Tatou te Maua Aogā i le Onosa‘ia o Mafatiaga
Tatou te Maua Aogā i le Onosaʻia o Mafatiaga
“Ua tatou taʻuamuia i ē onosaʻi.”—IAKOPO 5:11.
1, 2. O le ā e faaalia ai e leʻi finagalo Ieova e mafatia tagata?
E LEAI se tagata e manaʻo e mafatia; e leʻi finagalo foʻi Lē na Faia i tatou o Ieova le Atua, e mafatia tagata. E tatou te iloa lenei mea pe a iloilo lana Afioga, ma mātau le mea na tupu ina ua uma ona ia faia le tamāloa ma le fafine. Muamua, na faia e le Atua le tamāloa. “Ona faia lea e Ieova le Atua o le tagata i le efuefu o le eleele, ma ua mānava i ona pogaʻiisu o le mānava ola; ona avea ai lea o le tagata ma tagata ola.” (Kenese 2:7) Na lelei atoatoa Atamu i le tino ma le mafaufau, sa lē tatau ona maʻi pe oti.
2 Ae faapefea le tausiga o Atamu? “Ua faia foʻi e Ieova le Atua o le faatoʻaga i Etena i sasaʻe; ona ia tuuina lea i lea mea o le tagata na na faia. Ua faatutupuina foʻi e Ieova le Atua i le fanua o laau uma e matagofie i le vaai, e lelei foʻi pe a ʻaina.” (Kenese 2:8, 9) Ioe, e matagofie le aiga o Atamu. Sa leai ni mafatiaga i Etena.
3. O ā faamoemoega na iai i le uluaʻi ulugalii?
3 Ua taʻu mai iā i tatou e le Kenese 2:18: “Ua fetalai mai foʻi Ieova le Atua, E lē lelei ina toʻatasi o le tagata; ou te faia sona fesoasoani e tatau ma ia.” Na faia e Ieova se avā lelei atoatoa mo Atamu ina ia taulau ai le faamoemoe o le olaga fiafia i le aiga. (Kenese 2:21-23) Ua faailoa atili mai i le Tusi Paia: “Ua faamanuia foʻi e le Atua iā te i laʻua, ma ua fetalai atu le Atua iā te i laʻua, Ia fanafanau ia, ma ia uluola, ma ia tumu ai le lalolagi, ia faatoʻilalo i ai.” (Kenese 1:28) Na iai i le ulugalii le faaeaga matagofie e faalautele le Parataiso o Etena seʻia aofia ai le lalolagi atoa. Sa ao foʻi ona la fanauina mai ni fanau e lē oo i ai ni mafatiaga. Maʻeu se amataga inā matagofie!—Kenese 1:31.
Amata Mafatiaga
4. E tusa ai ma mea ua tutupu i le talafaasolopito, o le ā ua manino mai e uiga i tagata?
4 Peitaʻi, pe a tatou mātau le tulaga ua iai tagata i le gasologa mai o senituri, e manino mai ai sa iai se mea na matuā faalētonu. Ua tutupu mea leaga ma ua matuā mafatia tagata. I le gasologa o senituri, ua mamaʻi ē uma na tupuga mai iā Atamu ma Eva, ua ola matutua ma feoti. E lē o taitai avea le lalolagi ma parataiso e faatumulia i tagata fiafia. Ua saʻo ona faamatala i le Roma 8:22 le tulaga tonu ua iai: “Ua oi faatasi, ma oono faatasi mea uma lava na faia, ua oo mai lava i ona pō nei.”
5. Na faapefea ona aafia o tatou uluaʻi mātua i le faaooina mai o mafatiaga i tagata?
5 E lē tuuaʻia Ieova i le tele o mafatiaga ia ua loa ona iai. (2 Samuelu 22:31) E iai foʻi le vaega e tuuaʻia ai tagata. “Ua leaga lava i latou; ua inosia a latou amioga.” (Salamo 14:1) Na tuuina atu i o tatou uluaʻi mātua mea lelei uma i le amataga. Na pau le mea na manaʻomia e faaauau ai le lelei, o le usiusitai i le Atua, peitaʻi na filifili Atamu ma Eva e faaesea mai iā Ieova. Talu ai ua teena e o tatou uluaʻi mātua Ieova, na la lē toe lelei atoatoa ai loa. Na faasolo ina leaga lo la tulaga ma feoti ai. Ua tuufaasolo mai ai le lē lelei atoatoa iā i tatou.—Kenese 3:17-19; Roma 5:12.
6. O le ā le vaega na faia e Satani i le faapogaia o mafatiaga?
6 Na aofia ai foʻi i le amataga o mafatiaga le agelu leaga, o lē ua taʻua o Satani le Tiapolo. Na tuuina atu iā te ia le filifiliga saʻoloto. Na ia faaaogā sesē lenā filifiliga i le taumafai e maua ai le tapuaʻiga. E na o Ieova e ao ona tapuaʻia, ae lē o ana foafoaga. Na faaosooso e Satani ia Atamu ma Eva ina ia tū ese mai iā Ieova, o le a ‘pei ai i laʻua o ni atua o loo iloa le lelei ma le leaga.’—Kenese 3:5.
E na o Ieova e Iai le Aiā e Pule Ai
7. O le ā ua faaalia mai i iʻuga o le fouvale iā Ieova?
7 O iʻuga leaga o le fouvalega, ua faaalia ai e na o Ieova le Pule Silisili Ese i le aoao o mea, e iai le aiā e pule ai, e na o lana pule foʻi e amiotonu. O le faitau afe o tausaga ua mavae ua faaalia ai, na faatū e Satani o lē ua avea ma “alii o lenei lalolagi,” se pulega leaga, e lē tonu, ma sauā lea e matuā lē faamalieina ai. (Ioane 12:31) O pulega leaga ua loa ona iai a tagata ia e taʻitaʻia e Satani, ua faaalia ai foʻi le leai o so latou tomai e pule ai ma le amiotonu. (Ieremia 10:23) O pulega uma la e ese mai iā Ieova, e mautinoa e lē taulau. Ua faamaonia le moni o lenei tulaga i le talafaasolopito o tagata.
8. O le ā le finagalo o Ieova e faatatau i ituaiga pulega uma a tagata, ma e faataunuu faapefea?
8 Ua faitau afe tausaga o faataga e Ieova tagata e fai a latou pulega lea e tū ese mai iā te ia, ua amiotonu la ona ia tafiesea nei pulega mai le lalolagi, ae suia i lana pulega. Ua taʻua i se valoaga e faatatau i lea Malo: “O ona pō o ia tupu [pulega a tagata] e faatūina ai e le Atua o le lagi o le malo [lona malo i le lagi i aao o Keriso] e lē faaumatia e faavavau; . . . na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) O le a lē toe iai pulega a temoni ma tagata, o le a na o le Malo o le Atua i le lagi o le a iai ma pulea le lalolagi. O le a avea Keriso ma Tupu, ma o le a latou pule faatasi ma le 144,000, o tagata faamaoni na avatu mai le lalolagi.—Faaaliga 14:1.
Aogā Mai Mafatiaga
9, 10. Na faapefea ona maua e Iesu aogā ona o mea na ia mafatia ai?
9 O se mea lelei le iloilo o agavaa o ē o le a pule i le Malo i le lagi. Muamua, na faaalia e Iesu Keriso le matuā agavaa mo lona tofiga o se Tupu. Mo se taimi umi e lē mailoa, sa faatasi ai Iesu ma Ieova i le faia o le finagalo o lona Tamā i le avea ai o Lana “tufuga.” (Faataoto 8:22-31) Ina ua faatulaga e Ieova o ia e afio mai i le lalolagi, sa malie Iesu e faia faapea. A o i le lalolagi, na ia uaʻi atu i le taʻuina i isi o mea e uiga i le pule silisili ese a Ieova ma le Malo. Na faataatia e Iesu se faaaʻoaʻoga mo i tatou uma e ala i le gauaʻi atoatoa i lenā pule silisili ese.—Mataio 4:17; 6:9.
10 Na mafatia Iesu i puapuaga ma iʻu ai ina fasiotia o ia. I le taimi o lana faiva, na mafai ona ia mātauina tulaga faanoanoa o tagata. Pe na aogā iā te ia le silafia o na tulaga atoa foʻi ma ona mafatiaga? Ioe. Ua taʻua i le Eperu 5:8: “E ui lava o ia o le Alo, a o mea sa tigā ai o ia na aʻoaʻoina ai o ia ia usiusitai.” O mea na tutupu iā Iesu a o i le lalolagi, na atili ai ona ia malamalama ma alofa mutimutivale. Na oo iā te ia le tulaga moni o loo mafatia ai tagata. Na ia tigā alofa ma ē na mafatia, ma silafia lelei ai lana matafaioi i le afio mai e laveaʻi tagata. Mātau le auala na faamatilatila ai e Paulo lenei manatu i le Eperu: “Ua tatau ai ina ia avea o ia ia faapei o ona uso i mea uma lava, ina ia faia o ia ma ositaulaga sili e alofa ma faamaoni i mea a le Atua, ina ia faia e ia se togiola mo agasala a le nuu. Auā na tigāina o ia ina o faaosoosoina, o le mea lea ua mafai ai o ia ona fesoasoani i ē ua faaosoosoina.” “E lē iā te i tatou se ositaulaga sili e lē mafaia ona tigā alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala iā te ia. O le mea lea ia tatou faalatalata atu ai ma le loto tele i le nofoālii o le alofa tunoa, ina ia alofaina ai o i tatou, ia maua ai foʻi le alofa tunoa e fesoasoani mai i ona aso e tatau ai.”—Eperu 2:17, 18; 4:14-16; Mataio 9:36; 11:28-30.
11. O le a faapefea ona aogā i ē o le a avea ma tupu ma ositaulaga i le lumanaʻi, mea na tutupu iā i latou a o iai i le lalolagi?
11 E faapena foʻi le 144,000 o ē na “faatauina nai” le lalolagi e avea ma tupu faatasi ma Keriso Iesu i le Malo i le lagi. (Faaaliga 14:4) Na latou fananau uma mai le lalolagi o ni tagata, soifua i se lalolagi tumu i mafatiaga ma oo foʻi iā i latou puapuaga. E toʻatele na sauāina ma o nisi na fasiotia ona o le tausisia o lo latou faamaoni iā Ieova, ma lotomalilie e mulimuli iā Iesu. Ae latou te ‘leʻi mamā i le molimau i lo tatou Alii, a ua tigā faatasi ona o le tala lelei.’ (2 Timoteo 1:8) O mea na tutupu iā i latou a o i le lalolagi, ua agavaa ai e faamasino tagata mai le lagi. Ua aʻoaʻoina i latou ia sili atu ona alolofa, agalelei, ma ia naunau e fesoasoani i tagata.—Faaaliga 5:10; 14:2-5; 20:6.
Fiafiaga o Ē e Faamoemoe e Ola i le Lalolagi
12, 13. E faapefea ona aogā mafatiaga i ē e faamoemoe e ola i le lalolagi?
12 Pe iai ni aogā o mafatiaga ua iai nei i ē o loo faamoemoe e ola e faavavau i se lalolagi parataiso o le a leai ni maʻi, faanoanoa, ma le oti? O tigā ma faanoanoaga ona o mafatiaga, e mautinoa e lē o ni mea ia e manaʻomia. Ae pe a onosaʻia na mafatiaga, o le a faaleleia ai o tatou uiga ma maua ai le fiafia.
13 Mātau le mea ua taʻua i le Afioga a le Atua: “Afai e tigāina outou ona o le amiotonu, amuia outou.” “Afai e upuleagaina outou ona o le suafa o Keriso, amuia outou.” (1 Peteru 3:14; 4:14) “Amuia outou pe a latou upu leaga, ma faasauā iā te outou ma latou tuuaʻiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele.” (Mataio 5:11, 12) “Amuia le tagata o lē onosaʻi i le faaosoosoga; auā a uma ona tofotofoina e maua e ia le pale o le ola.”—Iakopo 1:12.
14. Aiseā e fiafia ai tagata tapuaʻi o Ieova ona o mafatiaga?
14 E mautinoa e lē o mafatiaga ia e tatou te onosaʻia e maua ai lo tatou fiafia. O le fiafia ma le faamalieina, e maua mai i le iloa ua tatou mafatia ona o loo tatou faia le finagalo o Ieova ma mulimuli i le faaaʻoaʻoga a Iesu. O se faaaʻoaʻoga i le uluaʻi senituri, na falepuipui nisi o le ʻauaposetolo ma ave i le faamasinoga maualuga a Iutaia ma taʻuleagaina, ona o le talaʻi e uiga iā Iesu Keriso. Na sasaina i latou ma toe faasaʻoloto. Na faapefea ona latou tali atu? Ua taʻua i le Tusi Paia, ona “ō lea o i latou nai luma o le fono, ua olioli ina ua taʻuaogāina i latou ia faaleagaina ona o lona suafa.” (Galuega 5:17-41) Na latou fiafia ona e lē o le sasaina o i latou ma tigā na faapogaia ai, ae ona sa latou malamalama, ua māfua na mea ona o le tausisia o lo latou faamaoni iā Ieova, ma le mulimuli i tulaga aao o Iesu.—Galuega 16:25; 2 Korinito 12:10; 1 Peteru 4:13.
15. E faapefea ona aogā iā i tatou i le lumanaʻi le onosaʻia o puapuaga i le taimi nei?
15 Afai tatou te onosaʻia teteega ma sauāga i se vaaiga saʻo, e tatou te onosaʻi ai. E fesoasoani iā i tatou e onosaʻia ai puapuaga i le lumanaʻi. Fai mai Iakopo: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosaʻi.” (Iakopo 1:2, 3) Ua faapena foʻi ona faailoa mai e le Roma 5:3-5 iā i tatou: “Ua tatou mitamita foʻi i puapuaga, ina ua tatou iloa o le puapuaga e tupu ai le onosaʻi, o le onosaʻi e tupu ai le mautinoa, o le mautinoa e tupu ai le faamoemoe; o le faamoemoe foʻi e lē mā ai.” O le tele la e tatou te onosaʻia ai tofotofoga i le taimi nei ona o lo tatou tulaga o ni Kerisiano, o le atili faaauupegaina foʻi lenā o i tatou e onosaʻia nisi tofotofoga i lenei lalolagi amio leaga.
O le a Tauia e Ieova
16. O le ā e faia e Ieova i ē o le a avea ma tupu ma ositaulaga i le lumanaʻi, o ē e tauia ona o o latou mafatiaga?
16 E tusa pe leiloloa ai a tatou mea faitino ona o teteega po o sauāga o loo tatou mafatia ai ona o le piiama i le ala faa-Kerisiano, ae e faamalieina i tatou i le iloa o le a matuā tauia i tatou e Ieova. O se faaaʻoaʻoga, na tusi Paulo i nisi na iai le faamoemoe e ō i le lagi: “Na outou . . . onosaʻi i le vetega o a outou oloa ma le olioli, ina ua iloa e outou ua iā te outou le oloa e sili ona lelei ma le tumau,” i le avea ai o ni tupu i le Malo o le Atua. (Eperu 10:34) Seʻi mafaufau foʻi i lo latou olioli o le a iai pe a faia so latou sao i lalo o le taʻitaʻiga a Ieova ma Keriso, e aumaia faamanuiaga ofoofogia i ē e ʻaināina le lalolagi fou. Ua moni ai upu a Paulo i Kerisiano faamaoni: “O loʻu manatu e lē tatau ona faatusaina le tigā i nei ona pō ma le manuia atalī e faaalia mai iā te i tatou.”—Roma 8:18.
17. O le ā e faia e Ieova mo ē o loo auauna faamaoni iā te ia ma o loo faamoemoe e ola i le lalolagi?
17 I se tulaga tutusa, po o ā foʻi ni mea ua toesea po o ni mea ua lotomalilie i latou o loo faamoemoe e ola i le lalolagi, e faataulaga ona o le auauna atu iā Ieova, o le a ia tauia i latou i mea e silisili atu i le lumanaʻi. O le a ia avatu iā i latou le ola e faavavau e lelei atoatoa i totonu o le lalolagi parataiso. I lenā lalolagi fou, o le a ‘soloiesea ai e Ieova loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga.’ (Faaaliga 21:4) Maʻeu se folafolaga matagofie! E leai se mea atonu e tatou te loto malie pe lē loto malie foʻi e tuua i lenei lalolagi ona o Ieova, e mafai ona faatusatusa atu i le ola ofoofogia lea o le a ia foaʻiina mai i ana auauna faamaoni o loo onosaʻia mafatiaga.
18. O ā folafolaga faamāfanafanaloto ua aumaia e Ieova i lana Afioga?
18 So o se puapuaga lava o le a tatou onosaʻia, o le a lē aafia ai lo tatou olioli i le ola e faavavau i le lalolagi fou a le Atua. O le a suia atoatoa uma na puapuaga i tulaga matagofie i le lalolagi fou. Ua taʻu mai e le Isaia 65:17, 18: “E lē toe manatua mea na muamua, e lē alu aʻe foʻi i le loto. A e peitaʻi ia outou olioli ma fiafia e faavavau i le mea ou te faia.” Ua talafeagai ai le faalauiloaga a le ʻafa uso o Iesu, o Iakopo: “Ua tatou taʻuamuia i ē onosaʻi.” (Iakopo 5:11) Ioe, pe afai tatou te onosaʻia ma le faamaoni mafatiaga i le taimi nei, o le a tatou maua ai aogā i le taimi nei ma le lumanaʻi.
O le ā Lau Tali?
• Na faapefea ona oo mai mafatiaga i tagata?
• O ā aogā e aumaia e mafatiaga i ē o le a avea ma tupu ma tagatānuu o le lalolagi i le lumanaʻi?
• Aiseā e mafai ai ona tatou fiafia i le taimi nei e ui i mafatiaga?
[Fesili mo le Suʻesuʻega]
[Ata i le itulau 27]
Na iai i o tatou uluaʻi mātua se lumanaʻi matagofie
[Ata i le itulau 29]
O le silafia e Iesu o mafatiaga na fesoasoani iā te ia e avea ai o se Tupu lelei ma o se Ositaulaga Sili
[Ata i le itulau 31]
Na ‘olioli le ʻauaposetolo ina ua taʻuaogāina i latou ia faaleagaina ona o lo latou faatuatua’