Ia Suʻesuʻe i ‘Mea Loloto a le Atua’

“E suʻesuʻe ifo le Agaga i mea uma, o mea loloto foʻi a le Atua.”—1 KORINITO 2:10.

1. O ā nisi o upu moni o le Tusi Paia e faapogaia ai le olioli o tagata aʻoga fou o le Tusi Paia?

E MANATUA e le toʻatele o i tatou i le faapotopotoga Kerisiano lo tatou olioli, ina ua tatou faatoʻā aʻoaʻoina le upu moni. Na tatou aʻoaʻoina le pogai e tāua ai le suafa o Ieova, le pogai ua ia lē taofia ai puapuaga, aiseā e ō ai nisi tagata i le lagi, ma le lumanaʻi mo i latou uma o ē faamaoni. Atonu sa tatou suʻesuʻe muamua i le Tusi Paia, peitaʻi sa natia nei mea mai iā i tatou e pei foʻi o le isi toʻatele o tagata. Sa pei i tatou o se tagata o loo autilo atu i lalo o le sami i le āʻau. Ae ona na te leʻi faaaogāina se mata fagota, e itiiti ni nai mea matagofie i lalo o le sami o loo ia vaai atu i ai. Peitaʻi ina ua ia faaaogāina se mata fagota po o se vaa e tioata lona fola, ua ia fiafia tele e vaai mo le uluaʻi taimi i ʻamu felanulanuaʻi matagofie, o iʻa, ma isi meaola matagofie o le sami. I se tulaga tutusa, na faatoʻā tatou manino i ‘mea loloto a le Atua’ ina ua amata ona fesoasoani mai se tasi iā i tatou ia malamalama i le Tusi Paia.—1 Korinito 2:8-10.

2. Aiseā e lē gata mai ai le olioli i le aʻoaʻoina mai le Afioga a le Atua?

² Pe ua lava ea le tau ina tatou iloa o upu moni o le Tusi Paia? O le faaupuga ‘mea loloto a le Atua,’ e aofia ai le malamalama i le atamai o le Atua lea ua faailoa atu e le agaga paia i Kerisiano, ae natia mai isi. (1 Korinito 2:7) Maʻeu le lē gata mai o le atamai o le Atua, ma e mafai ona tatou maua ai le olioli e ala i le suʻesuʻe i ona ala! E lē mafai ona tatou iloaina mea uma e faatatau i le atamai o ala o le Atua. Peitaʻi, afai e faaauau pea ona tatou saʻiliʻili i ‘mea loloto a le Atua’ e aunoa ma le faavaivai, o le a faaauau ona lagonaina pea le olioli lea sa tatou maua, ina ua faatoʻā aʻoaʻoina aʻoaʻoga faavae o le Tusi Paia.

3. Aiseā tatou te manaʻomia ai se malamalamaga loloto i māfuaaga o o tatou talitonuga?

 ³ Aiseā e manaʻomia ai ona tatou malamalama i na “mea loloto”? O le malamalama e lē gata i mea o loo tatou talitonu i ai, ae o le māfuaaga foʻi e tatou te talitonu ai i lenā mea, po o le faavae o o tatou talitonuga, o le a faamalosia ai lo tatou faatuatua ma le mautinoa i o tatou talitonuga. Ua taʻu mai e le Tusi Paia iā i tatou ia mafaufau i le ‘mea e tatau ona tatou faia,’ ina ia “[tatou] suʻesuʻe pe se ā le finagalo o le Atua, o mea ua lelei, ma le mālie, ma le atoatoa.” (Roma 12:1, 2) O le malamalama i le pogai ua poloaʻi mai ai Ieova ina ia ola i se auala patino, e faamalosia ai pea la tatou filifiliga e usitai atu iā te ia. O lea la, o le iai o se malamalamaga i “mea loloto,” e mafai ona aumaia ai iā i tatou le malosi e teena ai faaosoosoga e faia ni gaoioiga lē saʻo, ma uunaʻia ai i tatou “e maelega i galuega lelei.”—Tito 2:14.

4. O le ā e aofia ai i le suʻesuʻeina o le Tusi Paia?

⁴ O le malamalama i mea loloto e manaʻomia ai ona tatou suʻesuʻe. Peitaʻi, e lē tutusa le suʻesuʻe ma le faitauina faatopelau o se mea. O le suʻesuʻe e aofia ai le iloilo ma le faaeteete o se faamatalaga ina ia iloa pe faapefea ona fesootaʻi ma mea ua uma ona tatou iloaina. (2 Timoteo 1:13) E aofia ai foʻi le iloaina o māfuaaga mo manatu ua taʻua. O le suʻesuʻeina foʻi o le Tusi Paia, e tatau ona aofia ai le mafaufau loloto pe faapefea ona tatou faaaogā manatu ua tatou aʻoaʻoina i le faia o filifiliga atamai ma fesoasoani ai i isi. E lē gata i lea, talu ai ona o “Tusi Paia uma lava e mai le agaga o le Atua ia, e aogā foʻi,” e tatau la ona aofia ai iā tatou suʻesuʻega “afioga uma e tulei mai i le fofoga o le Atua.” (2 Timoteo 3:16, 17; Mataio 4:4) E lē faigofie le suʻesuʻeina o le Tusi Paia! Peitaʻi e mafai ona lagona ai le fiafia, ma e lē matuā faigatā tele le mauaina o le malamalama i ‘mea loloto a le Atua.’

E Fesoasoani Ieova i Ē Lotomaulalo Ina ia Malamalama

5. O ai e mafai ona malamalama i ‘mea loloto a le Atua’?

⁵ E tusa lava foʻi pe e leʻi lelei ni au aʻoaʻoga ma e lē o sau masani le suʻesuʻe, e lē tatau ona e manatu e faapea e lē mafai ona e malamalama i ‘mea loloto a le Atua.’ I le vaitaimi o le faiva a Iesu i le lalolagi, na faailoa mai ai e Ieova se malamalamaga i Lana fuafuaga, e lē i ē popoto ma atamamai, ae i tagata e leʻi aʻoaʻoina ma valelea, o ē na lotomaulalo e aʻoaʻoina e le auauna a le Atua. Sa pei i latou o ni tama valevale pe a faatusatusa atu i ē na aʻoaʻoina i aʻoga. (Mataio 11:25; Galuega 4:13) E tusa ai ma “mea ia ua saunia e le Atua mo i latou o ē alofa iā te ia,” na tusi atu ai Paulo i ona uso talitonu: “Ua faaalia mai ia mea e le Atua iā te i matou e lona Agaga; auā e suʻesuʻe ifo le Agaga i mea uma, o mea loloto foʻi a le Atua.”—1 Korinito 2:9, 10.

6. O le ā le uiga o le 1 Korinito 2:10?

⁶ E faapefea ona suʻesuʻe le agaga paia o le Atua “i mea uma, o mea loloto foʻi a le Atua?” Na i lo le avatu o se faaaliga i Kerisiano taʻitasi, e faaaogā e Ieova lona agaga e faatonutonu ai lana faalapotopotoga, lea ua saunia mai ai se malamalamaga o le Tusi Paia mo tagata autasi o le Atua. (Galuega 20:28; Efeso 4:3-6) O loo olioli faapotopotoga uma i le lalolagi aoao i le polokalame lava lea e tasi. E tele tausaga latou te suʻesuʻeina ai aʻoaʻoga eseese o le Tusi Paia. E galue foʻi le agaga paia i le faapotopotoga ina ia fesoasoani i tagata, ina ia iā i latou le uiga lea  e mafai ai ona malamalama i ‘mea loloto a le Atua.’—Galuega 5:32.

O le ā e Aofia ai i ‘Mea Loloto a le Atua’?

7. Aiseā ua lē malamalama ai le toʻatele o tagata i ‘mea loloto a le Atua’?

⁷ E lē tatau ona tatou manatu e faapea o “mea loloto” o ni mea e faigatā tele ona malamalama i ai. Ua punitia le poto o ‘mea loloto a le Atua’ mai le toʻatele o tagata, e lē ona ua faigatā tele ona maua le atamai o le Atua, ae ona o loo faasesē e Satani tagata e ala i le teena o le fesoasoani ua saunia e Ieova e ala mai i Lana faalapotopotoga.—2 Korinito 4:3, 4.

8. O ā mea loloto sa faasino i ai Paulo i le mataupu lona tolu o lana tusi i Kerisiano i Efeso?

⁸ Ua faaalia i le mataupu lona tolu o le tusi a Paulo i Kerisiano i Efeso e faapea, e aofia i ‘mea loloto a le Atua’ le tele o upu moni lea ua malamalama lelei i ai tagata o Ieova, e pei o le tulaga o le Fanau Folafolaina, le filifilia o tagata o ē e iai le faamoemoe faalelagi mai le fanau a tagata, ma le Malo faa-Mesia. Na tusi Paulo: “Sa lē faailoa atu i nisi tupulaga o le fanauga a tagata, faapei ona faaali mai nei e le Agaga, i ana aposetolo paia, ma ana perofeta paia; ia avea nuu ese ma suli faatasi ma tino e tasi, ma ia tofusia faatasi i lana sa folafola mai ona o Keriso Iesu.” Na taʻua e Paulo ua tofia o ia ina ia “faamalamalamaina atu foʻi i tagata uma le uiga o le mafuta faatasi i le mea lilo sa natia talu mai i tupulaga anamua e le Atua.”—Efeso 3:5-9.

9. Aiseā o se faaeaga ai le malamalama i ‘mea loloto a le Atua’?

⁹ Na faamatala atili mai e Paulo le finagalo o le Atua, “i mea o i le lagi, i le ekalesia, le poto uiga eseese o le Atua.” (Efeso 3:10) O loo maua e agelu aogā mai le mataʻituina, ma malamalama ai, i le atamai o feutagaʻiga a Ieova ma le faapotopotoga Kerisiano. Maʻeu se faaeaga mo i tatou o le malamalama lea i mea o loo naunau foʻi i ai agelu! (1 Peteru 1:10-12) Ona sosoo lea ma le faapea mai o Paulo, e tatau ona tatou taumafai e “iloa lelei e [tatou] atoa ma le ʻau paia uma, o le uiga o le lautele, ma le umi, ma le loloto, ma le maualuga” o le talitonuga faa-Kerisiano. (Efeso 3:11,18) Seʻi o tatou talanoaina nei nisi o faaaʻoaʻoga o mea loloto ia atonu tatou te leʻi iloaina muamua.

Faaaʻoaʻoga o Mea Loloto

10, 11. E tusa ai ma le Tusi Paia, o anafea na avea ai Iesu ma vaega autū o le “fanau” a le “fafine” faalelagi a le Atua?

¹⁰ Ua tatou iloa o le vaega autū o le “fanau” a le “fafine” faalelagi a le Atua lea e taʻua i le Kenese 3:15, o loo faasino atu iā Iesu. Ina ia faalauteleina lo tatou malamalama, tatou te ono fesili e faapea: ‘O anafea na avea ai Iesu ma Fanau folafolaina? Pe i se vaitaimi o lona uluaʻi soifuaga a o leʻi afio mai e avea ma tagata, pe ina ua fanau mai o se tagata, pe i le taimi o lona papatisoga, po o le taimi o lona toetū’?

¹¹ Na folafola mai e Ieova e faapea o le a saunia e le vaega faalelagi o lana faalapotopotoga, lea sa faasino atu i ai o lana “fafine” faavaloaga, se fanau o le a tuʻimomomoina le ulu o le gata. Peitaʻi a o faagasolo le faitau afe o tausaga, e leʻi saunia e le fafine a le Atua se fanau e mafai ona faaumatiaina Satani ma ana galuega. O le māfuaaga lea ua taʻua ai o ia e le valoaga a Isaia e “pa” ma “ua faanoanoa lona loto.” (Isaia 54:1, 5, 6) Na mulimuli ane fanau mai Iesu i Peteleema. Ae ina ua faatoʻā mavae lona papatisoga, ina ua faauuina o ia e le agaga e avea ma atalii faaleagaga o le Atua, ona faalauiloa mai lea e Ieova: “O loʻu Atalii pele lenā.” (Mataio 3:17; Ioane 3:3) O inā na aliaʻe mai ai le vaega autū o le “fanau” a le fafine. Mulimuli ane, ona faauuina foʻi lea o soo o Iesu e le agaga paia. Ona “pese” ai lea o le “fafine” a Ieova, o lē sa pei o se “fafine sa lē fanau.”—Isaia 54:1; Kalatia 3:29.

12, 13. O ā mau e faaalia ai o loo faia aʻe le “auauna faamaoni ma le mafaufau” i Kerisiano faauuina uma i le lalolagi?

¹² O le faaaʻoaʻoga lona lua o mea loloto lea ua faailoa mai iā i tatou, o le fuafuaga lea a le  Atua e filifilia le 144,000 mai i tagata. (Faaaliga 14:1, 4) Ua tatou talitonu i le aʻoaʻoga e faapea o le “auauna faamaoni ma le mafaufau” lea na taʻua e Iesu o le a saunia mai “mea e ʻai” mo ana auauna, o loo faia aʻe i le ʻaufaauuina uma lava o loo soifua i le lalolagi i so o se taimi. (Mataio 24:45) O ā mau o le Tusi Paia e faamaonia ai le saʻo o lenei malamalamaga? Pe sa faasino atu Iesu i so o se Kerisiano o loo taumafai e atiina aʻe ona uso i taumafa faaleagaga?

¹³ Na fetalai atu le Atua i le nuu o Isaraelu: “O outou o aʻu molimau, ma laʻu auauna o lē na aʻu filifilia.” (Isaia 43:10) Peitaʻi iā Nisani 11 i le 33 T.A., na fetalai atu ai Iesu i taʻitaʻi o Isaraelu, ua teena e le Atua lo latou nuu mai le avea ma Ana auauna. Na ia fetalai atu: “E aveesea le malo o le Atua iā te outou, ae tuuina atu i se nuu e au mai ai ona fua.” Na fetalai atu Iesu i le motu o tagata: “Faauta, ua tuua lo outou fale, e faatafunaina.” (Mataio 21:43; 23:38) I le avea ma auauna a Ieova, sa lē faamaoni ma sa lē mafaufau lelei le aiga o Isaraelu. (Isaia 29:13, 14) Mulimuli ane i lenā lava aso, na fesili atu ai Iesu e faapea: “O ai foʻi le auauna faamaoni ma le mafaufau?” o le uiga o le fesili a Iesu, ‘O ai le nuu mafaufau lelei o le a suitulaga iā Isaraelu e fai ma auauna faamaoni a le Atua?’ Na avatu e le aposetolo o Peteru le tali ina ua ia faapea atu i le faapotopotoga o Kerisiano faauuina: “O outou . . . ‘o le nuu paia, ma le nuu na faatauina mai.’” (1 Peteru 1:4; 2:9) Na avea lenā nuu faaleagaga, “le Isaraelu o le Atua,” ma auauna fou a Ieova. (Kalatia 6:16) E pei lava la ona sa faia aʻe le “auauna” e tasi i sui uma o Isaraelu anamua, ua faapea foʻi ona faia aʻe le “auauna faamaoni ma le mafaufau” e tasi, i Kerisiano faauuina uma i le lalolagi i so o se taimi. Maʻeu se faaeaga mo i tatou o le mauaina lea o “meaʻai” e ala mai i le auauna a le Atua!

E Mafai Ona e Olioli i Suʻesuʻega Totino

14. Aiseā e sili atu ai ona olioli i le suʻesuʻeina o le Tusi Paia na i lo le tau ina faitau i ai?

¹⁴ Pe a faaalia mai malamalamaga fou o le Tusi Paia iā i tatou, pe tatou te lē lagona ea le olioli ona o le auala o loo faamalosia ai lo tatou faatuatua? O le pogai lenā e faapea atu ai e sili atu ona maua le olioli i le suʻesuʻeina o le Tusi Paia na i lo le tau lava ina faitau. O lea la, pe a e faitauina lomiga faa-Kerisiano, ia fesili ifo iā te oe lava: ‘E faapefea ona faatusatusa lenei faamatalaga ma le mea na ou malamalama muamua i ai e faatatau i le mataupu? O ā mau faaopoopo o le Tusi Paia po o faamatalaga e mafai ona ou mafaufau i ai, lea o le a saunia ai se isi fesoasoani atili mo faaiʻuga ua aumaia i lenei mataupu?’ Afai e manaʻomia ona fai nisi saʻiliʻiliga atili, tusi i lalo le fesili o loo e manaʻo e tali, ma ia avea ma mataupu faaopoopo o le isi au suʻesuʻega o le a fai i le lumanaʻi.

15. O ā mataupu faaopoopo o suʻesuʻega e mafai ona olioli ai, ma e faapefea ona aogā pea na mataupu?

¹⁵ O ā mataupu faaopoopo o suʻesuʻega o le a e maua ai le olioli ona o le mauaina o le malamalamaga fou? E mafai ona faateleina lo tatou malamalama pe a faia se saʻiliʻiliga loloto i feagaiga eseese ua osia e le Atua mo le lelei o tagata, e ala i le faaaogāina o le mataupu e 19 o le tusi Faalatalata Atu Iā Ieova. * O le a e faamalosia lou faatuatua e ala i le faia o se saʻiliʻiliga i valoaga e faatatau iā Iesu Keriso, po o le iloiloina foʻi o fuaiupu taʻitasi o se tusi o le Tusi Paia o loo taʻua ai ni valoaga. E faamalosia foʻi le faatuatua e ala i le autaluina o talaaga o Molimau a Ieova i aso nei. E mautinoa foʻi o le a faateleina lou malamalama i nisi o mau, pe a e autaluina  mataupu ua mavae o le “Fesili Mai le ʻAufaitau” lea ua lomia atu i Le Olomatamata. Ia mātau faapitoa faamaoniga faale-Tusi Paia o loo lagolagoina ai upu moni ua faamatalaina mai. O le a fesoasoani lenā e “aʻoaʻosooina” ai oe ma atiina aʻe ai le mafaufau lelei. (Eperu 5:14) A o e suʻesuʻe, ia fai ni faamaumauga i lau kopi o le Tusi Paia pe i se laupepa, ma o le a aogā ai pea au suʻesuʻega iā te oe, aemaise foʻi isi tagata e mafai ona e fesoasoani atu i ai.

Fesoasoani i Fanau ia Fiafia e Suʻesuʻe le Tusi Paia

16. E faapefea ona e fesoasoani i fanau ina ia fiafia e suʻesuʻe le Tusi Paia?

¹⁶ E telē se sao o mātua ina ia fesoasoani i a latou fanau e faatupu aʻe se naunau mo mea faaleagaga. Aua le manatu māmā i tomai o talavou e malamalama ai i mea loloto. Afai e te tofia atu i tamaiti se mataupu e suʻesuʻe i ai e sauni ai mo le suʻesuʻega faale-Tusi Paia a le aiga, e mafai ona e fesili atu iā i latou po o ā mea na latou aʻoaʻoina. E mafai foʻi ona aofia ai i le suʻesuʻega a le aiga ni faataʻitaʻiga e fesoasoani ai i talavou e aʻoaʻo le auala e tali ai ni fesili e tusa o lo latou faatuatua, ma faamaonia atu e moni mea ua aʻoaʻoina. E mafai foʻi ona e faaaogā le polosiua ‘Matamata i le Nuu Lelei’ * e aʻoaʻoina ai nuu eseese i le Tusi Paia, ma faamanino ai manatu o loo e faitauina i lau faitauga Tusi Paia i vaiaso taʻitasi.

17. Aiseā e manaʻomia ai ona tatou paleni i a tatou mataupu faaopoopo, mo suʻesuʻega faale-Tusi Paia a le tagata lava ia?

¹⁷ E mafai e mataupu faaopoopo mo suʻesuʻega faale-Tusi Paia a le tagata lava ia ona maua ai le poto ma faamalosia ai le faatuatua, ae ia faaeteete foʻi ia aua neʻi avea lenā tulaga ma māfuaaga o le a leai ai se taimi e fai ai au sauniuniga mo sauniga a le faapotopotoga. O sauniga, o le isi lenā auala o loo aʻoaʻoina ai i tatou e Ieova e ala mai i “le auauna faamaoni ma le mafaufau.” Peitaʻi, e ono fesoasoani saʻiliʻiliga faaopoopo iā te oe e faia ai ni tali uigā i sauniga—o se faataʻitaʻiga, i Suʻesuʻega Tautusi a le Faapotopotoga, pe a o fai foʻi manatu tāua mai le faitauga Tusi Paia o le vaiaso mo le Aʻoga o le Faiva Faatiokarate.

18. Aiseā e aogā tele ai taumafaiga ina ia suʻesuʻeina ‘mea loloto a le Atua’?

¹⁸ E mafai ona fesoasoani iā te oe suʻesuʻega loloto totino e faalatalata atu ai iā Ieova. I le faaalia o le tāua o na ituaiga suʻesuʻega, ua faapea mai ai le Tusi Paia: “Ua fai le poto ma mamalu, ua fai foʻi tupe ma mamalu; a o le aogā lenei o le poto ua maua, e ola ai ē ua i ai.” (Failauga 7:12) O lea la, e aogā tele taumafaiga ina ia faalolotoina ai lou malamalama i mea faaleagaga. Ua folafola mai e le Tusi Paia iā i latou o ē e faaauau pea ona suʻesuʻe e faapea: “E maua ai le poto i le Atua.”—Faataoto 2:4, 5.

[Faaopoopoga i lalo]

Pe Mafai Ona e Faamatala?

• O ā ‘mea loloto a le Atua’?

• Aiseā e lē tatau ai ona muta lo tatou suʻesuʻe i mea loloto?

• Aiseā e mafai ai e Kerisiano uma ona maua le olioli i le malamalama i ‘mea loloto a le Atua’?

• E faapefea ona tatou maua atoatoa aogā mai ‘mea loloto a le Atua’?

[Fesili mo le Suʻesuʻega]

[Ata i le itulau 28]

O anafea na avea ai Iesu ma Fanau folafolaina?

[Ata i le itulau 31]

E mafai e mātua ona tofia atu i a latou fanau ni mataupu e suʻesuʻe i ai e sauni ai mo le suʻesuʻega faale-Tusi Paia a le aiga