Fesili Mai le ʻAufaitau

Aiseā na fesili atu ai le tupu o Saulo iā Tavita, “Le atalii ea oe o ai, sē?” ina ua uma ona fasioti e Tavita Koliata, e ui lava o Saulo lea na aamia Tavita e fai ma ana auauna?—1 Samuelu 16:22; 17:58.

Atonu e vave oso ifo se manatu e faapea, ai na galo iā Saulo po o ai Tavita, ona e leʻi umi tele se taimi lea na la feiloaʻi ai muamua. Peitaʻi e foliga mai e lē o le māfuaaga lenā, auā i le faamatalaga a le 1 Samuelu 16:18-23, o loo taʻu mai ai, sa avatu faapitoa lava le aveaʻi a le tupu o Saulo ina ia aumai Tavita iā te ia, ma sa matuā alofa foʻi iā Tavita, ma ia tofia Tavita e fai ma ana soātau. O lona uiga sa masani lelei Saulo iā Tavita.

E manatu nisi tagata faitofā o le Tusi Paia, o mau i le 1 Samuelu 17:12-31 ma le 17:55–18:5 o ni manatu na faaopoopo i se taimi mulimuli ane, auā e lē o maua nei faamatalaga i nisi kopi o le Greek Septuagint, o se faaliliuga o Tusitusiga Eperu lea na māeʻa ona tusia i le senituri lona lua T.L.M. Peitaʻi, e lē fetaui pe a faaaogā na o nei kopi o le Septuagint e faavae mai ai lenā faaiʻuga, auā o loo iai foʻi faamatalaga nei i isi manusikulipi autū o Tusitusiga Eperu. *

E foliga mai, o le fesili muamua atu o Saulo iā Apineru, toe fesili atu foʻi iā Tavita lava ia, e taʻu mai ai e lē o le na o le igoa o le tamā o Tavita lea sa fia iloa e Saulo. O le Tavita lea ua vaaia e Saulo i lea taimi, ua matuā ese lava; ua ia iloa atu ai se tagata e matuā telē lona faatuatua ma le loto tele, lea ua mafai ona ia faatoʻilaloina Koliata. Sa fia iloa la e Saulo, po o le ā le ituaiga o tamā na tausia aʻe lenei tama. Atonu pe na mafaufau Saulo, ua tatau foʻi la ona avatu le tamā o Tavita, ma isi tagata o lona aiga i le ʻautau, auā e foliga mai o le ituaiga loto tele lava lea e tasi o loo iai i isi uma tauaiga o Tavita.

I le 1 Samuelu 17:58 na pau le tali puupuu atu a Tavita o loo taʻua ai e faapea, “O aʻu o le atalii o lau auauna o Iese le Peteleema.” Peitaʻi o isi fuaiupu o loo sosoo e taʻu mai ai, sa umī atu se talanoaga na fai. E tusa o lenā manatu, seʻi mātau le faamatalaga a C. F. Keil ma F. Delitzsch: “O le faaupuga i le [1 Samuelu 18:1] e faapea, ‘ina ua uma atu ana upu iā Saulo,’ ua matuā manino mai ai, sa faaauau lava ona talanoa Saulo ma Tavita i nisi mataupu e faatatau i le aiga o Tavita, auā o upu lava na e taʻu mai ai sa faia sa la talanoaga umi.”

Pe a fua la i nei manatu uma, e mafai ona tatou faapea atu, o le fesili a Saulo iā Tavita, “Le atalii ea oe o ai, sē?” e taʻu mai ai e na te leʻi fia iloa po o ai Tavita auā o lea ua leva ona ia iloa, ae sa ia fia iloa le ituaiga o talaaga e tupuga mai ai Tavita.

[Faamatalaga pito i lalo]

[Ata i le itulau 31]

Aiseā na fesili atu ai Saulo iā Tavita po o ia o se atalii o ai?