‘Ia Oofu Outou i le Loto Maulalo’

NA SAU lenei tamāloa mai se aai taʻutaʻua. Na ia talisapaia lona tulaga o se tagatānuu o Roma, ma atonu na sau mai se aiga taualoa. Sa maua e lenā tamāloa, o Saulo, ni aʻoaʻoga aupito i sili ona lelei i le uluaʻi senituri T.A. Na tautala o ia i ni gagana a itiiti mai e lua, ma na auai i se ʻaulotu taʻutaʻua Iutaia e taʻua o le ʻau Faresaio.

Atonu na aʻoaʻoina Saulo e vaai maulalo i tagata lautele, ma ia mitamita i lana lava amiotonu. (Luka 18:11, 12; Galuega 26:5) Na talitonu aumea Faresaio a Saulo e faapea, e sili atu i latou i lo isi ma e aloaʻia ma e tatau ona iai ni o latou igoa e faaviivii ai i latou. (Mataio 23:6, 7; Luka 11:43) O le aumea atu i na ituaiga tagata atonu na avea ai Saulo ma sē faasausili foʻi. Tatou te iloa o ia o se tagata sa maelega i le sauāina o Kerisiano. I tausaga mulimuli ane, ina ua iloa o ia o le aposetolo o Paulo, na ia faapea mai o ia sa “muaʻi taufaifai ma faasauā, ma faatautala.”—1 Timoteo 1:13.

Ioe, sa avea Saulo ma Kerisiano, le aposetolo o Paulo, ma suia atoatoa ona uiga. I le avea ma aposetolo Kerisiano, na ia taʻutino mai ma le loto maulalo e faapea, o ia o “lē aupito itiiti lava i le ʻaupaia uma.” (Efeso 3:8) O ia o se faievagelia taulau, ae na te leʻi talia ni viiga mai ia mea. Na i lo lea, na ia tuuina atu viiga uma i le Atua. (1 Korinito 3:5-9; 2 Korinito 11:7) O Paulo lea na timaʻi atu i Kerisiano e faapea: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.”—Kolose 3:12.

Po o aogā lenā fautuaga i lo tatou senituri lona 21? Pe e aogā le faaalia o le loto maulalo? Pe mafai moni ona avea le loto maulalo o se faailoga o le malosi?

 Pe Loto Maulalo Lē Ona le Malosi Uma na Foafoaina Mea?

So o se taimi e talanoaina ai le loto maulalo, e tatau lava ona iloilo mai le vaaiga a le Atua. Aiseā? Auā o ia o lo tatou Pule Silisili Ese ma o Lē na Foafoaina i tatou. A faatusatusa atu iā te ia, e tatau ona tatou iloa ma talia mea e gata ai lo tatou mafai. Tatou te ola faalagolago iā te ia. Na faapea mai se tagata poto anamua e igoa iā Eliu: “A o Lē e ona le malosi uma lava, tatou te lē mafai ona iloa o ia; e silisili ese lona malosi.” (Iopu 37:23) Aiseā, auā a mafaufau i le vateatea o loo siʻomia ai i tatou, e tatou te lagona ai lo tatou faatauvaa! Na faapea mai le perofeta o Isaia: “Seʻi tetepa aʻe i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau iā te i latou uma i o latou igoa; ona o le tele o lona malosi ma lona mana tele; e leai so latou e lē iloa.”—Isaia 40:26.

E lē gata o ia o Lē ona le malosi uma lava, ae loto maulalo foʻi Ieova le Atua. Na tatalo le tupu o Tavita e faapea: “Ua e foaʻiina mai foʻi iā te aʻu le talita o le olataga mai iā te oe, o lou agamalu ua faasilisiliina ai aʻu.” (2 Samuelu 22:36) E agamalu le Atua, auā na te amanaʻia tagata faatauvaa o ē taumafai e faafiafia o ia, ma faasafua atu lona alofa mutimutivale mo i latou. E pei o loo aapa mai Ieova mai le lagi, ina ia feutagaʻi ma le agalelei ma ē matataʻu i le Atua.—Salamo 113:5-7.

E lē gata i lea, e faatāua e Ieova le loto maulalo i ana auauna. Na faapea mai le aposetolo o Peteru: “E tetee atu le Atua i ē faamaualuluga, a e foaʻiina mai le alofa tunoa i ē faamaulalo.” (1 Peteru 5:5) Na faapea mai se tusitala o le Tusi Paia e faatatau i le vaaiga a le Atua i le faamaualuga: “E inosia e Ieova atoa uma ē ua loto faamaualuga.” (Faataoto 16:5) Ae faapefea ona avea le loto maulalo ma faailoga o le malosi?

O le ā e Lē Uiga i ai le Loto Maulalo

E lē tutusa le loto maulalo ma le faalumaina. I aso anamua i isi aganuu, o se tagata e loto maulalo o se pologa, e lē fiafia, toe faatauvaa. E tuufaafeagai ma le manatu o loo faamamafa e le Tusi Paia, o le loto maulalo e oo ai i le faamamaluina. Mo se faaaʻoaʻoga, na faapea mai se tamāloa atamai: “O le taui o le faamaulalo ma le mataʻu iā Ieova, o le oloa lea, ma le viiga, ma le ola.” (Faataoto 22:4) O  loo faapea mai le Salamo 138:6: “O loo maualuga Ieova, a e silasila mai o ia i lē ua faamaulalo; a o lē ua faamaualuga, e silafia mamao mai e ia.”

Pe a faaalia e se tasi le loto maulalo, e lē faapea ai ua leai ni ona tomai po o ni mea ua taulau ai. Mo se faaaʻoaʻoga, e leʻi faafiti Iesu faapea o ia o le Alo pele e toʻatasi o Ieova, ma na te leʻi faatagā faapea e lē tāua lana faiva. (Mareko 14:61, 62; Ioane 6:51) Peitaʻi, na faaalia e Iesu le loto maulalo e ala i le avatu o le viiga i lona Tamā mo ana galuega, ma faaaogā lona malosi e auauna ma fesoasoani ai i isi na i lo le pule ma faapologaina ai i latou.

O se Faailoga o le Malosi

E lē fesiligia na iloa e tagata ia Iesu e ala i “mea mamana” na faia. (Galuega 2:22) Ae i le vaaiga a nisi, o ia “ua aupito faatauvaa.” (Tanielu 4:17) E lē gata na ia ola i se olaga maulalo, ae sa ia aʻoaʻo soo le tāua o le loto maulalo. (Luka 9:48; Ioane 13:2-16) Peitaʻi, e leʻi avea lona loto maulalo ma vaivaiga. Sa ia lē fefe i le puipuia o le suafa o lona Tamā ma le faatinoina o lana faiva. (Filipi 2:6-8) O loo faaataina Iesu i le Tusi Paia o se leona malosi. (Faaaliga 5:5) O loo atagia mai i faaaʻoaʻoga a Iesu e ōgatasi le loto maulalo ma le maumauaʻi e fai le mea saʻo.

A o tatou taumafai e ati aʻe le loto maulalo moni, tatou te iloa ai e manaʻomia ni taumafaiga malolosi e avea ai le loto maulalo ma se vaega o le olaga. E aofia ai le gauaʻi i le finagalo o Ieova i taimi uma, na i lo le mulimuli i ala faigofie po o le lolo atu i tuʻinanauga o le tino. O le ati aʻe o le loto maulalo e manaʻomia ai ona malosi i amioga tatau, e tatau foʻi ona aua le soona faatāua o tatou lava manaʻoga ina ia mafai ona auauna ai iā Ieova ma lē manatu faapito i isi.

O Aogā o le Loto Maulalo

E aofia i le agamalu le saʻoloto mai le faamaualuga po o le manatu faapito. O loo faaaogā e le Tusi Paia le faaupuga “loto maulalo” e faamatala ai lenā uiga. (Efeso 4:2) E mafai e le loto maulalo lea e pulea ai o tatou mafaufau ona fesoasoani e iloilo i tatou lava i mea e tatou te malolosi ai ma vaivaiga, o mea na taulau ai ma mea na lē taulau ai. Na fautua mai Paulo e faapea: “Ou te fai atu ai iā te outou uma, aua le faasili le manatu o se tasi i le mea ua tatau ona manatu ai, a ia māmā le manatu.” (Roma 12:3) So o se tasi na te faatatauina lenā fautuaga o loo ia faaalia le loto maulalo.

E iloa foʻi lo tatou loto maulalo, pe a faaalia le naunau moni e faamuamua manaʻoga o isi na i lo o tatou lava manaʻoga. Na faagaeeina Paulo e apoapoaʻi atu i Kerisiano: “Aua neʻi faia se mea e tasi ma le finau vale, ma le mitamita fua; a ia taʻitasi outou ma manatu ma le loto maulalo, ua sili nisi iā te ia.” (Filipi 2:3) E ōgatusa lenei mea ma le fautuaga a Iesu i ona soo: “O lē sili iā te outou e fai lea ma a outou auauna. O sē faamaualuga o ia iā te ia, e faamaulaloina lea; a o sē faamaulalo o ia iā te ia, e faamaualugaina lea.”—Mataio 23:11, 12.

Ioe, o le loto maulalo e oo ai i le faaeaina i le silafaga a le Atua. Na toe faamamafa e le soo o Iakopo lea manatu ina ua faapea mai: “Inā faamaulalo ia i luma o [Ieova], ona faamaualugaina lea o outou e ia.” (Iakopo 4:10) O ai o le a lē manaʻo e faaeaina e le Atua?

O le lē lava o le loto maulalo ua tele ina tupu ai le vevesi ma feeseeseaʻiga i le va o tagata e toʻatele ma le va o tagata taʻitoʻatasi. O le isi itu, a faaalia le loto maulalo o le a iai ni  iʻuga lelei. O le a tatou maua le māfana o le finagalo malie o le Atua. (Mika 6:8) O le a tatou olioli i le filemu o le mafaufau, auā o se tagata e loto maulalo atonu e fiafia ma lotomalie na i lo o se tagata faamaualuga. (Salamo 101:5) O le a tele ina sologa lelei a tatou feutagaʻiga ma aiga, uō, aumea i le galuega, ma isi. E ʻalofia e tagata loto maulalo le finauvale ma le manatu faapito, o uiga e faigofie ona oo ai i le ita, feeseeseaʻiga, faatautee, ma le tigā.—Iakopo 3:14-16.

Ioe, o le ati aʻe o le loto maulalo o se auala lelei lea e faatumauina ai le va fealoaʻi lelei ma isi. E mafai ona fesoasoani iā i tatou e fesagaʻia ai luʻi o se lalolagi manatu faapito ma vevesi. Na mafai e le aposetolo o Paulo ona manumalo mai le faamaualuga lea sa iā te ia ona o le fesoasoani a le Atua. E tatau ona tatou taumamao mai ni tuʻinanauga o le faamaualuga po o le manatu faatauvaa i isi. O loo lapataʻi mai le Tusi Paia: “E muamua le faamaualuga i le malaia; e muamua foʻi le loto faasiasia i le paū.” (Faataoto 16:18) I le mulimuli i le faaaʻoaʻoga ma le fautuaga a Paulo, o le a tatou iloa ai le atamai o le ‘oofu i le loto maulalo.’—Kolose 3:12.

[Ata i le itulau 4]

Sa mafai ona manumalo Paulo mai le faamaualuga

[Ata i le itulau 7]

O le faaalia o le loto maulalo o le a fesoasoani iā i tatou e faatumauina ai le va fealoaʻi lelei ma isi

[Ē Ana le Ata i le itulau 5]

Anglo-Australian Observatory/Ata na Puʻeina e David Malin