O Loo Ola le Afioga a Ieova

Manatu Tāua Mai i Tusi o Hakai ma Sakaria

O LE tausaga lea e 520 T.L.M. Ua sefulu ono tausaga talu ona toe amata e tagata Iutaia na faafoʻisia mai Papelonia, le faavae o le malumalu o Ieova i Ierusalema. E ui i lea, e leʻi māeʻa le malumalu, ma o loo taofia foʻi le galuega. Na tofia e Ieova le perofeta o Hakai, ma i le lua masina mulimuli ane, na ia tofia foʻi Sakaria, e folafola atu Ana afioga.

E tasi lava le sini o Hakai ma Sakaria: Ia uunaʻia tagata e toe amatalia le galuega o le toe fausiaina o le malumalu. Na taulau manuia taumafaiga a nei perofeta, ma na māeʻa le malumalu i le lima tausaga mulimuli ane. O feʻau na faalauiloa atu e Hakai ma Sakaria, o loo faamauina i tusi o le Tusi Paia o loo taʻua ai o la igoa. Na māeʻa tusia le tusi o Hakai i le 520 T.L.M., ma Sakaria i le 518 T.L.M. E pei o na perofeta, ua iai foʻi se galuega na tuuina mai e le Atua, lea e ao ona faamāeʻa ae leʻi oo mai le iʻuga o lenei faiga o mea. O le galuega o le talaʻi atu o le Malo ma le faia o soo. Seʻi iloilo po o ā ni faalaeiauga e mafai ona tatou maua mai i tusi o Hakai ma Sakaria.

“IA OUTOU MAFAUFAU I O OUTOU ALA”

(Hakai 1:1–2:23)

E fā ni feʻau faagaeeloto na tuuina atu e Hakai i totonu o le 112 aso. O le feʻau muamua:“‘Ia outou mafaufau i o outou ala. Inā ō aʻe ia outou i le mauga, ma outou aumaia laau, ma outou faia le fale; ona ou fiafia lea i ai, e viia ai foʻi aʻu,’ ua fetalai mai ai Ieova.” (Hakai 1:7, 8) Na talilelei mai tagata. O le feʻau lona lua o loo iai se folafolaga: “Ou [Ieova] te faatumuina foʻi lenei fale i le pupula.”—Hakai 2:7.

E tusa ai ma le feʻau lona tolu, o lo latou faatalatū e toe fausia le malumalu, ua leaga ‘ai tagata ma [mea] e faia e o latou lima,’ i luma o Ieova. Ae mai le aso na amata ai le galuega faaleleia, na tuuina atu ai e Ieova lana ‘faamanuia iā te i latou.’ E pei ona taʻua i le feʻau lona fā, o le a “faaumatia foʻi le malosi o malo o nuu ese” e Ieova, ma avea le Kovana o Serupapelu “e pei se faamaufaailoga.”—Hakai 2:14, 19, 22, 23.

 Taliina o Fesili Faale-Tusi Paia:

2:6, 7, 21, 22—O ai ma po o le ā le pogai o le lūlūina, ma o le ā ona aafiaga? O loo ‘lūlūina foʻi nuu uma’ e Ieova e ala i le talaʻia i le lalolagi aoao o le feʻau o le Malo. O loo faatosina mai e le talaʻiga “mea ua manaʻomia e nuu uma” i totonu o le fale o Ieova, ma faatumulia ai i le mamalu. O le a iai le taimi e lūlūina ai “le lagi, ma le lalolagi, ma le sami, atoa ma le eleele mātūtū” e “Ieova o ʻau,” ma o le a lē toe iai lenei lalolagi amioleaga.—Eperu 12:26, 27.

2:9—O ā auala e mafai ai ona “sili le mamalu o lenei fale ua mulimuli i le muamua”? E tolu ni auala e iloa ai: o le tele o tausaga sa iai le malumalu, na aʻoaʻo ai i inā le aʻoaʻo sili, ma i latou na lolofi atu e tapuaʻi ai iā Ieova. E ui e 420 tausaga o iai le malumalu mataʻina o Solomona, mai le 1027 T.L.M. seʻia oo i le 607 T.L.M., ae e 580 tausaga na faaaogā ai le “fale mulimuli,” mai lona māeʻa i le 515 T.L.M. seʻia oo i lona faaumatiaga i le 70 T.A. E lē gata i lea, na aʻoaʻo le Mesia, o Iesu Keriso, i le ‘fale mulimuli,’ ma e toʻatele atu tagata ua ō mai i le malumalu lea na i lo le malumalu “muamua” ina ia tapuaʻi ai i le Atua.—Galuega 2:1-11.

Lesona mo i Tatou:

1:2-4. E lē tatau ona suia mea tatou te faatāua ona o teteega i le talaʻiga, e pei o le faamuamua o tatou manaʻoga na i lo le ‘muaʻi saʻili o le malo.’—Mataio 6:33.

1:5, 7. E lelei ona ‘tatou mafaufau i o tatou ala’ ma iloilo po o le ā o faia i o tatou olaga, e aafia ai la tatou faiā ma le Atua.

1:6, 9-11; 2:14-17. Na galulue mamafa tagata Iutaia i vaitaimi o Hakai mo i latou lava, ae latou te leʻi seleseleina fua o ā latou galuega. Sa latou faatalalē i le malumalu, ma na latou lē mauaina le faamanuiaga a le Atua. E tatau ona tatou faamuamua manaʻoga faaleagaga ma auauna i le Atua ma le loto atoa, ma ia manatua, pe mativa pe mauʻoa, “o le faamanuia a Ieova, o lea e faatamaoaiga aʻi.”—Faataoto 10:22.

2:15, 18. Na timaʻi Ieova i tagata Iutaia ina ia mafaufau i le lumanaʻi, i le galuega o le toe fausia aʻe, aua le toe manatu i lo latou faatamala sa iai. E tatau ona tatou taumafai e agaʻi i luma i le tapuaʻiga i le Atua.

‘E LĒ O LE MALOSI, A O LOʻU AGAGA’

(Sakaria 1:1–14:21)

Na amata galuega faavaloaga a Sakaria e ala i le valaaulia o tagata Iutaia e toe ‘foʻi atu iā Ieova.’ (Sakaria 1:3) Na faamaonia le lagolagoina e le Atua o le galuega toe fausiaina o le malumalu e ala i vaaiga e valu na sosoo ai. (Tagaʻi i le pusa “O Faaataga o Vaaiga e Valu a Sakaria.”) O le a faamāeʻaina le galuega o le malumalu, “e lē o le fitafita, e lē o le malosi, a o loʻu [Ieova] Agaga.” (Sakaria 4:6) O lē e taʻua o le La Laau, “e faia foʻi e ia le malumalu o Ieova” ma “fai foʻi o ia ma faitaulaga i luga o lona nofoālii.”—Sakaria 6:12, 13.

Ua auina atu e Peteli nisi e fesili i ositaulaga e faatatau i anapogi e tusa o le faamanatuina o le faaumatiaga o Ierusalema. Na fetalai atu Ieova iā Sakaria, o le faanoanoa a o faia anapogi e fā e faamanatu ai puapuaga na oo iā Ierusalema, o le a suia e “fai ma fiafia ia, ma olioli, ma aso o tausamiga lelei.” (Sakaria 7:2,3; 8:19) O faalauiloaga e lua o loo sosoo mai, e aofia ai faamasinoga e faasaga i nuu o perofeta pepelo, o valoaga i le Mesia, ma le feʻau o le toe faafoʻisia o tagata o le Atua.—Sakaria 9:1; 12:1.

Taliina o Fesili Faale-Tusi Paia:

2:1—Aiseā na fua ai Ierusalema e se tamāloa i se maea? E foliga mai o lenei gaoioiga e atagia mai ai le fausiaina o se pa puipui e faataamilo i le aai. Na faailoa atu e le agelu i le tamāloa o le a tupu  tele Ierusalema ma iai ma le puipuiga a Ieova.—Sakaria 2:3-5.

6:11-13—Ina ua faapaleina Iosua e avea ma faitaulaga sili, pe na avea ai foʻi o ia ma tupu ma faitaulaga? E leai, e leʻi sau Iosua mai le gafa tautupu o Tavita. O le faapaleina o ia, ua avea ai o se ata faavaloaga o le Mesia. (Eperu 6:20) Ua faataunuuina iā Iesu le valoaga e faatatau i le “La Laau,” i lana matafaioi e avea ma Tupu ma Faitaulaga i le lagi. (Ieremia 23:5) E pei ona auauna Iosua i tagata Iutaia na toe taliu ane, e avea o se ositaulaga sili i le malumalu na toe fausia, na avea foʻi Iesu ma Ositaulaga Sili mo le tapuaʻiga moni i le malumalu faaleagaga o Ieova.

8:1-23—O anafea na faataunuu ai nei faalauiloaga e sefulu o loo taʻua i le mau? O loo faalauiloaga taʻitasi i le faaupuga, “o loo faapea ona fetalai mai o Ieova o ʻau,” ma o le folafolaga lea a le Atua mo le filemu o ona tagata. O nisi o nei faalauiloaga na faataunuu i le senituri lona ono T.L.M., ae o nei faalauiloaga uma, afai e leʻi faataunuuina talu mai le 1919 T.A., o loo faataunuu i le taimi nei. *

8:3—Aiseā o loo taʻua ai Ierusalema “o le aai e faamaoni”? A o leʻi faaumatiaina i le 607 T.L.M., na avea Ierusalema ma “aai sauā,” sa nofoia e perofeta ma faitaulaga pepelo ma tagata lē faamaoni. (Sefanaia 3:1; Ieremia 6:13; 7:29-34) Ae ina ua toe fausia le malumalu e tagata fia tapuaʻi iā Ieova, sa folafolaina atu upu moni o le tapuaʻiga mamā i inā, ma faaigoaina Ierusalema “o le aai e faamaoni.”

11:7-14—O le ā o loo faaataina i le gausia e Sakaria o tootoo ua faaigoaina o “Matagofie” ma “Noataga”? Na taʻua Sakaria e faapea o lē na auina atu e “leoleoina le lafu mamoe o le a fasia,” po o tagata e pei o ni mamoe ua faataugā e o latou taʻitaʻi. I le tofia o Sakaria ma leoleo mamoe, na ia faaataina Iesu Keriso, o lē sa auina atu i le nuu na osi feagaiga ma le Atua, ae latou teena o ia. O le gausia o “Matagofie” na faaata ai o le a faaiʻu e le Atua le feagaiga o le Tulafono ma tagata Iutaia, ma faamuta ana feutagaʻiga lelei ma i latou. O le gausia o “Noataga” ua faailoa mai ai le motusia o le va faaleuso o tagata Iutaia ma Isaraelu, lea e faavae mai le tapuaʻiga iā Ieova.

12:11—O le ā “le tagituʻi i Atatarimoni i le vanu o Mekito”? Na fasiotia le tupu o Iuta o Iosia i le taua ma Farao Neko o Aikupito “i le vanu o Mekito,” ona lagi lea o ni “fatu e aualofa aʻi,” a o faagasolo tausaga. (2 Nofoaiga Tupu 35:25) Atonu o le “tagituʻi i Atatarimoni” na faasino atu i faanoanoaga ona o le oti o Iosia.

Lesona mo i Tatou:

1:2-6; 7:11-14. E fiafia le finagalo o Ieova ma talia i latou o ē salamō ma talia aʻoaʻiga, ma toe foʻi atu iā te ia e ala i le ofoina atu o le tapuaʻiga mai se loto atoa. I le isi itu, e lē tali o ia i talosaga mo se fesoasoani a ē ‘ua lē mafai ona uaʻi mai o latou taliga, ma ua liu tua mai i latou ma le finau vale; ma o latou taliga ua faatulituli’ i ana feʻau.

4:6, 7. E leai ma se toʻatugā e lē mafai e le agaga o Ieova ona manumalo mai ai i le galuega o le faamāeʻaina o le malumalu. O ā  lava faafitauli e tatou te fesagaʻia i le auaunaga i le Atua, e mafai ona manumalo ai e ala i le faatuatua iā Ieova.—Mataio 17:20.

4:10. I lalo o le vaavaaiga a Ieova, na faamāeʻa ai e Serupapelu ma ona tagata le malumalu, e tusa ma tapulaa maualuluga a le Atua. E lē faigatā mo tagata lē lelei atoatoa, ona ola e tusa ma mea o loo faatalitalia e Ieova.

7:8-10; 8:16, 17. Ina ia maua le finagalo malie o Ieova, e tatau ona tatou faaalia le faamasino tonu, faaauau ona agalelei ma alofa mutimuti vale, ma fetautalaaʻi ma isi i le mea moni.

8:9-13. E faamanuia mai Ieova pe a ‘malolosi o tatou lima’ i le faia o galuega ua ia tuuina mai iā i tatou. O nei faamanuiaga e aofia ai le filemu, malupuipuia, ma le faaleleia atili o le tatou faiā ma Ieova.

12:6. O i latou o loo taʻimua i tagata o Ieova e tatau ona ‘pei o le sulu ua mū,’ i le uiga ese o lo latou maelega.

13:3. E tatau ona sili lo tatou faamaoni i le Atua moni ma lana faalapotopotoga, na i lo le faamaoni i se tagata, e tusa pe māfana la tatou faiā.

13:8, 9. E toʻatele le nuu na fulitua iā Ieova, o le lua vaetolu o tagata, ma na ia teena i latou. E na o le tasi vaetolu na faamamāina, e pei na faaui i se afi. I o tatou aso, ua teena e Ieova le toʻatele o i latou o ē ua faapea o Kerisiano. Ua na o se aofaʻiga itiiti, o Kerisiano faauuina, ‘ua valaau i le suafa o Ieova’ ma ua gauaʻi ina ia faamamāina. Ua avea moni i latou, faapea ma o latou uso talitonu, o Molimau iā Ieova.

Uunaʻia e Gaoioi ma le Maelega

O faapefea ona tatou aafia i aso nei i feʻau a Hakai ma Sakaria? Pe a tatou mafaufau i le auala na la uunaʻia ai tagata Iutaia e uaʻi atu i le galuega o le toe fausia o le malumalu, pe lē uunaʻia ai foʻi i tatou e fai se sao maelega i le talaʻia o le tala lelei o le Malo ma le galuega o le faia o soo?

Na valoia e Sakaria o le a “tiʻetiʻe i le asini” le Mesia, o le a faalataina o ia i “tupe e fuatolu,” o le a sasaina o ia, ma o le a “faataapeapeina ai lea o le ʻau mamoe.” (Sakaria 9:9; 11:12; 13:7) A tatou manatunatu loloto i le faataunuuina o valoaga a Sakaria e faatatau i le Mesia, o le a matuā aogā lea i lo tatou faatuatua! (Mataio 21:1-9; 26:31, 56; 27:3-10) O le a faamalosia atili lo tatou talisapaia o le Afioga a Ieova, ma ana faatulagaga mo le faaolataga.—Eperu 4:12.

[Faaopoopoga i lalo]

[Pusa i le itulau 11]

O FAAATAGA O VAAIGA E VALU A SAKARIA

1:8-17: E faamautinoa ai le faamāeʻaina o le malumalu, ma faaalia ai le faamanuiaina o Ierusalema ma isi aai o Iuta.

1:18-21: E faamautinoa ai le iʻuga o ‘nifo e fā na faataapeapeina Iuta,’ po o faigāmalo e teena le tapuaʻiga iā Ieova.

2:1-13: E faaalia ai o le a tupu tele Ierusalema ma o le a avea Ieova “ma pa afi e siʻosiʻo aʻi,” po o lana puipuiga.

3:1-10: Na faaalia ai sa aafia Satani i le faasagatau i le galuega o le malumalu, ma o le a laveaʻiina ma faamamāina le Faitaulaga Sili o Iosua.

4:1-14: Ua faamautinoa mai le soloia o ni toʻatugā e pei o ni mauga, ma o le a faamāeʻa e le kovana o Serupapelu le toe fausiaina o le malumalu.

5:1-4: Ua faalauiloa atu le malaia o le a oo i tagata amioleaga e leʻi faasalaina.

5:5-11: O loo valoia ai le iʻuga o le amioleaga.

6:1-8: O loo iai faamautinoaga o le vaavaaiga ma le puipuiga a agelu.

[Ata i le itulau 8]

O le ā le sini o feʻau a Hakai ma Sakaria?

[Ata i le itulau 10]

E faapefea ona avea ē taʻimua e ‘pei o le sulu ua mū’?