“O Loo iā te Aʻu le Ario, o Loo iā te Aʻu Foʻi le Auro”

I LE senituri lona ono T.L.M., na faasaʻolotoina ai e Kuresa, le tupu o Peresia, tagata o le Atua mai le faaaunuua i Papelonia. E faitau afe i latou na toe foʻi i Ierusalema e toe fausia le malumalu o Ieova lea ua faaleagaina. Sa faigatā le tulaga tamaoaiga o i latou na toe foʻi ane, ma sa tetee ifo nuu tuaoi i le toe fausiaina o le malumalu. O lea la, sa leʻi mautinoa ai e nisi pe faamata e mafai ona latou faaiʻuina lea galuega tāua.

E ala atu i le perofeta o Hakai, na faamautinoa atu e Ieova i le ʻaufaigaluega o le a Ia faatasi ma i latou. Na fetalai le Atua, “Ou te lūlūina foʻi nuu uma; ona oo mai ai lea o mea ua manaʻomia e nuu uma; ou te faatumuina foʻi lenei fale i le pupula.” E faatatau i le faatupeina o lea galuega, na momoli atu ai e Hakai le feʻau lenei i le ʻaufaigaluega: “O loo iā te aʻu le ario, o loo iā te aʻu foʻi le auro, ua fetalai mai ai Ieova o ʻau.” (Hakai 2:7-9) E leʻi atoa le lima tausaga mulimuli ane talu ona faaoo atu e Hakai na upu faalaeiau, ae faaiʻuina loa le galuega.—Esera 6:13-15.

Na uunaʻia e upu a Hakai auauna a le Atua i se vaitaimi e leʻi leva tele atu, a o avatu iā i latou galuega e fesootaʻi ma le tapuaʻiga iā Ieova. Ina ua amata lomia e le auauna faamaoni ma le mafaufau lenei mekasini i le 1879, e faaulutalaina Zion’s Watch Tower and Herald of Christ’s Presence, na tusia ai faamatalaga nei: “E tatou te talitonu o loo lagolagoina e IEOVA le ‘Zion’s Watch Tower,’ ma o le pogai lea e lē taitai ai o tatou ʻaisi pe talosagaina se fesoasoani a isi. Pe a taofia le saunia mai o tupe e Lē na fetalai: ‘O aʻu e ana auro ma siliva uma i mauga,’ ona tatou manatu loa lea ua ao ona taofia le lomia o lomiga.”

E leʻi taofia lava le lomia o Le Olomatamata. E 6,000 kopi o le lomiga muamua, i le na o le faa-Peretania. I aso nei, o le faatatauga o Le Olomatamata e lomia i lomiga taʻitasi, e 28,578,000 kopi, i le 161 gagana. * Ua lomia foʻi le Ala Mai!, le soa o Le Olomatamata i se faatatauga e 34,267,000 kopi, i le 80 gagana.

O loo faatinoina e Molimau a Ieova le tele o galuega lea e tutusa ma le fuafuaga o Le Olomatamata —o le faaeaeaina lea o Ieova le Atua, o ia o le Alii Pule Silisili Ese i le aoao o mea, ma le faasilasilaina o le tala lelei o lona Malo. (Mataio 24:14; Faaaliga 4:11) O talitonuga a Molimau ua tutusa ma manatu o loo faailoaina e lenei mekasini talu le tausaga 1879. Latou te talitonu o loo lagolagoina e le Atua le latou galuega, ma e maua le fesoasoani tau tupe mo galuega o loo ia finagalo i ai. Ae faapefea ona faatupe galuega a Molimau a Ieova? Ma o ā galuega o loo latou faatinoina ina ia talaʻia le tala lelei i le lalolagi aoao?

E Faapefea Ona Faatupe le Galuega?

E masani ona fesiligia e tagata Molimau a Ieova a o latou talaʻi atu i le lautele i se fesili faapea: “Pe e totogi outou e fai lenā galuega?” O le tali e leai, e lē totogia i latou. E ofo fua atu lo latou taimi. O loo faaaluina e nei tagata talaʻi le tele o itula e talanoa ai ma isi e faatatau iā Ieova ma le faamoemoe mo se lumanaʻi lelei ua folafola mai e le Tusi Paia, ona o lo latou lotofaafetai. Ua latou talisapaia mea o loo faia e le Atua mo i latou, ma le auala o loo taaʻina ai e le feʻau o le tala lelei o latou olaga ma la latou vaaiga i mea. O le māfuaaga lenā ua latou mananaʻo ai e faasoa atu na mea lelei i isi. O le faia o lenā mea, ua latou usitaia ai le taʻiala lenei na taʻua e Iesu: “Ua maua fua e  outou, ia outou foaʻifuaina atu.” (Mataio 10:8) Ioe, o lo latou faanaunauga e avea ma molimau iā Ieova ma Iesu, ua uunaʻia ai i latou e faaaogā a latou tupe ina ia faasoa atu ai lo latou talitonuga i isi, tusa lava pe mamao mea e nonofo ai isi mai iā i latou.—Isaia 43:10; Galuega 1:8.

O le faagaoioia o le galuega talaʻi ma mea e faaaogā e faataunuu ai—o masini lomitusi, ofisa, Maota mo Fonotaga, fale mo misionare, ma isi mea—e faaalu ai se tupe tele. O fea la e aumai ai tupe mo nei mea? O le faatupeina o nei mea uma e maua mai i meaalofa tauofo. E lē o faamalosia e Molimau a Ieova tagata i le faapotopotoga e avatu ni tupe e lagolagoina ai galuega a le faalapotopotoga, ma e lē totogia foʻi lomiga e latou te tufaina atu. Afai e fiafia se tasi e foaʻi se meaalofa tauofo e lagolagoina ai lenei galuega, e talia ma le fiafia e Molimau a Ieova. Seʻi o tatou iloiloina se tasi o vala ma mea e aofia ai a o taumafai e talaʻia le tala lelei i lalolagi atoa—le tulaga o faaliliuga.

Lomia i Gagana e 437

Mo le tele o tausaga, ua faaliliuina lomiga a Molimau a Ieova i le tele o vaega o le lalolagi. Ua faaliliuina sāvali, o polosiua, mekasini, ma tusi i gagana e 437. O le mea moni, e tele mea e manaʻomia e faatino ai faaliliuga, e pei foʻi o isi galuega e aofia ai i le talaʻia o le tala lelei. O ā la mea e manaʻomia ina ia faatino ai faaliliuga?

Pe a uma ona faamautū e i latou o loo saunia ma tusia lomiga a Molimau a Ieova i mataupu faa-Peretania, ona lafo lea i le komepiuta i vaega faaliliu o loo i le lalolagi atoa. O nei vaega faaliliu taʻitasi, e gafa ma le faaliliuina i le latou gagana, lea o le a maua ai lomiga ua saunia. O nei vaega faaliliu, e mai le 5 i le 25 tagata, e faalagolago lava i le tele o galuega o loo latou faatinoina ma le tulaga lavelave o le faaliliuina i le latou gagana.

 E toe siaki ma faitauina le mataupu ua faaliliu. O le sini ina ia faaoo atu le manatu o loo iai i le mataupu na saunia mai i se auala saʻo ma manino lelei. E lē faigofie le faatinoina o lenei mea. Pe a faaliliuina se mataupu e faaaogā ai upu faigatā, e faia e tagata faaliliu faapea ma tagata faitau ni saʻiliʻiliga loloto i gagana uma e lua (Faa-Peretania, po o isi gagana o loo tusia ai mataupu, e pei o Falani, Rusia, ma Sepania), ma le gagana tonu lea e faaliliu i ai ina ia faamautinoa le saʻo lelei. Mo se faaaʻoaʻoga, afai o se mataupu o le Ala Mai! e talanoaina ai mataupu faaonapōnei ma talafaasolopito, e manaʻomia la ni saʻiliʻiliga loloto.

O le toʻatele o le ʻau faaliliu e galulue i ofisa o lālā a Molimau a Ieova, o isi e galulue faataimi atoa ae o isi e galulue faavaitaimi. O isi e galulue i vaipanoa o loo faaaogā ai le gagana tonu lea e faaliliuina. E lē totogia i latou. Ua iai potu, meafale ma meaʻai ua saunia mo ē faigaluega faataimi atoa, faatasi ai ma sina alauni itiiti e fesoasoani ai mo mea e manaʻomia e le tagata. E pe ā ma le 2,800 Molimau o ē galulue o ni faaliliu i le lalolagi atoa. I le taimi nei, e 98 ofisa o lālā a Molimau a Ieova o loo faatinoina faaliliuga ma e latou te vaavaaia foʻi isi ʻau faaliliu i isi vaipanoa. O se faataʻitaʻiga, e vaavaaia e le lālā i Rusia le sili atu i le 230 o i latou e faigaluega faataimi atoa ma faavaitaimi i le faaliliuina i gagana e 30, e aofia ai gagana e lē iloa e le toʻatele i fafo atu o le vaipanoa, e pei o Chuvash, Ossetian, ma Uighur.

Faaleleia Atili le Galuega Faaliliu

E pei ona iloa e se tagata ua aʻoaʻoina se isi gagana le faigatā, e faapena foʻi ona lē faigofie le faaliliuina saʻo o manatu lavelave. O le sini autū, o le faaliliu saʻo lea o mea moni ma manatu o le mataupu na saunia mai, ae i le taimi e tasi e ao ona malamalama pe a faitauina, e pei lava o loo tusia i le gagana tonu lea e faaliliu ai. O le faia o lenei galuega e tele se taimi ma taumafaiga e alu ai. E  umi tausaga o taumafai se tasi e avea ma faaliliu lelei, ma ua faatulaga e Molimau a Ieova ni polokalame i toleniga tau faaliliu faaauau pea, e fesoasoani ai iā i latou. O nisi taimi e asiasi ai uso agavaa i vaega faaliliu ina ia fesoasoani iā i latou, e faaleleia atili le galuega faaliliu ma le faaaogāina o polokalame o komepiuta.

Ua iai ni iʻuga lelei o nei toleniga. O se faaaʻoaʻoga, na lipotia mai e le lālā o Molimau a Ieova i Nicaragua e faapea: “O le taimi muamua lea ua maua ai e le vaega faaliliu a Miskito ni toleniga mai i se tagata agavaa e sau mai le lālā o Mekisikō. Ma ua iai se suiga tele o le auala ua faaliliuina ai galuega a le matou ʻaufaaliliu. Ua faaleleia atili a matou faaliliuga.”

O Upu e Pāʻia ai le Loto

O taumafaiga e faaliliuina le Tusi Paia ma lomiga faale-Tusi Paia i le gagana lava a le tagata, e taumafai ia pāʻia o latou loto, ma o le mea moni lenā o loo iai. I le tausaga 2006, na matuā faafiafiaina Molimau a Ieova i Bulgaria ina ua maua le New World Translation of the Christian Greek Scriptures i le gagana Bulgaria. Na lipotia mai e le lālā a Bulgaria, le tele o faamatalaga faafetai i lenā mea. Na faapea mai tagata o le faapotopotoga, “o lenei, ua pāʻia e le Tusi Paia o latou loto ma o latou mafaufau.” Na faapea mai se tamāloa matua mai Sofia: “Na ou faitauina le Tusi Paia mo le tele o tausaga, ae ou te leʻi faitau lava i se faaliliuga e faigofie ona malamalama ma pāʻia ai le loto.” E faapena foʻi i Alapania, ina ua maua e se tamaʻitaʻi Molimau  le Tusi Paia atoa o le New World Translation i le faa-Alapania, na ia faapea mai: “Oka se manaia o le faalogo atu i le Afioga a le Atua i le faa-Alapania! Maʻeu se faaeaga o le fetalai mai o Ieova iā i matou i la matou lava gagana!”

E ono faaaluina ni nai tausaga e faaliliu ai le Tusi Paia. Ae pe a maua e tagata uma le malamalama moni i le Afioga a le Atua mo le taimi muamua, pe e te lē faapea ai la e aogā nei taumafaiga uma?

“O le ʻAu Faigaluega i Matou Faatasi ma le Atua”

O le faaliliu, o le isi lea o auala ua talaʻia ai ma le uigā le tala lelei. O le tusiaina, le lomiaina, ma le aveina o lomiga faale-Tusi Paia i vaa ma isi galuega a lālā, matagaluega, ma faapotopotoga a Molimau a Ieova, e manaʻomia ai taumafaiga ma tupe faaalu. Ae peitaʻi, ua “fai taulaga ma le loto” tagata o le Atua i le faataunuuina o lenei galuega. (Salamo 110:3) O se faaeaga iā i latou le faia o se sao ma manatu i ai o se tulaga mamalu, lea e iʻu ai i le manatu o Ieova iā i latou o ē ‘faigaluega faatasi ma ia.’—1 Korinito 3:5-9.

E moni e lē faalagolago lē na fetalai “o loo iā te aʻu le ario, o loo iā te aʻu foʻi le auro” i a tatou foaʻi tautupe ina ia faataunuu ai lana galuega. Ae peitaʻi, o loo faamamaluina e Ieova ana auauna mo le faapaiaina o lona suafa e ala i a latou meaalofa tauofo i le galuega o le faasaoina i “nuu uma.” (Mataio 24:14; 28:19, 20) Pe e lē uunaʻia ai ea oe ina ia lagolagoina lenei galuega o le a toeitiiti ona faamāeʻaina?

[Faaopoopoga i lalo]

[Pusa i le itulau 18]

“UA UUNAʻIA AI I MATOU E MAFAUFAU LOLOTO”

Na tusi atu se teineitiiti talavou e 14 tausaga i le lālā a Molimau a Ieova i Cameroon e faapea: “Ina ua uma ona faatau mai aʻu mea e manaʻomia i le aʻoga mo le tausaga, na ou faatau atu tusi aʻoga o le tausaga ua teʻa i le 2,500 francs [$5 Amerika]. Ou te faameaalofa atu lenei tupe faatasi ai ma le tupe faaopoopo e 910 francs [$1.82 Amerika] mai i laʻu teugātupe. Ou te fia faalaeiauina outou e faaauau pea i la outou galuega lelei o loo fai. Faafetai lava mo le Olomatamata ma le Ala Mai! Ua uunaʻia ai i matou e mafaufau loloto.”

[Pusa/Ata i le itulau 18]

O SE MEAALOFA MATAʻINA

Na maua e le lālā a Molimau a Ieova i Mekisikō se tusi mai se tamaitiiti lototalisapaia e ono tausaga e igoa iā Manuelu, lea e nofo i Chiapas. Ona o le taimi lea e lē iloa tusitusi, na tusi ai e lana uō le tusi mo ia. Na fai mai Manuelu: “Na aumai e le tinā o loʻu tinā iā te aʻu se aumatua. Ina ua fanau le aumatua, na ou tausia le tamaʻi puaa pito i sili ona manaia faatasi ai ma le fesoasoani mai a uso i le faapotopotoga. Ou te faameaalofa atu le tupe lea na maua mai le faatauina o le puaa faatasi ma oʻu alofaaga. O le mamafa o le puaa e 220 pauna [100 kilo], ma ou maua mai ai le 1,250 peso [$110 Amerika]. Faamolemole, faaaogā le tupe mo Ieova.”

[Pusa i le itulau 19]

‘FAAAOGĀ LE TUPE LEA E FAALILIU AI LE TUSI PAIA ATOA’

I le tauaofiaga itumalo a Molimau a Ieova i le tausaga 2005 i Ukraine, na mauaina ai le New World Translation of the Christian Greek Scriptures i le gagana Ukraine. I le aso na sosoo ai, na maua ai le tusi lenei i totonu o le pusa o meaalofa mo le tauaofiaga: “E iva oʻu tausaga. Faafetai tele lava mo le Tusi Paia Eleni. Na aumai e loʻu tinā iā i maʻua ma loʻu tuagane laʻitiiti le tupe lenei e pasese ai i le aʻoga. Ona e leʻi timu le aso, na ma mananaʻo ai e savavali i le aʻoga ae sefe le 50 hryvnia [$10 Amerika]. E ma te fiafia ma loʻu tuagane e avatu le tupe lea e faaaogā e faaliliu ai le Tusi Paia atoa i le gagana Ukraine.”

[Pusa i le itulau 20, 21]

AUALA UA FILIFILIA E NISI E FAIA AI FOAʻI

MEAALOFA MO LE GALUEGA I LE LALOLAGI AOAO

E toʻatele ua faaagaga se vaega tupe e lafo i pusa o loo faailogaina o “Meaalofa mo le Galuega i le Lalolagi Aoao.—Mataio 24:14.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina atu foaʻi tauofo o tupe i le Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, po o le ofisa o le lālā o Molimau a Ieova o loo vaavaaia lou atunuu. E ao ona tusia le igoa “Watch Tower” i se siaki pe a fia faia se foaʻi i lenā auala. E mafai foʻi ona foaʻi atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi e leai ni tuutuuga.

FUAFUAGA O FOAʻI E IAI TUUTUUGA

E mafai ona foaʻi atu se tupe e teuina i lalo o se āiāiga faapitoa ma le Watch Tower mo le faaaogāina i le lalolagi. Ae e mafai ona toe faafoʻi atu lenā foaʻi i lē e ana le tupe pe a ia talosagaina. Mo nisi faamatalaga, faamolemole faafesootaʻi le Treasurer’s Office i le tuatusi o loo taʻua i luga.

FUAFUAGA O FOAʻI FAAMEAALOFA

E lē gata i foaʻi tuusaʻo tautupe, ae e iai isi auala e faia ai foaʻi ina ia fesoasoani i le galuega o le Malo i le lalolagi. E aofia ai mea nei:

Inisiua: E mafai ona avea le Watch Tower and Tract Society of Pennsylvania ma faalapotopotoga e uili atu i ai taui po o lē e mauaina le inisiua o le ola o se tasi, po o taui e maua pe a litaea po le penisione.

Teugātupe i le Faletupe: O teugātupe i le faletupe, pepa o teugātupe, po o teugātupe e maua e le tagata pe a litaea, e mafai ona tuu faamavaega mo le Watch Tower and Tract Society of Pennsylvania e tusa ai ma faatulagaga manaʻomia a le faletupe o le atunuu.

Tupe Faafaigaluega (Stocks) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i le Watch Tower Bible and Tract Society of Pennsylvania.

Fanua ma Fale: E mafai ona foaʻi atu au meatotino e pei o fanua po o fale, e ala i le foaʻi saʻo atu, po o le tuu foʻi o le fale po o le fanua e nofo ai pea lē e ana, seʻia oo ina maliu. Ia faafesootaʻi le ofisa o le lālā i lou atunuu a o leʻi faapepaina faaletulafono so o se fanua o le a foaʻi atu.

Tupe Faameaalofa e Iai Tuutuuga (Gift Annuity): O tupe faameaalofa e iai tuutuuga ua faatulaga e se tasi e avatu i se faalapotopotoga faaletulafono o loo faaaogāina e Molimau a Ieova. Ae e maua e lē e ana le foaʻi faameaalofa, po o se tasi ua tofia, se aofaʻiga patino o se tupe e avatu i ai i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga tonu na faamautū ai lea fuafuaga.

Uili ma Mavaega: E mafai ona faaui atu meatotino po o se vaega tupe i le Watch Tower and Tract Society of Pennsylvania e ala i se uili ua faia e tusa ai ma le tulafono, pe avea foʻi le Watch Tower Bible and Tract Society of Pennsylvania ma lē e mauaina le taui o se feagaiga o se teugātupe ua tuu mavaega. O se teugātupe ua tuu faamavaega e faia mo le manuia o se faalapotopotoga faalelotu, e ono maua mai ai nisi fesoasoani tau lafoga.

E pei ona faailoa mai i le faaupuga “foaʻi faameaalofa” o nei ituaiga o foaʻi, e manaʻomia ai ona fuafua lelei e lē a ana le foaʻi. Ina ia fesoasoani i ē o loo naunau e fesoasoani i le galuega a Molimau a Ieova i le lalolagi aoao e ala i nisi o foaʻi faameaalofa, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Na tusia le polosiua ina ia saunia ai faamatalaga i auala eseese e mafai ona fai ai meaalofa i le taimi nei po o le taimi foʻi e maliu ai. Pe a uma ona faitauina le polosiua ma talanoa faatasi ma a latou lōia po o tagata faufautua tau i lafoga, ua mafai ai e le toʻatele ona lagolagoina gaoioiga fesoasoani faalelotu a Molimau a Ieova i le lalolagi aoao, ma maua ai foʻi aogā tau lafoga. E mafai ona maua lenei polosiua mai le Charitable Planning Office.

Mo nisi faamatalaga atili, e mafai ona e faafesootaʻi atu le Charitable Planning Office, e ala i lou tusi atu pe telefoni atu foʻi tuatusi o loo taʻua i lalo, po o le faafesootaʻi o le ofisa o le lālā o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, Niu Ioka 12563-9204

Telefoni: (845) 306-0707

[Ata i le itulau 19]

O le vaega faaliliu i Miskito, i le Lālā i Nicaragua