E ‘Alofa Mutimuti Vale lo Outou Tamā’
E ‘Alofa Mutimuti Vale lo Outou Tamā’
“O lenei, ia mutimuti vale lo outou alofa, pei ona alofa mutimuti vale o lo outou Tamā.”—LUKA 6:36.
1, 2. E faapefea ona faaalia i upu a Iesu i le ʻau tusiupu ma le ʻau Faresaio ma ona soo, le tāua tele o lea uiga o le alofa mutimutivale?
E TUSA ma le 600 tulafono eseese na iai i le Tulafono a Mose. E ui lava sa talafeagai ona faatinoina matafaioi o lea Tulafono, ae sa tāua tele foʻi le faaalia o le alofa mutimutivale. Seʻi tagaʻi foʻi i le fetalaiga a Iesu i le ʻau Faresaio, o ē na leʻi faaalia lea uiga. E faalua ona ia aʻoaʻia i latou, e ala i lona taʻua o le poloaʻiga a le Atua: “Ou te loto i le alofa [alofa mutimutivale] ae lē o le taulaga.” (Mataio 9:10-13; 12:1-7; Hosea 6:6) A o faaiʻuiʻu le faiva a Iesu, na ia fetalai e faapea: “Oi talofa iā te outou tusiupu ma faresaio, tagata pepelo! ua outou avatu mea e sefulu aʻi o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni.”—Mataio 23:23.
2 Na tāua iā Iesu le uiga o le alofa mutimutivale. Na ia fetalai i ona soo: “O lenei, ia mutimuti vale lo outou alofa, pei ona alofa mutimuti vale o lo outou Tamā.” (Luka 6:36) Peitaʻi, ina ia ‘faaaʻoaʻo i le Atua’ i lenei tulaga, e ao ona tatou malamalama muamua po o le ā tonu le uiga o le alofa mutimutivale. (Efeso 5:1) E lē gata i lea, afai tatou te malamalama i aogā o lea uiga, o le a sili atu ona tatou faaalia lea uiga i o tatou olaga.
Alofa Mutimutivale i Ē Lē Tagolima
3. Ina ia iloa po o le ā tonu le uiga o le alofa mutimutivale, aiseā e ao ai ona tatou saʻili atu iā Ieova?
3 Na pese le faisalamo e faapea: “E alofa fua mai ma alofa mutimuti vale mai Ieova; e tele gese lona toʻasā, e tele foʻi lona alofa. O loo agalelei mai Ieova i mea uma, o lona alofa mutimuti vale foʻi ua i ana mea uma na fai.” (Salamo 145:8, 9) O Ieova, “o le Tamā e ona le alofa mutimuti vale, o le Atua foʻi e ana le faamāfanafanaga uma.” (2 Korinito 1:3) E faaalia le alofa mutimutivale e ala i le faatino o le alofa i isi. O se vala e tāua tele i uiga o le Atua. O lana aʻoaʻoga ma ana faatonuga, o le a tatou iloa tonu ai le uiga o le alofa mutimutivale.
4. O le ā ua tatou aʻoaʻoina mai i le Isaia 49:15 e tusa ai o le alofa mutimutivale?
4 E pei ona tusia i le Isaia 49:15, na fetalai Ieova: “E galo ea i le fafine lana tama ua susu, na te lē alofa i le tama a lona lava manava?” O upu Eperu e fesootaʻi vavalalata i le upu i inei lea e faaliliuina i le “alofa” e fesootaʻi atu i le alofa mutimutivale lea e taʻua i le Salamo 145:8, 9. Ua faatusaina lagona alofa mutimutivale o Ieova, i lagona māfana o loo iai i se tinā mo lana tama. Atonu ua fiaʻai le pepe, po o manaʻomia foʻi se isi mea, o lagona alofa o le tinā o le a ia faia ai le mea o loo manaʻomia e lana pepe. Ua faapena foʻi lagona alofa o loo iā Ieova, mo ē ua ia alofa mutimutivale i ai.
5. Na faapefea ona faaalia e Ieova le ‘faulaʻi o lona alofa’ iā Isaraelu?
5 O se mea lelei le iai o le lagona alofa mutimutivale, ae e sili atu ona lelei pe a faaalia i ē lē tagolima. Manatu i le auala na tali atu ai Ieova ina ua faapologaina ona tagata tapuaʻi i Aikupito pe tusa o le 3,500 tausaga talu ai. Na ia fetalai atu iā Mose: “Ua ou matuā vaai atu i le puapuaga o [loʻu] nuu o loo i Aikupito, ua ou faalogo foʻi i lo latou alaga ona o ē pule faasauā iā i latou, ua ou iloa foʻi lo latou tigā. O lenei, ua ou alu ifo, ou te laveaʻi mai iā te i latou ai lima o Aikupito, ma ou aveina aʻe i latou ai lea nuu i le nuu lelei ma le lautele, o le nuu o tafe ai le suāsusu ma le meli.” (Esoto 3:7, 8) Ina ua mavae le tusa ma le 500 tausaga talu ona laveaʻiina Isaraelu mai Aikupito, ona faamanatu atu lea e Ieova iā i latou: “O aʻu na ou aveina aʻe iā Isaraelu nai Aikupito, ma ou laveaʻiina outou nai lima o Aikupito, ma lima o malo uma na faasauā iā te outou.” (1 Samuelu 10:18) O le māfuaaga o le tele o puapuaga o Isaraelu, ona o lo latou lē tumau i tapulaa amiotonu a le Atua. Ae na alofa faapelepele pea Ieova ma e tele taimi na ia laveaʻiina ai i latou. (Faamasino 2:11-16; 2 Nofoaiga a Tupu 36:15) Ua faataʻitaʻia mai ai i inei le ala e tali atu ai le Atua alofa i ē e lē tagolima, po o lamatia, po o iai i faigatā. O Ieova e ‘faulaʻi lona alofa.’—Efeso 2:4.
6. Na faapefea ona faaaʻoaʻo Iesu i lona Tamā i le faaalia o le alofa mutimutivale?
6 A o iai i le lalolagi, sa lelei ona faaaʻoaʻo Iesu i lona Tamā i le faaalia o le alofa mutimutivale. O le ā na faia e Iesu ina ua talosaga atu ni tagata tauaso e toʻalua: “Le Alii e, le alo o Tavita, ia e alofa mai iā te i maʻua”? Na la ōle atu iā Iesu ia faapupula i laʻua, ma na ia faia faapea. Ae e leʻi faia e Iesu e aunoa ma ni faalogona, auā ua faapea mai le Tusi Paia: “Ona mutimuti vale ai lea o le alofa o Iesu, ua paʻi atu i o la mata; ona vaai loa ai lea o la mata.” (Mataio 20:30-34) O le alofa na uunaʻia ai Iesu e faia vavega e tele, ma na mālōlō ai tagata tauaso, ma ē na ulufia e temoni, o ē lepela, faapea ma mātua e iai fanau mamaʻi.—Mataio 9:27; 15:22; 17:15; Mareko 5:18, 19; Luka 17:12, 13.
7. O le ā ua tatou aʻoaʻoina mai faaaʻoaʻoga a Ieova le Atua ma lona Alo, e tusa ai o le alofa mutimutivale?
7 Ua faaalia i faaaʻoaʻoga a Ieova le Atua ma Iesu Keriso, e lua vala o le alofa mutimutivale—o lagona alofa i lē ua puapuagatia, ma gaoioiga e fesoasoani ai iā te ia. E manaʻomia uma ia vala i le faaalia o le alofa mutimutivale. A taʻu le alofa mutimutivale i le Tusi Paia, ua masani ona faatatau i le faaalia o le alofa i lē o loo manaʻomia. Ae faapefea tulaga tau faamasinoga, e faapefea ona faaalia ai le alofa mutimutivale? Pe e mafai ona aofia ai le lē faia o se gaoioiga, e pei o le lē faataunuuina o se faasalaga?
Alofa Mutimutivale i Ē Agasala
8, 9. O le ā na aofia ai i le faaalia o le alofa mutimutivale o le Atua iā Tavita ona o le la agasala ma Patesepa?
8 Seʻi manatu i le mea na tupu ina ua taʻu atu e le perofeta o Natano iā Tavita, le tupu o Isaraelu anamua, le la mulilua ma Patesepa. Na salamō Tavita ma tatalo: “Le Atua e, ia e alofa mai iā te aʻu, e tusa ma lou lava alofa; e tusa ma le tele o lou alofa mutimutivale, ia e soloiesea oʻu solitulafono. Ia e matuā fufulu mai iā te aʻu i laʻu amio leaga, ma ia e faamamā mai iā te aʻu i laʻu agasala. Auā ua ou iloa e aʻu loʻu solitulafono; e lē aunoa foʻi ona i ai i oʻu luma o laʻu agasala. Ua ou agasala atu iā te oe, na o oe lava; ua ou faia foʻi lenei mea leaga i ou luma.”—Salamo 51:1-4.
9 Na matuā lagona e Tavita le salamō. Na faamagaloina e Ieova lana agasala, ma na ia taofia le faasalaga na tatau ona oo iā i laʻua ma Patesepa. Auā e tusa ai ma le Tulafono a Mose, na tatau ona fasiotia Tavita ma Patesepa. (Teuteronome 22:22) E ui e leʻi aveesea iʻuga faigatā na iai ona o le la agasala, ae na faasaoina o la ola. (2 Samuelu 12:13) O le alofa mutimutivale la o le Atua, e aofia ai le faamagaloina o agasala. Peitaʻi, e na te lē taofia le faaooina o se faasalaga e talafeagai ai.
10. E ui e alofa mutimutivale Ieova a o faatino lana faamasinoga, ae aiseā e lē tatau ai ona tatou faaaogāsesēina lona alofa mutimutivale?
10 Talu ai ua “oo mai . . . le agasala i le lalolagi i le tagata e toʻatasi, [Atamu], o le oti foʻi ona o le agasala,” ua tatau ai la ona oti tagata uma lava. (Roma 5:12; 6:23) Tatou te matuā faafetaia Ieova i le faaalia o lona alofa mutimutivale ina ua ia faamasinoina i tatou! Peitaʻi, ia faaeteete ina neʻi tatou faaaogāsesēina lona alofa mutimutivale, auā ua faapea mai le Teuteronome 32:4 e faatatau iā te ia: “Auā e tonu ona ala uma lava.” E faaalia e Ieova le alofa mutimutivale, ae e lē faatuatuanaʻi ai i ana tapulaa lelei atoatoa o le faamasinotonu.
11. Na faaalia faapefea e Ieova le tāua iā te ia o le faamasinotonu i le tauaaoina o le agasala a Tavita ma Patesepa?
11 I le tulaga iā Tavita ma Patesepa, ina ia mafai ona faamāmā le faasalaga oti lea sa ono faasala ai, sa tatau ona muamua faamagaloina le la agasala. E leʻi tuuina atu i faamasino Isaraelu se pule e faia ai lea tulaga. Pe ana fai e tuu atu e latou te taulimaina lea faamasinoga, semanū e pau lava le tulaga e mafai ona latou faia, o le faia o le faasalaga oti, ona o le tulaga lenā o le Tulafono. Peitaʻi, ona o le manatu i le la feagaiga ma Tavita, sa finagalo Ieova e faamautinoa, pe iai se faavae e mafai ai ona faamagalo le agasala a Tavita. (2 Samuelu 7:12-16) O lea na filifili ai Ieova le Atua e na te tauaaoina lea mataupu, auā o ia o “le faamasino i le lalolagi uma,” ma e ‘suʻesuʻe foʻi i le loto.’ (Kenese 18:25; 1 Nofoaiga a Tupu 29:17) Na mafai e le Atua ona faamagalo iā Tavita ona na ia silafia tonu le mea o i lona loto, ma silafia ai le moni o lona salamō.
12. E mafai faapefea e tagata agasala ona latou maua le alofa mutimutivale o le Atua?
12 O le alofa mutimutivale o loo faaalia mai e Ieova iā i tatou, e ala i le tuusaʻoloto o i tatou mai le faasalaga o le agasala tuufaasolo, ua ōgatasi lea ma lona faamasinotonu. Ina ia faamagaloina agasala e aunoa ma le solia o le faamasinotonu, ua saunia ai e Ieova le taulaga togiola a lona Alo, o Iesu Keriso, o le faaaliga aupito i silisili lea o le alofa mutimutivale. (Mataio 20:28; Roma 6:22, 23) Ina ia tatou maua le alofa mutimutivale mai le Atua, lea e tatou te sao ai mai le sala oti ona o le agasala tuufaasolo, e ao ona tatou “faatuatua i le Alo.”—Ioane 3:16, 36.
Le Atua Alofa Mutimutivale ma Faamasinotonu
13, 14. Pe e faamāmāina e le alofa mutimutivale o le Atua lona faamasinotonu? Faamatala.
13 E lē taofia e Ieova lona faamasinotonu ona o lona alofa mutimutivale, ae faamata e iai nisi tulaga e ono āfaina ai lona faamasinotonu, ona o lona alofa mutimutivale? Pe e faamāmāina e lona alofa mutimutivale lana faamasinogatonu? E leai.
14 Na fetalai Ieova iā Isaraelu e ala i le perofeta o Hosea: “Ta te osi sa ta feagaiga ma aʻu e faavavau; ta te osi sa ta feagaiga ma aʻu i le amiotonu, ma le faamasinoga [tonu], ma le agalelei, ma le alofa.” (Hosea 2:19) Ua iloa mai i lea fetalaiga le ōgatasi o le alofa mutimutivale o Ieova ma isi ona uiga e iai le faamasinotonu. O Ieova “o le Atua alofa mutimutivale ma le alofa fua, . . . o lē faamagalo foʻi i le amiolētonu ma le solitulafono ma le agasala, a e lē faasaoina lava e ia o ē agasala.” (Esoto 34:6, 7) O Ieova o le Atua e alofa mutimutivale ma faamasinotonu. Ua faapea mai le Tusi Paia e faatatau iā te ia: “O le Papa, e sao lava lana galuega; auā e tonu ona ala uma lava.” (Teuteronome 32:4) E atoatoa ona lelei lana faamasinotonu, e faapena foʻi lona alofa mutimutivale. E lē gata e tutusa uma ona uiga, ae e lē faamāmāina foʻi se isi uiga ona o le faatinoina o le isi uiga. Auā e matuā fetaui lelei ia uiga taʻitasi.
15, 16. (a) Ua faapefea ona iloa e lē sauā le faamasinotonu a le Atua? (e) A oo ina aumai e Ieova lana faasalaga faafaamasinoga i lenei faiga amioleaga o mea, o le ā e mautinoa e i latou e tapuaʻi iā Ieova?
15 E lē sauā le faamasinotonu a Ieova. E masani lava ona iai aiaiga faaletulafono i se faamasinoga, ma e tatau lava ona iai se faasalaga e tusa ma lē ua sala pe a faia se faamasinoga. Peitaʻi ane, o le faamasinoga tonu tauatua, e mafai foʻi ona iʻu i le faasaoina o ē ua tatau i ai. O se faataʻitaʻiga, na faasaoina le augātamā o Lota ma ona afafine ina ua faaumatia aai amioleaga o Sotoma ma Komoro.—Kenese 19:12-26.
16 Pe a aumai e Ieova lana faasalaga faafaamasinoga i lenei faiga amioleaga o mea, e tatou te mautinoa, o le a ia faasaoina le “motu o tagata e toʻatele” o ona tagata tapuaʻi moni o ē ‘ua ta o latou ofu, ma ua faasinasinaina i le toto o le Tamaʻi mamoe,’ o le māfuaaga lea o lo latou “ō mai nai le puapuaga tele.”—Faaaliga 7:9-14.
Aiseā e Faaalia ai le Alofa Mutimutivale?
17. O le ā le māfuaaga autū e faaalia ai le alofa mutimutivale?
17 Ua matuā aʻoaʻoina i tatou mai faaaʻoaʻoga a Ieova ma Iesu Keriso e tusa o le alofa mutimutivale moni. Ua aumaia i le Faataoto 19:17 se māfuaaga autū e tatou te faaalia ai le alofa mutimutivale e faapea: “O lē ua alofa i le tagata mativa, na te avatua ana mea iā Ieova; e tauia mai foʻi e ia ana mea na avatu iā te ia.” O le a fiafia Ieova ma lona Alo pe a tatou faaaʻoaʻo iā i laʻua i le faaalia o le alofa mutimutivale i a tatou feutagaʻiga ma isi. (1 Korinito 11:1) O le a faalaeiauina foʻi isi e faaali le alofa mutimutivale ona o le faaalia atu i ai o le alofa mutimutivale.—Luka 6:38.
18. Aiseā e ao ai ona tatou maumauaʻi e faaalia le alofa mutimutivale?
18 E tele ni vala lelei o le uiga o le alofa mutimutivale. E aofia ai le agaalofa, alofa, mataalofa, ma le agalelei. O lagona tigā alofa, e uunaʻia ai le alofa mutimutivale. E ui e lē faamāmāina e Ieova lana faamasinogatonu ona o lona alofa mutimutivale, ae e telegese lona toʻasā ma e onosai, ia lava le taimi mo lē ua agasala e faailoa mai ai lona salamō. (2 Peteru 3:9, 10) O lea la, e iai le sootaga o le alofa mutimutivale i le onosai ma le faapalepale. Talu ai e tele ni uiga lelei ua tuufaatasia i le alofa mutimutivale, e aofia ai ma isi vala o fua o le agaga o le Atua, ua avea ai la le alofa mutimutivale e pei o se faavae, e ati aʻe ai ia uiga. (Kalatia 5:22, 23) Maʻeu la le tāua tele ona tatou maumauaʻi e faaalia le alofa mutimutivale!
Amuia Ē Alolofa Mutimutivale
19, 20. Ua faapefea ona olioli pe manumalo lē e faaalia le alofa mutimutivale pe a faamasinoina?
19 Ua faailoa mai e le soo o Iakopo le māfuaaga e ao ai ona avea le alofa mutimutivale ma uiga tāua tele i o tatou olaga. “A o lē alofa, e olioli [manumalo] ia pe a faamasinoina.” (Iakopo 2:13e) O loo tautala Iakopo e tusa o le alofa mutimutivale o loo faaalia i isi e se tagata e tapuaʻi iā Ieova. E manumalo le alofa mutimutivale pe a faamasinoina, auā a oo i le taimi e ‘tala ai lana amio i le Atua,’ e manatua e Ieova lona alofa mutimutivale i isi, ma e na te faamagalo o ia e faavae i le taulaga togiola a Lona Alo. (Roma 14:12) E lē taumatea, o se tasi o māfuaaga na faaalia ai le alofa mutimutivale o le Atua iā Tavita i le la agasala ma Patesepa, ona sa faaalia foʻi e Tavita le alofa mutimutivale i isi. (1 Samuelu 24:4-7) A o “lē lē alofa [alofa mutimutivale], e lē alofagia o ia i le faamasinoga.” (Iakopo 2:13a) E lētioa a taʻu faatasi i latou, o ē “faalēalolofa” ma ē ua ‘tatau i ai le oti” e tusa ma le silafaga a le Atua.—Roma 1:31, 32.
20 Na fetalai Iesu i lana Lauga i luga o le Mauga e faapea: “Amuia ē alolofa [alofa mutimutivale] atu; auā e alofaina mai i latou.” (Mataio 5:7) O le manatu tuusaʻo i inei, o ē fia maua le alofa mutimutivale o le Atua, e ao foʻi ona latou faaalia atu lea uiga! O le a talanoaina i le mataupu o sosoo mai le auala e faatino ai lea uiga i o tatou olaga i aso uma.
O le ā na E Aʻoaʻoina?
• O le ā le uiga o le alofa mutimutivale?
• O ā auala e faaalia ai le alofa mutimutivale?
• E faapefea ona avea Ieova o se Atua e alofa mutimutivale toe faamasinotonu?
• Aiseā e ao ai ona tatou faaalia le alofa mutimutivale?
[Fesili mo le Suʻesuʻega]
[Ata i le itulau 21]
O lagona agaalofa o Ieova mo ē pagatia, ua pei o lagona o se tinā i lana pepe
[Ata i le itulau 23]
O le ā ua tatou iloa mai vavega a Iesu e tusa o le alofa mutimutivale?
[Ata i le itulau 24]
Pe na lē faia e Ieova lana faamasinogatonu, ona ua faaalia le alofa mutimutivale iā Tavita?
[Ata i le itulau 25]
O le alofa mutimutivale o le Atua i tagata agasala, e ōgatasi ma lana faamasinogatonu