Faalogo i Lou Loto Fuatiaifo

‘E fai e nuu ese e lē o i ai le tulafono a le Atua mea e tusa ma le tulafono.’—ROMA 2:14.

1, 2. (a) Ua faapefea ona gaoioi le toʻatele ona o lo latou manatu mamafa i isi? (e) O ā faaaʻoaʻoga faale-Tusi Paia o loo faataʻitaʻia ai le manatu mamafa i isi?

NA OSO le maʻi māliu o se alii e 20 ona tausaga, ma paʻū ai i luga o ālā paʻu o nofoaafi. Ina ua iloa atu e se tamāloa le mea ua tupu, ona faamamulu lea o lima o si ana fanau teine laiti e toʻalua ae oso i lalo e fesoasoani. Na ia toso atu le tamāloa i le va o ālā paʻu o le nofoaafi, ma taoto i ona luga e puipuia ai o ia mai le nofoaafi o loo sau. Na taʻua e nisi tagata le tamāloa lenei o se toa, ae na ia faapea mai: “E ao ona e fai le mea tonu e tatau ona fai. Na ou faia ona o loʻu agalelei. Ae lē o se mea ina ia lauiloa ai po o le maua ai o se viiga.”

² Atonu e te iloa se tasi na lamatia lona ola a o ia fesoasoani i isi. E toʻatele tagata na latou faia faapea i le taimi o le Taua Lona Lua a le Lalolagi, ona sa latou faalalafi tagata ese. Seʻi manatu foʻi i le mea na tupu i le aposetolo o Paulo ma isi tagata e toʻa 275 na afātia i Melita, lea e latalata i Sicily. Na ō ane tagata o le nuu ma fesoasoani i nei tagata ese, ma e uiga ese le “alolofa” na faaalia e nei tagata. (Galuega 27:27–28:2) Ua tatou iloa foʻi le faaaʻoaʻoga a le teineitiiti Isaraelu, atonu e na te leʻi tuua lona ola i se tulaga lamatia, ae na ia faaalia le agalelei ma le manatu mamafa, mo le lelei o le tagata Suria na aumaia faatagataotauaina o ia mai Isaraelu. (2 Tupu 5:1-4) Seʻi mafaufau foʻi i le talafaatusa ua lausilafia a Iesu, i se Samaria agalelei. Sa lē amanaʻia e le ositaulaga ma le sā Levī, se tagata Iutaia ua toetoe lava a oti, ae na faia e le tagata Samaria se taumafaiga uiga ese e fesoasoani ai i le tagata Iutaia. O lenei talafaatusa, ua pāʻia ai loto o tagata i le tele o aganuu mo le tele o senituri, ona o le mea na tupu.—Luka 10:29-37.

3, 4. Ona o le taatele o uiga lē manatu faapito, o le ā la ua tatou iloa ai e faatatau i le aʻoaʻoga o le evolusione?

³ O le mea moni, o loo tatou ola i “aso faigatā”; ma e toʻatele tagata e “faasauā” ma “ʻinoʻino i le amio lelei.” (2 Timoteo 3:1-3) Ae pe tatou te lē o mātauina ea ni gaoioiga agalelei, lea atonu na aogā iā i tatou? O le uunaʻiga e fesoasoani atu i isi, e ui lava e lamatia ai, ua matuā taatele, ma ua manatu i ai nisi o le faaalia lea o lagona “mutimuti alofa.”

⁴ O le uiga o le fia fesoasoani atu e ui lava e lamatia ai, o loo vaaia i le tele o atunuu ma aganuu, ma e feteenaʻi ma le manatu faapea, o le tagata na tupuga mai i se manu. Na taʻua e Francis S. Collins, o se tagata e suʻesuʻeina le vaega o le sela lea e pulea amioga ma le tuputupu aʻe o se meaola, ma na ia taʻitaʻia taumafaiga a le Iunaite Setete i le suʻesuʻeina o le DNA o le tagata e faapea: “O uiga lē manatu faapito o loo faaalia e tagata, ua faigatā i tagata e talitonu i le evolusione ona faafetaui atu i a latou aʻoaʻoga. . . . E lē mafai ona latou faamalamalamaina le uiga o le lē manatu faapito ona e latou te talitonu, e faaauau ona ola le tino ona e manatu faapito sela o loo iai.” Na ia faapea mai foʻi: “O nisi tagata ua iā i latou lea uiga lē manatu faapito ma ua fesoasoani i tagata e lē o ni o latou tagata ma e matuā lē tutusa lava mea e latou te fiafia i ai. . . . O lea uiga o le lē manatu faapito, e foliga mai e lē o mafai ona faamatalaina e le aʻoaʻoga na tupuga mai tagata mai se manu.”

“Le Loto Fuatiaifo”

5. O le ā e masani ona mātauina i tagata?

⁵ Na taʻua e Dr. Collins se tasi o vala o lo tatou lē manatu faapito: “E pei o loo musumusu mai lo tatou loto fuatia ifo, e fesoasoani i isi e tusa lava pe leai se mea e tatou te maua mai ai.” *  O lona taʻua o le “loto fuatiaifo,” ua toe faamanatu mai ai iā i tatou le mea moni na faamamafa e le aposetolo o Paulo e faapea: “Auā pe a fai fua e nuu ese e lē o i ai le tulafono o mea e tusa ma le tulafono, e ui ina lē o i ai le tulafono, ua avea i latou ma tulafono iā te i latou; o i latou ia ua iloa mai ai le galuega o le tulafono ua tusia i o latou loto, e ō faatasi ai foʻi o latou loto fuatia ifo, o loo fefaaleagaʻi foʻi, pe fefaatonuaʻi o latou manatu.”—Roma 2:14, 15.

6. Aiseā e ao ai ona tali uma atu tagata i Lē na faia i latou?

⁶ I le tusi a Paulo i tagata i Roma na ia faaalia ai faapea, e ao i tagata ona tali atu i le Atua ona o loo faamaonia i mea o loo vaaia, o loo soifua o Ia, ma iloa ai ona uiga. O le tulaga lenā ua iai “talu ona faia o le lalolagi.” (Roma 1:18-20; Salamo 19:1-4) O le mea moni, e toʻatele tagata ua latou lē amanaʻia Lē na faia i latou ma ola i se olaga leaga. Ae peitaʻi, o le finagalo o le Atua, ia talia e tagata lona tulaga amiotonu ma ia salamō mai mea leaga o loo latou faia. (Roma 1:22–2:6) Sa iai i tagata Iutaia se māfuaaga tāua e latou te faia ai faapea—na tuu atu e le Atua iā i latou le Tulafono e ala atu iā Mose. E oo foʻi i tagata e leʻi tuuina atu i ai le “afioga a le Atua,” e ao lava ona latou iloa o loo soifua o ia.—Roma 2:8-13; 3:2.

7, 8. O le ā le taatele o le lagona o le faia o le mea ua saʻo, ma o le ā o loo faasino atu i ai lea manatu?

⁷ O se māfuaaga malosi e ao ai i tagata uma ona iloa le Atua ma gaoioi e talafeagai ai, ona o le lagona o loo i totonu iā i latou o le mea e saʻo ma le mea e sesē. O lo tatou lagona o le mea ua tonu, o se faailoaga lea o le iai o se loto fuatiaifo iā i tatou. Faaata i lou mafaufau le mea lenei: O loo tutū tamaiti i se laina e faatali le taimi e oo mai ai le faasologa e faaaogā le suigi. Ae teʻi ua alu atu se tasi tamaitiiti i luma o le laina, e lē kea i ē o loo faatalitali. E toʻatele ua faapea atu, E lē saʻo!’ Ae seʻi manatu ifo la oe i le mea lenei, ‘I le tele o tamaiti, o loo mafai ona faaali saʻo mai o latou lagona e tusa o le mea ua tonu, aiseā ua faapea ai?’ O lo latou faia faapea, e faaalia ai o latou lagona i amioga tatau. Na tusi Paulo e faapea: “Pe a fai fua e nuu ese e lē o i ai le tulafono o mea e tusa ma le tulafono.” E leʻi fai mai o ia, “Afai,” peiseaʻī o se mea e seāseā tupu. Ae ua ia fai mai “pe a,” e taʻu mai ai, o se mea e tupu soo. O lona uiga, e faia e tagata “mea e tusa ma le tulafono,” ona ua uunaʻia i latou e lo latou lagona o le mea ua tatau, ma gaoioi e ōgatusa ma mea o loo tatou faitau i ai i le tulafono a le Atua.

⁸ Ua vaaia lenei lagona tau i amioga tatau i le tele o atunuu. Na tusi se polofesa mai Cambridge e faapea, i tapulaa a tagata Papelonia, Aikupito, ma Eleni faapea ma tagata Apoliki o Ausetalia ma tagatānuu lava ia o Amerika, o loo aofia ai le “taʻusalaina o le faileagaina o tagata, fasioti tagata, faiga taufaasesē ma le pepelo, e tutusa foʻi tapulaa mo le agalelei i tagata ua loa le soifua, i tagata talavou, faapea ma tagata vāivai.” Ma na tusi Dr. Collins e faapea: “O le manatu i le saʻo ma le sesē e foliga mai e taatele i le lalolagi i tagata uma o so o se ituaiga.” Pe lē o faamanatu mai ai ea iā te oe le Roma 2:14?

Lou Loto Fuatiaifo —E Faapefea Ona Gaoioi?

9. O le ā le loto fuatiaifo, ma e faapefea ona fesoasoani iā te oe a o e leʻi faia se gaoioiga?

⁹ Ua faaalia i le Tusi Paia faapea o le loto fuatiaifo, o se mea e pei o se fua o loo i totonu e fua i ai au gaoioiga. E tai pei o se leo o loo i totonu o oe o loo taʻu atu po o saʻo po o sesē se gaoioiga o loo e fai. Na taʻua e Paulo lea leo i totonu o ia e faapea: “Ua molimau mai iā te aʻu loʻu loto fuatia ifo i le Agaga Paia.” (Roma 9:1) Mo se faaaʻoaʻoga, atonu e tautala muamua mai lenei leo a o e mafaufau pe fai se mea e aafia ai tulaga tau i amioga tatau. E fesoasoani lou loto fuatiaifo iā te oe e iloilo se gaoioiga o le a fai, ma taʻu atu le mea o le a oo iā te oe pe a e faia lenā mea.

10. O le ā le auala e galue ai le loto fuatiaifo?

¹⁰ O le tulaga masani, e te lagona lou loto fuatiaifo pe a uma ona faia se mea. A o fesolasolataʻi Tavita mai le tupu o Saulo, sa maua e Tavita se avanoa e faia ai se gaoioiga lē migao i le tupu ua faauuina e le Atua, ma na ia faia faapea. Ina ua uma ona ia faia lenā mea, “mulimuli ane ua tuia le loto o Tavita iā te ia.” (1 Samuelu 24:1-5;  Salamo 32:3, 5) E lē o iai le upu “loto fuatiaifo” i lea faamaumauga; ae o le lagona lenā o Tavita na iai—o le tali mai lenā a lona loto fuatiaifo. Ua tatou oo uma lava i se loto fuatiaifo ae tigā. E lagona le atuatuvale ma popole i le auala na tatou gaoioi ai, ona o se mea na tatou faia. O nisi tagata na leʻi totogia a latou lafoga, sa lagona le atuatuvale ma toe totogi mulimuli ane a latou aitalafu. Ae o isi, ua uunaʻia e taʻu atu i a latou paaga la latou agasala, o le faia o le mulilua. (Eperu 13:4) Ae peitaʻi, a ola se tagata e ōgatasi ma lona loto fuatiaifo, e na te lagona le faamalieina ma le toʻafilemu o le mafaufau.

11. Aiseā e ono lamatia ai le avea o lou loto fuatiaifo ma ou taʻiala? Faataʻitaʻi.

¹¹ O lea la, pe mafai ona avea lo tatou loto fuatiaifo ma o tatou taʻiala? E lelei ona faalogo atu i o tatou loto fuatiaifo, ae e mafai foʻi ona taʻitaʻisesēina ai i tatou. Ioe, o le leo o ‘le tagata i totonu’ e mafai ona tatou sesē ai. (2 Korinito 4:16) Seʻi manatu mo se faataʻitaʻiga. Ua taʻu mai e le Tusi Paia iā i tatou Setefano, o ia o se soo faamaoni o Keriso e “tumu o ia i le alofa tunoa ma le mana.” Na lafo e nisi o tagata Iutaia Setefano i tua o Ierusalema ma fetogi iā te ia ma oti ai. O Saulo lea na (avea mulimuli ane ma aposetolo o Paulo), sa tū ai i talaane ma ‘loto gatasi i le fasiga’ o Setefano. E foliga mai na faatalitonuina na tagata Iutaia e faapea, na latou faia se gaoioiga saʻo, lea e leʻi atuatuvale ai o latou loto fuatiaifo. Atonu o le tulaga foʻi lenā sa iai Saulo, auā ina ua mavae lenā mea, “ua mapugatamaʻi pea o Saulo i le faamataʻu ma le fasioti i le ʻau soo o le Alii.” E manino mai, e leʻi saʻo le leo na tautala mai ai lona loto fuatiaifo.—Galuega 6:8; 7:57–8:1; 9:1.

12. O le ā se tasi o auala ua taaʻina ai o tatou loto fuatiaifo?

¹² O le ā sa ono taaʻina ai le loto fuatiaifo o Saulo? O se tasi o auala, atonu o le faifaimea faatasi ma isi. O le toʻatele o i tatou, ua tatou talanoa i le telefoni i se tagata e talitutusa lona leo ma le leo o lona tamā. Atonu ua maua lelei e le atalii le leo o lona tamā, ae atonu foʻi ua taaʻina i le auala e tautala ai lona tamā. I se tulaga talitutusa, atonu na taaʻina Saulo ona o lona faifaimea faatasi ma tagata Iutaia o ē na ʻinoʻino iā Iesu ma tetee i ana aʻoaʻoga. (Ioane 11:47-50; 18:14; Galuega 5:27, 28, 33) Ioe, atonu na taaʻina le loto fuatiaifo o Saulo, e ana aumea.

13. E faapefea ona aafia le loto fuatiaifo o se tasi ona o le siʻomaga o loo soifua ai?

¹³ E mafai ona aafia le loto fuatiaifo ona o tū ma aganuu masani po o le siʻomaga o loo soifua ai se tasi, e pei lava ona aafia le auala e tautala ai se tasi i le siʻomaga o loo nofo ai ma le auala e faaleo ai upu. (Mataio 26:73) Atonu o le tulaga lenā na tupu i tagata Asuria anamua. Na lauiloa i latou o tagata faitaua, ma o ata na latou vaneina, o loo faailoa ai lo latou faapuapuagatia o tagata na latou puʻe faatagataotauaina. (Nauma 2:11, 12; 3:1) O tagata Nineva i aso o Iona o loo faamatalaina faapea, e lē iloa le eseesega i “o latou lima taumatau po o latou lima tauagavale.” O lona uiga, sa leai so latou malamalamaga saʻo mo le faavasegaina o le mea e lelei ma le mea e lē lelei i le silafaga a le Atua. Seʻi manatu la i le auala na aafia ai le loto fuatiaifo o se tasi na soifua aʻe i lenā siʻomaga i Nineva! (Iona 3:4, 5; 4:11) I se tulaga tutusa foʻi i aso nei, o le loto fuatiaifo o se tasi, e mafai ona aafia i uiga o i latou o loo latou faifaimea faatasi.

Le Auala e Faaleleia ai le Loto Fuatiaifo

14. Ua faapefea ona faaatagia mai e lo tatou loto fuatiaifo le manatu o loo taʻua i le Kenese 1:27?

¹⁴ Na saunia e Ieova le meaalofa o le loto fuatiaifo mo Atamu ma Eva, ma ua tatou mauaina le loto fuatiaifo mai iā i laʻua. Ua taʻu mai e le Kenese 1:27 iā i tatou e faapea, ua faia le tagata i le faatusa o le Atua. E lē o le uiga o lenā mea o se faatusa faaletino o le Atua, ona o ia o le agaga ae o tatou e iai o tatou tino. Ua faia i tatou i le faatusa o le Atua, ma ua iā i tatou ona uiga, e aofia ai le iloa o amioga tatau ma se loto fuatiaifo o loo galue. O lenei mea moni, ua iloa ai se tasi o auala e faamalosia ai lo tatou loto fuatiaifo, ma avea ma mea e maufaatuatuaina. O le uiga o lenā mea, o le aʻoaʻoina atili e faatatau i Lē na faia i tatou, ma faalatalata atu iā te ia.

15. O le ā se auala e tatou te maua ai aogā o le iloa lelei o lo tatou tamā?

 ¹⁵ Ua faaalia i le Tusi Paia, o Ieova ua pei o se tamā iā i tatou. (Isaia 64:8) O Kerisiano faamaoni, po o lo latou faamoemoe e i le lagi po o le ola i le lalolagi parataiso, e mafai ona taʻua le Atua o lo tatou Tamā. (Mataio 6:9) E tatau ona tatou mananaʻo e faalatalata atu atili i lo tatou Tamā, ma aʻoaʻoina lana silafaga i mea, faapea ma ana tapulaa. (Iakopo 4:8) E toʻatele e latou te lē fiafia e faia faapea. Ua pei i latou o tagata Iutaia ia na fetalai i ai Iesu: “E leʻi faalogo lava outou i lona siʻufofoga, e leʻi vaavaai atu foʻi i lona tino mai. E lē tumau foʻi lana afioga i totonu iā te outou.” (Ioane 5:37, 38) E tatou te leʻi faalogo lava i le leo moni o le Atua, ae mafai ona tatou iloa lona finagalo i le faitauina o lana afioga ma oo ina lagona mea e pei ona ia lagona ai.

16. O le ā ua faaalia i le tala iā Iosefa e faatatau i le toleniga o lo tatou loto fuatiaifo ma faalogo atu i ai?

¹⁶ O le faamaumauga i le mea na tupu iā Iosefa i le fale o Potifara ua faaalia ai lenā tulaga. Na taumafai le avā a Potifara e faatosina Iosefa. E ui na ia soifua i se vaitaimi e leʻi tusia ai se tusi o le Tusi Paia, ma e leʻi aumaia foʻi Tulafono e Sefulu, ae na tali atu Iosefa i le faapea atu: “Pe faapefea ona ou faia lenei mea leaga tele ma ou agasala ai i le Atua?” (Kenese 39:9) E leʻi tali atu faapena ina ia faamalieina ai lona aiga; auā sa mamao lava le mea na iai i latou. O lona manaʻoga autū ia faafiafia le finagalo o le Atua. Na iloa e Iosefa tapulaa a le Atua mo faaipoipoga—o le tane ma le avā, ua avea i laʻua o le “tino e tasi.” Ma atonu na faalogo o ia i lagona na oo iā Apimeleko ina ua ia iloa o Repeka e faaipoipo—ma o le avea o ia ma ana avā e sesē, ma e oo mai ai se faasalaga i ona tagata. Ioe, na faamanuia e Ieova le mea na tupu, ma faaalia ai lana silafaga e tusa o le mulilua. O le iloa e Iosefa o na mea uma na tutupu, na faamalosia ai lona loto fuatiaifo, ma uunaʻia ai o ia e teena le faia o amioga lē mamā i feusuaʻiga.—Kenese 2:24; 12:17-19; 20:1-18; 26:7-14.

17. Ina ia pei i tatou o lo tatou Tamā, aiseā ua sili atu ai i tatou i lo Iosefa?

 ¹⁷ O le mea moni, ua sili atu lo tatou tulaga i le taimi nei. Ua iā i tatou le Tusi Paia atoa, lea e tatou te aʻoaʻoina mai ai mafaufauga ma lagona o lo tatou Tamā, e aofia ai mea e na te talia ma mea e na te lē taliaina. O le tele e tatou te iloa ai le Tusi Paia, o lo tatou latalata atu foʻi lenā i le Atua ma tatou pei o ia. A o tatou faia lenā mea, o le a tai pei ai lava uunaʻiga a lo tatou loto fuatiaifo o le auala e mafaufau ai lo tatou Tamā. O le a faaauau pea ona ōgatusa na uunaʻiga ma lona finagalo.—Efeso 5:1-5.

18. E ui lava i mea na tutupu i aso ua mavae, ae o le ā e mafai ona tatou fai e faaleleia atili ai le maufaatuatuaina o lo tatou loto fuatiaifo?

¹⁸ Ae faapefea le taaʻina o tatou loto fuatiaifo ona o le siʻomaga na tatou ola aʻe ai? E ono taaʻina i tatou i mafaufauga ma amioga a o tatou tauaiga ma le siʻomaga na tatou ola aʻe ai. Atonu la ua lē gaoioi po ua faasesēina foʻi o tatou loto fuatiaifo. Ma ua atagia mai ai “loto fuatiaifo” o tagata o loo tatou faifaimea faatasi. E moni e lē mafai ona tatou suia mea na tutupu i aso ua mavae; ae peitaʻi, e mafai ona tatou filifili a tatou aumea ma se siʻomaga e iai se aafiaga lelei i lo tatou loto fuatiaifo. O se laasaga tāua, o le aufaatasi e lē aunoa ma Kerisiano tuutoina atu ua loa ona taumafai ia pei o lo latou Tamā. O sauniga a le faapotopotoga, e aofia ai le auaufaatasi ma i latou a o leʻi faia le sauniga faapea ma le taimi e māeʻa ai, e maua ai avanoa e sili ona lelei mo lenā tulaga. E tatou te mātauina ai le auala e mafaufau ma tali atu ai uso Kerisiano, e faavae i le Tusi Paia, e aofia ai lo latou faalogo a o faailoa mai e o latou loto fuatiaifo le silafaga a le Atua ma ona ala. A o faagasolo taimi, e mafai ona fesoasoani iā i tatou e faaōgatasi ai o tatou loto fuatiaifo ma mataupu silisili o le Tusi Paia, ma faaatagia lelei atu ai uiga o le Atua na faia i tatou. Pe a tatou fetuunaʻi atu le leo i totonu, i mataupu silisili a lo tatou Tamā ma gauaʻi atu i taaʻiga lelei a uso Kerisiano, o le a oo ina maufaatuatuaina o tatou loto fuatiaifo, ma o le a tatou faalogo atu i le mea o loo fai mai ai.—Isaia 30:21.

19. O ā vala o lo tatou loto fuatiaifo e manaʻomia ona tatou uaʻi atu i ai?

¹⁹ E ui i lea, o loo faigatā i nisi ona faalogo atu i o latou loto fuatiaifo mai lea aso i lea aso. O le a iloiloina i le mataupu o loo sosoo mai nisi o tulaga na fesagaʻi ma Kerisiano. O le iloiloina o na tulaga, e tatou te vaai manino ai i le matafaioi a lo tatou loto fuatiaifo, le māfuaaga e eseese ai loto fuatiaifo, ma le auala e tatou te faalogo atu ai i lona leo.—Eperu 6:11, 12.

[Faaopoopoga i lalo]

O le ā na E Aʻoaʻoina?

• Aiseā ua maua ai i aganuu uma le lagona o le saʻo ma le sesē, po o le loto fuatiaifo?

• Aiseā e tatou te manaʻomia ai le faaeteete i le avea tau o le loto fuatiaifo ma o tatou taʻiala?

• O ā nisi o auala e tatou te faaleleia ai le leo mai totonu, po o lo tatou loto fuatiaifo?

[Fesili mo le Suʻesuʻega]

[Ata i le itulau 23]

Na matuā tigā le loto fuatiaifo o Tavita . . .

ae e leʻi faapena Saulo, mai Taso

[Ata i le itulau 24]

E mafai ona tatou toleniina lo tatou loto fuatiaifo