“Sa Ou Maofa i le Mataʻina o Lona Maumauaʻi”

NA LOMIA e Gunter Grass, o se tusitala ma o lē na manumalo i le Nobel Prize mo Lomiga i le 1999, lana tusi o talaaga o olaga o tagata i le 2006. I totonu o lenā tusi, o loo ia faamatala ai le taimi na filifilia ai o ia i le vaegaau mo le puipuiga o tagata lautele a Siamani. I le tusi lava foʻi lenā, o loo ia taʻua ai se tamāloa sa ia faia se mea mataʻina lea o loo ia manatuaina pea mo le silia i le 60 tausaga. O se tasi na o tagata na tumau lona faamaoni i lalo o sauāga.

I se faatalatalanoaga na tusia i le nusipepa o aso taʻitasi o le Frankfurter Allgemeine Zeitung, na toe taʻua ai e Grass lenei tagata mataʻina lea sa ia teena lona auai i taua. Na taʻua e Grass e faapea: “E leʻi lagolagoina e le tamāloa so o se manatu o tagata maualuluga, pe o se faigāmalo faa-Nasi, se faigāmalo faa-Komunisi po o faigāmalo ia e tutusa uma ai tagata i a latou pulega. O ia o se tasi o Molimau a Ieova.” E lē o manatua e Grass le igoa o le Molimau, ae na ia faaigoa iā, Matou-te-lē-faia-na-mea. Ae peitaʻi na iloa e tagata suʻesuʻe o Molimau a Ieova o le igoa o le tamāloa lenei o Joachim Alfermann. Sa sauāina o ia mo se taimi umi ma faalumaina, ona tuu lea o ia i se sela. Peitaʻi sa tumau mausalī pea Alfermann ma teena le auai i taua.

Na faapea mai Grass: “Sa ou maofa i le mataʻina o lona maumauaʻi. Sa ou fesili ifo iā te aʻu: E faapefea ona mafai e lenei tagata ona tumau i nei mea uma? E faapefea ona ia faia lenei mea?” Ina ua mavae se taimi o tumau pea Alfermann i taumafaiga faaumiumi ina ia gausia lona faamaoni i le Atua, ona mulimuli ane lea ave o ia i le nofoaga o faasalaga mamafa i Stutthof iā Fepuari i le 1944. Sa toe faasaʻolotoina o ia iā Aperila i le 1945, na faasaoina mai le taua, ma tumau o se Molimau faamaoni a Ieova seʻia oo i lona maliu i le 1998.

O Alfermann o se tasi o nisi o Molimau pe tusa ma le 13,400 i Siamani ma atunuu na nofoia e Nasi, lea na mafatia i faasalaga ona o lo latou faatuatua. Na latou mulimuli i le taʻitaʻiga a le Tusi Paia, ma tumau e solitū i faiga faapolotiki, ma teena le auai i taua. (Mataio 26:52; Ioane 18:36) O nisi Molimau pe tusa ma le 4,200 na tuuina i nofoaga o faasalaga mamafa, ma le 1,490 na maliliu ai. E oo lava foʻi i aso nei, o loo iai se aafiaga o le tulaga o Molimau a Ieova iā i latou o ē e lē tutusa o latou talitonuga, ma o loo latou maofa i lo latou tutumau mausalī.

[Ata i le itulau 32]

Joachim Alfermann