Ola ma Mafaufau i le Lumanaʻi

“AUA tou te popole i le aso a taeao,” o le fetalaiga lenā a Iesu i lana lauga i le mauga o Kalilaia. Na toe fetalai Iesu: “Auā e popole le aso a taeao i ana lava mea.”—Mataio 6:34.

O le ā sou manatu, o le ā le uiga o nei upu, “auā e popole le aso a taeao i ana lava mea”? Po o le uiga ea e ao ona e ola tau lava o le asō ae faagalo le aso a taeao? Pe fetaui lenā manatu ma le mea na talitonu i ai Iesu ma ē na mulimuli iā te ia?

“Aua Neʻi Outou Popole”

Ia faitau i fetalaiga a Iesu o loo maua i le Mataio 6:25-32, LT. Sa ia taʻua i se vaega: “Aua neʻi outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. . . . Ia outou vaavaai i manu felelei; latou te lē lūlū saito, pe selesele, pe faaputu i fale saito, a e fagaina i latou e lo outou Tamā o i le lagi. . . . O ai ea so outou na te mafaia i lona popole ona faateleina le umi o lona olaga i le kupita e tasi? Se ā foʻi le mea tou te popole ai i ofu? Ia outou mafaufau i lautalotalo o le vao, pe faapefea ona tupu; latou te lē galulue, latou te lē milo foʻi; . . . O lenei, aua neʻi outou popole, ma faapea ane. Ni a mea tatou te aai ai, ni a foʻi mea tatou te inu ai, ni a foʻi mea tatou te oofu ai? auā o mea uma ia ua sailia e nuu ese. Auā ua silafia e lo outou Tamā o i le lagi e aogā ia mea uma iā te outou.”

Na faaiʻu le vaega lea o le lauga a Iesu i ni lapataʻiga se lua. Muamua, na ia faapea mai: “A ia outou muaʻi saʻili lona [Atua] malo ma lana amiotonu; ona faaopoopoina atu lea o ia mea uma iā te outou.” O lona lua: “O lenei, aua tou te popole i le aso a taeao; auā e popole le aso a taeao i ana lava mea. E tatau i le aso lona lava leaga.”—Mataio 6:33, 34.

 Ua Silafia e lo Outou Tamā Mea Tou te Manaʻomia

Pe na faalotovaivaia ea e Iesu ona soo, ma le ʻaufaifaatoʻaga, mai le ‘lūlūina, seleseleina, po o le aoina o saito i totonu o a latou fale saito?’ Pe taofia foʻi i latou mai le ‘galue pea ma tauivi,’ ina ia maua ni lavalava latou te manaʻomia? (Faataoto 21:5; 24:30-34; Failauga 11:4) E mautinoa lava e leai. Afai latou te lē toe galulue, o le a latou ʻʻaisi i le tausaga e selesele ai saito,’ ma o le a leai ni a latou meaʻai ma ofu e oofu ai.—Faataoto 20:4.

Ae faapefea le popole? Pe na uiga atu fetalaiga a Iesu, e mafai e lana ʻaufaalogologo ona lē toe popole lava i se mea? E mautinoa le lē talafeagai o lenā mea. Na lagona foʻi e Iesu le matuā popole i le pō na puʻea ai o ia.—Luka 22:44.

O lona uiga la, o lea sa na ona taʻutino mai e Iesu le mea moni. E lē mafai e le soona popole ona fesoasoani iā te oe e foʻia so o se faafitauli o lua fesagaʻia. Mo se faataʻitaʻiga, e lē mafai ona fesoasoani le popole e faaumiumi ai lou ola. Na taʻua e Iesu, e lē mafai e le popole “ona faateleina le umi o [lou] olaga.” (Mataio 6:27, LT) O le mea moni, o le faaauau pea ona e popole, e faapuupuuina ai lou ola.

Na matuā aogā lava fautuaga a Iesu. O le tele o mea e tatou te popole ai, e masani lava ona lē taunuu. Na iloa e se alii maualuga o Peretania e suafa iā Winston Churchill, lenei mea e faatatau i aso pōuliuli o le Taua Lona Lua a le Lalolagi. Ona o ona popolega i lenā taimi, na ia tusi ai: “Pe a ou toe tepa i tua i nei popolega uma, ua ou manatua ai le tala i se tamāloa matua o lē na faapea mai a o lata i lona maliu, e anoanoaʻi mea na ia popole ai i lona olaga ae o le tele o na mea e leʻi taunuu.” O le mea moni, o loo iai le atamai i le taulima o mea o aso taʻitasi pe a tutupu mai, aemaise lava pe a faapogaia e omiga ma faafitauli o tatou fesagaʻia le matuā tele o popolega iā i tatou.

‘Ia Muaʻi Saʻili le Malo o le Atua’

O le mea moni, e tele isi mea na i le finagalo o Iesu na i lo le ola mālōlōina lelei ma faalogona o lana ʻaufaalogologo. Na ia silafia, o le popole i mea e manaʻomia o le olaga, faapea ma le manaʻo tele i le fia maumea ma  faafiafiaga, o le a lē amanaʻia ai mea e sili ona tāua. (Filipi 1:10) E te ono manatu, ‘O ā nisi mea e sili ona tāua na i lo mea e manaʻomia o le olaga?’ O le tali, o mea faaleagaga e fesootaʻi i la tatou tapuaʻiga i le Atua. O le mea e sili ona tāua i o tatou olaga, sa faamamafa e Iesu, e ao ona tatou ‘muaʻi saʻili le malo o le Atua ma lana amiotonu.’—Mataio 6:33.

I aso o Iesu, o le toʻatele o tagata na naunau i le saʻilia o mea faitino. Na latou faamuamua le faaputuina o le ʻoa. Peitaʻi, na timaʻi atu Iesu i lana ʻaufaalogologo, e ao ona saʻo le latou vaaiga i na mea. I le avea ma tagata tuutoina atu iā Ieova, “o mea ia e tatau” iā i latou, o le ‘mataʻu i le Atua, ma latou anaana i ana poloaʻiga.’—Failauga 12:13.

O le tele o le taimi e faaalu i le saʻilia o mea faitino—“le loto popole i mea a lenei lalolagi, ma le pepelo o le ʻoa”—e ono faaleagaina ai le itu faaleagaga o lana ʻaufaalogologo. (Mataio 13:22) “O ē manaʻo i le fia mauʻoa,” na tusi Paulo e faapea, e “maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” (1 Timoteo 6:9) Ina ia fesoasoani iā i latou e ʻalofia lenei “mailei,” na faamanatu atu e Iesu iā i latou o ē mulimuli iā te ia, o loo silafia e lo latou Tamā i le lagi mea e latou te manaʻomia. E mafai e le Atua ona saunia mea manaʻomia mo i latou e pei ona ia tausia “manu felelei.” (Mataio 6:26, 32) Na i lo le faataga la o popolega e faavaivaia i latou, e latou te faia mea uma latou te mafaia ina ia tausia i latou, ona latou tuu atu lea o mea uma ma le mautinoa iā Ieova.—Filipi 4:6, 7.

Ina ua taʻua e Iesu “auā e popole le aso a taeao i ana lava mea,” o le uiga moni o lana faamatalaga, e lē tatau ona tatou faataga le soona popole i mea e tupu i le lumanaʻi, e faaopoopo i popolega o le aso. O loo faaupu e se tasi o faaliliuga o le Tusi Paia upu nei a Iesu e faapea: “Aua le popole i le aso a taeao; o le a lava ma totoe popolega o taeao lava ia. E lē manaʻomia ona faateleina atili popolega e aumai i aso taʻitasi.”—Mataio 6:34, Today’s English Version.

“Ia Oo Mai Lou Malo”

Ae peitaʻi, e iai se eseesega telē o le aua le soona popole i le aso a taeao, ma le faagaloina atoatoa o le aso a taeao. E leʻi faalaeiauina e Iesu ona soo ina ia lē manatu mamafa i le lumanaʻi. Na i lo lea, na ia uunaʻia i latou ina ia matuā naunau i le lumanaʻi. E talafeagai ona latou tatalo mo manaʻoga i le taimi nei—o a latou meaʻai i aso taʻitasi. Ae muamua lava, e ao ona latou tatalo mo mea o i le lumanaʻi—mo le Malo o le Atua ia oo mai, ma le faataunuuina o le finagalo o le Atua i luga o le lalolagi.—Mataio 6:9-11.

E lē tatau ona tatou pei o tagata i aso o Noa. Na latou pisi e “aai ma inu, ua latou fai avā foʻi ma faaavaga,” ma latou te “leʻi iloa” le mea o le a tupu. O le ā le iʻuga? “Ina seʻia oo le lolo, ma aveesea i latou uma.” (Mataio 24:36-42) Na faaaogā e le aposetolo o Peteru lenā mea na tupu, e faamanatu mai ai iā i tatou le manaʻomia ona ola ma mafaufau i le lumanaʻi. Na ia tusi mai, “O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua!”—2 Peteru 3:5-7, 11, 12.

Ia Toloʻaʻi ʻOa i le Lagi

Ioe, e ao ona tatou “teu i manatu” le aso o Ieova. O le faia faapea o le a telē se aafiaga i le auala e faaaogā lelei ai o tatou taimi, malosi, tomai, alagaʻoa, ma o tatou agavaa. E lē manaʻomia ona tatou soona popole i le saʻilia o mea faitino—e lē gata i mea e manaʻomia o le olaga faapea ma faafiafiaga—lea e faaitiitia ai le taimi e faaalu mo galuega e atagia mai ai le “amio Atua.” E ono foliga mai e vave ona maua iʻuga lelei o le saʻilia o mea faitino i aso nei, ae e lē tumau ona aogā. O se mea atamai la, e pei ona taʻua e Iesu, le “toloʻaʻi ʻoa mo [tatou] i le lagi” na i lo ʻoa a le lalolagi.—Mataio 6:19, 20.

 Na faamamafa e Iesu lenā manatu i lana talafaatusa e faatatau se tamāloa sa ia soona fai fuafuaga mo le lumanaʻi. O na fuafuaga e leʻi faaaofia ai le faiā ma le Atua. Na fua mai le faatoʻaga a lenei tamāloa. Na ia filifili e tala i lalo lona fale saito ae fai ni fale saito tetelē ina ia mafai ona ola i se olaga faigofie, e na o le ʻai, inu ma fiafia. O le ā le leaga o lenā mea? Na oti le tamāloa a o leʻi tofo i fua o lana faatoʻaga. O le mea e sili ona leaga, e leʻi iai se la faiā ma le Atua. Na faaiʻu fetalaiga a Iesu i le faapea mai: “O loo faapea foʻi lē faaputu ʻoa iā te ia, ae lē mauʻoa i le Atua.”—Luka 12:15-21; Faataoto 19:21.

O le ā e Mafai Ona e Faia?

Seʻi aua lava neʻi o tatou faia le mea sesē na fai e lenā tamāloa. Ia saʻili atu i mea ua fuafua e le Atua mo le lumanaʻi, ma ola e tusa ma lenā fuafuaga. E leʻi tuufauina e le Atua tagata e tusa ai o mea o le a ia faia i le lumanaʻi. Na tusi le perofeta o Amosa, “E lē faia lava se mea e le Alii o Ieova, ae faaalia lona finagalo i ana auauna o perofeta.” (Amosa 3:7) O mea na faaalia e Ieova e ala mai i ana perofeta, o loo maua i lana Afioga faagaeeina, le Tusi Paia.—2 Timoteo 3:16, 17.

O se tasi o mea ua faaalia mai i le Tusi Paia, o le mea o le a tupu i le lumanaʻi ma e leʻi tupu muamua lava, lea o le a aafia ai le lalolagi atoa. Na fetalai Iesu: “E oo ai le puapuaga tele, e leai sona tusa talu le amataga o le lalolagi, ua oo lava i ona po nei.” (Mataio 24:21) E leai ma se tagata e na te taofia le oo mai o lenā mea. Ae o le mea moni, e leai se māfuaaga e mananaʻo ai tagata tapuaʻi moni e taofia lenā mea. Aiseā? Auā o lenei puapuaga tele, o le a tafiesea le amioleaga i le lalolagi, ae o le a aumaia se “lagi fou ma le lalolagi fou,” o lona uiga o se faigāmalo fou faalelagi ma se sosaiete fou faalelalolagi. I le lalolagi fou, o le a “sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”—Faaaliga 21:1-4.

Pe ua lē o se gaoioiga talafeagai la i le taimi nei le suʻesuʻeina o le mea o fai mai ai le Tusi Paia e faatatau i lenā mea o le a tupu? Po o e manaʻomia se fesoasoani i le faia faapea? Fesili atu i Molimau a Ieova mo se fesoasoani. Po o lou tusi atu foʻi iā i latou na lomia lenei mekasini. O lea la, ia mautinoa e tatou te ola e lē gata e mo le taimi nei, ae ia tatou ola foʻi mo se lumanaʻi matagofie.

[Ata i le itulau 7]

“Aua tou te popole . . . Auā e popole le aso a taeao i ana lava mea”