“Po o le ā le Upu Moni?”

O LE fesili faaamuamu lenā a le Kovana Roma o Ponotio Pilato iā Iesu. Sa leʻi manaʻo Pilato i se tali, ma e leʻi tuu atu e Iesu se tali iā te ia. Atonu o le manatu o Pilato i le upu moni, o se mea e faigatā ona faamalamalamaina.—Ioane 18:38.

E toʻatele foʻi tagata i aso nei ua latou faaalia lenei uiga lē migao agaʻi i le upu moni, e aofia ai taʻitaʻi lotu, o tagata atamamai ma le ʻaufaipolotiki. Latou te manatu i le upu moni—aemaise lava le mea moni i tulaga tau amio ma le faaleagaga—o se mea e lē tumau ae mafai ona suia. O lona uiga ua latou manatu, e mafai e tagata ona latou filifili pe fai le mea lelei pe fai le mea leaga. (Isaia 5:20, 21) Ua faatagaina foʻi e lenā manatu tagata ina ia latou lafoaʻi tapulaa na faatāua e augātupulaga ua mavae, ma ua latou vaai i ai o ni mea lē aogā.

E lelei ona mātau le manatu na māfua ai le fesili a Pilato. Na taʻua e Iesu: “O le mea lenei na fanau mai ai aʻu, o le mea foʻi lenei na ou sau ai i le lalolagi, ina ia ou molimau i le upu moni.” (Ioane 18:37) Sa leʻi manatu Iesu i le upu moni o se mea e lē manino ma faigatā ona malamalama i ai. Na ia folafola i ona soo: “E iloa foʻi e outou le mea moni, e tuu saʻoloto foʻi outou e le upu moni.”—Ioane 8:32.

O fea o loo maua ai le upu moni? I se tasi taimi, na taʻua e Iesu i lana tatalo i le Atua: “O lau afioga o le upu moni lea.” (Ioane 17:17) O loo faailoa mai e le Tusi Paia, le tusi na faagaeeina e le Atua, le upu moni lea e aumaia taʻitaʻiga aogā aemaise le faamoemoe mautinoa mo le lumanaʻi—le ola e faavavau.—2 Timoteo 3:15-17.

E leʻi talia e Pilato le avanoa e na te aʻoaʻoina ai le upu moni. Ae faapefea oe? Aiseā e lē talosaga atu ai i Molimau a Ieova, e faamatala atu iā te oe le uiga o le “upu moni” lea sa aʻoaʻoina e Iesu? O le a latou fiafia e faasoa atu le upu moni iā te oe.