Surakusa se Motu na Afea i le Malaga a Paulo

NA FOLAU atu se vaa mai le motu Metitirani o Melita ma agaʻi atu i Italia i le pe tusa o le 59 T.A. Sa tusi i luma o le taumua o le vaa le faaupuga “O Atalii o Seu,” o atua na manatu i ai o ē latou te puipuia le ʻauvaa. Na taʻua e le tusitala o le Tusi Paia o Luka e faapea, na alu aʻe le vaa “i uta i Surakusa” i le talafatai i saute sasaʻe o Sicily ma ‘nonofo ai i aso e tolu.’ (Galuega 28:11, 12) Na faimalaga faatasi Luka ma Aritako ma le aposetolo o Paulo, lea na ave i Roma ina ia faamasinoina.—Galuega 27:2.

Tatou te lē iloa pe na faataga Paulo e alu ese mai le vaa i Surakusa. Ae pe afai sa mafai e lana ʻaumalaga, o le ā se mea atonu na latou vaaia?

Sa lauiloa Surakusa i le vaitaimi o Eleni ma Roma e pei lava o Atenai ma Roma. E tusa ai ma talatuu, sa uluaʻi nofoia le atunuu e tagata Korinito i le 734 T.L.M. Sa iai taimi na lauiloa ai Surakusa, ma sa fananau ai tagata taʻutaʻua i aso anamua, e pei o le tusitala o Epicharmus ma le tagata tomai i le matematika o Archimedes. I le 212 T.L.M., na faatoʻilalo ai e Roma Surakusa.

O se asiasiga i le aai o loo iai i aso nei, tatou te iloa ai se ata e faatatau iā Surakusa i aso o Paulo. Na vaeluaina le aai i vaega e lua—o le isi i le motu laʻitiiti o Ortygia lea atonu na taunuu i ai le vaa a Paulo, ma le isi i le motu tele.

I aso nei, e mafai ona e maua i le motu toega o le malumalu na fausia i le fausaga faa-Eleni ma pito i sili ona leva i Sicily—le malumalu o Apolo mai le senituri lona ono T.L.M. O loo iai foʻi pou o se malumalu na faaaogā e tapuaʻi atu ai iā Athena, mai le senituri lona lima T.L.M., peitaʻi na avea ma vaega o le malumalu.

O lona taulaga i aso nei e i le motu tele, lea e mafai ona e asiasi ai i le nofoaga o loo iai toega o mea mai anamua i Neapoli. O loo tu latalata i luma i le faitotoʻa e ulufale atu ai le fale matamata o Eleni. O loo faaatagia mai ai se tasi o faaaʻoaʻoga sili ona mataʻina o se fale matamata i Eleni. Sa mafai ona avatu se vaaiga mataʻina i mea na fai ai, ona e faasaga atu i le sami. O loo iai i le vaega maotua o le fanua le fale matamata o le senituri lona tolu T.A. a Roma. O lona foliga e tai pei e lapotopoto, e 460 futu (140 mita) le umi ae 390 futu (119 mita) le lautele, ma o le fale e lona tolu lona telē i Italia.

Pe afai ae maua sou avanoa e te asiasi ai i Surakusa, e mafai ona e nofonofo i luga o se nofoa umi i le matafaga i Ortygia ma tatala lau Tusi Paia i le Galuega 28:12, ma faaata i lou mafaufau faapea o loo iai Paulo i luga o le vaa a o faaseesee mai i le uafu i inei.

[Siata/Faafanua i le itulau 30]

(Tagaʻi i le lomiga mo le ata atoa)

Melita

Sicily

Surakusa

ITALIA

Rekiu

Puteoli

Roma

[Ata i le itulau 30]

Toega o se fale matamata o Eleni i Surakusa