Ia Gaoioi e Tusa ma Lou Loto Fuatiaifo

“Ua mamā mea uma i ē ua loto mamā, a o ē loto eleelea ma le lē faatuatua, e lē mamā iā te i latou se mea e tasi.” —TITO 1:15.

1. Na faapefea ona aafia Paulo i faapotopotoga i Kereta?

INA ua māeʻa malaga faamisionare e tolu a le aposetolo o Paulo, na puʻea faapagota o ia ma oo ai lava ina auina atu i Roma, lea na faafalepuipui ai mo le lua tausaga. O le ā na ia faia ina ua toe faasaʻoloto o ia? A o faagasolo taimi, na la asiasi atu i le motu o Kereta ma Tito, lea na tusi atu i ai Paulo mulimuli ane e faapea: “O le mea lenei na ou tuu ai oe i Kereta, ina ia e faatonuina mea ua totoe, ma ia e tofia toeaina.” (Tito 1:5) O le faataunuuina e Tito o lea tofiga sa aafia ai tagata na galue lelei o latou loto fuatiaifo, ma ē foʻi na lē galue o latou loto fuatiaifo.

2. O ā faafitauli na tatau ona taulimaina e Tito i le motu o Kereta?

² Na fautua Paulo iā Tito e faatatau i agavaa o toeaina o le faapotopotoga, ona taʻua lea o loo iai le “toʻatele o ē solitulafono ua tautalatala i upu lē aogā ma faasesē atu.” O i latou ia “ua latou faaliliu ese i nisi aiga atoa, o loo aʻoaʻo i mea lē tatau.” Sa tatau iā Tito ona ‘aʻoaʻi atu pea iā te i latou.’ (Tito 1:10-14; 1 Timoteo 4:7) Na taʻua e Paulo o latou mafaufau ma o latou loto fuatiaifo faapea e “eleelea,” e pei o se ʻie mamā ua pisia i se vali. (Tito 1:15) O nisi o na tamāloloa atonu o ni Iutaia, ona na latou lagolagoina le ‘peritomega.’ E lē o faaleagaina faapotopotoga i aso nei e tagata e iai na uiga; ae tatou te aʻoaʻoina le tele o mea e faatatau i le loto fuatiaifo mai le fautuaga na avatu e Paulo iā Tito.

O Ē e Eleelea o Latou Loto Fuatiaifo

3. O le ā na tusi atu ai Paulo iā Tito e faatatau i le loto fuatiaifo?

³ Seʻi manatu i le tulaga na māfua ai ona taʻua e Paulo le loto fuatiaifo. “Ua mamā mea uma i ē ua loto mamā, a o ē loto eleelea ma le lē faatuatua, e lē mamā iā te i latou se mea e tasi, a ua eleelea o latou mafaufau atoa ma o latou loto fuatia ifo. Ua latou taʻu ane ua latou iloa le Atua, a e faafiti iā te ia i a latou galuega.” O le mea moni, sa tatau i nisi na iai i tuā i inā ona faia ni suiga ina ia “faamaoni i le faatuatua.” (Tito 1:13, 15, 16) Sa lē faigofie ona latou iloa le eseesega o le mea e mamā ma le mea e eleelea, ma o lenā tulaga, na aafia ai o latou loto fuatiaifo.

4, 5. O ā ni tulaga lē lelei na iai i faapotopotoga, ma na faapefea ona latou aafia ai?

⁴ I le silia i le sefulu tausaga muamua atu, na faia ai se iʻugāfono a le vaega pule faapea, e lē o toe manaʻomia le peritomeina mo se tagata tapuaʻi moni, ma na latou faailoa atu i faapotopotoga le iʻugāfono. (Galuega 15:1, 2, 19-29) Ae peitaʻi, sa iai lava nisi i Kereta na tautū ‘i le peritomega’ Na latou faaalia i luma o le lautele lo latou lē malilie i le vaega pule, ma latou “aʻoaʻo i mea lē tatau.” (Tito 1:10, 11) I o latou mafaufauga sesē, atonu ua latou faaauilumaina ai āiāiga o le Tulafono e faatatau  i meaʻai ma le faamamāina faaletapuaʻiga. Atonu foʻi na latou soona faatele le mea na fai mai ai le tulafono, e pei o ē na muamua iā i latou i aso o Iesu, faapea ma le folafola atu o tala o le vavau faa-Iutaia ma poloaʻiga a tagata.—Mareko 7:2, 3, 5, 15; 1 Timoteo 4:3.

⁵ O na ituaiga o mafaufauga e iai sona aafiaga leaga i a latou faaiʻuga e fai ma o latou lagona i amioga tatau, o lo latou loto fuatiaifo lea. Na tusi le aposetolo o Paulo: “A o ē loto eleelea ma le lē faatuatua, e lē mamā iā te i latou se mea e tasi.” Ua matuā sesē lava o latou loto fuatiaifo, lea ua lē o toe maufaatuatuaina e avea o se taʻiala i a latou gaoioiga, ma mea e fuafua e fai. E lē gata i lea, ua latou faamasino o latou uso Kerisiano i mea e fitoitonu i tagata taʻitoʻatasi, lea e filifili le tasi Kerisiano e fai i se tasi auala, ae filifili le isi e fai i se isi auala. I lenei tulaga, na vaai tagata Kereta i nisi o gaoioiga ma filifiliga faapea e lē mamā, ae o le mea moni e leai. (Roma 14:17; Kolose 2:16) A o latou fai mai e latou te iloa le Atua, ae ua faamaonia i mea o loo latou fai e lē o le tulaga lenā.—Tito 1:16.

“Ua Mamā Mea Uma i Ē ua Loto Mamā”

6. O ā ituaiga tagata eseese e lua o loo taʻua e Paulo?

⁶ Ua faapefea ona aogā iā i tatou mea na tusi ai Paulo iā Tito? Ia, seʻi mātau le eseesega o loo i le faaupuga lenei: “Ua mamā mea uma i ē ua loto mamā, a o ē loto eleelea ma le lē faatuatua, e lē mamā iā te i latou se mea e tasi, a ua eleelea o latou mafaufau atoa ma o latou loto fuatia ifo.” (Tito 1:15) E leʻi faapea mai Paulo o le Kerisiano e mamā tau amio, ua matuā mamā atoatoa i mea uma ma ua taga ona ia faia so o se mea. E tatou te mautinoa lenā tulaga ona na faamalamalama mai e Paulo i le isi ana tusi e faapea o le tagata e faia le mulilua, ifo i tupua, fai togafiti faataulāitu, ma isi mea e “lē fai le malo o le Atua mo latou tofi.” (Kalatia 5:19-21) O lea la, e ao ona tatou manatu o loo taʻua e Paulo le mea moni e masani ai ituaiga tagata eseese e lua, o tagata e mamā tau amio ma le tulaga faaleagaga, ma i latou e lē mamā i na tulaga.

7. O le ā le mea o loo faasāina i le Eperu 13: 4, ma o le ā le fesili e ono lāgā ai?

⁷ O mea e ao ona ʻalofia e se Kerisiano faamaoni, e lē faatapulaa mai na o mea o loo taʻua patino e le Tusi Paia e faasā. Seʻi manatu mo se faataʻitaʻiga i le faatonuga tuusaʻo lenei: “Ia faamamaluina le faaipoipoga e tagata uma, o le moega foʻi o le ulugalii ia leai sona leaga; auā e faamasinoina e le Atua o ē faitaaga ma ē mulilulua.” (Eperu 13:4) E oo lava i tagata e lē o ni Kerisiano ma i latou e lē iloa le Tusi Paia, e latou te ioe o loo faasāina i lenei fuaiupu le mulilua. O loo manino mai i inei ma isi faamatalaga a le Tusi Paia, e taʻusalaina e le Atua le faia o feusuaʻiga e se tane po o se fafine ua faaipoipo ma se isi e ese mai i lana paaga ua faaipoipo faaletulafono i ai. Ae faapefea la tagata e toʻalua e leʻi faaipoipo ae faia faiga faaleituaiga e faaaogā ai le fofoga po o le  gutu? E faapea mai le toʻatele o talavou e lē leaga lenā faiga ona e lē o feusuaʻi. Pe e vaai ea le Kerisiano i faiga faaleituaiga e faaaogā ai le fofoga o se mea e mamā?

8. E faapefea ona ese Kerisiano mai le toʻatele o tagata i le lalolagi e tusa ai ma faiga faaleituaiga e faaaogā ai le fofoga?

⁸ O loo faamautinoa mai i le Eperu 13:4 ma le 1 Korinito 6:9 e taʻusalaina e le Atua le mulilua ma le faitaaga (Eleni, por·neiʹa). O le ā o loo aofia ai i le faitaaga? O le upu i le gagana Eleni e aofia ai le faaaogāina o totogasā a lē i le auala e masani ai, po o le faaaogāina foʻi i se auala lē tatau, lea e iai ma se manaʻoga leaga. E aofia ai vala uma o feusuaʻiga e faasāina, i fafo atu o le faatulagaga a le Tusi Paia mo faaipoipoga. O lea la, e aofia ai faiga faaleituaiga e faaaogā ai le fofoga, e ui ina aʻoaʻoina le toʻatele o talavou po o latou lava foʻi manatu faapea, e talia faiga faapena. E lē taʻitaʻia mafaufauga ma gaoioiga a Kerisiano moni i manatu o tagata e “tautalatala i upu lē aogā ma faasesē atu.” (Tito 1:10) E latou te pipii atu i tapulaa maualuluga a le Tusi Paia. Na i lo le taumafai e faia ni faamolemolega mo le faaaogāina o le fofoga, ae ua latou malamalama, pe a tuu atu i le manatu o le Tusi Paia, o le faitaaga le mea lenā po o le por·neiʹa, ma e latou te toleniina o latou loto fuatiaifo ia aua neʻi o latou taliaina na faiga. *—Galuega 21:25; 1 Korinito 6:18; Efeso 5:3.

Eseese Loto Fuatiaifo, Eseese Filifiliga

9. Afai e “mamā mea uma,” o le ā la le matafaioi a le loto fuatiaifo?

⁹ Ae o le ā le uiga o upu a Paulo ina ua ia faapea mai, “Ua mamā mea uma i ē ua loto mamā”? Na faasino atu Paulo i Kerisiano o loo ōgatasi o latou mafaufauga, ma amioga ma tapulaa a le Atua lea o loo i lana Afioga. E iloa e na Kerisiano o le tele o mataupu e lē o taʻusalaina tuusaʻo e le Atua, e eseese lava manatu o uso talitonu e faatatau i ai. O lea la, na i lo le iai o se uiga faamasinosino, e latou te manatu e “mamā” mea e lē o taʻusalaina e le Atua. E latou te lē faatalitalia o le a tutusa uma manatu o isi tagata ma i latou i vala o le olaga, lea e lē o aumaia e le Tusi Paia ni taʻiala patino e faatatau i ai. Seʻi o tatou talanoaina nisi o faataʻitaʻiga.

10. E faapefea i se faaipoipoga (po o se toe sauniga o se maliu) ona tulaʻi mai ai se faafitauli?

¹⁰ E toʻatele aiga e toʻatasi le paaga o loo avea ma se Kerisiano a o le isi e leai. (1 Peteru 3:1; 4:3) E ono tulaʻi mai ai ni faafitauli eseese, e pei o se faaipoipoga po o se maliu o se tauaiga. Seʻi manatu i se avā Kerisiano e lē tutusa a la tapuaʻiga ma lana tane. O le a faaipoipo se tasi o tauaiga o le tane, ma o le a faia le faapaiaga i le falesā. (Ia po o se tauaiga po o se matua foʻi ua maliu, ma o le a faia le toe sauniga i se falesā.) Ua valaaulia le ulugalii ia auai ma e manaʻo le tane e ō ma lana avā. O le ā ua taʻu atu e le loto fuatiaifo o le avā e faatatau i lona auai atu i ai? O le ā o le a ia faia nei? Seʻi mafaufau i mea nei e lua e ono tutupu.

11. Faamatala le auala e ono taʻu atu ai e se avā Kerisiano pe e alu pe leai i se faapaiaga o se faaipoipoga e faia i se falesā, ma o le ā le iʻuga?

¹¹ Ua mafaufau mamafa Loi i le tāua o le faatonuga a le Tusi Paia, ‘Ia ō ese mai iā Papelonia le aai tele,’ le emepaea o lotu sesē. (Faaaliga 18:2, 4) Sa iai muamua o ia i lenā lotu lea o le a fai ai le faapaiaga o le faaipoipoga, ma ua ia iloa o le a manaʻomia i ē uma o le a auai ona faia nisi o tū faalotu, pei o le tatalo, pepese, po o le faia o ni tāga faalelotu. Ua ia maumauaʻi e leai sana vaega e fai ma e lē manaʻo foʻi e auai atu i ai, ona e ono faamalosia ai o ia e gausia lona faamaoni. E faaaloalo Loi i lana tane ma e manaʻo e lagolagoina o ia o lona ulu i le faatulagaga a le Tusi Paia; ae peitaʻi, e lē o manaʻo e faagutugutulua i mataupu silisili o le Tusi Paia. (Galuega 5:29) I se tulaga faautauta, na ia faamatala atu i lana tane afai e manaʻo e alu, ae o ia e lē mafai lava ona auai. E na te ono taʻua faapea afai e alu, ma e musu e auai i nisi o  mea o fai ai i le falesā, atonu e mā ai lana tane, o lea e sili atu ai lona lē auai. O lana filifiliga o le a tumau ai pea lona loto fuatiaifo mamā.

12. E faapefea ona manatu ma gaoioi se isi tagata i se valaaulia e auai i se faaipoipoga e fai i se falesā?

¹² Na fesagaʻi foʻi Ruta ma se faafitauli tai faapena. E faaaloalo i lana tane, e faamaoni i le Atua, ma o loo gaoioi e tusa ai ma lona loto fuatiaifo ua aʻoaʻoina e le Tusi Paia. Ina ua uma ona ia mafaufau i manatu e pei ona iloiloina e Loi, ona tatalo lea o Ruta ma iloilo le “Fesili Mai le ʻAufaitau” i Le Olomatamata o Me 15, 2002. Na ia manatua tauleleʻa Eperu e toʻatolu na usitai i se faatonuga e ō i se nofoaga lea o le a fai ai le ifoga i tupua, ae peitaʻi na latou tausia pea lo latou faamaoni e ala i le lē auai i se gaoioiga e ifo ai i le tupua. (Tanielu 3:15-18) Na ia filifili e ō ma lana tane ae e lē auai i so o se gaoioiga faalotu o le a faia ai, ma o loo ia gaoioi e tusa ai ma lona loto fuatiaifo. Na ia faamatalaina ma le faautauta ma le manino i lana tane, mea e faatagaina e lona loto fuatiaifo e fai ma mea na te lē faia. Sa faamoemoe Ruta o le a iloa e lana tane le eseesega o le tapuaʻiga moni ma le tapuaʻiga sesē.—Galuega 24:16.

13. Aiseā e lē tatau ai ona faateʻia i le faia e ni Kerisiano se toʻalua o ni faaiʻuga eseese?

¹³ Talu ai e ono fai e ni Kerisiano se toʻalua ni faaiʻuga eseese, po o lona uiga ea la e lē afaina le mea e fai e le tagata, pe ona o le tasi o i laʻua e vaivai lona loto fuatiaifo? E leai. I lona malamalama lelei i mea i le taimi ua mavae i musika ma mea e lē talafeagai o loo faia i faapaiaga faalelotu, atonu e lagona e Loi o lona auai o le a patino ona faigatā mo ia. Ma o ana feutagaʻiga ma lana tane i taimi ua teʻa i mataupu faalelotu e aafia ai lona loto fuatiaifo. O lea ua mautū i lona mafaufau o lana filifiliga lea ua fai e sili atu mo ia.

14. O le ā le mea e ao ona teu i le mafaufau o se Kerisiano e faatatau i mataupu e fitoitonu i le tagata lava ia?

¹⁴ Pe na leaga ea le faaiʻuga na faia e Ruta? E lē o se mea lenā e aiā fua i ai se isi. E lē tatau ona latou faamasino pe faitioina o ia i lana filifiliga e auai i le mea o loo fai, ae leai sana gaoioiga faaletapuaʻiga e fai ai. Ia teu i le mafaufau le fautuaga a Paulo i filifiliga e fitoitonu i le tagata lava ia pe ʻai pe lē ʻai i nisi o meaʻai: “Aua neʻi taʻufaatauvaaina lē ʻai i lē lē ʻai, ma lē ua lē ʻai, aua neʻi faasala o ia i lē ua ʻai . . . E tumau ia pe paʻū i lona lava alii; a e faatumauina lava ia, auā e mafaia e le Atua ona faatumau iā te ia.” (Roma 14:3, 4) E mautinoa e leai se Kerisiano moni e manaʻo e uunaʻi se tasi ia lē amanaʻia le taʻitaʻiga a lona loto fuatiaifo ua aʻoaʻoina lelei, auā o le faia faapea e tusa ma le lē amanaʻia o se leo lea e ono aumaia se feʻau e faasaoina ai le ola.

15. Aiseā e manatu mamafa ai i loto fuatiaifo ma faalogona o isi?

¹⁵ Ina ia faaauau lenei manatu, e tatau i Kerisiano e toʻalua ona iloiloina isi vala, ma o se  tasi o ia vala o le aafiaga i isi. Na fautua mai Paulo iā i tatou: “Ia manatu i lenei lava mea, aua neʻi tuu ane e se tasi se mea e tausuai ai, po o se mea e tautevateva ai lona uso.” (Roma 14:13) Atonu e iloa e Loi o tulaga faapena sa māfua ai le tele o le lē fiafia i le faapotopotoga po o lona aiga, ma o le mea na te faia e ono telē se aafiaga i lana fanau. I le isi itu, atonu ua iloa e Ruta e lē o āfaina le faapotopotoga, po o tagata i lo latou nuu i ni filifiliga faapena na fai. O tuafāfine ia e toʻalua— faapea ma i tatou uma—e ao ona tatou iloa o se loto fuatiaifo ua toleniina lelei e amanaʻia aafiaga e oo i isi. Na fetalai Iesu: “Ai sē na te faatausuai se tasi o i latou nei e faatauvaa o ē faatuatua iā te aʻu, e lelei i lea tagata pe ana nonoa se maaolo tele i lona ua, ma faagotoina o ia i le moana loloto.” (Mataio 18:6) Afai e lē amanaʻia e se tagata le mataupu o le faatausuai i isi, e ono oo ina iai se loto fuatiaifo leaga pe eleelea, e pei ona sa iai i nisi o Kerisiano i Kereta.

16. O ā suiga e tatou te faatalitalia i se Kerisiano a o faagasolo taimi?

¹⁶ O le tuputupu aʻe o le itu faaleagaga o se Kerisiano e ao ona faaauau pea, e pei lava o le agaʻigaʻi i luma i lana faalogo ma le tali atu a lona loto fuatiaifo. Seʻi o tatou mafaufau iā Mareko lea e leʻi leva tele ona papatiso. Ua taʻu atu e lona loto fuatiaifo e teena le faia o gaoioiga e lē talafeagai ma le Tusi Paia lea na ia faia muamua, atonu e aofia ai le ifo i tupua po o le toto. (Galuega 21:25) O le mea moni, e oo lava i nai mea iti e lē tutusa ma mea e faasāina e le Atua ua ia ʻalofia. Ae i le isi itu, e lē o malamalama i le māfuaaga ua teena ai e isi ni mea e na te iloa e lē afāina, e pei o nisi polokalame o le televise.

17. Faataʻitaʻi pe faapefea i le umi o se taimi ma le tuputupu aʻe faaleagaga ona aafia ai le loto fuatiaifo ma filifiliga a se Kerisiano.

¹⁷ A o faagasolo taimi, ua tuputupu aʻe le iloa o Mareko ma faalatalata atu i le Atua. (Kolose 1:9, 10) O le ā le iʻuga? Ua tele toleniga ua faia i lona loto fuatiaifo. O lea, ua tele ina faalagolago Mareko i lona loto fuatiaifo ma iloilo mea e tusa ai ma mataupu silisili o le Tusi Paia. O le mea moni, ua ia iloaina nei o nisi o “mea” na ia lē faia, e lē o feteenaʻi ma le finagalo o le Atua. E lē gata i lea, o le pipii atu i mataupu silisili ma taumafai e tali atu i lona loto fuatiaifo ua aʻoaʻoina lelei, ua uunaʻia ai nei Mareko e ʻalofia polokalame ia na ia manatu muamua i ai e talafeagai. Ioe, ua faaleleia atili lona loto fuatiaifo.—Salamo 37:31.

18. O le ā le māfuaaga o lo tatou fiafia?

¹⁸ I le tele o faapotopotoga, e eseese uma lava le tulaga o le tuputupu aʻe faa-Kerisiano o tagata taʻitoʻatasi. O nisi o i latou e fou i le faatuatua. Atonu e itiiti lava se aafiaga o lo latou loto fuatiaifo i nisi o mataupu, ae e aafia tele o latou loto fuatiaifo i a latou filifiliga i nisi o mataupu. Atonu o i latou ia e manaʻomia se taimi ma se fesoasoani ina ia masani ai i taʻiala a Ieova, ma tali atu i o latou lava loto fuatiaifo ua toleniina. (Efeso 4:14, 15) Ae o le mea e lelei ai, i le faapotopotoga lea e tasi, e foliga mai e ono iai le toʻatele e loloto lo latou iloa, ma le poto masani i le faatatauina o mataupu silisili, ma se loto fuatiaifo e ōgatasi ma le finagalo o le Atua. Maʻeu se fiafiaga i le iai faatasi ma i latou e “mamā” o ē e latou te iloa amioga ma tulaga faaleagaga e “mamā” e fiafia i ai le Aii! (Efeso 5:10) Seʻi tau ina ia avea ma o tatou sini le tuputupu aʻe pea i lenā tulaga, ma ia tausia se loto fuatiaifo faapena e ōgatasi ma le poto saʻo o le upu moni ma le tuutoina atu faale-Atua.—Tito 1:1.

[Faaopoopoga i lalo]

O le ā Lau Tali?

• Aiseā na eleelea pe leaga ai loto fuatiaifo o nisi o Kerisiano i Kereta?

• E faapefea i ni Kerisiano se toʻalua e lelei ona toleni o la loto fuatiaifo ona faia ni faaiʻuga eseese?

• A o faagasolo taimi, o le ā le mea e ono tupu i o tatou loto fuatiaifo?

[Fesili mo le Suʻesuʻega]

[Faafanua i le itulau 26]

(Tagaʻi i le lomiga mo le ata atoa)

Sicily

ELENI

Kereta

ASIA ITIITI

Kuperu

SAMI METITIRANI

[Ata i le itulau 28]

O Kerisiano e toʻalua e fesagaʻi ma se tulaga talitutusa, e la te ono faia ni faaiʻuga eseese