Le Luʻi o le Loto Maulalo

O LE toʻatele o tagata, e atagia mai e lē talafeagai le loto maulalo i aso nei. O ē mananaʻo e uaʻi atu tagata ma ē fia mata muamua, o ē faamaualuluga, o ē mananaʻo e fai lo latou loto i taimi uma. O le toʻatele o tagata e fia mananaʻo i olaga o ē mauoloa toe taʻutaʻua, ae lē o olaga o ē loto maulalo toe agamalu. O i latou e taulau e masani ona femitai ona ua manuia a latou taumafaiga. Na i lo le faaalia o le loto maulalo, latou te mitamitavale ona o le manuia ua latou maua.

Na faapea mai se tagata suʻesuʻe mai Kanata, e faatatau i le “aliaʻe o le manatu faapito ma le faamaualuga o le tagata iā te ia lava” i lona atunuu. Ua manatu nisi o loo tatou ola i se lalolagi e faatāua e tagata le manatu faapito na i lo le faatāua o latou tiute tauave, ma ua mātauina le faatupulaʻia o le manatu faapito mo lo latou lava lelei. I lenei lalolagi, e foliga mai e leai se māfuaaga e ono aogā ai le fautuaina atu o le loto maulalo.

O lea la, e toʻalaiti e lē talia le manatu e lelei le loto maulalo mo isi, ona e faigofie ona nonofo faatasi ma tagata loto maulalo pe agamalu. Peitaʻi, i lenei lalolagi vevesi, e popole nisi tagata e faapea, a latou faaalia le loto maulalo, o le a vaai mai isi o se latou vaivaiga.

Na valoia e le Tusi Paia, o le a iai tagata i o tatou vaitaimi e ‘loto vii, ma faamaualuga.’ (2 Timoteo 3:1, 2) Pe e te lē ioe ua faataunuuina lenei valoaga? Pe e te manatu e iai se aogā o le loto maulalo? Pe e te manatu o le a vaai nisi i se tagata loto maulalo e vaivai toe faigofie ona faavalea?

O le mea moni e tele māfuaaga lelei i le Tusi Paia e faatāua ai ma ati aʻe le loto maulalo. E maua ai se vaaiga paleni ma le mautinoa o lenei uiga, ma faaalia ai o le loto maulalo e iloa ai le malosi ae lē o se vaivaiga. O le a faamatala e le mataupu o sosoo mai pe aiseā.

[Ata i le itulau 3]

E tatau faapefea ona tatou manatu i mea ua tatou taulau ai?