Pe Mafai Ona Autasia Tagata Uma?

PO O agaʻi atu lo tatou lalolagi i le filemu po o le puapuaga? E foliga mai e faigofie lava ona tupu uma ia mea e lua.

Ua mautinoa e nisi taʻitaʻi o le lalolagi, e mafai ona maua le filemu i le lalolagi aoao, auā a misi ma lea, e mataʻutia tele nisi aafiaga e oo i ai. Ae ua matuā faapopoleina le toʻatele i fesili nei: O ai atunuu o loo iai auupega faaniukilia mataʻutia? Pe faamata e latou te faaaogāina na auupega? O le ā e tupu pe afai e faaaogā a latou auupega?

Ua tatou iloa mai talafaasolopito, ua faigatā ona maua se autasi ona o le uiga tauvā ma le faailogatagata, ma ua faateteleina lea tulaga ona o lotu, ae e lē o foʻiaina ai. Na faapea mai le tusitala o James A. Haught, “So o se mea e fevaevaeaʻi ai tagata, e mafai ona tupu ai le feitagaʻi, ma o lotu o se tasi lea o māfuaaga autū ua fevaevaeaʻi ai tagata. E ui o le talitonuga i le lalolagi aoao e faapea o lotu e ‘faaleleia’ tagata, ae o le mea moni ua faapogaia e lotu nisi tagata e faia ni gaoioiga e sili ona leaga.” E faapena foʻi le manatu o le tusitala o Steven Weinberg. Na ia faapea mai, “O feeseeseaʻiga faalelotu ua māfua ai ona faia e tagata lelei ia mea leaga.”

Pe iai se faamoemoe o le a autasia lo tatou lalolagi? Ioe! Ae e lē mai tagata, po o lotu na faia e tagata, le autasia o le lalolagi, e pei ona o le a tatou talanoaina.

[Faamatalaga faaopoopo i le itulau 3]

Po o ua pei le lalolagi o se pomu ua lata ona pā?