Faaalia le Agalelei i Lenei Lalolagi Sauā

SA MAʻI tigāina se tamāloa i Burundi i le malalia. Sa manaʻomia ona vave auina atu o ia i se falemaʻi. Ae e leai se taavale e auina atu ai o ia. Na fesoasoani atu ni ana uō iā te ia. Sa la tuu o ia i luga o se uila, ma tulei o ia mo le lima itula i auala maugā. O loo agaʻi atu i se nofoaga e maua ai se pasi e auina atu ai o ia i se falemaʻi e lata ane. Ina ua mavae ni nai aso, na faasolosolo ina malosi o ia.

I le isi itu o le lalolagi, na matuā faaleagaina e le Afā o Katerina le vaipanoa o le vaifagaloa i le Iunaite Setete iā Aokuso 2005, ma sa maua ai e se vaega o tamāloloa na fesoasoani, se fale o loo tanumia i laau paʻuʻū. O nei tagata e lē masani i lē ona le fale, ae na alu le aso atoa o fesoasoani i le aveesea ma le faamamāina o laau ma otaota. Na faapea mai lē ona le fale, “Ou te lē iloa pe faapefea ona ou faafetai atu i nei [tagata].”

O le tele o lipoti mai televise, nusipepa, ma le leitiō, e na o faiga sauā e faaalia mai ai. E tele ina lē iloa galuega agalelei ona o lipoti o faiga sauā. Peitaʻi, e lē suia le mea moni o loo manaʻomia e tagata le faaalia atu o le alofa ma le tigā alofa. E tatou te manaʻomia lava le agaalofa! O na lagona e taatele i le vaitau o le Kerisimasi, pe a tautatala pe pepese foʻi e faatatau i ‘le manuia i le lalolagi i tagata ua alofagia e ia.’—Luka 2:14.

Atonu e lē faigofie ona faaalia le agalelei i se lalolagi ua tumu i le lē tali malo, ma leai ni  uiga faaleuō. O le manatu taatele o tagata, o le ala e taulau ai i le olaga, o le leai o se alofa ma le manatu faapito. E toʻatele tagata o loo ola e tusa ma lenei talitonuga, e lelei ona faaalia le sauā na i lo le agaalofa. O le matapeʻapeʻa ma le mitamitavale ua faigatā ai ona faaalia le agalelei.

O le mea ua tupu, ua faamuamua e le toʻatele i latou lava, ae lē amanaʻia ai faalogona po o faanaunauga o isi. O faagatama ma tama e autū ai ata, e masani ona faaali mai o ni “toa” o ē lē faaalia ni uiga māfana. E maua foʻi ia uiga i nisi o taʻitaʻi faapolotiki.

O lea la, ia fesili ifo iā i tatou lava: Aiseā e tatau ai ona tatou faaalia le tigāalofa? Pe e mafai ona avea lo tatou agalelei ma uunaʻiga e faia ai le lelei? O le ā e mafai ona fesoasoani iā i tatou e faaalia ai le agalelei? O le a talanoaina nei fesili i le mataupu o loo sosoo mai.

[Pusa i le itulau 3]

•Po o se vaivaiga le faaalia o le agalelei?

•Pe e iai se aogā o le agalelei?

•O ā ni auala e mafai ona e faaali atu ai le tigāalofa?