Aʻoaʻo Lau Tama e Tausisi i le Filemu

Ona o lona fiafia tele o le a siitia lona aiga i se isi vaipanoa, sa masani ona taʻu atu ai e Nicole i lana uō māfana o Gabrielle mea uma o tutupu. I se tasi aso, na faateʻia Nicole i le tala a Gabrielle e faapea e lē toe fia faalogo i sana tala. Ona o lona tigā tele ma le lē fiafia, na ia faapea atu ai i lona tinā, “Ou te lē toe fia uō iā Gabrielle.”

O MISA a tamaiti e pei o Nicole ma Gabrielle, e masani ona manaʻomia le fesoasoani a mātua e foʻia ai, e lē gata e teʻa ai lagona tigā ae iloa ai foʻi e tamaiti le auala e faaleleia ai misa. E faaalia lava e tamaiti laiti uiga faatamaiti, ma e masani ona latou lē manatu i iʻuga e ono tupu mai ona o a latou gaoioiga ma upu o loo fai. (1 Korinito 13:11) E latou te manaʻomia le fesoasoani ia ati aʻe uiga e tausi ai le filemu ma isi tagata o le aiga, ma i so o se mea lava.

E naunau mātua Kerisiano ia aʻoaʻo a latou fanau ia “saʻili i le filemu ma tausisi i ai.” (1 Peteru 3:11) Pe a fua atu i le fiafia e maua i le taumafai e tausi le filemu, e matuā aogā lava taumafaiga ia foʻia lagona masalosalo, le lē fiafia, ma le ita. Afai la o oe o se matua, e faapefea ona aʻoaʻo lau fanau ia tausia le filemu?

Fesoasoani i Fanau e Faafiafia “le Atua o le Filemu”

O loo taʻua Ieova o le “Atua o le filemu,” ma o lē na te foaʻi mai le filemu. (Filipi 4:9, NW; Roma 15:33) O lea la, e faaaogā lelei ai e mātua atamamai le Afioga a le Atua, ina ia totō i loto o a latou fanau le faanaunauga e faafiafia le Atua ma faaaʻoaʻo i ona uiga. O se faaaʻoaʻoga, ia fesoasoani i lau fanau e malamalama i le faaaliga lea na vaaia e le aposetolo o Ioane, o se nuanua matagofie lanu eseese o loo siʻomia ai le nofoālii o Ieova. * (Faaaliga 4:2, 3) Ia faamatala i ai, o lenā nuanua, ua faaataina ai le filemu ma le lē gaoiā lea e iā Ieova, ma o na uiga o le a maua e i latou uma o ē usiusitaʻi iā te ia.

 O loo aumaia foʻi e Ieova taʻitaʻiga e ala mai iā Iesu lona Alo, o lē taʻua o le “Alii o le filemu.” (Isaia 9:6, 7) O lea la, faitau ma talatalanoa ma lau fanau i mau o le Tusi Paia o loo aʻoaʻoina ai e Iesu le tāua o le ʻalofia o le femisaaʻi. (Mataio 26:51-56; Mareko 9:33-35) Ia faamatala le māfuaaga na sui ai Paulo, o lē sa leʻi ava ma “faatautala,” ae na faapea mai “e lē tatau ona faamisa o le auauna a le Alii, a ia agamalu i tagata uma, . . . ma ia onosaʻi.” (1 Timoteo 1:13; 2 Timoteo 2:24) Atonu o le a e fiafia e vaai atu i lau fanau ua suia foʻi o latou uiga.

Na manatua e Eveni a o laʻitiiti sa faalili o ia e se tamaitiiti a o ō i le pasi a le aʻoga. Fai mai o ia, “Na matuā ou ita lava, ma na ou manaʻo ai e faatigā iā te ia. Ae na ou manatua le lesona tāua sa ou aʻoaʻoina e faatatau iā i latou o ē fia misa. Na ou iloa, e faafiafiaina Ieova pe a ou lē ‘taui atu le leaga i le leaga i se tasi’ ma ia ‘nofo lelei ma tagata uma lava.’” (Roma 12:17, 18) O lea na onosaʻi ai Eveni ma foʻia lenā luʻi ona o lona tali atu i se uiga filemu. Na ia manaʻo e faafiafia le Atua o le filemu.

Ia Avea o se Matua e Tausi i le Filemu

Po o faaalia i lou aiga le tausisi i le filemu? Afai o le tulaga lenā, o le a aʻoaʻoina e lau fanau le filemu e ala i le vaai atu i au mea o loo fai. E mafai ona e aʻoaʻoina lau fanau e tausisi i le filemu pe afai o loo e taumafai malosi e faataʻitaʻi i le filemu o le Atua ma Keriso.—Roma 2:21.

Na taumafai malosi Lusi ma Sina e aʻoaʻo le la fanau tama e toʻalua, ina ia tausisi i le filemu pe a faamisa ifo isi iā i laʻua. Na faapea mai Sina, “O le ma tausisi pea ma Lusa i le filemu i le va o i maʻua ma le ma fanau ma isi tagata pe a tulaʻi mai ni feeseeseaʻiga, ua fesoasoani tele lea iā i laʻua e foʻia ai faafitauli i se auala filemu.”

E ui lava e te sesē i nisi o taimi— ma o ai se matua e lē sesē?—e mafai lava ona e aʻoaʻoina lau fanau. Ua fai mai Sitivi, “E iai taimi e ma te feita ai lava ma laʻu avā o Teri ma aʻoaʻi le ma fanau, ae leʻi iloa le mea na tupu. Pe a tupu lenā mea, e ma te faatoese iā i latou.” Na faapea mai Teri: “E ma te taumafai ia iloa e le ma fanau, o i maʻua e lē lelei atoatoa ma e iai taimi e ma te sesē ai. E ma te iloa, e lē gata ua maua ai le filemu o lo matou aiga i le faia faapea, ae fesoasoani foʻi i le fanau e iloa ai le auala e saʻilia ai le filemu.”

Po o iloa e lau fanau le auala e tausisi ai i le filemu ona o lou aʻoaʻoina o i latou i se auala filemu? Na fetalai Iesu: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.” (Mataio 7:12) E ui lava e iai ou vaivaiga, ae e mautinoa o le a iai ni iʻuga lelei o lou taumafai e faaalia le alofa i lau fanau. O le a faigofie ona usitaʻi mai lau fanau pe a e aʻoaʻoina i latou i se auala alofa.

Aua le Vave Ona Ita

O loo taʻua i le Faataoto 19:11 e faapea: “O le mafaufau o le tagata e faagesegese ai lona  ita.” E faapefea ona e fesoasoani i lau fanau ia mafaufau ma lē vave ai ona ita? Na faamatala e Tavita le auala aogā sa la faia ma lana avā o Maria ina ia fesoasoani ai i le la fanau e faia faapea. Na ia faapea mai: “Pe a lē fiafia ona o se tala po o se mea na faia e se tasi iā i laʻua, e ma te fesoasoani iā i laʻua e faaalia le manatu mamafa i faalogona o isi. E ma te fesili atu faapea: ‘Pe na iai se mea na tupu i lenā tagata i lenā aso? Pe māfua lona lē fiafia ona o lona lotovale? Pe na fai e se tasi se mea e tigā ai o ia?’” Na faapea mai Maria, “Ua fesoasoani lea e faatoʻatoʻa ai le fanau, na i lo le iai o manatu sesē po o le finau foʻi po o ai e saʻo a o ai e sesē.”

E maua ni iʻuga lelei pe a faia faapea e mātua. Seʻi mātau le auala na fesoasoani ai Michelle le tinā o Nicole lea na taʻua i le amataga o le mataupu, e lē gata i le auala e na te foʻia ai le misa ma lana uō o Gabrielle ae faapea foʻi le fesagaʻia o feeseeseaʻiga e ono tulaʻi mai i le lumanaʻi. Na faapea mai Michelle, “Sa ma faitau ma Nicole i le mataupu e 14 o le tusi Ia Faalogo i le Faiaʻoga Sili. * Ona ou faamatala lea iā te ia le uiga o fetalaiga a Iesu faapea ia tatou ‘faafitugafulu ni fitu’ taimi e faamagalo ai i se tasi. Sa ou faalogo lelei a o faaali mai ona faalogona, ona ou fesoasoani lea iā te ia e iloa le māfuaaga o le lē fiafia o Gabrielle, ona o lona tuua o ia.”—Mataio 18:21, 22.

Ina ua mafaufau ma malamalama Nicole i le māfuaaga atonu ua tali mai ai faapea lana uō, na aogā lea e manatu mamafa ai i faalogona o lana uō, ma uunaʻia ai o ia e vili atu e faatoese iā Gabrielle. Na faapea mai Michelle, “Talu mai lenā taimi, ua faafiafiaina Nicole ona o le manatu mamafa i faalogona o isi, ma fai mea lelei mo i latou ina ia latou fiafia ai.”—Filipi 2:3, 4.

Ia aʻoaʻo lau fanau ia lē maitaita i sesē o isi pe afai e lē femalamalamaaʻi. O lou faia faapea, o le a e fiafia ai i le vaai atu i lau fanau o loo faaalia le manatu mamafa ma le alofa i isi.—Roma 12:10; 1 Korinito 12:25.

E Aumaia e le Fefaamagaloaʻi le Viiga

O loo taʻua i le Faataoto 19:11 e faapea, “O lona viiga foʻi lea, ina ua lē manatua lona agaleagaina.” E oo lava i le taimi na puapuaga ai Iesu, na ia faaaʻoaʻo pea i lona Tamā i le faaalia o le faamagalo atu. (Luka 23:34) O le a iloa e lau fanau e maua le viiga i le faamagalo, pe a e faamagalo foʻi iā i latou.

O se faaaʻoaʻoga, o Uili, o se tamaitiiti e lima tausaga ma e fiafia o ia e valivali ata faatasi ma le tinā o lona tinā. Ae i se tasi aso, na faafuaseʻi ona tuu e le olomatua le valiga o le ata ae otegia Uili ma savali ese, ma na faanoanoa lava Uili. Ae na faamatala mai e Samuelu le tamā o Uili: “O le tinā o lona tinā, e maua i le gasegase o le faigofie lea ona galo mea i nisi o taimi. O lea na ma taumafai ai e faamatala iā Uili lenā tulaga i se auala e malamalama ai.” Ina ua uma ona faamanatu atu iā Uili o loo faamagaloina o ia i le tele o taimi ma e tatau foʻi ona ia faia i isi, na ofo Samuelu i le mea na ia faia. Na faapea mai Samuelu: “Na faafiafiaina i maʻua ma laʻu avā ina ua ma vaai atu, ua alu le ma tama ma faatoese i le tinā o lona tinā lea ua 80 tausaga, ma tago i lona lima ma taʻitaʻi mai i le laulau ʻai.”

 E maua le viiga pe a iloa e fanau ona “fefaapalepaleaʻi” i vaivaiga ma sesē o isi, ma ia faamagalo atu. (Kolose 3:13) E ao ona faamautinoa i fanau e tusa lava pe faatigā ma lē fiafia mai isi iā i latou, ae o le tali atu ma le filemu e aogā tele, auā “a fiafia Ieova i ala o le tagata, ona faatupuina lea e ia o le leleiga ma ia o ē ita iā te ia.”—Faataoto 16:7.

Fesoasoani Pea i Lau Fanau e Tausisi i le Filemu

Afai e faaaogā e mātua le Afioga a le Atua e aʻoaʻoina ai “ma le filemu” le fanau ina ia avea ma “ē faatupuina le filemu,” ua maua e fanau faamanuiaga ona o i latou. (Iakopo 3:18) O loo faalaeiau e na mātua a latou fanau ina ia iloa le auala e foʻia ai feeseeseaʻiga ma tausisi i le filemu. O le a fesoasoani lea i le fanau e maua ai se olaga fiafia ma le faamalieina.

E toʻatolu le fanau talavou a Tanu ma Katerina o loo malolosi uma i le auaunaga iā Ieova. Na faapea mai Tanu, “E ui na faigatā le aʻoaʻoina o i latou a o laiti, ae ua faafiafiaina i maʻua ona o loo malolosi uma i latou faaleagaga. Ua lelei la latou faiā ma isi, ma e latou te faamagalo i isi pe a faatigā mai.” Na faapea mai Katerina, “Ua matuā faalaeiauina i maʻua e lenā mea, ona ua avea le filemu ma fua o le agaga o le Atua.”— Kalatia 5:22, 23.

O lea la, e iai māfuaaga lelei e pei o mātua Kerisiano,e lē “faapalapala” ai pe “faavaivai” i le aʻoaʻoina o lau fanau ia tausisi i le filemu, e ui lava e tuai ona suia uiga o fanau i le taimi muamua. E mautinoa pe a outou faia faapea, “ona faatasi lea iā te outou o le Atua o le alofa ma le filemu.”—Kalatia 6:9; 2 Korinito 13:11, NW.

[Faaopoopoga i lalo]

[Pusa/Ata i le itulau 20]

O SE TAAʻIGA LELEI?

Na lomia e le faalapotopotoga e faalauiloaina taaʻiga o le televise le tala e faaulutalaina, “O Faiga Sauā i le Televise,” ma taʻua e faapea: “Ua faamatilatila e le televise faiga sauā o se auala e foʻia ai faafitauli, ma ua masani ona faaali mai ai i latou e leaga ma ē lelei o fai faiga sauā.” E na o le 10 pasene o ata i le televise, ma tifaga ma musika i ata vitiō, o loo faailoa mai ai le leaga o faiga sauā. Ae na taʻua e le tala, “o loo faaalia e le televise faiga sauā o se auala e masani ona lelei i le foʻiaina o feeseeseaʻiga.”

Po ua e iloa ua tatau ona fai ni fetuutuunaʻiga a lou aiga e tusa o le matamata i le televise? Aua le avea mea o loo faaalia mai e le televise e faalēaogā ai au taumafaiga e aʻoaʻo lau fanau e tausisi i le filemu.

[Ata i le itulau 17]

Ia totō i loto o lau fanau le faanaunauga e faafiafia le “Atua o le filemu”

[Ata i le itulau 18]

Taumafai e faasaʻo tala ma gaoioiga faatigā

[Ata i le itulau 19]

E ao ona aʻoaʻoina lau fanau e faatoese ma faamagalo i isi