Po o E “Mau‘oa i le Atua”?
Po o E “Mauʻoa i le Atua”?
“O loo faapea foʻi lē faaputu ʻoa iā te ia, a e lē mauʻoa i le Atua.”—LUKA 12:21.
1, 2. (a) O le ā le mea ua lotomalilie tagata e fai ai ni taumafaiga fitā? (e) O ā luʻi ma lamatiaga e ao ona fesagaʻia e Kerisiano?
O LE saʻilia o oloa e lē na o se taaloga e fiafia tamaiti e taaalo ai; o se tala moni e tupu pea i le talafaasolopito o tagata mo le tele o tausaga i atunuu taʻitasi. Mo se faataʻitaʻiga, i le 19 senituri na eli ai le auro i eleele o Ausetalia, Aferika i Saute, Kanata, ma le Iunaite Setete o Amerika, lea na lolofi atu ai tagata mai nuu mamao o ē ua lotomalilie e tuua o latou atunuu ma ē pele, ina ia saʻilia ʻoa i atunuu e lē masani ai ma lē talileleia i latou. Ioe, e toʻatele tagata ua lotomalilie e lamatia o latou ola ma faia ni taumafaiga fitā, ina ia maua ʻoa o loo faananau i ai o latou loto.
2 E ui o le toʻatele o tagata i aso nei ua lē o toe saʻilia oloa tāua, ae ua latou galulue malolosi ina ia maua tupe e ola ai. O le faia faapea i lenei vaitaimi o se luʻi, e faigatā, ma o se avega mamafa. E faigofie ona popole i meaʻai, lavalava, ma fale ma iʻu ina tuulafoaʻia pe galo ai mea e sili ona tāua. (Roma 14:17) Na faia e Iesu se tala faatusa e faamatala saʻo ai lea uiga faaletagata. O loo i le Luka 12:16-21.
3. Ia faamatala puupuu mai le tala faatusa a Iesu o loo i le Luka 12:16-21.
3 Na fai e Iesu le tala faatusa i le taimi e tasi na ia fetalai ai i le manaʻomia ona leoleoina mai le matapeʻapeʻa, lea na tatou auʻiliʻiliina i le mataupu ua mavae atu. Ina ua uma le lapataʻiga i le matapeʻapeʻa, na fetalai Iesu e faatatau i se tamāloa mauʻoa ua lē faamalieina i ana fale teu oloa ua tumu i mea lelei ua iā te ia, ae ua ia talepe ia fale ma fausia ni fale e tetelē atu ina ia teu ai nisi mea lelei se tele. Ina ua ia manatu ua sologa lelei ma fiafia i mea lelei ua ia maua, na fetalai atu le Atua iā te ia ua oo mai le iʻuga o lona soifua, a o mea lelei na ia faaputu o le a avatu ma se isi. Ona fetalai atili atu lea o Iesu: “O loo faapea foʻi lē faaputu ʻoa iā te ia, a e lē mauʻoa i le Atua.” (Luka 12:21) O le ā se lesona tatou te aʻoaʻoina mai lenei tala faatusa? E faapefea ona faatatauina le lesona i o tatou olaga?
Se Tamāloa sa Iai Sona Faafitauli
4. O le ā le ituaiga o tamāloa o loo taʻua i le tala faatusa a Iesu?
4 O le tala masani le tala faatusa a Iesu. Na faatomua e Iesu le tala i le fetalai e faapea: “Na matuā fua mai le fanua o se tamāloa mauʻoa.” E leʻi faapea Iesu na maua ʻoa a le tamāloa i ni auala taufaasesē pe lē faatulafonoina. I nisi faaupuga, e lē o ia o se tamāloa leaga. E tusa ai ma le faamatalaga a Iesu, sa galue malosi le tamāloa i le tala faatusa. E mautinoa na faia ni ana fuafuaga ma faaputu ana ʻoa mo le lumanaʻi, atonu na ia mafaufau mo le lelei o lona aiga. O lea i le vaaiga faaletagata, o le tamāloa o se tagata galue malosi o lē na faia ona tiute tauave ma le pulunaunau.
5. O le ā le faafitauli na fesagaʻi ma le tamāloa i le tala faatusa a Iesu?
5 O le mea moni, na taʻua e Iesu le tamāloa i le tala faatusa o le tamāloa mauʻoa, o lona uiga o ia o se tasi ua tele ni mea faitino ua iā te ia. Peitaʻi, e pei ona faamatalaina e Iesu, na iai se faafitauli i le tamāloa mauʻoa. Na fua tele mai lona fanua na i lo le mea na ia faatalitalia, ma tele na i lo mea na te manaʻomia pe mafai ona ia tausia. O le ā sa tatau ona ia faia?
6. O ā filifiliga e fesagaʻia ma le tele o auauna a le Atua i aso nei?
6 E toʻatele auauna a Ieova o loo fesagaʻi ma faafitauli e pei lava o le tamāloa mauʻoa. E taumafai Kerisiano moni e avea i latou ma ni tagata e galulue faamaoni, filigā ma galulue malosi. (Kolose 3:22, 23) E tusa pe faigaluega mo nisi tagata pe fai foʻi a latou lava pisinisi, e masani ona taulau manuia i latou, e oo lava ina matuā matilatila le lelei o mea latou te faia. Ma e fesagaʻi i latou ma se filifiliga, pe a siitia o latou tulaga i galuega po o ni avanoa fou mo pisinisi. Pe latou te talia lea tulaga ma tele ai ni tupe e maua? E faapena foʻi talavou Molimau e lelei o latou tulaga i aʻoaʻoga. O le iʻuga, e ofo atu ni avanoa sikolasipi ina ia faaauau ai aʻoaʻoga i ni iunivesite. Pe latou te mulimuli i ala o le toʻatele o tagata ma talia na ofo?
7. Na faapefea ona foʻia e le tamāloa i le tala faatusa a Iesu lona faafitauli?
7 Pe a tatou toe tagaʻi i le tala faatusa a Iesu, o le ā na faia e le tamāloa mauʻoa ina ua fua tele mai lona fanua ae ua leai se mea e faaputu ai lana seleselega? Na ia manatu e talepe i lalo ana fale teu oloa sa iai ae fausia nisi fale e tetelē atu, e faaputu ai ana fua faasili ma ana mea lelei uma. O lenā fuafuaga e mautinoa sa ia lagona ai le malu puipuia ma le faamalieina ma ia manatu ai iā te ia lava: “Loʻu agaga e, ua iā te oe mea lelei e tele ua teuina mo tausaga e tele; inā nofonofo filemu ia, inā ʻai ia, ma inu ma ia e olioli.”—Luka 12:19.
Aiseā na Taʻua ai o le “Vale”?
8. O le ā le vaega e sili ona tāua e leʻi faaaofia e le tamāloa, e tusa ai i le tala faatusa a Iesu?
8 Peitaʻi, e pei ona fetalai Iesu, o fuafuaga a le tamāloa mauʻoa e na o lagona sesē o le malu puipuia na aumai ai. E foliga mai e manaia tele lea faaiʻuga, peitaʻi e lē o aofia ai le vaega e sili ona tāua—le finagalo o le Atua. Na manatu le tamāloa mo lona lava lelei, ma le auala e gaoioi lemū ai, ʻai, inu, ma olioli i ana ʻoa. Na ia manatu ona ua iā te ia “mea lelei e tele” o le a ‘tele foʻi la tausaga’ e ola ai. Ae pagā lea, e leʻi tino mai mea i le auala na ia mafaufau ai. E pei ona fetalai Iesu, “e lē ola se tasi i le tele o ana mea ua iā te ia.” (Luka 12:15) I lenā lava pō, na leai atoa ai se aogā o mea uma na galue ai le tamāloa, auā na fetalai atu le Atua iā te ia: “O oe na le vale, e aamiina atu lou agaga nai iā te oe i le pō nanei; a e fai ma ai mea ia ua e saunia?”—Luka 12:20.
9. Aiseā na taʻua ai le tamāloa i le tala faatusa o le vale?
9 O le a tatou talanoaina le vaega autū o le tala faatusa a Iesu. Na faaigoa e le Atua le tamāloa o le vale. Ua faamatala i le lomifefiloi o le Exegetical Dictionary of the New Testament le uiga o le vaega o le upu Eleni o loo faaaogā, “e faaalia ai le lē lava o le malamalama.” Ua faapea mai lea lomifefiloi, i lenei tala faatusa, o loo faaalia ai le faaaogāina e le Atua o lea upu e faailoa ai le “lē aogā o fuafuaga mo le lumanaʻi a le tagata mauʻoa.” E lē o faasino atu le upu i se tasi e lē lava le poto, ae o “lē e musu e amanaʻia le tatau ona faalagolago i le Atua.” O le auala na faamatala ai e Iesu le tamāloa mauʻoa, e tatou te manatua ai nisi o ana fetalaiga i Kerisiano o le uluaʻi senituri i le faapotopotoga i Laotikaia, i Aisa Itiiti e faapea: “Ua e fai mai, Ou te se mauʻoa, ua faatamaoaigaina aʻu, ou te lē mativa foʻi i se mea e tasi; a ua e lē iloa o oe o le malaia, ma le pagatia, ma le mativa, ma le tauaso, ma le lē lavalavā.”—Faaaliga 3:17.
10. Aiseā e lē avea ai le mauaina o “mea lelei e tele” ma faamautinoaga o le ola mo le ‘tele o tausaga’?
10 E lelei pe a tatou manatunatu loloto i le lesona ua aʻoaʻoina mai i lea tala. Pe e ono pei i tatou o le tamāloa i le tala faatusa, e galue malosi ia faamautinoa ua maua “mea lelei e tele,” ae lē faia ai mea e tatau ona fai ina ia ola ai mo le ‘tele o tausaga’? (Ioane 3:16; 17:3) Ua faapea mai le Tusi Paia: “E lē aogā le oloa i le aso o le toʻasā,” ma “o lē na te faatuatua i lona oloa, e paʻū lava o ia.” (Faataoto 11:4, 28) O lea na lapataʻi atili atu ai Iesu: “O loo faapea foʻi lē faaputu ʻoa iā te ia, a e lē mauʻoa i le Atua.”—Luka 12:21.
11. Aiseā e lē aogā ai le faamoemoe o se tasi faapea e malu puipuia o ia i mea faitino?
11 Ina ua fetalai Iesu “o loo faapea foʻi,” sa ia faamatilatila ai o le mea na tupu i le tamāloa mauʻoa i le tala faatusa, o le a tupu foʻi iā i latou o ē ati aʻe o latou olaga—o latou faamoemoega ma le malu puipuia—i mea faitino. E lē sesē le ‘faaputu o ʻoa mo se tasi,’ ae o le lē amanaʻia o le manatu, e ao ona “mauʻoa i le Atua.” Na faia foʻi e le soo o Iakopo se lapataʻiga talitutusa ina ua ia tusi: “Faauta mai ia, outou o ē fai ane, ‘O le asō po o taeao tatou te ō atu ai i lea aai, po o le tasi aai, ma nonofo ai i le tausaga e tasi, ma faatau, ma maua ai oloa;’ a e lē iloa e outou se mea e tupu a taeao.” O le ā e tatau ona latou fai? “A e tatau ona outou faapea, ‘A finagalo i ai le Alii, tatou te ola ai, ma tatou faia lea mea ma lea mea.’ ” (Iakopo 4:13-15) E tusa po o le ā le mauʻoa po o le ā foʻi le tele o ni mea faitino a se tasi, e lē aogā uma ia mea pe a lē mauʻoa i le Atua. O le ā la le uiga o le mauʻoa i le Atua?
Ia Mauʻoa i le Atua
12. O le ā tatou te faia ona mauʻoa ai lea i le Atua?
12 I le faamatalaga a Iesu, e iai le eseesega o le mauʻoa i le Atua ma le faaputuina o ʻoa mo se tasi, po o le faateleina o mea faitino a se tasi. Na fetalai Iesu, e lē tatau ona avea le faaputuina o ʻoa faaletino po o le olioli i mea ua tatou maua, ma taulaʻiga o o tatou olaga. Na i lo lea e tatau ona faaaogā a tatou mea faitino ina ia faaleleia, pe faamalosia ai la tatou faiā ma Ieova. O le faia faapea e mautinoa o le a tatou mauʻoa ai i le Atua. Aiseā? Ona e ala mai iā Ieova le tele o faamanuiaga. Ua taʻua i le Tusi Paia: “O le faamanuia a Ieova, o lea e faatamaoaiga ai; na te lē faaopoopo i ai se tigā.”—Faataoto 10:22.
13. E faapefea ona “faatamaoaiga ai” i le faamanuia a Ieova?
13 Pe a faamanuia Ieova i ona tagata, e na te avatu iā i latou le faamanuiaga e silisili ona lelei. (Iakopo 1:17) Mo se faataʻitaʻiga, ina ua avatu e Ieova i tagata Isaraelu le nuu e nonofo ai, o se nuu sa “tafe ai le suāsusu ma le meli.” E ui na faamatalaina foʻi faapena le nuu o Aikupito, ae e iai se vala se tasi na ese ai le nuu lea na avatu e Ieova i tagata Isaraelu. Na faapea atu Mose i tagata Isaraelu: “O le nuu e tausia e Ieova lou Atua.” I nisi faaupuga, e latou te manuia ona o le a tausia e Ieova i latou. Pe a faaauau ona faamaoni tagata Isaraelu iā Ieova, e matuā faamanuia i latou e ia ma soifua ai i se olaga e matuā sili atu i isi uma nuu tuaoi. Ioe, o le faamanuia a Ieova e “faatamaoaiga ai”!—Numera 16:13; Teuteronome 4:5-8; 11:8-15.
14. O le ā ua tofo i ai i latou e mauʻoa i le Atua?
14 O le faaupuga “mauʻoa i le Atua” e mafai foʻi ona faaupuina “mauʻoa i le silafaga a le Atua” (Today’s English Version) po o le “mauʻoa i luma o fofoga o le Atua.” (The New Testament in Modern English, a J. B. Phillips) O i latou e mauʻoa faaletino e masani ona popole i le vaaiga a isi tagata iā i latou. E masani ona atagia mai i le auala latou te ola ai. E latou te mananaʻo e faaofo tagata i mea ua taʻua e le Tusi Paia o “le faalialia o lenei olaga.” (1 Ioane 2:16) O le eseesega, o i latou e mauʻoa i le Atua ua latou maua le faamaoniga, le finagalo malie o le Atua, le tele o lona agalelei ma se faiā māfanafana ma ia. E mautinoa lo latou mauaina o lagona fiafia, faamalieina ma le malu puipuia, i le iai i lea tulaga tāua, e sili atu na i lo mea e mafai ona aumai e mea faitino. (Isaia 40:11) A o le fesili la, O le ā e ao ona tatou faia ina ia mauʻoa ai i le silafaga a le Atua?
Mauʻoa i le Silafaga a le Atua
15. O le ā e tatau ona tatou faia ina ia mauʻoa ai i le Atua?
15 I le tala faatusa a Iesu, na fai fuafuaga a le tamāloa ma galue malosi ina ia tele ana ʻoa, ma sa taʻua ai o ia o le vale. O lea, ina ia mauʻoa i le Atua, e tatau ona tatou galulue malosi ma faia se sao atoatoa i galuega e matuā tāua ma lelei i le silafaga a le Atua. E aofia i ia mea le faatonuga a Iesu: “O lenei, ia outou ō atu e fai nuu uma lava ma soo.” (Mataio 28:19) Ua tai pei o se teuga tupe e faaaogā i le lumanaʻi le faaaogāina o o tatou taimi, malosi, ma tomai e lē mo so tatou lava lelei, ae mo le talaʻia o le Malo ma le galuega o le faia o soo. O i latou ua faia faapea ua latou seleseleina faamanuiaga faaleagaga, e pei ona faaalia i mea na tutupu o loo i palakalafa o sosoo mai.—Faataoto 19:17.
16, 17. Faamatala mai po o ā ni mea na tutupu e faaalia ai le olaga e mauʻoa ai se tasi i le silafaga a le Atua?
16 Seʻi manatu i le tulaga o se tamāloa Kerisiano i se atunuu Asia. Na iai sana galuega totogi lelei lava o se fai komepiuta. Peitaʻi e tele lona taimi na alu i lana galuega ma lagona ai lona mativa faaleagaga. Na iʻu, na i lo lona taumafai e siitia lona tulaga i le galuega, na ia faamavae ma amata sana pisinisi e fai ma faatau ai aisakulimi i le alatele, ina ia maua ai le taimi e tausia ai ona manaʻoga faaleagaga ma tiute tauave. Na aamu ē sa latou faigaluega faatasi iā te ia, ae o ā aogā mo ia? Na ia faapea mai: “O le mea moni ua tele atu aʻu tupe na i lo le taimi na ou faigaluega ai i komepiuta. Ua matuā faafiafiaina aʻu ona ua lē toe oo iā te aʻu le popole lea sa iai a o oʻu iai i laʻu galuega muamua. Ae sili ona tāua, ua ou lagona le latalata iā Ieova.” O le suiga na mafai ai e lea Kerisiano ona galue i le auaunaga faataimi atoa, ma o loo auauna nei i le ofisa o le lālā a Molimau a Ieova i lona atunuu. Ioe, o le faamanuia a Ieova e matuā “faatamaoaiga ai.”
17 O le isi faaaʻoaʻoga o se fafine na ola aʻe i se aiga e matuā faatāuaina aʻoaʻoga. Na aʻoga o ia i iunivesite i Falani, Mekisikō, ma Suisilani ma na telē se avanoa lelei e faigaluega ai. Na ia faapea mai: “Sa ou taulau manuia; sa faaaloalogia aʻu ma ou maua avanoa taualoa, ae i totonu o loʻu loto, na peiseaʻī e gaogao ma leai soʻu fiafia, sa matuā leai soʻu faamalieina.” Ona ia aʻoaʻo lea e faatatau iā Ieova. Na ia faapea mai: “A o oʻu agaʻigaʻi i luma faaleagaga, o oʻu faanaunauga e faafiafia Ieova ma toe faafoʻi se mea itiiti o mea ua ia foaʻi mai iā te aʻu, na fesoasoani lenā e filifilia ai le ala ou te savali ai ma auauna iā te ia i le auaunaga faataimi atoa.” Na ia faamavae mai lana galuega ma e leʻi umi ae papatiso. Ua silia ma le 20 tausaga, o ia auauna ma le fiafia i le auaunaga faataimi atoa. Sa ia faamatala: “O nisi e manatu ua maʻimau laʻu taleni, peitaʻi latou te mātauina loʻu fiafia, ma latou te amanaʻia taʻiala o loo oʻu ola ai. O aso uma ou te tatalo ai iā Ieova e foaʻi mai iā te aʻu le loto maulalo ina ia ou maua ai lona finagalo malie.”
18. E faapefea ona tatou mauʻoa i le Atua e faapei o Paulo?
18 O Saulo, o lē na avea ma aposetolo o Paulo, na matuā lelei se galuega sa tatau ona ia maua. Ae na ia tusi: “E moni lava, o loʻu manatu ua lē aogā mea uma lava ona o le silisili ese o le poto i la Keriso Iesu loʻu Alii.” (Filipi 3:7, 8) Iā Paulo, o ʻoa na ia maua mai iā Iesu e sili atu na i lo se isi lava mea e mafai ona maua mai i le lalolagi. E tatou te maua foʻi se olaga fiafia e mauʻoa i le silafaga a le Atua, pe a tuua so o se mea po o sini manatu faapito, ae saʻili se olaga amio Atua. Ua faamautinoa mai e le Afioga a le Atua iā i tatou: “O le taui o le faamaulalo ma le mataʻu iā Ieova, o le oloa lea, ma le viiga, ma le ola.”—Faataoto 22:4.
Pe Mafai Ona E Faamatala?
• O le ā le faafitauli na iai o le tamāloa lea na taʻua i le tala faatusa a Iesu?
• Aiseā na taʻua ai le tamāloa i le tala faatusa o le vale?
• O le ā le uiga o le mauʻoa i le Atua?
• E faapefea ona tatou mauʻoa i le Atua?
[Fesili mo le Suʻesuʻega]
[Ata i le itulau 26]
Aiseā na taʻua ai le tamāloa mauʻoa o le vale?
[Ata i le itulau 27]
E faapefea ona avea avanoa e siitia ai tulaga i galuega o se tofotofoga?
[Ata i le itulau 28, 29]
“O le faamanuia a Ieova—e faatamaoaiga ai”