Fesagaʻia ma le Manuia o Luʻi e Auina Atu le Tala Lelei

INA ua taunuu atu le ma loli i le mea e siaki ai taavale lea o loo iai le 60 o tamāloloa, fafine, ma talavou o loo faaauupegaina. O isi o loo ofu ni togiga ae o nisi i ofu savili. O le toʻatele na faalālā mai a latou fana. E foliga mai o loo latou faatalitali mai iā i maʻua. O le vaitaimi lea o loo fetauaʻi tagatānuu i le vaipanoa lea.

Ua fā nei aso o alu le ma malaga, ma le uta e sefulu tone o lomiga faale-Tusi Paia. Sa ma taumānatu pe o le a latou faataga i maʻua e faaauau le ma malaga. Pe o le a latou mananaʻo i ni tupe? O le ā le umi o le a ma taumafai ai e faatalitonu i latou, o le ma faigāmalaga e filemu?

Na faapā agaʻi i le lagi e se tasi o tamāloa le fana e taʻu mai iā i maʻua, o ia o le taʻitaʻi. Na ia iloa mai ma telefoni feaveaʻi, ma faatonuina i maʻua e avatu iā te ia. Ina ua ma faatalatū, na ia tosi lona lima e faalava i lona ua, e faailoa mai ai le mea o le a tupu iā i maʻua pe a ma lē usitai. Ona avatu lea i ai o a ma telefoni.

Na faafuaseʻi ona seʻi e se fafine sa fai lana togiga lana fana ma faalatalata mai iā i maʻua. O ia o le “failautusi,” ma o loo manaʻo foʻi e ma te avatu se mea iā te ia. Ona e faigatā le olaga, o le avatu po o le a lava se mea o iai iā i maʻua, o le a aogā iā te ia. Ona tatala lea e le tasi fitafita le tane suāuu o le ma loli, ma utu faatumu ai lana kalone suāuu. I le vaai mai i le ma lē fiafia, na ia faapea mai e lē o sona manaʻo ae o lona usitai i faatonuga. E leai se mea e mafai ona ma faia. Ua na ona ma faamoemoe o le a lē faia foʻi faapea e nisi.

Mulimuli ane, na tuu i luga le laupapa faalava na poloka ai le auala, ma toe faaauau loa le ma faigāmalaga. Na ma lagona le toʻafilemu. O se popolega lenā mea, ae ua ma masani i le taufaamataʻu i vaipanoa e siaki ai taavale. I le va o Aperila i le tausaga 2002 ma Ianuari i le tausaga 2004, na mafai ona ma faia faigāmalaga e 18 mai le taulaga o Douala, Cameroon, i Bangui, le laumua o Malo o Aferika Tutotonu. O lenei faigāmalaga e 1,000 maila le umi, e masani ona iai faafitauli ma mea ofoofogia. *

“Na mafai ona ma aʻoaʻoina ni lesona tāua i  nei faigāmalaga,” o le tala lea a Iosefa ma Emanuelu, o ni aveloli e masani ona faafoeina nei faigāmalaga. “O se mea atamai le tatalo lē leoa i le tele o taimi ma toʻa lelei. Na tusi le faisalamo, ‘Ua ou faatuatua i le Atua; ou te lē fefe i se mea e faia e tagata iā te aʻu?’ Na ma taumafai e faataʻitaʻi i lenā faatuatua. Sa ma mautinoa o loo manatu mai Ieova i le ma faigāmalaga, o le auina atu o le feʻau faasaoola lea e matuā manaʻomia lava.”—Salamo 56:11.

Taumafaiga Faavaomalo e Saunia Taumafa Faaleagaga

O le toʻatele o tagata i vaega nei o Aferika, e fiafia e faalogologo i le tala lelei o le Malo o le Atua. O lomiga la ia o loo ma ō e momoli, e fesoasoani e faamalieina o latou manaʻoga faaleagaga. (Mataio 5:3; 24:14) E momoli atu e lē aunoa e le ofisa o le lālā o Molimau a Ieova i Cameroon i Douala, ia lomiga mo le 30,000 o le ʻautalaʻi o le Malo ma mo tagata fiafia o loo nonofo i Cameroon ma isi atunuu tuaoi e fā.

E fai lava si mamao o le mea na lolomi ai nei lomiga. O le tele o nei lomiga e lomia i Egelani, o Finilani, Siamani, Italia, ma Sepania. Ona momoli mai lea e vaa mai Falani. E masani lava ona taunuu uta o lomiga faale-Tusi Paia i le taulaga o Douala i le taʻi lua vaiaso.

Ona siligi lea o le uta o lomiga i luga o se loli, lea e momolia i le lālā. E faavasega e le ʻaufaigaluega i le Matagaluega o Felaʻuaʻiga lomiga e tusa o nofoaga o le a auina i ai. O le faaooina atu o lomiga i vaega maotua o nei atunuu, e lē o se mea faigofie. Peitaʻi, o se tasi lenei o auala o le faaooina atu o le tala lelei “e oo lava i le tuluʻiga o le lalolagi.” (Galuega 1:8) O loo faalagolago le lālā iā i latou o ē tauofo mai ma lotomalilie e aveloli i le faia o nei faigāmalaga lamatia. O le auina atu o nei lomiga faale-Tusi Paia i se tulaga faifai pea, ua mafai ona oo ai i le faitau miliona o tagata i vaega tutotonu o Aferika.

Se Faigāmalaga Masani

O lomiga e laʻu mai e loli e mo Cameroon, Chad, Equatoria Guinea, Gabon ma le Malo o Aferika Tutotonu. Seʻi o tatou tagaʻi i se tasi o loli ma lana ʻau aveloli. Faaata i lou mafaufau o loo e nofo faatasi ma le ʻau aveloli, ma ua e sauni e  faimalaga ma i latou i se faigāmalaga e iai faafitauli ma mea e fiafia ai, mo le 10 aso pe sili atu foʻi.

E toʻaono uso aveloli na faafoeina lenei faigāmalaga. E tatau ona malolosi, agavaa, onosai, ma lavalava lelei i latou uma. Na latou laʻeiina a lē o se laʻei faa-Aferika, o se ofutino ma se fusiua. I se taimi ua teʻa, na faapea mai ai se tagata faigaluega i le tiute: “Seʻi vaai atu i lenei loli mamā ma le ʻau aveloli laʻei mamā, e pei lava o ata o loo i totonu o a latou lomiga.” E sili atu i o latou foliga mamā, e latou te lotomalilie e malaga atu i so o se mea e manaʻomia ai ona auauna mo isi.—Salamo 110:3.

Na matou tuua Douala i le ono i le taeao, ina ia ʻalofia ai le pisi o taavale i lenei aai toʻatele. Ina ua uma ona matou sopoʻia le auala laupapa e latalata ane i le ofisa o le lālā, ma le tulaga pisi o le aai, ona matou agaʻi loa lea i le nofoaga muamua—Yaoundé, le taulaga o Cameroon.

E ioe i latou uma na faafoeina le malaga, i le faigatā ona faafoe o le loli e tumu i le sefulu tone o tusi. O aso muamua e tolu i luga o auala lamolemole, na amata ai nai faafitauli, o lea e manaʻomia ai le uaʻi totoʻa ma le faaeteete. Ona faafuaseʻi lea ona matou fetaiaʻi ma timuga tetele. Ua amata le auala e lauleaga. Ua tau lē iloa atu se mea i luma, ua maseesee le auala, ma e manaʻomia ona alu lemū le matou loli ona e lauleaga le auala. Ua lata ina pogisa. E manaʻomia ona matou mālōlō e ai sina meaʻai, ma taumafai e momoe a o lago o matou vae i luga o le faaata tele o le loli. Maʻeu se olaga i nei faigāmalaga!

Na toe amata le faigāmalaga i le taeao na sosoo ai. O se tasi o aveloli, na fesoasoani i le mātauina ma le faaeteete o tulaga o le auala. E vave lava ona ia lapataʻia i matou pe a tau lata atu le loli i le ʻautu. Ua latou iloa lelei afai e see le loli i le ʻautu, e tele aso e taumafai ai e toe aveese mai ai. E leʻi faaleleia le tulaga o auala, a o matou agaʻi atu i le tuaoi o le Malo o Aferika Tutotonu. Mo le isi 400 maila (650 kilomita), na matou ui atu i laufanua lanumeamata matagofie ma maugā i nuu maotua. Na talotalo mai iā i matou tamaiti, o tagata matutua, ma tinā o loo fafa pepe i o latou tua, a o matou malaga atu i totonu o o latou nuu. Ae ona o le tulaga fetauaʻi o tagata o le atunuu lava latou, e tau leai ai ni taavale e sopoʻia lea auala i lenā taimi, o le ala lea o le pulatoʻa mai o tagata iā i matou ma le fia iloa.

Mea Faamalieloto na Tutupu

Ua taʻu mai e Janvier, o se tasi o aveloli, e ui lava ina tau lē maua se avanoa, ae tele lava ina latou mālōlō i ni tamaʻi nuu, ma tufa atu lomiga faale-Tusi Paia i tagata o le nuu. Na ia faapea mai: “I Baboua, na matou talanoa i se tagata e faigaluega i le falemaʻi, o sē e fiafia i le feʻau o le Malo ma sa matou faia se suʻesuʻega faale-Tusi Paia puupuu faatasi ma ia. I se tasi aso, na matou faaalia ai le ata vitiō a Noa i le aiga o le tagata lea. Na ō mai ana uō ma tuaoi, ma faatumulia ai lona  fale i tagata matamata. Na latou faalogo uma i le tala iā Noa, ae o lea ua latou matamata i ai i le televise. Na ootia o matou loto i le mātauina o lo latou lototalisapaia. Ina ua uma lenā, na latou faia se fuafuaga mo sina ʻaiga faapitoa e faaali mai ai le latou agaga faafetai, ma na latou tauanauina i matou e nonofo ai i le pō. E ao ona matou tuua vave i latou ma faaauau pea le matou faigāmalaga umi, ae na matou fiafia ona ua mafai ona matou faasoa atu le tala lelei i nei tagata loto maulalo.”

O le isi aveloli, o Isaraelu, na ia taʻu maia le mea na tupu i se isi malaga i Bangui, lea o loo matou malaga i ai. Na ia taʻua: “O lo matou latalata atu lava i Bangui, o lo matou fetaiaʻi foʻi lenā ma le tele o poloka i le auala e taofi ai taavale ae siaki. O le mea e lelei ai, e toʻatele fitafita e faaleuō ma latou te manatua le loli i isi faigāmalaga muamua atu. Na latou mananaʻo e matou te talanoa, ma talia ma le fiafia a matou lomiga faale-Tusi Paia. Ona e tāua iā i latou le tusi, o lea na latou tusia ai o latou igoa i totonu o le tusi ma le aso na maua ai, faapea ma le igoa o le tagata na avatu ai le tusi. O nisi o nei fitafita e iai o latou tauaiga Molimau, ma o le isi māfuaaga lea o lo latou faaleuō.”

Na taʻu mai e Iosefa, le aveloli ua lava lona poto masani, le mea e manatu i ai o le vala tāua lea o nei faigāmalaga—o le nofoaga e faataunuu i ai le malaga. E faatatau i se tasi faigāmalaga, na ia faapea mai: “A o latalata atu i Bangui, na matou vili atu i o matou uso e taʻu i ai ua lē o toe umi matou taunuu atu. Na latou faafeao i matou i totonu o le aai, ma fesoasoani iā i matou i le sainia o pepa e faataga ai le matou ulu atu. Ina ua matou taunuu, na ō mai i latou uma o loo i le ofisa o le lālā e faafeiloaʻi mai i matou. Na taunuu ifo le ʻau fesoasoani mai faapotopotoga e lata ane i le lālā, ma e leʻi umi se taimi na laʻueseina ai le faitau selau o pusa o Tusi Paia, tusi, sāvali, ma mekasini mai le loli ma tuu i totonu o le fale e teu ai tusi.”

Na faaopoopo mai Iosefa, “O nisi taimi, e ave i le matou uta ni ofu, o seevae, ma meataalo ma tusi mo tamaiti lea e faameaalofa mo le Malo tuaoi o Congo. O se fiafiaga iā i matou le vaai atu i laufofoga ataata o uso i lo latou lototalisapaia!”

Ina ua uma se mālōlōga mo se aso atoa, na toe sauniuni mea mo le faigāmalaga ma foʻi atu i le mea na matou ō mai ai. E matou te fetaiaʻi ma faafitauli, ae o mea faamalieloto na matou oo i ai, na māmā ai iā i matou so o se faafitauli e tulaʻi mai.

O le mamao, o timuga tetele, o auala lauleaga, o le sui o paʻu o le loli pe a pā, ma le tele o faafitauli, e ono aumaia ai le lē fiafia. O fitafita mata sauā o se matuā luʻi foʻi. E ui i na faafitauli, ae na matuā faamalieina nei aveloli i le iloaina ua latou faaooina atu le tala lelei o le Malo i vaega uma o Aferika, aemaise le vaai atu i suiga i olaga o tagata o loo talia lenei feʻau.

Mo se faataʻitaʻiga, e momoli atu le faafetai iā i latou, ona ua mafai nei e se tagata o se nuu i se vaega maotua o le Malo o Aferika Tutotonu e lata ane i le tuaoi o Sudan, ona faitauina se faaliliuga faaonapōnei o le Tusi Paia. Na suʻesuʻeina e lana avā Olomatamata o tausaga ua teʻa, ma ua aogā i le la fanau le tusi Ia Faalogo i le Faiaʻoga Sili. * Na latou maua atoa foʻi ma isi o latou uso Kerisiano i lenā vaega o Aferika, le anoanoaʻi o meataumafa faaleagaga e pei ona maua foʻi e isi atunuu tetele. Ioe, o lenei mea e faatupuina ai le matuā tele o le faamalieina!

[Faaopoopoga i lalo]

[Faafanua/Ata i le itulau 9]

(Tagaʻi i le lomiga mo le ata atoa)

CAMEROON

Douala

MALO O AFERIKA TUTOTONU

Bangui

[Ata i le itulau 9]

Iosefa

[Ata i le itulau 9]

Emanuelu

[Ata i le itulau 10]

Lālā o le Malo o Aferika Tutotonu, i Bangui

[Ata i le itulau 10]

Laʻueseina o le uta a le loli, i Bangui