Faia o le Finagalo o le Atua i Aso Nei

“Na maliu foʻi o ia [Keriso] ona o tagata uma, ina ia lē usiusitai pea o ē ola iā te i latou lava.”—2 KORINITO 5:15.

1. Faamatala se mea na tupu i le tofiga a se tasi o misionare.

NA FAAPEA mai se misionare e suafa iā Arona: * “O le matou taavale na muaʻi taunuu i vaipanoa maotua o Aferika i aai na tupu ai le taua. Ua motusia fesootaʻiga ma le faapotopotoga laitiiti i inā, ma ua tatau ona auina atu se fesoasoani mo le ʻauuso. E faaopoopo atu i meaʻai, lavalava, ma lomiga faale-Tusi Paia, na matou tuuina atu foʻi le vitiō, Jehovah’s Witnesses—The Organization Behind the Name. * E toʻatele tagata fiafia na lolofi atu e maimoa le ata i le fale ‘tifaga,’ o se fale e ato i vaovao o loo iai se vitiō (VCR) ma se televise, ma na faalua ona faaali le ata. E tele ni suʻesuʻega faale-Tusi Paia na amata i faaaliga taʻitasi. Sa mautinoa na aogā a matou taumafaiga.”

2. (a) Aiseā ua filifili ai Kerisiano e faaaogā o latou ola mo le auaunaga i le Atua? (e) O ā fesili o le a talanoaina nei?

² Aiseā na faataunuu ai e Arona ma ana uō lenei gaoioiga faigatā? Ona o le latou loto faafetai mo le taulaga togiola a Iesu Keriso, ua tuuina atu ai o latou ola mo le Atua, ma mananaʻo e faaaogā e ōgatusa ma le finagalo o le Atua. I le pei o i latou, ua lotomalilie Kerisiano uma ua tuuina atu i le Atua, ‘ina ia lē usiusitai iā te i latou lava,’ ae ia fai le mea sili e mafai “ona o le tala lelei.” (2 Korinito 5:15; 1 Korinito 9:23) Ua latou iloa a iʻu lenei faiga o mea, e lē toe aogā tupe ma tulaga taualoa o lenei lalolagi. I le mauaina o le ola ma le soifua mālōlōina o loo iai i le taimi nei, latou te mananaʻo e faaaogā na mea ia ōgatasi ma le finagalo o le Atua. (Failauga 12:1) E faapefea ona tatou faia lenei mea? O fea tatou te maua ai le lototele ma le malosi e faia ai? O ā vala eseese o le auaunaga o loo avanoa mai mo i tatou?

Uia ni Laasaga Talafeagai e Agaʻigaʻi ai i Luma

3. O ā laasaga amata o loo aofia i le faia o le finagalo o le Atua?

³ Mo Kerisiano moni, o le faia o le finagalo o le Atua e mo le olaga atoa. E masani ona iai ni laasaga amata e pei o le auai i le Aʻoga o le Faiva Faatiokarate, faitau o le Tusi Paia i aso taʻitasi, auai i le talaʻiga, ma agaʻigaʻi atu mo le papatisoga. A o agaʻigaʻi i luma, ia tatou manatua timaʻiga a le aposetolo o Paulo: “Ia e mafaufau i ia mea, ia e faamasani ai; ina ia iloa ai e tagata uma lou alualu i luma.” (1 Timoteo 4:15) O lenā agaʻigaʻi i luma e lē mo se viiga o le tagata lava ia, a o lo tatou faanaunauga e faia le finagalo o le Atua e aunoa ma le manatu faapito. O le uia o lenei laasaga e faaalia ai o loo faatagaina le Atua e taʻitaʻiina o tatou olaga i mea uma, auā e sili atu lona malamalama na i lo i tatou.—Salamo 32:8.

4. E faapefea ona tatou tuu ese le popolevale?

⁴ Peitaʻi, o le musu e fai se mea, po o le popolevale iā i tatou lava, e mafai ona faalavelavea ai lo tatou agaʻigaʻi i luma i le auaunaga i le Atua. (Failauga 11:4) O lea la, a o leʻi maua le olioli moni i le auaunaga i le Atua ma isi, e manaʻomia ona tatou manumalo mai i o tatou lava popolega. Mo se faaaʻoaʻoga, o Erika, na ia mafaufau e auauna i se faapotopotoga e tautatala i se isi gagana. Ae sa popole o ia: ‘Po o le a ou vave masani i le faapotopotoga? Po o le  a ou fiafia i uso? Po o le a latou fiafia mai?’ Na ia faapea mai: “Na iʻu ina ou iloa e tatau ona sili atu loʻu manatu mamafa i oʻu uso na i lo aʻu lava. Na ou faia se faaiʻuga e aua le soona popole iā te aʻu lava, ae avatu laʻu fesoasoani po o le ā lava le mea ou te mafaia. Sa ou tatalo mo le fesoasoani ma faia loa le mea na ou manatu i ai. O le taimi nei, ua ou matuā fiafia lava i laʻu auaunaga i inā.” (Roma 4:20) Ioe, o le tele tatou te auauna ai ma le lē manatu faapito i le Atua ma isi, o le a tatou maua ai le olioli ma le lotomalie.

5. Aiseā e manaʻomia ai le fuafua lelei a o tatou faia le finagalo o le Atua? Faataʻitaʻi mai.

⁵ Ina ia faaauau ona taulau i fuafuaga a le Atua, e manaʻomia ona iloilo lelei tatou faasologa. O se gaoioiga poto le ʻalofia o le faia o ni aitalafu se tele, lea e ono avea ai i tatou ma pologa i lenei faiga o mea, ma faaitiitia ai le tatou saʻolotoga e fai le galuega a le Atua. O loo faamanatu mai e le Tusi Paia: “E auauna foʻi lē no mea i lē ua au mai ai ana mea.” (Faataoto 22:7) O le faatuatua iā Ieova ma faamuamua mea faaleagaga, o le a fesoasoani iā i tatou e taulaʻi atu ai i mea e ao ona fai. Mo se faaaʻoaʻoga, o Guoming ma ona tuafāfine e toʻalua e nonofo faatasi ma le latou tinā i se vaipanoa e taugatā ai le tau o fale, ma e suʻe gatā ni galuega tumau. I le faaaogā lelei o tupe maua ma le vaevae lelei o tupe faaalu, na mafai ai ona maua uma mea manaʻomia e ui e lē o faigaluega nisi o i latou. Na faapea mai Guoming, “I nisi o taimi e lē tofu i matou ma se alagātupe. Ae o loo mafai pea ona faaauau le auaunaga paeonia ma tausia si o matou tinā. Matou te talisapaia le lē manaʻo o le matou tinā e faataulagaina la matou auaunaga paeonia, ae matou ō e saʻili ni mea mananaia ma taugatā mo ia.”—2 Korinito 12:14; Eperu 13:5.

6. O le ā se faaaʻoaʻoga e faaalia ai e mafai ona faaōgatusa o tatou olaga ma le finagalo o le Atua?

⁶ Afai o loo e matuā aafia i galuega faaletino, atonu o le saʻilia o tupe po o isi mea, atonu e manaʻomia ni fetuutuunaʻiga tetele e faamuamua ai le faia o le finagalo o le Atua. O na suiga e lē mafai ona faia i se aso e tasi, ma e fai ma e faia ni mea sesē i au taumafaiga, ae lē faapea ai ua e lē taulau. Seʻi tomānatu iā Koichi, sa iai sona faafitauli o le tele naʻuā o le taimi e faaalu i faafiafiaga. Na suʻesuʻe e Koichi le Tusi Paia a o talavou, ae o le tele o tausaga, na pulea lona olaga e taaloga vitiō. I se tasi aso na faapea ifo Koichi iā te ia lava: ‘O ā aʻu mea o loo fai? Ua sili atu i le 30 oʻu tausaga, ae leai se mea aogā o loo faia i loʻu olaga!’ Sa toe faaauau le suʻesuʻega faale-Tusi Paia a Koichi, ma ia talia ai le fesoasoani mai le faapotopotoga. E ui na faifai malie ona tutupu suiga, ae leʻi faavaivai ai. E ala i le tatalo soo ma faalaeiauga mai isi, na iʻu ina ia manumalo mai lana masaniga leaga. (Luka 11:9) Ua avea nei Koichi ma se auauna o le faiva.

Ia Iloa Ona Paleni

7. Aiseā e manaʻomia ai ona tatou paleni i le faia o le galuega a le Atua?

⁷ O le faia o le finagalo o le Atua e moomia ai se taumafaiga ma se loto atoa. E lē tatau ona tatou faatalalē pe paiē i le faia o le finagalo o le Atua. (Eperu 6:11, 12) Peitaʻi, e lē finagalo Ieova e tatou te soona faia ni taumafaiga e oo ai ina lē lavā le tino, mafaufau, po o faalogona. O le amanaʻia ma le loto maulalo e lē mafai ona faatino se mea i lo tatou lava malosi, o le a viia ai le Atua ma faaalia ai lo tatou paleni. (1 Peteru 4:11) Ua folafola mai e Ieova e na te tuuina mai le malosi e manaʻomia e fai ai lona finagalo, ae lē tatau ona faia se mea e sili atu i le mea tatou te mafaia, ma fai ai mea na te lē o manaʻomia mai iā i tatou. (2 Korinito 4:7) Ina ia faaauau ona auauna iā Ieova e aunoa ma le lē lavā, e manaʻomia ona faaaogā lelei lo tatou malosi.

8. O le ā le mea na tupu i se talavou Kerisiano ina ua taumafai e faaalu lona malosi mo le lalolagi ma Ieova i le taimi e tasi, ma o ā fetuutuunaʻiga na ia faia?

⁸ Mo se faaaʻoaʻoga, o Ji Hye lea e nofo i Asia i sasaʻe, sa faigaluega mo le lua tausaga i se galuega e matuā pisi lava, a o paeonia. Na ia faapea mai: “Sa ou taumafai e tuu loʻu malosi  atoa iā Ieova ma le lalolagi i le taimi e tasi, ae o le faalavelave, sa na o le lima itula ou te moe ai i le pō. Na oo ina leai ni oʻu mafaufauga lelei mo le upu moni ona o le lē lavā o loʻu mafaufau, ma ua faaitiitia loʻu olioli mo mea faaleagaga.” Ina ia auauna iā Ieova ma le ‘loto atoa, agaga atoa, manatu atoa, ma le malosi atoa,’ na saʻilia ai loa e Ji Hye se galuega e lē pisi tele. (Mareko 12:30) Na ia faapea mai: “E ui i omiga mai loʻu aiga e saʻilia le tamaoaiga e sili atu, ae sa ou taumafai e faamuamua le finagalo o le Atua. O loo mafai pea ona lava tupe ou te mauaina, e faatau ai mea manaʻomia o le olaga e pei o laʻei onomea. Ma e manaia le lava lelei o le moe! Ua toe iai loʻu olioli i laʻu auaunaga, ma ua ou toe malosi faaleagaga, ona ua ou lē aafia tele i faatosinaga ma mea e faalavelavea ai o lenei lalolagi.”—Failauga 4:6; Mataio 6:24, 28-30.

9. E faapefea ona aafia tagata i le fanua i a tatou taumafaiga?

⁹ E lē o tagata uma e mafai ona auauna i le Atua o se faievagelia faataimi atoa. Afai o loo e fesagaʻi ma le tino matua, faalētonu le soifua mālōlōina, po o nisi faafitauli, ia e iloa o loo talisapaia e Ieova lou faamaoni ma so o se auaunaga mai le loto e mafai ona e faatinoina. (Luka 21:2, 3) O lea la, e lē tatau iā i tatou ona manatu māmā i aafiaga o a tatou taumafaiga i isi, e tusa lava pe laʻitiiti. Mo se faaaʻoaʻoga, seʻi faapea e lē tele ni fale na tatou asiasi i ai ae leai se tasi e fiafia i la tatou feʻau. Pe a tatou tuua na aiga, atonu e talanoa i ai mo se taimi umi, pe faitau aso foʻi o talanoa lava na aiga e faatatau i la tatou asiasiga, e tusa lava pe afai e leʻi tatala maia le faitotoʻa! Tatou te lē faatalitalia e talileleia e tagata uma le tala lelei, ae iai lava ē o le a talia le feʻau. (Mataio 13:19-23) E mulimuli ane, e talia e nisi le tala lelei pe a iai suiga i le tulaga o mea i le lalolagi po o latou olaga foʻi. Po o le ā lava le tulaga e iai, o le faia o le mea tatou te mafai i le auaunaga i tagata i le lautele, ua tatou faia le galuega a le Atua. Auā o i tatou “o le ʻau faigaluega i [tatou] faatasi ma le Atua.”—1 Korinito 3:9.

10. O ā avanoa e mafai ona maua e tagata uma o le faapotopotoga?

¹⁰ E lē gata i lea, e mafai foʻi e i tatou uma ona fesoasoani i o tatou aiga, o uso ma tuafāfine faaleagaga. (Kalatia 6:10) O aafiaga lelei i isi o mea tatou te fai, atonu e mauaa pe umi foʻi ona iai. (Failauga 11:1, 6) Pe a maelega toeaina ma auauna o le faiva i le faatinoina  o a latou tiute, latou te saosaolaumea i le mālōlōina faaleagaga ma le mautū o le faapotopotoga, ma faateleina ai galuega faa-Kerisiano. Ua faamautinoa mai iā i tatou, pe a ‘alualu lo tatou faamalosi i le galuega a le Alii,’ o le a ‘lē se mea faalēaogā lo tatou tautigā’ i galuega o loo tatou fai.—1 Korinito 15:58.

Avea le Faia o le Finagalo o le Atua ma Au Galuega

11. E ese mai le galue i lau lava faapotopotoga, o ā nisi faaeaga o loo avanoa mai?

¹¹ I le avea ma se Kerisiano, tatou te ola fiafia, ma iai se faanaunauga e viia le Atua i mea uma tatou te faia. (1 Korinito 10:31) Pe a tatou faamaoni i le talaʻia o le tala lelei o le Malo ma aʻoaʻo isi e tausi i mea uma e pei ona faatonuina e Iesu, o le a tele ni avanoa matagofie e faalautele ai le tatou auaunaga. (Mataio 24:14; 28:19,20) E lē gata i le galue i lau lava faapotopotoga, atonu tatou te maua ni avanoa e auauna ai i mea e manaʻomia tele ai le fesoasoani, pe i se isi oganuu, gagana, po o se isi atunuu. O toeaina ma auauna o le faiva agavaa e nofofua, e mafai ona valaaulia e auai i le Aʻoga mo Toleniga i le Faiva, a māeʻa le aʻoga ona auauna lea i faapotopotoga e manaʻomia ai le fesoasoani a Kerisiano taʻumatuaina, po o latou atunuu po o isi vaipanoa. O ulugalii faaipoipo o loo i le auaunaga faataimi atoa, e mafai ona agavaa e aʻoaʻoina i Kiliata o ni misionare ma auauna ai i atunuu i fafo. O loo faaauau pea ona manaʻomia ni tagata e tauofo e faia le tele o galuega i Peteli, le fausia ma le tausia o maota mo sauniga, ma ofisa o lālā.

12, 13. (a) E faapefea ona e filifili po o ā auaunaga e te faia? (e) Faamatala mai pe faapefea ona faaaogā le tomai mai le tasi tofiga mo le isi.

¹² O fea o nei avanoa e tatau ona e filifilia? I le avea ma auauna tuuina atu a Ieova, ia vaavaai atu iā te ia ma lana faalapotopotoga mo taʻiala. O le a fesoasoani lona “Agaga lelei” iā te oe e faia se faaiʻuga saʻo. (Neemia 9:20) O se tofiga e tasi e oo ina tatala ai le avanoa mo le faia o le isi tofiga, ma o le poto masani ma le tomai e maua mai ai atonu e aogā i se isi tofiga mulimuli ane ai.

¹³ Mo se faaaʻoaʻoga, o Tenise ma lana avā o Sieni, e masani ona la lagolagoina le fausiaina o Maota mo Sauniga. I le māeʻa o le Afā o Katerina i le itu i saute o le Iunaite Setete, na la tauofo e fesoasoani i ē o loo mafatia. Na lipotia mai e Tenise: “I le faaaogāina o le tomai na maʻua maua mai i le fausiaina o Maota mo Sauniga e fesoasoani ai i uso, na maʻua maua ai le olioli tele. E faagaeetia i maʻua i le faaalia  o le talisapaia e i latou na ma fesoasoani i ai. E laʻitiiti le fesoasoani na mafai ona avatu e isi vaega i le toe fausia o fale. E 5,300 fale na toe fausia pe faaleleia e Molimau a Ieova, ma le tele o Maota mo Sauniga. Na mātauina e tagata nei galuega, ma faaalia ai le naunau i la tatou feʻau.”

14. O le ā e mafai ona e fai, pe a e fia auai i le auaunaga faataimi atoa?

¹⁴ Pe mafai ona e faia le finagalo o le Atua e ala i le filifilia o le auaunaga faataimi atoa e avea ma au galuega? Afai o lea, e tele ni faamanuiaga o le a e mauaina. A lē tusa ma lou tulaga i le taimi nei, atonu e manaʻomia ni fetuutuunaʻiga. Tatalo e pei o Neemia ina ua leva ona ia manaʻo e talia se tofiga tāua: “Le Alii [Ieova] e, . . . ia e faamanuia lava i lau auauna.” (Neemia 1:11) I lou talitonu i “Lē faafofoga tatalo,” ia ō faatasi au talosaga ma gaoioiga. (Salamo 65:2) Ina ia faamanuia e Ieova au taumafaiga e auauna iā te ia ma le loto atoa, e tatau ona muaʻi faia ni au taumafaiga. O le taimi lava e te filifili ai e amata lau auaunaga faataimi atoa, ia tausisi i lau faaiʻuga ua fai. A o faagasolo taimi, o le a tuputupu aʻe lou poto masani, ma o le a faateleina lou olioli.

Se Olaga e Aogā Moni

15. (a) E faapefea ona tatou maua aogā mai le talatalanoa ma le faitau i tala o ē ua leva ona auauna iā Ieova? (e) Faamatala mai se talaaga o se soifuaga na faalaeiauina ai oe.

¹⁵ O ā iʻuga e mafai ona e faatalitalia i le faia o le finagalo o le Atua? Talatalanoa ma i latou ua leva ona auauna iā Ieova, aemaise ē ua tele tausaga i le auaunaga faataimi atoa. Maʻeu ni olaga faamalieina toe aogā ua latou maua! (Faataoto 10:22) O le a latou faamautinoa atu iā te oe, e leʻi tuulafoaʻia lava i latou e Ieova i le faaauau pea ona maua mea manaʻomia ma isi foʻi mea, e tusa lava po o ā tulaga faigatā sa i ai. (Filipi 4:11-13) Mai le 1955 e oo i le 1961, na lomia faasolosolo ai i le Olomatamata faa-Peretania talaaga o soifuaga o ē na faamaoni i lalo o le ulutala, “Ola e Tusa ma Fuafuaga o Loʻu Olaga.” Talu mai lenā taimi, e faitau selau isi talaaga o soifuaga ua lomia. O loo atagia i tala taʻitasi le agaga maelega ma le olioli, lea e faamanatu mai ai mea o loo i le tusi o Galuega, i le Tusi Paia. O le faitauina o na tala faagaeeloto, e uunaʻia ai i tatou e faapea atu: ‘O le ituaiga olaga lea ou te fia ola ai!’

16. E faapefea ona uigā ma olioli le olaga o se Kerisiano?

¹⁶ Na faapea mai Arona lea na taʻua i le amataga o le mataupu: “E masani ona ou feiloaʻi i talavou i Aferika o loo feoaʻi solo e saʻili pe iai se uiga o lenei olaga. O le toʻatele e lē maua se uiga. A o matou, o loo matou faia le finagalo o le Atua e ala i le faalauiloaina o le tala lelei o le Malo, ma o loo matou olioli i se olaga pisi ma se olaga uigā. Ua matou molimauina le tele o le manuia po o le fiafia o lē na te foaʻi atu, i lo lē na te talia mai.”—Galuega 20:35.

17. Aiseā e tatau ai ona tatou faia le finagalo o le Atua i le taimi nei?

¹⁷ Ae faapefea oe? O ā fuafuaga o loo e faia? A leai sou sini mautū faaleagaga, o le a tele isi mea e lolofi mai e faatumu lenā avanoa. Aiseā e maʻimau ai lou ola o se mea e faapelepele i ai i mea o loo faatāuaina e le lalolagi a Satani? E lē o toe umi ae oo mai le “puapuaga tele,” e lē toe aogā le tamaoaiga ma tulaga taualoa o lenei lalolagi. Na o le tatou faiā lava ma Ieova o le a taulia. Maʻeu lo tatou talisapaia o le tatou auaunaga i le Atua ma isi, ona ua tatou faia atoatoa le finagalo o le Atua i o tatou olaga!—Mataio 24:21; Faaaliga 7:14, 15.

[Faaopoopoga i lalo]

Pe Mafai Ona E Faamatala?

• O ā faalogona o Ieova e tusa ma la tatou auaunaga iā te ia?

• E faapefea i lo tatou faia o ni gaoioiga talafeagai ma paleni ona fesoasoani e auauna ai i le Atua ma isi?

• O ā avanoa o loo tatala mai mo i tatou?

• E faapefea ona tatou ola i se olaga uigā i le taimi nei?

[Fesili mo le Suʻesuʻega]

[Ata i le itulau 23]

E manaʻomia le paleni ina ia faaauau ai ona auauna iā Ieova ma le loto atoa

[Ata i le itulau 24]

E tele vala o le auaunaga paia