Po o E Lagolagoina le Pule Silisili Ese a Ieova?
Po o E Lagolagoina le Pule Silisili Ese a Ieova?
“Ia outou fai atu i nuu ese, Ua fai Ieova ma tupu.”—SALAMO 96:10.
1, 2. (a) Pe tusa o Oketopa i le 29 T.A., o le ā le mea tāua na tupu? (e) O le ā le uiga o lenā mea iā Iesu?
PE TUSA o Oketopa i le 29 T.A., na tupu ai se mea mataʻina, o se mea e leʻi tupu muamua i le lalolagi. Na faapea mai le tusitala o le Evagelia a Mataio: “Ua papatisoina Iesu, ona maliu aʻe loa lea o ia nai le vai, faauta foʻi, ua faaavanoa le lagi iā te ia, ua iloa atu foʻi e [Ioane le Papatiso] le Agaga o le Atua ua afio ifo e peiseaʻī se lupe, ua oo i luga o [Iesu.] Faauta foʻi, o le siʻufofoga mai le lagi, ua faapea mai, “O loʻu Atalii pele lenā, ua ou fiafia lava iā te ia.” O lenā mea na tupu, sa taʻua uma e tusitala e toʻafā o Evagelia.—Mataio 3:16, 17; Mareko 1:9-11; Luka 3:21, 22; Ioane 1:32-34.
2 O le vaaia o le liligiina ifo o le agaga paia i luga o Iesu, na taʻua ai o ia o Lē ua Faauuina, o lona uiga o le Mesia po o le Keriso. (Ioane 1:33) O lea ua oo mai le taimi e aliaʻe mai ai le “fanau” na folafolaina! Ona vaai atu lea o Ioane le Papatiso i lē o le a tuʻimomomoina e Satani lona mulivae, ae o ia e tuʻimomomoina le ulu o lenā fili sili o Ieova faapea Lana pule silisili ese. (Kenese 3:15) Mai lenā taimi ma faasolo mai ai, na iloa lelei e Iesu e tatau ona ia taumafai e faataunuu le fuafuaga a Ieova e faatatau i Lana pule silisili ese ma le Malo.
3. Na faapefea ona saunia Iesu mo le vaega o le a ia faia e lagolagoina ai le pule silisili ese a Ieova?
3 Ina ia saunia mo lona tofiga fou, ina “ua foʻi aʻe Iesu mai Ioritana, ua tumu o ia i le Agaga Paia, ona taʻitaʻiina lea o ia e le Agaga i le mea tuufua.” (Luka 4:1; Mareko 1:12) Na mafaufau loloto Iesu i inā mo le 40 aso e faatatau i le finauga o le pule silisili ese, lea na lāgā e Satani, ma le auala e ola ai ina ia lagolagoina ai le pule silisili ese a Ieova. O lenā finauga e aofia ai foafoaga atamamai uma, i le lagi ma le lalolagi. O lea, ua tatau ai ona tatou iloiloina le faamaoni o Iesu ma vaai po o le ā e tatau ona tatou faia, e faaalia ai o loo tatou faanaunau e lagolagoina le pule silisili ese a Ieova.—Iopu 1:6-12; 2:2-6.
Aliaʻe le Finauga o le Pule Silisili Ese
4. O le ā le gaoioiga na faia e Satani na faamatilatila mai ai le finauga i le pule silisili ese?
4 O le mea moni, na mātauina e Satani na mea uma na tutupu. E leʻi umi ae amata loa ana osofaʻiga i le “fanau” autū a le “fafine” a le Atua. (Kenese 3:15) E faatolu ona faaosoosoina e Satani Iesu, o lona manatu e ao iā Iesu ona fai le mea e lelei iā te ia lava, na i lo le mea na finagalo lona Tamā na te faia. Na atili faamatilatila mai le finauga o le pule silisili ese i le taimi o le faaosoosoga lona tolu. Ua faaali atu iā Iesu “malo uma o le lalolagi ma o latou matagofie,” ma na faapea atu ma le faamaualuga Satani iā Iesu: “Ou te avatu nei mea uma iā te oe, pe afai e te faapaʻū ma ifo mai iā te aʻu.” Ona na malamalama lelei Iesu e pule le Tiapolo i “malo uma o le lalolagi,” o lea na ia faailoa atu ai Lona tulaga i le finauga o le pule silisili ese e ala i le tali atu e faapea: “Inā alu ese ia oe Satani, auā ua tusia, E te ifo atu i le Alii lou Atua, ua na o ia lava e te auauna i ai.”—Mataio 4:8-10.
5. O le ā le tofiga faigatā sa tatau ona faataunuu e Iesu?
5 Na faaalia manino mai i le soifuaga o Iesu le mea e sili ona tāua iā te ia, ia lagolagoina le pule silisili ese a Ieova. Sa silafia lelei e Iesu e tatau ona ia tumau i le faamaoni seʻia faapogaia e Satani lona maliu, e pei ona valoia le tuʻimomomoina o le mulivae o le “fanau” a le fafine, ina ia faamaonia ai le tonu o le pule silisili ese a le Atua. (Mataio 16:21; 17:12) E tatau foʻi ona ia faailoa atu le mea moni o le Malo o le Atua, o le auala lea ua faavaeina e Ieova ina ia faatoʻilalo ai Satani lē e tetee, ae toe aumai le filemu ma le maopoopo i foafoaga uma. (Mataio 6:9, 10) O le ā na faia e Iesu ina ia faataunuu ai lenei tofiga faigatā?
“Ua Latalata Mai le Malo o le Atua”
6. Na faapefea ona faaalia e Iesu o le a faaaogā e le Atua le Malo e ‘faaumatia ai galuega a le Tiapolo’?
6 Ina ua amata lana galuega, “ona maliu atu lea o Iesu i Kalilaia, ua talaʻi atu le tala lelei i le Atua, ua faapea atu, ‘Ua oo mai ona pō, ua latalata mai le malo o le Atua.’ ” (Mareko 1:14, 15) O le mea moni, na ia fetalai e faapea: “E tatau ona ou folafola le tala lelei o le malo o le Atua . . . auā o le mea lea na auina mai ai aʻu.” (Luka 4:18-21, 43) Sa soo vaipanoa o femalagaaʻi solo ai Iesu e “talaʻi ma folafola le tala lelei o le malo o le Atua.” (Luka 8:1) Sa faatino foʻi e Iesu le tele o vavega, e pei o le fafagaina o le motu o tagata, faatoʻafilemu matagi, faamālōlō tagata mamaʻi, ma toe faatutū ē ua maliliu. Ona o nei vavega, na faamaonia ai e Iesu e mafai e le Atua ona toe faaleleia mea leaga uma ma puapuaga lea na māfua mai i le fouvalega i Etena, ma ‘faaumatia galuega a le Tiapolo.’—1 Ioane 3:8.
7. O le ā na faatonu e Iesu ona soo e fai, ma o le ā le iʻuga?
7 Ina ia faalauiloa le tala lelei o le Malo i le tele e mafai ai, na faapotopoto e Iesu se vaega o soo faamaoni ma aʻoaʻo i latou i lenā galuega. Na ia muaʻi faatonuina ona aposetolo e toʻa 12 ma ‘auina atu i latou e talaʻi i le malo o le Atua.’ (Luka 9:1, 2) Ona ia auina atu lea o le isi toʻa 70 e folafola le feʻau e faapea: “Ua latalata iā te outou le malo o le Atua.” (Luka 10:1, 8, 9) Ina ua toe foʻi mai nei soo ma faamatala mai iā Iesu iʻuga fiafia o le latou galuega talaʻi o le Malo, na tali atu o ia e faapea: “Na ou iloa Satani ua paʻū mai le lagi pei o le uila.”—Luka 10:17, 18.
8. O le ā na faaalia manino mai i le soifuaga o Iesu?
8 Sa finafinau ma faaaogā e Iesu avanoa uma e molimau atu ai i le Malo. Sa galue e lē aunoa o ia, i le ao faapea ma le pō, ma na te leʻi faatāuaina le soifua i se olaga sologa lelei. Na ia fetalai e faapea: “E fai lua o alope, e fai foʻi mea e momoe ai manu felelei; a o le Atalii o le tagata, e leai se mea e moe ai o ia.” (Luka 9:58; Mareko 6:31; Ioane 4:31-34) A o toe o se aga oo i lona maliu, na taʻu atu ma le lototele e Iesu iā Pilato e faapea: “O le mea foʻi lenei na ou sau ai i le lalolagi, ina ia ou molimau i le upu moni.” (Ioane 18:37) Na faaalia i le soifuaga atoa o Iesu, na sau o ia e lē tau ina ia avea ma se faiaʻoga sili po o sē e faia vavega, pe na o se Faaola. Peitaʻi ina ia lagolagoina ma faatumauina le finagalo o Ieova le Silisili ese, ma faailoa atu le mana o le Atua e mafai ai ona faataunuuina lona finagalo e ala i le Malo.—Ioane 14:6.
“Ua Taunuu!”
9. Na faapefea ona iʻu ina taulau Satani i le tuʻimomomoina o le mulivae o le “fanau” a le fafine a le Atua?
9 E leʻi fiafia le Fili, o Satani le Tiapolo, i mea uma na faia e Iesu ona o le Malo. O loo faaauau pea ona taumafai Satani e fasiotia le “fanau” a le fafine a le Atua, e ala i le vaega i le lalolagi o lana “fanau,” o faiga faapolotiki ma faiga faalotu. Mai lava i le taimi o lona fanau mai seʻia oo i le iʻuga o lona soifuaga i le lalolagi, sa avea pea Iesu ma taulaʻiga a Satani ma ana ʻau. O le iʻuga, i le 33 T.A., na oo mai ai le taimi e tuu atu ai le Atalii o le tagata i lima o le Fili ina ia tuʻimomomoina e ia lona mulivae. (Mataio 20:18, 19; Luka 18:31-33) O loo faaalia manino i tala a le ʻau Faievagelia pe na faapefea ona uunaʻia e Satani tagata, e iai Iuta le Sekara, le ʻau ositaulaga sili, le ʻau tusiupu, le ʻau Faresaio, ma tagata Roma, ina ia taʻusalaina Iesu ma faaoo iā te ia se maliu tigā i luga o le laau faaoosala.—Galuega 2:22, 23.
10. O le ā le mea pito i sili ona tāua na faataunuuina e Iesu, e ala i lona maliu i le laau faaoosala?
10 O le ā e oso aʻe i lou mafaufau pe a tomānatu iā Iesu o loo mafatia i se maliu tigā i luga o le laau faaoosala? Atonu e te manatua le taulaga togiola na saunia ma le lē manatu faapito e Iesu mo tagata agasala. (Mataio 20:28; Ioane 15:13) Atonu e faagaeetia oe i le alofa silisili lea na faaalia e Ieova e ala i le saunia o lenā taulaga. (Ioane 3:16) Pe atonu foʻi o le a pei ou lagona o le taʻitaʻiʻau Roma lea na faapea mai: “E moni, o le Alo lava lenei o le Atua.” (Mataio 27:54) E mautinoa e moni nei mea uma. I le isi itu, ia manatu i toe upu a Iesu i le laau faaoosala e faapea: “Ua taunuu!” (Ioane 19:30) O le ā ua taunuu? Na ausia e Iesu le tele o mea i lona olaga ma lona maliu, ae sa faapitoa ona afio mai o ia i le lalolagi ina ia foʻia le finauga o le pule silisili ese a Ieova. Ma na valoiaina e faapea, i le avea ma “fanau,” o le a ia fesagaʻia tofotofoga mai iā Satani ina ia faamamā ai le suafa o Ieova mai tuuaʻiga uma. (Isaia 53:3-7) O ni matafaioi tāua nei mea, ae na faataunuuina e Iesu vala uma. Maʻeu se faataunuuga ina a mataʻina!
11. O le ā o le a faia e Iesu e faataunuu atoatoa ai le valoaga na faia i Etena?
11 Na toe faatūina Iesu o se “Agaga faaola” ae lē i se tino faaletagata, ona o lona faamaoni. (1 Korinito 15:45; 1 Peteru 3:18) Na folafola atu e Ieova i lona Alo o lē ua faamamaluina e faapea: “Ia e nofo i loʻu itu taumatau, seʻia ou faia ē ua ita iā te oe ma mea e tu ai ou vae.” (Salamo 110:1) O “ē ua ita” e aofia ai le tetee silisili, o Satani, ma i latou uma ua faia aʻe ai lana “fanau.” I le avea ma Tupu o le Malo Faa-Mesia o Ieova, o le a taʻimua Iesu Keriso i le aveeseina o ē uma e tetee, i le lagi ma le lalolagi. (Faaaliga 12:7-9; 19:11-16; 20:1-3, 10) O le a faataunuuina atoatoa ai le valoaga i le Kenese 3:15 faapea le tatalo lea na aʻoaʻo atu e Iesu i ona soo e faapea: “Ia oo mai lou malo, Ia faia lou finagalo, I le lalolagi e pei ona faia i le lagi.”—Mataio 6:10; Filipi 2:8-11.
Ia Mulimuli i le Faaaʻoaʻoga a Iesu
12, 13. (a) O le ā le tali mai i le tala lelei o le Malo ua tatou vaaia i aso nei? (e) O le ā e ao ona fesili ifo iā i tatou lava, pe afai e fia mulimuli i tulagāaao o Iesu?
12 Ua talaʻia le tala lelei o le Malo i aso nei i le tele o atunuu, e pei ona valoia e Iesu. (Mataio 24:14) O le iʻuga, e faitau miliona tagata ua tuuina atu o latou ola i le Atua. Ua faagaeetia i latou i faamanuiaga o le a aumai e le Malo. O loo latou taulaʻi atu foʻi e ola e faavavau i le filemu ma le saogalemu i se lalolagi parataiso, ma fiafia e taʻu atu i isi lo latou faamoemoe. (Salamo 37:11; 2 Peteru 3:13) Po o oe o se tasi o i latou nei o ē folafola le Malo? Afai o e faia faapea, e faamalō atu iā te oe. Peitaʻi, e iai se isi mea e tatau iā i tatou taʻitoʻatasi ona iloilo.
13 Na tusi le aposetolo o Paulo e faapea: “Na tigāina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) Peitaʻi, seʻi mātau e tusa ai ma lenei mea, e leʻi taʻua e Peteru le maelega o Iesu i le talaʻiga po o lona tomai i le aʻoaʻo atu, ae o lona tigāina. I le avea ma sē na vaaitino i ai, na iloa lelei e Peteru na lotomalie Iesu e tigāina, ina ia gauaʻi i le pule silisili ese a Ieova ma faamaonia e pepelo Satani. O lea la, o ā auala e tatou te mulimuli ai i tulagāaao o Iesu? E ao ona fesili ifo iā i tatou lava: ‘O le ā le tele o oʻu taumafai ai e lagolagoina ma faamamaluina le pule silisili ese a Ieova, e ui ina faigatā? Po o oʻu faaalia atu i aʻu gaoioiga ma le maelega i le faiva, o loo sili ona ou manatu mamafa i le lagolagoina o le pule silisili ese a Ieova?’—Kolose 3:17.
14, 15. (a) Na faapefea ona tali atu Iesu i manatu sesē, ma aiseā? (e) O le ā le finauga e tatau ona manatua pea i o tatou mafaufau? (Faaaofia ai ni manatu mai le pusa “Lagolagoina le Itu a Ieova.”)
14 Ua tatou fesagaʻi i aso taʻitasi ma tofotofoga ma filifiliga e tetele pe itiiti foʻi. O le ā e tatau ona avea ma māfuaaga autū o a tatou faaiʻuga? O se faaaʻoaʻoga, pe a tatou fesagaʻi ma tofotofoga e fai se mea o le a lamatia ai lo tatou tulaga faaleagaga, o le a faapefea ona tatou tali atu? Ina ua fai atu Peteru o le a lē oo iā Iesu ni tulaga faigatā, o le ā le tali a Iesu? Na taʻutino atu Iesu e faapea: “Satani e, inā alu ia oe i oʻu tua; e lē o mea a le Atua ua e loto i ai, a o mea a tagata.” (Mataio 16:21-23) Ae ā pe a ofo mai iā i tatou ni avanoa e faalautele atu ai ma faaleleia le tulaga tau tupe po o galuega, lea o le a afāina ai la tatou faiā ma Ieova? Pe tatou te tali atu e pei o Iesu? Ina ua silafia e Iesu o le a ō mai i latou na vāai i ana vavega e puʻe iā te ia “ina ia latou faia o ia ma tupu,” sa vave lava ona maliu ese o ia.—Ioane 6:15.
15 Aiseā na vave gaoioi ai Iesu i nei tulaga faapea ma isi? Talu ai ona sa ia silafia lelei e iai se isi mea e sili atu ona tāua na i lo lona saogalemu, po o le mea na ia manatu e lelei mo ia lava. Sa manaʻo e fai le finagalo o lona Tamā ma lagolagoina Lana pule silisili ese, tusa lava po o ā tulaga e tulaʻi mai. (Mataio 26:50-54) O lea la, afai e lē pei tatou o Iesu, na manino i taimi uma i lona mafaufau le finauga i le pule silisili ese a Ieova, atonu o le a tatou lē taulau i le faia o le mea saʻo. Aiseā? Talu ai e faigofie ona maileia i tatou i togafiti a Satani, o lē ua sili ona poto e faatosina tagata e faia mea sesē, e pei ona sa ia faia e ala i le faaosoosoina o Eva.—2 Korinito 11:14; 1 Timoteo 2:14.
16. O le ā e ao ona avea ma o tatou sini autū i le fesoasoani atu i isi?
16 I la tatou faiva, tatou te taumafai e talanoa i tagata e uiga i o latou popolega, ma faailoa iā i latou tali mai le Tusi Paia. O se auala lelei lenei e faaosofia ai lo latou fiafia e suʻesuʻe le Tusi Paia. Peitaʻi, o lo tatou sini autū e lē tau ina ia fesoasoani i tagata e iloa le mea o loo taʻu mai e le Tusi Paia, po o faamanuiaga o le a aumaia e le Malo o le Atua. E tatau ona tatou fesoasoani iā i latou ia malamalama e uiga i le finauga o le pule silisili ese a Ieova. Po ua latou nofosauni e avea ma Kerisiano moni, ma tauave a latou “satauro” ma onosaia mafatiaga ona o le Malo? (Mareko 8:34) Po ua latou nofosauni e aufaatasi ma i latou o loo lagolagoina le pule silisili ese a Ieova, ma faaalia ai le pepelo ma le taufaaleaga o Satani? (Faataoto 27:11) O se faaeaga iā i tatou le faia faapea ma fesoasoani i isi ina ia lagolagoina le pule silisili ese a Ieova.—1 Timoteo 4:16.
Pe a “Pule Aoao le Atua i le Aoao o Mea”
17, 18. O le ā le taimi matagofie tatou te tulimataʻia, pe afai o loo tatou lagolagoina le pule silisili ese a Ieova?
17 A o tatou faia le mea sili tatou te mafaia i lenei taimi e faaalia ai iā tatou amio ma le tatou faiva o loo tatou lagolagoina le pule silisili ese a Ieova, tatou te tulimataʻia le taimi o le a “tuuina atu ai e Iesu le malo i le Atua, o le Tamā lea.” O āfea o le a tupu ai lenā mea? Ua faamatala e le aposetolo o Paulo e faapea: “Pe a uma ona faaumatia e ia o alii sili uma, ma faipule uma, ma ē malolosi. Auā e tatau ona pule o ia, seʻia tuuina e ia ona fili uma lava i lalo o ona vae. . . . Ona tuuina i lalo foʻi lea o le Alo lava i lē na tuuina i lalo iā te ia o mea uma, ina ia pule aoao le Atua i le aoao o mea.”—1 Korinito 15:24, 25, 28.
18 Maʻeu se taimi sili ona matagofie o le a iai, pe a “pule aoao le Atua i le aoao o mea!” O le a faataunuuina e le Malo lona fuafuaga. O le a aveesea i latou uma e tetee i le pule silisili ese a Ieova. O le a toe faafoʻisia le filemu ma le maopoopo i le lagi ma le lalolagi. O le a pepese foafoaga uma i upu a le faisalamo e faapea: “Ia outou avatu iā Ieova le viiga o lona suafa; . . . Ia outou fai atu i nuu ese, Ua fai Ieova ma tupu.”—Salamo 96:8, 10.
Pe Mafai Ona E Tali?
• Na faapefea ona faasilisilia e Iesu le finauga i le pule silisili ese a le Atua?
• O le ā le mea autū na faataunuu e Iesu i lana faiva ma lona maliu?
• O ā auala e tatou te mulimuli ai i le faaaʻoaʻoga a Iesu, i le faaalia o loo tatou lagolagoina le pule silisili ese a Ieova?
[Fesili mo le Suʻesuʻega]
[Pusa/Ata i le itulau 29]
LAGOLAGOINA LE ITU A IEOVA
E pei ona iloa e le toʻatele o uso i Korea ma so o se mea, pe a fesagaʻia e Kerisiano tulaga faigatā, e tāua tele ona manino i le mafaufau le māfuaaga ua tutupu ai na faigatā iā i latou.
Fai mai se tasi uso Molimau a Ieova, o lē na faafalepuipuiina i taimi o pulega a le Soviet e faapea: “O le malamalama e faatatau i le finauga na lāgā i le faatoʻaga i Etena, le finauga i le tonu o le pule silisili ese a le Atua, sa fesoasoani iā i matou e tutumau ai. . . . Na matou iloa ua iā i matou se avanoa e lagolagoina ai le pule a Ieova. . . . Sa fesoasoani lenei mea e faamalosia ai i matou, ma faigofie ai ona tutumau ma le faamaoni.”
Na faamatala e se isi Molimau le mea sa fesoasoani iā te ia ma isi Molimau i se nofoaga o faasalaga. Fai mai a ia: “Sa lagolagoina i matou e Ieova. E ui lava i tulaga faigatā, ae sa matou mataala faaleagaga. Sa matou faalaeiau pea le tasi i le isi, e ala i le faamanatu e faapea, o loo matou lagolagoina le itu a Ieova i le finauga i le pule silisili ese aoao.”
[Ata i le itulau 26]
Na faapefea ona lagolagoina e Iesu le pule silisili ese a Ieova, ina ua faaosoosoina e Satani?
[Ata i le itulau 28]
O le ā na faataunuuina i le maliu o Iesu?