Le Faatuatua o se Tinā ua Manumalo Mai le Oti

“Pe afai o loo outou faitauina lenei tusi, o lona uiga e leʻi manuia loʻu taotoga ma o le a lē mafai ona tatou toe faatasi.”

O ULUAʻI upu ia o le tusi a Carmen o se tinā Kerisiano, i lana fanau teine e toʻatolu, e 25, 19, ma le 16 o latou tausaga. E leʻi manuia le taotoga o Carmen ma e faanoanoa lava, na maliu o ia.

I le tuuina o lana fanau teine e toʻatolu i nei tulaga faanoanoa, e oo ai le loto nutimomoia i so o se tasi. E ui i lea, na matuā atagia i le tusi a lenei tinā le filemu o lona loto ma le malosi o lona faatuatua iā Ieova ma ana folafolaga. Mātau ana faamatalaga i lana fanau teine.

“Muamua lava, ou te fia taʻu atu loʻu alofa iā te outou ma loʻu loto atoa. . . . E lē toe maua se isi fanau teine e pei o outou, ma o le mitamitaga sili lea i loʻu loto o outou.

“Sa ou manaʻo e tatou te faatasi pea seʻia oo i le lalolagi fou lea na folafola mai e le Atua . . . , ae ui i lea, ona ua ou lē mafaia, o lea ua ou talosagaina ai o ia e fesoasoani iā te outou ina ia faaauau ona outou faamaoni iā te ia e pei ona outou faia i le taimi nei. E leʻi tuulafoaʻia lava i tatou e Ieova a o tatou fesagaʻia puapuaga e tele. . . . O lea, ia faaauau ona outou faalagolago i taʻiala e maua mai i lana faalapotopotoga, ma faaauau ona outou lagolagosua i le faapotopotoga ma le ʻautoeaina. Ia outou toʻaʻaga e talaʻi, ma ia alolofa i le ʻauuso uma.

“E lē tumau ona tatou valavala. . . . Ia outou faamagalo mai aʻu mea sesē na fai ma taimi na ou lē malamalama ai i o outou uiga, ma ou lē taʻu atu foʻi le loloto o loʻu alofa mo outou. . . . Ou te iloa e tofu outou ma manaʻoga. E sili atu le silafia e Ieova o outou manaʻoga, ma o le a ia faamalieina uma ia itu, ma o le a tauia lo outou tutumau faamaoni.

“Aua neʻi galo lo tatou sini, o se olaga i le lalolagi fou, ma faia ni taumafaiga e tumau ai i le faamoemoe. Ia faamanuia ma faamalosia outou e Ieova ina ia outou tutumau seʻia oo i le gataaga. . . . Aua tou te faanoanoa si aʻu fanau pele. Ou te alofa tele iā te outou!”

E mafai ona oo faafuaseʻi le oti i se tasi. Na tusi le tupu o Solomona: “O le tausaga ma le mea e tupu ai e oo iā te i latou uma.” (Failauga 9:11) Peitaʻi, o ē malosi lo latou faatuatua i le Atua, e mafai ona iai le mautinoa lea na iā Paulo, i lona faapea mai: “Ua ou mautinoa, e lē mafaia e le oti, po o le ola, . . . po o se tasi mea na faia, e lē mafaia e ia mea ona faateʻaeseina mai i tatou i le alofa o le Atua, o loo iā Keriso Iesu lo tatou Alii.”—Roma 8:38, 39; Eperu 6:10.