atua].” (1 Korinito 2:4, 5) Ua tatou maua foʻi le fesoasoani o le agaga paia o Ieova. Ona tatou te faatuatua iā Ieova, e tatou te mautinoa ai i lana fesoasoani a o taumafai e tautatala atu ma le faautauta ma i se uiga mautinoa i la tatou faiva.

E lētioa taʻua “lē ua poto le loto” o lē “atamai” pe iai le “utaga mamao”! (Faataoto 16:21, An American Translation; New International Version) Ioe, o le faautauta o le “puna o le ola lea” i ē ua maua. Ae ā ē vālea? E latou te ‘ʻinoʻino i le poto ma le aʻoaʻoina.’ (Faataoto 1:7) O ā iʻuga latou te seleseleina ona o le teena o aʻoaʻiga mai iā Ieova? E pei ona taʻua i luga, ua faapea mai Solomona: “O le aʻoaʻo atu o ē valelea, o le valea lava lea.” (Faataoto 16:22) E oo iā i latou nisi aʻoaʻiga, e masani e ala mai i se faasalaga mamafa. E ono faapogaia foʻi e ē vālea ni faigatā, faalumaina, faamaʻi, ma oo ina feoti ai ae leʻi taitai ona o a latou lava amioga.

I le faasino atili atu i aogā o le poto i upu tatou te tautatala atu ai, ua taʻua e le tupu Isaraelu: “O upu matagofie, o le meli ua sisina ifo ia; e suamalie i le loto, ma le mea e mālōlō ai ivi.” (Faataoto 16:24) E pei lava ona vave faamalieina sē ua galala i le fia taumafa ona o le suamalie o le meli, e faapena foʻi ona faalaeiauina ma faafouina se tasi i upu e logoleleia. E mafai foʻi e le meli ona maua ai le soifua mālōlōina lelei ma tapē ni siama o loo iai i se tasi. E faapena foʻi faaupuga logoleleia; e mālōlōina ai faaleagaga.—Faataoto 24:13, 14.

Ia Faaeteete i ‘se Ala e Foliga Mai e Tonu’

“O i ai le ala ua tonu i le manatu o le tagata; a o lona taunuuga, o ala ia e oti ai.” (Faataoto 16:25) O se lapataʻiga lenei i manatu sesē ma le saʻilia o se ala e teena ai tulafono a le Atua.  O se ala e foliga mai e saʻo i le vaaiga a tagata lē lelei atoatoa, ae atonu e matuā feteenaʻi ma tapulaa amiotonu o le Afioga a le Atua. E ono faaauiluma foʻi e Satani lea manatu faaʻoleʻole e lolo ai se tasi i se ala e manatu e saʻo, ae o le mea moni e taʻitaʻia atu i le oti.

E leai se isi puipuiga e sili atu mo lou ʻolegia o oe lava ia, na i lo o se loto e poto ma malamalama, ma se loto fuatiaifo ua aʻoaʻoina e le poto o le Afioga a le Atua. Pe a faia filifiliga i le olaga po o mataupu e tusa ai o amioga, tapuaʻiga, po o isi mea, o le ala sili e puipuia ai mai le faasesēina o i tatou, o le taʻitaʻia e tapulaa a le Atua mo le lelei ma le leaga.

O le Fia Taumafa e Galue ai le Tagata mo Ia Lava

Ua faapea atili mai le tupu poto: “O le tagata e galue, ua galue o ia mo ia lava; auā ua faatauanauina o ia e lona gutu.” (Faataoto 16:26) Ua taʻua e Solomona, o le fia taumafa o se tagata, ‘ua galue ai o ia mo ia lava’ ona ua “faatauanauina o ia” pe uunaʻia e lona galala i le fia taumafa. O le faanaunauga masani e pei o le fia taumafa, e uunaʻia ai i tatou ia taulau manuia a tatou galuega. E aogā lenā ituaiga o faanaunauga. Ae ā pe afai ua ova tele le faanaunauga masani lea ua iʻu ai ina matapeʻapeʻa? E tutusa le iʻuga, i se tamaʻi afi lea sa faaaogā e kuka ai se meaʻai ae ua iʻu ina avea ma afi telē e mū ai le togavao. O le matapeʻapeʻa, o se faanaunauga ua lē pulea ma e malaia ai se tasi. O le nofouta o le tagata poto i nei lamatiaga, e na te puleaina ai e oo lava i ona faanaunauga aogā.

Aua Neʻi ‘Taʻitaʻiina i le Ala e Lē Lelei’

O upu e alu atu i o tatou gutu e mafai ona faaleagaina ai e pei o se afi mumū. I le faamatalaina o aafiaga leaga o le suʻesuʻeina o masei o isi ma le faasalalau atu o na masei i isi tagata, ua taʻua ai e Solomona: “O le tagata ulavale, na te matuā saunia le leaga; o loo i ona laugutu o upu e peiseaʻī o le afi mumū. O le tagata faapiʻopiʻo, e faatupuina e ia le misa; ma lē faatuaupua, na te faateʻaeseina uō.”—Faataoto 16:27, 28.

O se tasi e taumafai e faaleaga le talaaga lelei o lona uso, o se “tagata ulavale” po o se tagata leaga. E ao ona tatou taumafai e vaai mea e lelei ai isi ma talanoa i mea e uunaʻia ai isi ia faaaloalo iā i latou. Ae ā pe a faalogo atu i ē o loo faasalalauina ni tala taufaaleaga? O a latou faamatalaga e faigofie ona māfua ai ni masalosaloga e lē faavaea, malepe ai faigauō, ma taape ai le faapotopotoga. E uunaʻia e le poto i tatou e aua neʻi faalogo atu iā i latou.

Na lapataʻi Solomona e uiga i se malosiaga taufaasesē e māfua ai  ona mulimuli atu se tasi i se ala sesē: “O le tagata faasauā, na te faaʻoleʻole i lē la te tuaoi; na te taʻitaʻiina foʻi o ia i le ala e lē lelei. O loo moe ona mata e manatunatu ai i mea faapiʻopiʻo; o loo memu ona laugutu e faataunuu ai le leaga.”—Faataoto 16:29, 30.

Pe mafai ona pulea e faiga sauā tagata tapuaʻi moni? E toʻatele tagata i aso nei ua manatunatu i “mea faapiʻopiʻo.” Ua latou uunaʻia pe faia ni gaoioiga sauā. Atonu e faigofie ona tatou ʻalofia le auai tuusaʻo i ia faiga sauā. Ae faapefea le maileia i ona vala iloagatā? Po ua lē lolo atu ea le faitau miliona o tagata e matamata i faafiafiaga po o taaloga e faatāua ai faiga sauā? E manino le fautuaga a le Tusi Paia: “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.” (Faataoto 13:20) Maeʻu se puipuiga o le poto mai le Atua!

E faapefea ona faamatala se tasi na ia faaaogā le poto ma le malamalama ma ‘e leʻi taʻitaʻiina i le ala e lē lelei’? E matagofie i le silafaga a le Atua le ola i se olaga amiotonu, ma e ao ona faaaloalogia o ia. Ua taʻua i le Faataoto 16:31: “O le pale matagofie le ulusinā, pe a ua i ai i le ala o le amiotonu.”

I le isi itu, e matuā lē matagofie lava le lē pulea o le ita. Na ‘ita tele Kaino’ le atalii ulumatua o Atamu ma Eva i lona uso o Apelu, ma ia ‘tulaʻi ai ma fasioti iā te ia.’ (Kenese 4:1, 2, 5, 8) E ui e iai taimi e tatau ai ona tatou feita, ae ao ona faaeteete ina neʻi lē pulea lo tatou ita. E manino le manatu o le Faataoto 16:32: “E sili ona lelei o lē ua gesegese i le ita i lē ua malosi; e sili foʻi lē ua pule i lona loto i lē na te āʻea le aai.” O le lē pulea o le ita, o se faailoga lea o le leai o se malosi po o ni uiga lelei. O se vaivaiga lea e ‘taʻitaʻiina ai se tasi i le ala e lē lelei.’

Pe a ‘Mai iā Ieova Faatonuga Uma’

Ua taʻua e le tupu o Isaraelu: “E faia le vili i le fatafata o le ofu; a e mai iā Ieova lona faatonuga uma lava.” (Faataoto 16:33) I Isaraelu anamua, na faaaogā e Ieova i nisi taimi vili e faailoa mai ai lona finagalo. O vili o ni tamaʻi maa lapotopoto po o ni papa maa e faia i laau po o maa. Muamua, e ōle atu iā Ieova mo sana faaiʻuga i se mataupu. Ona togi lea o vili i totonu o se maea ma toe tuu mai i fafo. O le iʻuga e maua mai ai, e manatu i ai e mai le Atua.

E lē o toe faaaogāina e Ieova ni vili e faailoa mai ai i ona tagata lona finagalo. Ua ia faaalia mai lona finagalo i lana Afioga, le Tusi Paia. O le poto saʻo o i le Tusi Paia, e tāua lea i le mauaina o le poto mai le Atua. E lē tatau la ona tatou misia se aso e aunoa ma le faitauina o le Tusi Paia.—Salamo 1:1, 2; Mataio 4:4.

[Faamatalaga pito i lalo]

[Ata i le itulau 8]

Aiseā e sili atu ai ona lelei le poto i lo le auro?

[Ata i le itulau 9]

O le ā se mea e faaopoopo atu ai le mautinoa i au upu a o e auai i le faiva?

[Ata i le itulau 10]

“O le tagata ulavale, e na te matuā saunia le leaga”

[Ata i le itulau 11]

O le lē pulea o le ita, e taʻitaʻiina ai se tasi “i le ala e lē lelei”

[Ata i le itulau 12]

E iai i faiga sauā le malosi e faaosoosoina ai se tasi