O Loo Ola le Afioga a Ieova

Manatu Tāua Mai le Tusi o Tanielu

“O LE tusi o Tanielu o se tasi o tusi e matuā mataʻina o le Tusi Paia,” o le faamatalaga lea a le Holman Illustrated Bible Dictionary. “Ua faatumulia ona itulau i upu moni lē masuia.” Na amata mea o loo tusia i le tusi o Tanielu i le 618 T.L.M., ina ua sau le tupu Papelonia o Nepukanesa i Ierusalema ma vagaia le aai, ma ia ave faatagataotauaina “nisi o le fanauga a Isaraelu” i Papelonia. (Tanielu 1:1-3) O Tanielu se tasi na ave ai a o talavou lava, atonu po o le va o le sefulutolu i le sefuluiva ona tausaga. E faaiʻu le tusi a o iai pea Tanielu i Papelonia. O lea ua toeitiiti lava atoa le 100 o ona tausaga, ae ona mauaina loa le folafolaga a le Atua: “E te mālōlō, e te tū mai foʻi i lou tofi pe a oo i le iʻuga o aso.”—Tanielu 12:13.

O le vaega muamua o le tusi o Tanielu, e foliga e ese le tagata o loo faamatalaina le faasolosolo mai o mea na tutupu. Ae o le vaega mulimuli o le tusi, o Tanielu lea ua ia faamatalaina mai. O lenei tusi na tusia lava e Tanielu, ma o loo iai valoaga i le tulaʻi mai ma le paʻūʻū o malo malolosi e pulea le lalolagi, le taimi e taunuu ai le Mesia, ma mea e tutupu i o tatou aso. * Na toe tomānatu foʻi le perofeta ua āfu le soifua i lona soifuaga faafualoa, ma faamatala mea na tutupu e faalaeiauina ai i tatou ina ia avea o ni tane, ma ni fafine amioatua e faamaoni i le Atua. O le feʻau a Tanielu, o loo ola ma o loo matuā galue foʻi.—Eperu 4:12.

O LE Ā TATOU TE AʻOAʻOINA I MANATU FAASOLOSOLO MAI LE AMATAGA?

(Tanielu 1:1–6:28)

O le tausaga lea e 617 T.L.M. o loo iai Tanielu ma ana uō e toʻatolu o Sataraka, Mesako, ma Apeteniko, i le maota i Papelonia. A o faagasolo le tolu tausaga na aʻoaʻoina ai i latou i le maota o le tupu, na tausia ai lava lo latou faamaoni i le Atua. Pe tusa o le valu tausaga mulimuli ane ai, na faia ai e le tupu o Nepukanesa se miti e lē iloa lona uiga. Na faailoa atu e Tanielu le miti, ona taʻu atu lea o lona uiga. Na taʻutino e le tupu faapea o Ieova, “o le Atua o atua ia, ma le Alii o tupu, o lē faaali foʻi i mea ua lilo.” (Tanielu 2:47) E leʻi umi, ae foliga ua galo iā Nepukanesa lenā lesona. Ina ua teena e uō e toʻatolu a Tanielu le tapuaʻi atu i se tupua telē, ona faatonu lea e le tupu e lafo i latou i se ogaumu aasa. Na faasaoina e le Atua moni i latou ia e toʻatolu, ma na faamalosia Nepukanesa e iloa “e leai se isi atua na te mafaia ona laveaʻiina faapena.”—Tanielu 3:29.

Na iai foʻi se isi miti mataʻina na faia e Nepukanesa. Na ia vaaia se laau telē lava, na tuu i lalo ma taofia lona toe tupu aʻe. Na faailoa atu e Tanielu le uiga o lenā miti. Na faataunuuina se vaega o lenā miti ina ua valea Nepukanesa, ma le toe faafoʻisia o lona malosi. I le tele o tausaga mulimuli ane ai, na faia ai e le tupu o Pelesara se taumafataga tele mo ona  alii maualuluga, ma faaaogā ai ma le lē āva ipu na aumai mai le malumalu o Ieova. O lenā lava pō, na fasiotia ai Pelesara ma maua ai e Tariu le Metai le malo. (Tanielu 5:30, 31) I aso o Tariu, ina ua silia i le 90 tausaga o Tanielu, na avea ai le perofeta matua, ma taulaʻiga o faufauga a tagata maualuluga loto vale ina ia fasiotia o ia. Ae na laveaʻi o ia e Ieova “ai lima o leona.”—Tanielu 6:27.

Taliina o Fesili Faale-Tusi Paia:

1:11-15—Pe na avea le ʻaia na o fuālaau ʻaina, ma fuālaau faisua ma māfuaaga na mananaia ai foliga o talavou Iutaia e toʻafā? E leai. E leai ni meaʻai e mafai ona faia na suiga i se taimi e na o le sefulu aso. E ao ona ave le viiga iā Ieova, ona o le suiga o foliga o taulelea e toʻafā lea na faamanuiaina ona o lo latou faalagolago iā te ia.—Faataoto 10:22.

2:1—O anafea na fai ai le miti a Nepukanesa i se tupua telē? O loo taʻua i faamaumauga faapea, o le “lua tausaga o le nofoaiga a Nepukanesa.” Na avea o ia ma tupu i le 624 T.L.M. O le tausaga lona lua la o lana nofoaiga e tatau ona amata i le tausaga e 623 T.L.M.—e faitau tausaga a o ia leʻi osofaʻia Iuta. I lenā taimi e leʻi iai Tanielu e faamatalaina le miti. O le tausaga lona “lua” la e ao ona amata faitau mai i le 607 T.L.M., ina ua faaumatia e le tupu o Papelonia Ierusalema, ma avea ai ma malo e pulea le lalolagi.

2:32, 39—O le ā le auala na lē tutusa pe maulalo ifo ai le malo na faaātaina i le ario, i le malo na faaātaina i le ulu auro, ma na faapefea e le malo na faaātaina i le apamemea ona maulalo ifo i le malo na faaātaina i le ario? O le Emepaea o Metai ma Peresia, na faaāta mai e le vaega ario o le tupua, ma na maulalo ifo iā Papelonia o le ulu auro, ona e na te leʻi faatoʻilaloina Iuta. O le malo malosi na sosoo ai o Eleni, lea na faaāta mai e le ʻapa memea. Na maulalo ifo Eleni iā Metai ma Peresia, e pei lava ona maulalo le apamemea i le ario. E ui lava na telē se vaega na pulea e le Emepaea o Eleni, ae e leʻi iā te ia le faaeaga e toe faafoʻisia ai tagata o le Atua mai le faaaunuua e pei ona faia e Metai ma Peresia.

4:8, 9—Pe na avea Tanielu ma matai o taulāitu? E leai. O le faaupuga “o le matai o taulāitu” ua na o se taʻu e faasino i le tulaga o Tanielu auā ua ‘sili o ia i ē pule i le ʻau popoto uma o Papelonia.’—Tanielu 2:48.

4:10, 11, 20-22—O le ā na fai ma sui, pe na faaātaina mai e le laau telē i le miti a Nepukanesa? Na faaāta muamua mai e le laau Nepukanesa o lē na pulea le malo malosi o le lalolagi. Ae peitaʻi, ona na oo atu le pulega a lea malo i “tuluʻiga o le lalolagi,” na tatau la ona faaātaina mai e le laau se isi mea e sili atu. O loo faafesootaʻi e le Tanielu 4:17 le miti i le pulega a “lē Silisili ese” i tagata. O loo faaātaina mai foʻi e le laau le silisili ese o Ieova i le aoao o mea, aemaise lava i le faatatau atu i le lalolagi. O lea la, o le miti e lua ona faataunuuga—i le pulega a Nepukanesa ma le pulega silisili a Ieova.

4:16, 23, 25, 32, 33—O le ā le umi o ‘tausaga po o taimi e fitu’? O suiga uma na tutupu i foliga vaaia o le tupu o Nepukanesa, na manaʻomia ai se taimi e umi atu na i lo ni aso se fitu. E faatatau iā Nepukanesa, o nei taimi  po o tausaga e fitu e taʻi 360 aso i le tausaga, po o le 2,520 aso. O lona faataunuuga tele o “tausaga e fitu” e 2,520 tausaga. (Esekielu 4:6, 7) Na amata i le faaumatiaga o Ierusalema i le 607 T.L.M., ae iʻu ina ua nofotupu Iesu o le Tupu faalelagi i le 1914 T.A.—Luka 21:24.

6:6-10—Ona o le tatalo iā Ieova e lē manaʻomia ai sou tulaga patino, pe sa lē o se tulaga atamai ea la iā Tanielu ona tatalo faalilolilo mo aso e 30? O le tatalo a Tanielu faatolu i le aso, sa iloa e le toʻatele o tagata. O le māfuaaga lenā na faufau ai se vaega o tagata e fai se mea e lē faaletulafono e taofia ai le tatalo. O le suia o le masani a Tanielu e tusa ai o le tatalo e ono foliga atu ai i isi ua faagutugutulua, ma e faaalia ai lona lē taulau i le faaalia o lona tuutoina iā Ieova.

Lesona mo i Tatou:

1:3-8. O le maumauaʻi o Tanielu ma ana aumea e tumau i le faamaoni iā Ieova, e faamamafa ai le tāua o le toleniga a mātua na latou maua. Pe a faamuamua e mātua matataʻu i le Atua mea faaleagaga i o la olaga, ma aʻoaʻo le la fanau e faia faapea, e ono teena ai foʻi e le la fanau po o ā lava faaosoosoga ma omiga e tulaʻi mai i le aʻoga, po o se isi mea.

1:10-12. Na malamalama Tanielu i le māfuaaga na mataʻu ai “le alii e pule i eunuka” i le tupu, ma lē taʻua ai lona manaʻo i lenā tagata maualuga o le malo. Peitaʻi na faalatalata atu Tanielu mulimuli ane ai i le “alii e pule” lea e ono faaalia le alofa. Pe a fesagaʻi ma faigatā, e ao ona tatou gaoioi ma le malamalama, ma le faautaga poto, ma le atamai.

2:29, 30. I le pei o Tanielu, e ao ona tatou viiviia Ieova i le poto, i uiga, ma le tomai ua tatou maua ona ua tatou faaaogā tatau ana sauniuniga faaleagaga.

3:16-18. E foliga mai e lē mafai ona tali atu nei Eperu e toʻatolu ma le maumauaʻi, pe ana faapea na latou faagutugutulua muamua i a latou meaʻai. E ao foʻi ona tatou taumafai e “faamaoni i mea uma lava.”—1 Timoteo 3:11.

4:24-27. O le folafola atu o le feʻau o le Malo, lea e aofia ai le faaumatiaga lē masuia a le Atua, e manaʻomia ai le ituaiga faatuatua ma le loto tele e pei ona faaalia e Tanielu, i le faailoa atu o le mea o le a oo iā Nepukanesa ma le mea e ao ona faia e le tupu ina ia ‘faalevaleva ai lona filemu.’

5:30, 31. Na taunuu le “faataoto i le tupu o Papelonia.” (Isaia 14:3, 4, 12-15) O le faamaualuga o Satani le Tiapolo e pei o le aiga tupu o Papelonia, o le a ia fesagaʻia ai foʻi se iʻuga lē manuia.—Tanielu 4:30; 5:2-4, 23.

O LE Ā UA FAAILOA MAI I FAAALIGA NA VAAIA E TANIELU?

(Tanielu 7:1–12:13)

Ina ua maua e Tanielu le faaaliga muamua e ala i se miti i le 553 T.L.M., ua silia i le 70 ona tausaga i le taimi lea. Na vaaia e Tanielu ni meaola tetelē se fā lea e faaāta mai ai le faasologa o malo malolosi e pulea le lalolagi seʻia oo mai i o tatou aso. I se faaaliga na ia vaaia i le lagi, na ia vaaia ai “Lē e pei o le Atalii o le tagata,” ua foaʻiina atu iā te ia “le pule e faavavau.” (Tanielu 7:13, 14) I le lua tausaga mulimuli ane ai, ae iloa e Tanielu se faaaliga e aofia ai Metai ma Peresia, Eleni, ma se “tupu mata sauā.”—Tanielu 8:23.

O lea ua oo mai i le 539 T.L.M. Ua paʻū Papelonia, ma ua pulea nei e Tariu le Metai le malo o Kaletaia. Na tatalo Tanielu iā Ieova ia toe faafoʻisia le tulaga o lona nuu e pei ona iai muamua. A o fai lana tatalo, na auina mai e Ieova lana agelu o Kaperielu ‘e aʻoaʻo iā te ia e poto ai’ e faatatau i le afio mai o le Mesia. (Tanielu 9:20-25) O lea ua oo mai i le 536/535 T.L.M. Ua toe foʻi se vaega totoe i Ierusalema. Ua iai ni teteega i le toe fausiaina o le malumalu. Na avea lea ma pogai o le atuatuvale o Tanielu. Ona ia tatalo faatauanau ai lea e uiga i le mataupu, ma na auina mai e Ieova lana agelu e maualuga lona tulaga e faamalosi iā Tanielu. Ina ua uma ona faamalosi ma faalaeiau iā Tanielu, ona taʻu atu lea e le  agelu o le valoaga se tauiviga mo le pule i le va o le tupu i le itu i mātū ma le tupu o le itu i toga. O le feteenaʻiga i nei tupu e lua e mai le taimi ina ua vaevaeina le malo o Alesana le Sili i ana taʻitaʻiʻau e toʻafā, seʻia oo i le taimi e “tulaʻi ai” Mekaeli, le Alii Sili.—Tanielu 12:1.

Taliina o Fesili Faale-Tusi Paia

8:9—O le ā ua faaāta mai e “le nuu matagofie”? I inei, o “le nuu matagofie” o loo faaāta mai ai le tulaga i le lalolagi o Kerisiano faauuina i le taimi o le pulega a Peretania ma Amerika.

8:25—O ai “le Alii o alii”? O le upu Eperu o le sar, e faaliliuina “Alii,” o lona uiga o le “alii silisili,” po o “lē e ulu.” O le taʻu “Alii o alii” e faasino atu na o Ieova le Atua—o le Alii Silisili o agelu e aofia ai “Mekaeli o so le ʻau alii sili.”—Tanielu 10:13.

9:21—Aiseā na faasino atu ai Tanielu iā Kaperielu o “le tagata”? Ona na faailoa ane Kaperielu iā te ia i se tino pei o se tagata, e pei foʻi ona ia faailoa atu iā Tanielu i le vaaiga na muamua atu.—Tanielu 8:15-17.

9:27—O le ā le feagaiga na tumau seʻia oo i le iʻuga o le fitu sefulu o vaiaso o tausaga, pe i le 36 T.A.? Na aveesea le feagaiga o le Tulafono i le 33 T.A. ina ua faasatauro Iesu. Ae, o le faatumauina pea o le feagaiga faa-Aperaamo ma Isaraelu faaletino seʻia oo i le 36 T.A., na faasafua atu ai e Ieova se vaitaimi o lona finagalo malie faapitoa, mo tagata Iutaia ona o i latou na tupuga mai iā Aperaamo. O loo faaauau pea le feagaiga faa-Aperaamo ma le “Isaraelu [a] le Atua.”—Kalatia 3:7-9, 14-18, 29; 6:16.

Lesona mo i Tatou:

9:1-23; 10:11. Ona o lona loto maulalo, tuutoina i le Atua, galue mamafa, filigā, ma le maumauaʻi i le tatalo, na “alofateleina” ai Tanielu. O ona uiga nei na fesoasoani iā te ia e tumau ai i le faamaoni i le Atua seʻia oo ina iʻu lona soifua. O lea, seʻi o tatou maumauaʻi nei e mulimuli i le faaaʻoaʻoga a Tanielu.

9:17-19. E tusa lava pe tatou te tatalo ina ia oo mai le lalolagi fou a le Atua lea o le a “mau ai le amiotonu,” ae pe lē o lo tatou faanaunauga autū ea o le faapaiaina o le suafa o Ieova, ma le faamaonia o le tonu o lana pule silisili ese, na i lo le iʻuga o o tatou mafatiaga ma faafitauli?—2 Peteru 3:13.

10:9-11, 18, 19. I le faataʻitaʻi atu i le agelu na sau iā Tanielu, e tatau ona tatou faalaeiau ma faamalosiau le tasi i le isi i le ofo atu o se fesoasoani, faapea ma upu faamāfanafana.

12:3. I aso e gata ai, o “ē popoto”—Kerisiano faauuina—ua pupula “faapei o mea e faamalamalama aʻi” ua latou ‘faaliliu tagata e toʻatele ia amiotonu,’ e aofia ai ma le “motu o tagata e toʻatele” o “isi mamoe.” (Filipi 2:15; Faaaliga 7:9; Ioane 10:16) O le vaega faauuina o le a fepulafi e “pei o fetu” i se tulaga atoatoa i le taimi o le Pulega o le Afe Tausaga a Keriso, pe a latou galulue faatasi ma Keriso, e faatatauina aogā atoatoa o le togiola i tagata usiusitai i le lalolagi. E ao ona pipii atu ma le faamaoni “isi mamoe” i le vaega faauuina, ma lagolagoina ma le loto atoa i latou.

E Faamanuia Ieova i Ē Matataʻu iā te Ia

O le ā ua aʻoaʻoina ai i tatou e le tusi o Tanielu e faatatau i le Atua o loo tatou tapuaʻi atu i ai? Mafaufau i valoaga o loo iai i le tusi—o valoaga ua uma ona faataunuuina, ma valoaga e leʻi faataunuuina. O loo manino ona faamatalaina ai Ieova o Lē na te Faataunuu ana afioga!—Isaia 55:11.

O le ā ua faaalia i faamatalaga o loo i le tusi a Tanielu e faatatau i lo tatou Atua? O talavou Eperu e toʻafā na teena le ola i olaga sa ola ai tagata i le fale o le tupu i Papelonia, na latou mauaina le ‘faautauta, atamai ma le poto.’ (Tanielu 1:17) Na auina mai e le Atua moni lana agelu e laveaʻi iā Sataraka, Mesako, ma Apeteniko, ai le ogaumu aasa. Na laveaʻia Tanielu mai le lua o leona. O Ieova e ‘fesoasoani ma avea foʻi ma talita i ē matataʻu iā te ia.’—Salamo 115:9, 13.

[Faaopoopoga i lalo]

[Ata i le itulau 18]

Aiseā na “alofateleina” ai Tanielu?