O ā Mea E te Faatāua i Lou Olaga?

NA MAUA e Keni se galuega totogi lelei i se kamupani telē, e iai sana taavale taugatā, ma e nofo i se fale manaia. Na ia fiafia tele e faapaʻū mai i le mea maualuga e faitau afe futu agaʻi i le laueleele. Pe na faamalieina o ia e na mea? Na ia taʻua i le tusi The Wall Street Journal, e faapea: “O lenei ua 45 oʻu tausaga, ae e lē o iai lava soʻu lumanaʻi . . . E lē o faamalieina loʻu olaga.”

Na toleni ma le malosi Elini ina ia avea o ia ma se tasi e lelei tele i le faasee ma siva i luga o le aisa. Na iʻu ina lauiloa o ia i lenā mea. Na maua e Elini le mea na ia manaʻo i ai. Ae na ia faapea mai, “Aiseā ua ou lē fiafia ai? Ua tau leai ni aʻu uō moni. O le a oo mai foʻi le tino matua, ma e ui ina tele aʻu tupe, e matuā lē tāua lava pe a ou lē fiafia.”

 Na lauiloa Hideo o se tusiata ona o lona faaaogāina lelei o lanu, ma na o le pau lea o le mea tāua i lona olaga. Na sili atu ona tāua lana taleni o le tusiata na i lo tupe. I le 98 o ona tausaga ma ua faasolo ina vaivai, na ia foaʻi atu lana galuega tusiata i se fale mataaga. Na matuā tāua i lona olaga le avea ma se tusiata lelei. Peitaʻi, e leʻi faamalieina o ia, ona sa ia manatu e lē mafai ona ia tusia se ata e lelei atoatoa.

O nisi tagata e latou te faia ni taumafaiga tele ina ia fesoasoani i isi. O se tasi tamāloa sa maualuga lona tulaga i le faia o ata tifaga i Hollywood. Ona o ia o le sui peresitene o se kamupani fai ata tifaga i le Iunaite Setete, sa ia aufaatasi ai ma isi tagata lauiloa ma nofo i se fale taugatā ma manaia. Ina ua ia asiasi atu i Cambodia e tafao ai, na ʻaisi atu iā te ia se teine mo se tupe a o ʻai lenei tamāloa i se faleʻaiga i le aai o Phnom Penh. Na ia tuu iā te ia sina tupe ma se faguinu. Na faamalieina le teine. Ae sa alu ane foʻi le teine i le pō na sosoo ai ma toe ʻaisi. Na iloa e lenei tamāloa e manaʻomia ni taumafaiga e sili atu e fesoasoani atu ai i isi.

I le tausaga na sosoo ai, na filifili ai loa lenei tamāloa e sui lana galuega o le fai ata tifaga ina ia fesoasoani i tagata matitiva i Cambodia. Na ia faatū ai i inā se aʻoga mo le saunia o mea manaʻomia e pei o le nofotumau, meaʻai, ma fesoasoani tau aʻoaʻoga. E ui i na taumafaiga, ae sa faaauau pea ona mafatia o ia i faalogona, o nisi taimi e fiafia ai ae o nisi taimi ua fiu i faafitauli e tulaʻi mai.

Sa mananaʻo uma i latou nei na taʻua i luga, ina ia taulau o latou olaga. Ae sa tumau pea ona latou lē fiafia e ui lava sa taulau o latou sini na taumafai e maua. O le ā le olaga o loo e fia ola ai? O le ā se mea o loo e faatāua i lou olaga? Po o e mautinoa e faamalieina oe e le olaga o loo e ola ai?