Po o Silasila Mai le Atua iā te Oe?

PE MAFAI ea e Ieova, le Mataisili o le foafoaga, ona silasila mai? O le mea moni lenā! Ua taʻu manino mai e le Tusi Paia le māfuaaga: “O lē na faia le mata, e lē silasila atu ea o ia?” (Salamo 94:9) E matuā mamao ma ati le silasila a Ieova na i lo le vaai a le tagata. E lē gata na te silafia mai o tatou foliga atu i fafo, ae na te iloiloina pe “tofotofoina loto,” ma e mafai foʻi ona ia “fuatia loto.” (Faataoto 17:3; 21:2) Ioe, ua iā te ia le tomai e iloilo ai o tatou mafaufauga, uunaʻiga o a tatou gaoioiga, ma o tatou manaʻoga lilo.

E silafia mai e Ieova toʻatugā tatou te ono fetaiaʻi i le olaga, ma e tali mai o ia i a tatou ōlega. Na tusi le faisalamo: “O fofoga o Ieova o loo faasaga i ē amiotonu, e liliu mai foʻi ona taliga i a latou alaga. Ua latalata mai Ieova i ē ua loto momomo; ua ia faaola foʻi i ē ua loto nutimomoia.” (Salamo 34:15, 18) Maʻeu se faamāfanafanaloto o le iloa, e malamalama mai Ieova i o tatou tulaga, ma tali mai i a tatou faatoga faamaoni!

E silafia mai e Ieova le Atua, so o se mea e fai, e tusa lava pe faia faalilolilo. Ioe, “ua aliali mai o mea uma lava i lana silafaga, tatou te taʻu atu iā te ia a tatou amio.” (Eperu 4:13) Pe lelei pe leaga a tatou gaoioiga, ae o loo silafia uma mai lava e le Atua. (Faataoto 15:3) O se faataʻitaʻiga, i le Kenese 6:8, 9 o loo taʻua ai e faapea, “a o Noa, ua alofagia o ia e Ieova,” ma sa la ‘feooaʻi ma le Atua.’ Ioe, sa fiafia ma faamanuia Ieova iā Noa, auā sa usiusitai Noa ma lagolagosua i taʻiala amiotonu a le Atua. (Kenese 6:22) Na ese mai ai la tagata i aso o Noa, sa sauā ma amioleaga. Sa leʻi lilo i le silasila a le Atua na mea. “Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.” Na iʻu lava ina faaumatia e Ieova na tagata amioleaga, ae faasaoina Noa ma lona aiga.—Kenese 6:5; 7:23.

Po o le a faamalieina ea le silasila mai a Ieova iā te oe? E mautinoa o fofoga o Ieova “e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9) Ua toe nei o se aga, ona ia toe tafiesea lea mai le lalolagi tagata uma amioleaga, ae faasaoina o ē agamalu.—Salamo 37:10, 11.