Lua “Mea Mataʻina” i se Tasi Tauaofiaga i Georgia

O SE mea e lē mafaagaloina, o ni “mea mataʻina” se lua na tutupu i Georgia i le 2006. Na faia ai le Tauaofiaga Itumalo “Ua i Faitotoʻa le Faaolataga” a Molimau a Ieova mo aso e tolu mai iā Iulai 7 e oo i le 9, i nofoaga e ono i le atunuu atoa. O se taumafataga faaleagaga na olioli ai le silia i le 17,000 na auai.

Iā Ianuari 2006, na faia ai ni taumafaiga e saʻili se nofoaga talafeagai e potopoto ai le faitau afe o tagata i le laumua o Georgia, o Tbilisi, lea na fuafua e faia ai le tauaofiaga. O isi nofoaga, o le a fesootaʻi uma e ala i laina o telefoni.

Na faasolo pea ona iai le saʻolotoga e tapuaʻi ai i Georgia i nai tausaga ua teʻa. E ui i teteega i le taimi ua teʻa, ae na agaʻi pea i luma ma le lē faavaivai Molimau, i le mautinoa o le a maua se nofoaga i le laumua e fai ai le tauaofiaga. E ese le faaleuō ma le talimālō o tagata Georgia. Ae e malosi tele faiga faaituʻau faalotu i nisi o taʻitaʻi o le atunuu. Po o le a suia ea o latou lagona ma faataga Molimau e faaaogā se fale mautotogi?

Na asiasi uso o le Komiti o le Tauaofiaga i fale matamata eseese ma fale taalo tetele. Na folafola e pule o nei nofoaga e mafai ona faaaogā o latou fale, ae e leʻi mananaʻo e taʻu ane se aso patino e faaaogā ai. O le ala lea o le maofa o le komiti o le tauaofiaga, ina ua malilie le pulega a le Tbilisi Philharmonic e totogi ma faaaogā e Molimau a Ieova lo latou fale. E i le ogatotonu o le laumua le fale, lea e masani ona fai ai le tele o faatasiga e sili ona tāua.

I le faalaeiauina ina ua manuia a latou taumafaiga, na amata ai loa ona faamaopoopo e le komiti le tauaofiaga i Tbilisi, faapena foʻi tauaofiaga i isi taulaga ma aai o le atunuu atoa, lea e aofia ai Tsnori, Kutaisi, Zugdidi,  Kaspi, ma Gori. Na tele ni galuega na faia ina ia fesootaʻi ai nei nofoaga uma e fai ai tauaofiaga, e ala i laina o telefoni, ina ia maua ai le polokalame i le taimi e tasi. Ua saunia mea uma mo le tauaofiaga. Ae faafuaseʻi lava pe ā ma le toe tasi le vaiaso a o leʻi faia le tauaofiaga, na toe faalēaogāina ai e le pulega a le Tbilisi Philharmonic le maliega. E leʻi taʻuina ane ni māfuaaga.

Le “Mea Mataʻina” Muamua

O le ā le mea o le a mafai ona fai e uso i lenei taimi puupuu o totoe? E na o le pau le fesoasoani o lo latou toe foʻi lea i Marneuli, o se vaipanoa e iai ni faatoʻaga pe tusa e 25 maila (40 kilomita) le mamao ese mai Tbilisi. E tele ni tauaofiaga na faia ai i inā i le fale o se aiga e Molimau a Ieova. Sa avea le nofoaga o se faatoʻaga telē. Mo le sefulu tausaga ua mavae, e na o le pau lea o le nofoaga sa faaaogā e faapotopotoga i Tbilisi e fai ai a latou tauaofiaga. Peitaʻi, sa avea foʻi Marneuli ma nofoaga lea e tele ina mafatia ai Molimau a Ieova i osofaʻiga a tagata sauā leaga.

O se tasi o nei mea na tupu iā Setema 16, 2000. Na faia e leoleo mai le aai o Marneuli ni poloka i le auala e taofi ai Molimau mai le oo atu i le nofoaga e fai ai le tauaofiaga. Na ō mai ni pasi ua tumu i tagata sauā na taʻitaʻia e Vasili Mkalavishvili, o se faifeʻau ua ave ese lona tofi mai le lotu Orthodox. Na latou taofia taavale ma pasi na ō mai mo le tauaofiaga i Marneuli, tatoso i fafo le ʻauusufono, ma sasa faamoʻamoʻa i latou ae fao faamalosi mea totino a isi tagata o le pasese, e aofia ai Tusi Paia ma lomiga faale-Tusi Paia.

Na osofaʻia foʻi le nofoaga na faia ai le tauaofiaga i Marneuli e ni tagata sauā pe tusa e 60. Na manunuʻa ai Molimau e 40. Na lavea le fatafata o se tasi uso i se agaese. Na faaaliali e nisi ʻauosofaʻi a latou fana, ma tafana solo i luga i le ea. Na taʻi e se isi se fana i le tuafafine e ona le fale, ma fai i ai e avatu ana tupe ma maa tāua. Na latou suʻeina lona fale lea e i le faatausiʻusiʻuga o le nofoaga, ma gaoia uma ana mea tāua. Ina ua uma ona taʻei faamalama o le fale, na latou susunu lomiga faale-Tusi Paia ma nofoa na fai faapitoa mo le tauaofiaga. Na faaleagaina le tasi ma le ʻafa tone o lomiga. Na i lo le taofia e leoleo o le solitulafono, na fai ai foʻi la latou vaega i faiga sauā i Molimau. *

 Na tauivi le Komiti o le Tauaofiaga e lē gata i faamataʻuga o sauāga, ae faapena foʻi le luʻi o le tau faaofi uma o le 5,000 o tagata i se nofoaga e masani ona ofi ai tagata pe tusa e 2,500. E faapefea ona foʻia lenei faafitauli i lea taimi puupuu? E foliga mai o se vavega ina ua ō atu ni uso se toʻalua e sosoo lava o la fanua, ma ofo atu e totogi ma faaaogā o la fanua o loo iai a la faatoʻaga.

O le faia o nei fanua e avea ma nofoaga talafeagai mo le tauaofiaga, o se galuega e faigatā tele. Na atili faigatā le tulaga o mea ona o le tau, na atoa le vaiaso o timu a o lumanaʻi le tauaofiaga. Na totō pateta i fanua o tuaoi ma e ao ona eli uma na pateta. Muamua, na potopoto le ʻaugalulue tauofo i le tetele o timuga e eli ese pateta. Na aveese pā ae faatutū ni fausaga e mafai ona ato, ina ia malu lelei ai le aofia mai le lā ma le timu. Na manaʻomia ona fausia nisi nofoa laupapa, ma na toe faia foʻi le isi mea faaleotele leo. Na galulue le ʻautauofo i le pō ma le ao i le fausiaina o le nofoaga ina ia māeʻa lelei le galuega, o nisi e leʻi momoe ai lava.

Na tomānatu nisi, “Ae ā pe a faaauau pea ona timu i le taimi o le tauaofiaga? Faamata e lē teʻi ua magoto ifo ai le ʻauusufono i le palapala?” Na faatau mai ni vao mamago e ufiufi ai le palapala susū. Ae susulu mai loa le lā! Na lafoia le susulu matagofie ma le māfanafana o le lā i laufanua i aso uma e tolu o le tauaofiaga.

Ina ua taunuu le ʻauusufono, na faafeiloaʻia i latou i se vaaiga matagofie. Na foliga atu o le laufanua toʻafilemu o se faaataga lea o le lalolagi fou. Na lelei nofoa na latou alaala ai, ma na siʻomia i latou i laau o mati, o laau e iai fualaau ʻaina, ma fanua e iai sana ma tamato. Na teuteu faamatagofie le pito i tua o le pulelaa i vine. I nisi taimi a o faagasolo le polokalame, e faalogoina ai e le aofia le kokoʻē o toa ma matuāmoa a o tuu o latou fua. E iai isi leo ua masani ai tagata i nuu i tua, ae o ni leo e mālie tele i tagata o i le aofia. Na i lo le tosina ese ai o le aofia, na faigatā ona mātauina auā sa latou naunau e faalogologo atu i le polokalame sili ona lelei sa faavae mai le Tusi Paia. Ae e lē na o le pau ai na o mea e lē mafaagaloina o lenei tauaofiaga.

Le “Mea Mataʻina” Lona Lua

I le faaiʻuga o le polokalame i le taeao o le Aso Faraile, na maofa ai le ʻauusufono ina ua faasilasila e se sui o le Vaega Pule o Molimau a Ieova, o Geoffrey Jackson, le tatalaina o le Tusi Paia atoa o le New World Translation of  the Holy Scriptures i le gagana Georgia. * Na maligi loimata o le toʻatele o ē na maofa. Na taʻua ma le fiafia e se aiga: “E lē mafai ona taofia le faaleoina atu o la matou faafetai mo lenei mea mataʻina, o se vavega a Ieova. O se matuā galuega tele lava na faia i se taimi puupuu!”

Na tali mai se tuafafine mai le taulaga o Tsalendjikha na faalogologo i le polokalame i le telefoni: “E lē mafai e upu ona faamatala loʻu olioli ina ua matou mauaina le Tusi Paia atoa. Ou te faafetai tele mo lenei tauaofiaga mataʻina e tolu aso. O se matuā mea uigaese i le talafaasolopito.” Na faapea mai se aiga i se faapotopotoga e i sisifo o Georgia, e tuaoi ma le Sami Uliuli: “E oo mai i le taimi nei, e na o le tasi le Tusi Paia i lo matou aiga, ae o lea ua tofu i matou e toʻafā ma le kopi o le New World Translation. O lea la ua mafai nei ona faia suʻesuʻega a le tagata lava ia i lana Tusi Paia.”

Ae ese mai i lenā, e leʻi sologa lelei ai pea mea uma. Mo se faaaʻoaʻoga, e ui ina sa lomia ma auina atu i le vaa i Georgia le Tusi Paia atoa o le New World Translation, ae na mumusu le ofisa o le Matagaluega a le Tiute e faataga le vaa e sopoʻia le tuaoi o Georgia. Na ave e uso le talosaga i le Ofisa o le Sulufaʻiga. Na loto malie le tamāloa e faamautinoa le tatalaina i tua o Tusi Paia i le taimi tonu o le tauaofiaga itumalo. Na ia auina atu foʻi lana fesoasoani i le tauaofiaga i Marneuli e maua mai ni kopi o le Tusi Paia fou mo lo latou ofisa.

Faafeiloaʻi Māfana i Tū Faa-Georgia

Sa avea le tauaofiaga itumalo i Marneuli o se mea tāua na tupu i Molimau a Ieova i Georgia, ona o se isi foʻi māfuaaga. Sa iai i le polokalame se sui o le Vaega Pule o Molimau a Ieova. Na naunau i latou uma na auai e faafeiloaʻi o ia i la latou faafeiloaʻi māfana faaleaganuu. Na tū le uso o Jackson ma faafeiloaʻi uso ma tuafāfine mo ni itula uumi, a o faagasolo ma ina ua māeʻa le tauaofiaga, ae sa ia fiafia lava e faia faapea.

I tuā i le 1903 i le faaiʻuga o se isi tauaofiaga, na taʻua ai e se uso: “Ou te mativa, peitaʻi, o le a ou lē faafesuiaʻia le tele o aogā ua ou maua mai i lenei tauaofiaga, mo se afe talā.” I le silia i se senituri mulimuli ane ai, o faalogona tonu na o Molimau na auai i tauaofiaga mataʻina na faia i le tau māfanafana i le 2006 i Georgia.

[Faamatalaga pito i lalo]

[Pusa i le itulau 19]

Ua Faatupulaʻia “le Toʻaitiiti”

Ua moni upu o i le Isaia 60:22 i Georgia: “O le toʻaitiiti e fai ma toʻaafe, ma lē ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” I le itiiti ifo i le 20 tausaga, na faatupulaʻia ai le aofaʻi o tagata talaʻi i Georgia mai sina vaega e lē atoa lelei se toʻa 100, ae ua oo atu nei i le pe tusa ma le 16,000. O loo faia e nei tagata talaʻi maelega o le Afioga a le Atua le toetoe lava 8,000 suʻesuʻega faale-Tusi Paia i vaiaso taʻitasi, o se avanoa lelei mo le faatelega atili i Georgia.

[Ata/​Faafanua i le itulau 16]

(Tagaʻi i le lomiga mo le ata atoa)

MALO SOOFAATSI A RUSIA

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsknori

TBILISI

TAKE

ARMENIA

AZERBAIJAN

[Faamatalaga i Ata]

Lalolagi: Faavae mai i le NASA/Ata o le Lalolagi

[Ata i le itulau 16]

Faatagata i Tbilisi

[Ata i le itulau 17]

Na soo faatasi nofoaga e lima i le tauaofiaga i Marneuli e ala i telefoni feaveaʻi

[Ata i le itulau 18]

Na maofa ma le fiafia le ʻauusufono i le tatalaina o le “New World Translation” i le gagana Georgia