‘Ieova e, ia e Tofotofo Mai iā te Aʻu’

“O IEOVA, na te tofotofoina [suʻesuʻeina] loto.” (Faataoto 17:3) Maʻeu se faamāfanafanaina ai o i tatou i na upu. Aiseā? Auā foʻi e lē taitai tutusa lo tatou Tamā o i le lagi, ma tagata. O tagata e fua a latou faaiʻuga i tulaga o mea o loo vaai atu i ai, peitaʻi o lo tatou Tamā o i le lagi, e ‘vaai o ia i le loto.’—1 Samuelu 16:7.

O le mea moni, e lē mafai foʻi e i tatou lava ia, ona faia se faaiʻuga e sili ona lelei e tusa ai o uunaʻiga ma faanaunauga o o tatou loto. Aiseā? Talu ai e ‘sili ona faaʻoleʻole o tatou loto i mea uma, ma ua matuā leaga lava; po o ai sē na te mafaia ona iloa?’ E mautinoa o loo silafia mai e le Atua, auā na ia folafola: “O aʻu o Ieova o lē suʻesuʻe i le loto, o lē tofotofo i manatu.” (Ieremia 17:9, 10) Ioe, e silafia e Ieova le “loto,” e aofia ai ma o tatou uunaʻiga mai totonu, ma o tatou “manatu,” o tatou manatunatuga ma faalogona loloto.

Aiseā e Tofotofo ai Kerisiano?

E lētioa a faapea atu le tupu o Tavita i le Atua: “Ieova e, ia e suʻesuʻe iā te aʻu, ma tofotofo iā te aʻu; ia e faamamā i oʻu manatu ma loʻu loto.” (Salamo 26:2) Pe na saʻo uma Tavita i ana gaoioiga ma upu, o le a lē fefe ai pe a tofotofo e Ieova? E leai! E tutusa Tavita ma i tatou, e lē lelei atoatoa toe lē mafai ona piiama i tapulaa a le Atua i taimi uma. Ona o ona vaivaiga, sa faia e Tavita ni mea sesē matuiā, ae sa ia ‘savali ma le loto saʻo.’ (1 Tupu 9:4) E faapefea? E ala i le talia o aʻoaʻiga ma le faasaʻoina o ona ala. Sa atagia ai lona alofa moni iā Ieova. Sa atoa lona tuutoina i le Atua.

Ae faapefea i tatou i aso nei? E silafia e Ieova e tatou te lē lelei atoatoa, ma e tatou te ono agasala i upu ma gaoioiga. Peitaʻi, na te lē filifilia le auala tatou te ola ai e ala i le faaaogāina o lona tomai e silafia ai mea i le lumanaʻi. Na ia faia i tatou ma le tomai e filifili ai, ma na te faaaloalogia la tatou filifiliga saʻoloto, o se meaalofa na ia tuuina mai ma lona finagalo malie.

I nisi taimi e mafai ona faapea atu e tofotofo e Ieova o tatou tagata i totonu e aofia ai ma o tatou faanaunauga. Atonu na te faia lenei mea i le tuu avanoa mai e faaalia ai le tulaga o o tatou loto. Na te ono lē taofia foʻi ni mea tutupu po o ni faafitauli e faaalia ai o tatou uunaʻiga moni. O avanoa faapea tatou te faaalia ai lo tatou tuutoina ma le faamaoni. O nei tofotofoga e lē o taofia e Ieova e ono iloa ai le tulaga o lo tatou faatuatua, ina ia “atoatoa ai ma ia sao ona lelei ai outou, ia leai se mea e tasi e mativa ai.”—Iakopo 1:2-4.

Tofotofoina o le Faatuatua Anamua

E lē o se mea fou le tofotofoina o le faatuatua ma uunaʻiga e fai ai mea e auauna a Ieova. Seʻi manatu foʻi i le augātamā o Aperaamo. “Ona tofotofo lea o le Atua iā Aperaamo.” (Kenese 22:1) I le sili atu i le sefulu tausaga muamua atu na fetalai ai le Atua iā Aperaamo ma lona aiga e tuua Uro o se aai tamaoaiga, ae ō atu i se nuu e lē iloa po o fea e i ai. (Kenese 11:31; Galuega 7:2-4) Atonu na iai se fale o Aperaamo i Uro, ae leʻi iai sona fale mautū i Kanana i le mea ua faitau sefulu tausaga o aumau ai. (Eperu 11:9) Ona o le lē mautū o Aperaamo na lamatia ai o ia ma lona aiga mai i oge, o tagata e faaauupegaina, ma taʻitaʻi faapaupau  o lenā vaipanoa. E ui i nei mea uma, ae na malosi pea le faatuatua o Aperaamo.

Ona aumai lea e Ieova o se tofotofoga faigatā iā Aperaamo. “Ia e ave lou atalii, o lou atalii e toʻatasi, o lē ua pele iā te oe, o Isaako lava, ma . . . avatu iā te ia e fai ma taulaga mū.” (Kenese 22:2) Sa matuā alofa faapelepele Aperaamo i lona atalii o Isaako. Na o le pau lea o le atalii o Aperaamo iā Sara. O Isaako o le atalii na folafola mai, ma na o le pau lea o le faamoemoe o Aperaamo mo sana “fanau” e fai mo latou tofi le nuu o Kanana, ma avea ma faamanuiaga mo le toʻatele, e tusa ai ma folafolaga a le Atua. E lē gata i lea, o Isaako o le atalii lea na faatalitalia e Aperaamo ma na fanau mai e ala i se vavega mai le Atua!—Kenese 15:2-4, 7.

E mautinoa lava sa faigatā iā Aperaamo ona malamalama i lenei faatonuga. Pe na manaʻomia e Ieova se taulaga e fai atu i se tagata? Aiseā na faapogaia ai e Ieova le olioli o Aperaamo i le maua o se atalii a ua afu lona soifua, ae mulimuli ane toe manaʻomia lona atalii e fai ai le taulaga? *

E ui e leʻi maua ni tali maumaututū i nei fesili, ae sa usitai pea Aperaamo. E tolu aso na malaga ai i le mauga na filifilia. O inā na ia fausia ai se fata faitaulaga ma tuu ai fafie i luga, ma oo ai loa i le tumutumuga o le tofotofoga. Ua tago Aperaamo i le naifi, ae i le taimi lava o le a ia fasiotia ai lona atalii, na taofia e Ieova o ia e ala i se agelu ma faapea atu: “Ua ou iloa nei ua e mataʻu i le Atua, ina ua e lē taofia lou atalii, o lou atalii e toʻatasi, a ua e tuu mai iā te aʻu.” (Kenese 22:3, 11, 12) Seʻi manatu i le telē o le taui mo Aperaamo ina ua ia faalogo i ia upu! Na iloa e Ieova le ituaiga o faatuatua na iā Aperaamo. (Kenese 15:5, 6) Ona faaaogā lea e Aperaamo o se mamoe poʻa e fai ai le taulaga, na i lo o Isaako. Ona toe faamautinoa lea e Ieova le feagaiga ma Aperaamo mo se fanau folafolaina. O le mea mautinoa, na avea  Aperaamo ma uō a Ieova.—Kenese 22:13-18; Iakopo 2:21-23.

E Tofotofoina Foʻi lo Tatou Faatuatua

Ua tatou iloa e oo tofotofoga i auauna uma a le Atua. Peitaʻi mo i tatou, atonu o le tele o tofotofoga e sau mai mea e faataga e Ieova ona tutupu, na i lo mea na te faatonuina i tatou e fai.

Na faapea mai le aposetolo o Paulo: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12) O nei sauāga e ono oo mai ona o aumea i aʻoga, uō, tauaiga, tuaoi, po o pulega a le malo na faasesēina i ni faamatalaga. E ono aofia ai upu masoā ma le faaoolima, ma le faafaigatā mo Kerisiano ona maua ni galuega e tausi ai aiga. E aafia foʻi Kerisiano moni i faafitauli o loo taatele e pei o le maʻi, faanoanoa, ma faiga lē tonu. O nei tofotofoga uma e tofotofoina ai le faatuatua o se tasi.

Na faauaʻi e le aposetolo o Peteru manatu i le aogā o le tofotofoina o le faatuatua o se tasi: “E ui lava ona faanoanoa o outou i nai aso nei, i tofotofoga eseese. O le tofotofo foʻi o lo outou faatuatua, e silisili ona aogā i le auro e faaumatia, e ui lava ina tofotofoina i le afi, e avea ma mea e iʻu ai i le viiga, ma le mamalu, ma le manuia pe a faaalia mai Iesu Keriso.” (1 Peteru 1:6, 7) Ioe, o aafiaga o tofotofoga o loo faatusa i le faamamāina o le auro i le afi. E aliali mai mea moni pe a faamamāina ae aveesea otaota po o mea lē moni. E faapena foʻi lo tatou faatuatua pe a fesagaʻi ma tofotofoga.

Mo se faaaʻoaʻoga, o se faalavelave faafuaseʻi po o se mala faalenatura e ono oo ai i faigatā. Ae e lē avea lenā ma mea e lolo ai i popolega i latou e moni le faatuatua. Latou te maua faamāfanafanaga i faamautinoaga a Ieova: “Ou te lē tuua lava oe, ou te lē tuulafoaʻi lava iā te oe.” (Eperu 13:5) E faaauau ona latou faamuamua mea faaleagaga, ona o le mautinoa e faamanuia e Ieova a latou taumafaiga, ma na te tausia o latou manaʻoga. Latou te tumau ona o lo latou faatuatua a o fesagaʻia faigatā, ma e taofia ai le faafaigatā o tulaga o mea i le soona popole.

Ona e ono faaalia mai e tofotofoga ni vaivaiga i lo tatou faatuatua, e aogā la pe a tatou faaaogā lenā avanoa e faasaʻo ai. E fesili ifo le tagata iā te ia lava: ‘E faapefea ona faamalosia loʻu faatuatua? Pe tatau ona faaalu le tele o le taimi i le tatalo ma le mafaufau loloto i le Tusi Paia? Po o oʻu faaaogā tatau ia faatulagaga e auai faatasi ma uso talitonu i sauniga? Po o oʻu faalagolago iā te aʻu lava, na i lo le tuu atu o oʻu popolega iā Ieova le Atua e ala i le tatalo?’ Peitaʻi, o nei iloiloga totino ua na o se amataga.

I le faamalosia o le faatuatua o se tasi, atonu e manaʻomia ona faaleleia le manaʻo i mea faaleagaga, ma ia “naunau outou i le suāsusu faaleagaga e lē suia.” (1 Peteru 2:2; Eperu 5:12-14) E tatau ona tatou pei o le tagata na faamatalaina e le faisalamo: “Ae naunau o ia i le tulafono a Ieova; e mafaufau foʻi o ia i lana tulafono i le ao atoa ma le po.”—Salamo 1:2.

E sili atu mea e manaʻomia i le faia o lenei mea na i lo le tau ina faitau le Tusi Paia. E tāua lo tatou mafaufau po o le ā le mea o loo fai mai ai le Tusi Paia iā i tatou, ma faatatau aʻoaʻiga o loo maua ai. (Iakopo 1:22-25) O le iʻuga, o le a tupu aʻe lo tatou alofa mo le Atua, o le a patino a tatou tatalo, ma faamalosia atili lo tatou faatuatua mo ia.

 Le Aogā o se Faatuatua ua Tofotofoina

O le iloaina e matuā tāua ona iai le faatuatua ona tatou maua lea o le finagalo malie o le Atua, o se māfuaaga tatau lea e faamalosia ai. O loo timaʻi mai le Tusi Paia: “A leai foʻi se faatuatua e lē mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia. (Eperu 11:6) O lea la, e tatau ona tatou pei o le tamāloa na ʻaiʻoi atu iā Iesu: “Ia e fesoasoani i loʻu lē faatuatua!”—Mareko 9:24.

E mafai foʻi i le tofotofoina o lo tatou faatuatua ona fesoasoani i isi. Mo se faataʻitaʻiga, pe a maliu sē e pele i se Kerisiano, o le a faatumauina o ia ona o lona faatuatua malosi i folafolaga a le Atua i le toetū. E faanoanoa, ae lē “faanoanoa, pei o isi e leai so latou faamoemoe.” (1 Tesalonia 4:13, 14) E mātauina e isi le malosi o le tutumau o le faatuatua o se Kerisiano, ma latou te talisapaia le tāua o lenei mea. Atonu e pāʻia ai o latou loto ma iai se faanaunauga e maua se faatuatua faapena, ma uunaʻia i latou e suʻesuʻe le Tusi Paia ma avea ma soo o Iesu Keriso.

E silafia e Ieova le tāua o se faatuatua ua tofotofoina. E lē gata i lea, o le tofotofoina o lo tatou faatuatua, o le a mafai ai ona tatou iloa po o lava le malosi o lo tatou faatuatua e tutumau ai. O loo maua fesoasoani e iloa ai vaivaiga i lo tatou faatuatua, ma faigofie ai ona faasaʻo lea tulaga. O le mea mulimuli, o lo tatou manumalo i tofotofoga, atonu o le a fesoasoani i isi e avea ma soo o Iesu. Ia faia mea uma e faatumau ai le malosi o lo tatou faatuatua—le faatuatua lea ua fesagaʻi ma tofotofoga “e avea ma mea e iʻu ai i le viiga, ma le mamalu, ma le manuia pe a faaalia mai Iesu Keriso.”—1 Peteru 1:7.

[Faaopoopoga i lalo]

[Ata i le itulau 13]

O galuega o le faatuatua o Aperaamo na avea ai o ia ma uō a Ieova

[Ata i le itulau 15]

E mafai e tofotofoga ona faamaonia ai ua i lo tatou faatuatua le malosi e tumau ai

[Ē Ana le Ata i le itulau 12]

Mai le Illustrated Edition of the Holy Scriptures, tusia e Cassell, Petter, & Galpin