Tusitusiga Lona Aogā i Isaraelu Anamua

PE NA e faitau i se vaega o le Iliad po o le Odyssey, o ni solo uumi mataʻina mai Eleni anamua? E manatu nisi na fatuina nei solo i le senituri lona iva po o le senituri lona valu T.L.M. O le ā se faatusatusaga o nei tusitusiga ma le Tusi Paia, lea na amata ona tusia i le tele o senituri muamua atu? Na taʻua i le tusi o le Jewish Bible and the Christian Bible: “E lē itiiti ifo i le 429 faasinomaga i tusitusiga ma faamatalaga tusitusia a le Tusi Paia. E mataʻina lenei mea auā e tasi le faasinomaga tusitusia mo le Iliad ae leai se faasinomaga mo le Odyssey.”

Na faapea mai le Oxford Encyclopedia of Archaeology in the Near East, “i Isaraelu anamuā na avea tusitusiga ma vaega autū a lotu.” Mo se faaaʻoaʻoga, na tusia le feagaiga o le Tulafono ma mulimuli ane fai ma masani le faitauina i le lautele mo tamāloloa, o fafine ma fanau. Sa faitauina foʻi ma suʻesuʻeina e tagata i ni vaega toʻatele pe taʻitoʻatasi foʻi. I le māeʻa o le iloiloina o se vaega o le Tulafono e Alan Millard, o se faiaʻoga sinia i le iunivesite o Liverpool na ia faapea mai ai: “E aliali mai, sa manatu tusitala o le Tusi Paia o le faitau ma le tusitusi, e mafai ona aafia ai le olaga i so o se tulaga.”—Teuteronome 31:9-13; Iosua 1:8; Neemia 8:13-15; Salamo 1:2.

Na faamatala e Paulo le vaaiga e tatau ona iai i Kerisiano i tusitusiga paia: “O mea uma foʻi na tusia anamua, na tusia ia e aʻoaʻo mai ai iā te i tatou; ina ia tatou maua le faamoemoe e tupu mai i le onosaʻi, ma le faamāfanafana mai o Tusi.” Pe e te talisapaia le Tusi Paia e ala i le faitauina e lē aunoa?—Roma 15:4.