“Faamolemole, ia Talia Mai Laʻu Meaalofa Faatauvaa”

O UPU nei na tusia i se tusi na maua e le ofisa o le lālā o Molimau a Ieova i Rusia. Na avatu faatasi le tusi ma se atigipusa lapoʻa e tumu i totini māfanafana.

O le meaalofa na lafo atu e Alla ua 67 ona tausaga, o se Molimau a Ieova o loo auauna i se faapotopotoga i Sasaʻe o Rusia. Ua silia i le sefulu tausaga o loo auauna Alla iā Ieova, e ala i le maelega e talaʻi atu le tala lelei o le Malo. Peitaʻi, na faafuaseʻi ona pe le vaega pito i lalo o lona tino. E ui i lea, na uunaʻia o ia e le alofa e mulimuli i le ala e pei o le fafine Kerisiano i le uluaʻi senituri o Toreka, o sē na saunia ofu mo uso talitonu.—Galuega 9:36, 39.

Na tusi mai Alla e faapea: “E lē mafai ona gaoioi oʻu vae, ae o loo mafai ona gaoioi pea oʻu lima. O lea la ou te talaʻi atu e ala i le tusia o ni tusi. . . . Na ou faapea o le a ou suʻiina ni nai pea totini māfanafana manū o loo mafai pea ona gaoioi oʻu lima. Ou te manaʻo e ave totini nei i uso ma tuafafine o le a galulue i le fausiaina o Maota mo Sauniga i nofoaga malūlū, e pei o Sasaʻe o Rusia ma Saiperia.”

Na fetalai Iesu Keriso e faatatau i ona soo moni: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O le alofa lenā na faaalia e Alla, o se faailoga lea e iloa ai soo moni o Iesu.