Fesili Mai le ʻAufaitau

Pe na sesē Iakopo ina ua ia faafoliga iā Esau, e pei ona tusia i le Kenese 27:18, 19?

Atonu ua e masani i lenei tala. Ina ua toeaina Isaako, sa ia faatonuina Esau e tuli mai se manu o le vao ma taʻu atu iā te ia: “Ou te ʻai ai, ina ia ou faamanuia atu iā te oe manū ou te leʻi oti.” Ina ua faalogo Repeka i upu a lana tane, ona ia saunia lea o se meaʻai manogi ma faatonuina Iakopo i le faapea atu: ‘Ia e avatu i lou tamā, e ʻai ai o ia, ina ia faamanuia mai o ia iā te oe manū e leʻi oti o ia.’ Ona faaofuina lea o Iakopo i ofu lelei o Esau ma o loo iai paʻu o le tamaʻi oti i lona ua ma ona lima, ona ia alu atu lea i lona tamā ma le meaʻai manogi. Ina ua fesili atu Isaako iā te ia, “Loʻu atalii e, o ai ea oe?” Na tali atu Iakopo: “O aʻu o Esau o lau ulumatua.” Na talitonu Isaako iā te ia, ma faamanuia atu loa iā te ia.—Kenese 27:1-29.

E lē o taʻu maia e le Tusi Paia le māfuaaga na faia ai e Repeka ma Iakopo lea gaoioiga, ae o loo faailoa mai o se mea na tupu faafuaseʻi. E ao ona tatou iloa e lē faapea o faamaonia pe e teena e le Tusi Paia gaoioiga a Repeka ma Iakopo, ma e la te leʻi faia foʻi se pepelo ma se taufaavalea. Ae peitaʻi, o loo aumaia e le Tusi Paia faamatalaga e faatatau i lea tulaga.

Muamua lava, o loo faaalia manino mai e le tala le iai iā Iakopo o le aiā e maua ai faamanuiaga mai lona tamā; ae lē o Esau. I le taimi muamua atu, na faatau mai e Iakopo le tofi o le ulumatua mai lona uso masaga, o lē sa lē faatāuaina lona tofi ona o lona manaʻo i le ʻaiga e tasi e tali ai lona fia ʻai. Na ‘faalēaogāina e Esau lona tofi o le ulumatua.’ (Kenese 25:29-34) Ina ua faalatalata atu i lona tamā, na saʻilia e Iakopo le faamanuiaga e tatau ona ia maua.

Lona lua, ina ua iloa e Isaako o Iakopo lea na ia ave i ai le faamanuiaga, e leʻi manaʻo o ia e toe suia lenā tulaga. Atonu na ia manatua fetalaiga a Ieova na taʻu atu iā Repeka a o leʻi fanau mai le masaga, e faapea: “E nofo pologa [pe auauna] foʻi le ulumatua i le uii.” (Kenese 25:23) E mataʻina foʻi lea tulaga ina ua tuu atu Iakopo e malaga atu i Karana, ma sa faamanuia atili atu Isaako iā te ia.—Kenese 28:1-4.

Ma le faamaoniga mulimuli, e ao ona manatua sa malamalama lelei ma sa i le finagalo o Ieova nei mea uma na tutupu. Na fesootaʻi atu le faamanuiaga lea na avatu e Isaako, i le folafolaga na taʻu atu e Ieova iā Aperaamo. (Kenese 12:2, 3) Pe ana lē finagalo le Atua e tuu atu le faamanuiaga iā Iakopo, e mautinoa lona taofia o lenā mea e tupu. Ae peitaʻi, sa faamaonia e Ieova le tuu atu o le faamanuiaga iā Iakopo i le faapea atu: “O oe foʻi ma au fanau e manuia ai aiga uma o le lalolagi.”—Kenese 28:10-15.