Po o E Faaaogā Lelei Avanoa e Taʻu Atu ai Ou Talitonuga?

“PE E iai se mea e moni aʻiaʻi?” O le ulutala lenā o le tauvaga tusigatala faaitumalo na fai i Polani. O taʻiala nei o le tusigatala: “E tatou te lē manaʻomia se mea e moni aʻiaʻi. E leai se tasi e na te fia iloa. E leai lava se mea e moni aʻiaʻi.” Na faaaogā e Akata, o se teineitiiti aʻoga ua 15 ona tausaga, ma o ia o se Molimau a Ieova, lenei avanoa e taʻu atu ai i isi ana talitonuga.

A o sauniuni mo le tusigatala, na muamua ona tatalo Akata iā Ieova mo lana taʻitaʻiga ma amata loa le suʻesuʻeina o faamatalaga e faatatau i le mataupu. Na ia maua faamatalaga mai Le Olomatamata o Iulai 1, 1995. Na ia sii mai le fesili a Ponotio Pilato lea na fai iā Iesu: “Po o le ā le upu moni?” (Ioane 18:38) Na ia tusi e faapea, o lea fesili ua atagia mai ai le uiga o le lē talitonugofie, e peiseaʻī o loo fai mai: ‘O le ā lenā mea e taʻu o le upu moni? E leai se mea e moni!’ Na tusi Akata, “O le fesili lenei a Pilato na faamanatu mai ai iā te ia taʻiala o le tusigatala.”

Ona sosoo lea ma lona taʻua o le uiga lea o le tonu o le tagata i ona lava manatu po o le fua foʻi o le saʻo i mafaufauga o le tagata lava ia ma atonu e “saʻo” uma na manatu. Na ia tusia le fesili e faapea, “O ai se tasi e fia malaga i se vaalele pe afai e lē talitonu e moni aʻiaʻi malosiaga ia o loo mafai ai ona lele se vaalele?” Ona ia faasino lea i le Tusi Paia, i le faapea mai: “O le faalagolago i le Afioga a le Atua, ua faamautūina ai mea moni ua faamaonia.” Sa ia taʻua faapea e ao iā i latou o loo matuā saʻili i le mea moni aʻiaʻi, ona lava le onosaʻi ina ia maua ai.

Na maua e Akata se faailoga faapitoa, ma na maua foʻi e Akata se avanoa e faitau atu ai lana tala i luma o lana vasega. Na talia e nisi o ana uō i le aʻoga se suʻesuʻega faale-Tusi Paia ma ia. Na matuā faafiafiaina Akata ona ua ia faaaogā lelei lenei avanoa e taʻu atu ai ana talitonuga i isi. Ioe, o lou nofo sauni e faaaogā avanoa e tautala atu ai i lou faatuatua, e mafai ona fua mai. O ā avanoa e mafai ona e faaaogāina?