Ia Mutimutivale i le Alofa

E LEʻI faapea ona iai muamua i tagata se faanaunauga o le mauaina o le agaalofa a o latou fesagaʻia oge, maʻi, mativa, soligatulafono, taua, ma mala faalenatura. O le agalelei, e atagia atu ai lou tigāalofa i puapuaga po o faafitauli o isi, lea e aofia ai ma se faanaunauga e faaitiitia ai nei tulaga. I le pei o se ipu vai mālū i le mugālā, e mafai e le agalelei ona fesoasoani i se tagata o loo mafatia, e faaitiitia ona tigā, ma faalaeiauina ē o loo lutia i faafitauli.

E mafai ona faaalia le agalelei i a tatou upu ma gaoioiga, ma uaʻi atu i isi e ala i le faaavanoa atu pe a latou manaʻomia i tatou. E lelei pe a lē gata i aiga, uō, ma ē masani le faaali atu o le agalelei. E mafai ona faalauaʻitele atu le agalelei i isi tatou te lē iloa. Na fesili atu Iesu i lana Lauga i le Mauga, “Afai tou te alolofa atu i ē ua alolofa mai iā te outou, se a ea se taui tou te maua ai?” Na toe faapea mai Iesu, o lē e agaalofa: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.”—Mataio 5:46, 47; 7:12.

E mafai ona e faitau i nei upu, i le Tusi Paia. E toʻatele e ioe i le manatu lenei, o le Tusi Paia o le taʻiala sili lea mo le faaalia o le agalelei. O loo faamamafa i le Tusi Paia le mea e tatau ona tatou faia, o le fesoasoani lea i ē e manaʻomia le fesoasoani. O loo faailoa mai e le Tusi Paia Ieova le Atua, o le faaaʻoaʻoga aupito i sili o le agaalofa.

O se faaaʻoaʻoga, pe a tatou faitau: “O lē [Atua] na te puipuia aiā tatau o ē ua mātuaoti ma le fafine ua oti lana tane; o lē alofa atu i le tagata ese, ma avatu ai iā te ia le mea e ʻai atoa ma ofu.” (Teuteronome 10:18, Contemporary English Version) O loo faamatalaina Ieova le Atua o “lē na te faia le faamasinoga mo ē o sauāina; na te avatua le mea e ʻai i ē o fia aai.” (Salamo 146:7) E tusa ai ma tagata ese ua faileagaina, na faamanatu mai e Ieova: “O le tagata ese . . . ia tusa lava ia iā te outou ma le tama a le eleele, e te alofa atu iā te ia e pei o oe lava iā te oe.”—Levitiko 19:34.

Peitaʻi, e lē faigofie ona faaalia le agalelei. Na tusi atu le aposetolo o Paulo i Kerisiano i Kolose: “Ina ua toeseina e outou le tagata tuai atoa ma ana amio, a ua outou oofu i le tagata fou, o lē ua faafouina i le iloa, e faatatau  ia foliga i lē na faia o ia . . . ia oofu outou i le alofa mutimuti vale.”—Kolose 3:9, 10, 12.

E manaʻomia la ni taumafaiga e ati aʻe ai le agaalofa. O lenā uiga, o se vaega o le “tagata fou” lea e tatau ona ofuina e Kerisiano. Sa nofo Paulo i le nuu sauā o Roma anamua. Na ia faalaeiauina uso talitonu ina ia faia ni suiga tetele i o latou uiga, ina ia faaalia atili ai le tigāalofa ma le agaalofa.

O Aogā o le Agaalofa

Ua faapea mai nisi, o se vaivaiga ma se lamatiaga le faaalia o le agalelei. Pe saʻo lenā manatu?

E lē saʻo lenā manatu! O le uunaʻiga moni mo le faaalia o le agalelei moni, o le alofa loloto lea e faapogaia mai e le Atua, o le faaaʻoaʻoga sili o le alofa moni. “O le Atua, o le alofa lava ia.” (1 Ioane 4:16) Ua tonu le taʻua o Ieova “o le Tamā e ona le alofa mutimuti vale, o le Atua foʻi e ana le faamāfanafanaga uma.” (2 Korinito 1:3) O le faaupuga “alofa mutimuti vale,” o lona uiga ia “agalelei atu i puapuaga o isi.” O le mea moni, e “agamalu,” o lona uiga e agalelei Ieova “i ē agavale, atoa ma ē amio leaga”!—Luka 6:35.

E moomia e Lē na Faia mea i tatou e faaalia uiga tauagafau, e pei o le agaalofa. O loo faapea mai le Mika 6:8: “Ua faaali atu e ia iā te oe le mea lelei; se a foʻi se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa.” O loo faapea mai le Faataoto 19:22, “O le mea e manaʻomia i le tagata, o lona alofa lea.” Na timaʻi mai le Alo o le Atua o Iesu, lea na atagia mai ai uiga lelei atoatoa o lona Tamā: “Ia mutimuti vale lo outou alofa, pei ona alofa mutimuti vale o lo outou Tamā.” (Luka 6:36) Na faaliliu e le Jerusalem Bible lenā timaʻiga: “Ia agaalofa outou, auā e agaalofa lo outou Tamā.”

E iai māfuaaga lelei e faapea ai, auā e tele faamanuiaga e maua pe a faaalia le agalelei. E masani ona tatou iloa le moni o upu i le Faataoto 11:17: “O le tagata alofa ua agalelei o ia iā te ia lava.” Pe a tatou faaalia le agalelei i se tasi o loo manaʻomia, o le a silasila mai le Atua ua e faia lenā gaoioiga mo Ia. E iā te ia le tiute tauave e taui ai le alofa, le agalelei ua faaalia e ona tagata tapuaʻi. Na faagaeeina le tupu o Solomona e faapea mai: “O lē ua alofa i le tagata mativa, na te avatua ana mea iā Ieova; e tauia mai foʻi e ia ana mea na  avatu iā te ia.” (Faataoto 19:17) Na faapea mai Paulo: “O iloa e outou o lē na te faia se mea lelei, e toe maua lea e ia mai le Alii.”—Efeso 6:8.

E mafai e le agalelei ona faatumauina le filemu ma fesoasoani i le fofōina o faafitauli. E fesoasoani foʻi i le foʻiaina o feeseeseaʻiga, ma tatala ai le avanoa e fefaamagaloaʻi ai. Atonu e tupu feeseeseaʻiga ona e lē mafai ona faamatala atu o tatou mafaufauga po o faalogona, i le auala tatou te mananaʻo ai, po o le faauiga sesē o a tatou gaoioiga. O le ituaiga tulaga lea e aogā ai le agaalofa, auā e fesoasoani i le faatumauina o le filemu. E faigofie ona faamagalo se tagata e agaalofa. E fesoasoani le agaalofa iā i tatou e piiama i fautuaga a Paulo i Kerisiano: “Ia fefaapalepaleaʻi, ma ia fefaamagaloaʻi outou, pe afai ua agaleagaina se tasi e se tasi.”—Kolose 3:13.

O le Agalelei e Faaalia ai le Tigāalofa

E lē gata i lea, e mafai e le agaalofa ona aveesea puapuaga. E atagia atu ai le agaga tigāalofa i ē o loo pagatia, ma uunaʻia ai i tatou e tauaveina mafatiaga o ē o loo mafatia. E aofia i le agalelei le manatu mamafa mo ē o loo puapuagatia, ma gaoioi e fesoasoani iā i latou.

I le faaalia o le tigāalofa, o loo faataʻitaʻi ai Kerisiano iā Iesu. E na te faaavanoa lona taimi e fesoasoani ai i le itu faaletino ma le itu faaleagaga. Ina ua silafia e Iesu mea na manaʻomia e isi, o lona alofa mutimutivale na ia saʻilia ai se auala e fesoasoani ai.

Mātau le auala na gaoioi ai Iesu ina ua ia iloa atu le motu o tagata ua tuulafoaʻia faaleagaga: “Ua silafia e ia le motu o tagata, ona mutimuti vale ai lea o lona alofa iā te i latou, ona ua lailoa i latou ma tuulafoaʻiina, e pei o mamoe e leai so latou leoleo.” (Mataio 9:36) Na faapea mai se faitofā o le Tusi Paia e faatatau i le faamatalaga “ua mutimuti vale lea o lona alofa,” e “atagia mai ai faalogona loloto o se tagata.” Na ia toe faapea mai: O le mea moni, o le upu aupito i malosi lea i le gagana Eleni mo lagona, o le agaalofa.

O lea la, o Kerisiano agaalofa e vave tali atu i manaʻoga faaletino ma faaleagaga o isi. Na faapea mai le aposetolo o Peteru: “Ia loto gatasi outou uma, ia fealofani, ia alolofa i le ʻau uso, ia mutimuti vale i le alofa.” (1 Peteru 3:8) Mo se faataʻitaʻiga, na siitia se aiga Kerisiano matitiva i se isi vaipanoa ona o tulaga tau soifua mālōlōina, ma na fesoasoani atu uso talitonu i lenā vaipanoa e ala i le nonofo i se fale e aunoa ma se totogi mo le ono masina. Na faapea mai le tamā: “Na latou asiasi mai i aso uma ma fia iloa po o ā mai i matou, ma na matuā faalaeiauina i matou inā asiasiga.”

E amanaʻia foʻi e Kerisiano moni manaʻoga o tagata ese. E fiafia e faaaogā o latou taimi, malosi, ma tupe e fesoasoani ai i ē latou te lē masani. O tamāloloa ia na fesoasoani atu i tagata latou te lē masani, lea na taʻua i le mataupu muamua, o i latou o ni Molimau a Ieova.

O loo tumu le faapotopotoga Kerisiano i le agaga o le agalelei ma le alofa. O loo faatumulia tagata o le faapotopotoga i auala e mafai ona fesoasoani atu ai, ona o le alofa. Ona e tofu lava ma faafitauli, e manaʻomia e tamaiti mātuaoti ma fafine ua oti a latou tane i le faapotopotoga, la tatou lagolagosua ma le tigāalofa. Pe mafai ona e fesoasoani iā i latou e taulimaina le mativa, le lē lava o togafitiga faafomaʻi, lē lava fale talafeagai e nonofo ai, po o nisi faafitauli totino?

Seʻi manatu foʻi i se ulugalii i Eleni. Sa aafia le tamā i le maʻi o le pē o le tino. Sa auina atu o ia ma lana avā i se falemaʻi e mamao. Sa lē lava le la faasoa, ma e faalagolago le la alagātupe i le faatoʻaga moli ua pula. O ai o le a galueaʻiina le la faatoʻaga a o iai i le falemaʻi? Sa gaoioi loa le faapotopotoga. Na latou piki ma faatau atu moli, ma na toe mafai ona maua ai se alagātupe a le ulugalii ma faatoʻafilemu ai o la mafaufau.

 E tele auala e mafai ona faaalia ai le agalelei. O se faaaʻoaʻoga, e iloa e Kerisiano agaalofa o nisi taimi e na o le pau le mea e manaʻomia e i latou o loo puapuagatia, o se asiasiga mai se tagata e fia faalogo atu ma le tigāalofa, ma tuuina atu ni faamāfanafanaga mai le Tusi Paia.—Roma 12:15.

Olioli i se Siʻomaga Agaalofa

Ua avea le faapotopotoga Kerisiano i le lalolagi aoao ma nofoaga e maua ai le filemu ma faamāfanafanaga, aemaise foʻi le faaalia o le agalelei ma le alofa. E iloa e Kerisiano moni e tosina mai tagata ona o le agalelei, ae lē o le sauā. A o taumafai e faaaʻoaʻo atu i lo latou Tamā o i lagi, latou te taumafai malosi e faaalia le “alofa mutimutivale” i ni auala aogā.

E valaaulia ma le māfana e Molimau a Ieova oe ina ia e molimauina le agaalofa, ma le manatu mamafa o ona tagata, lea e faaalia e le ʻauuso Kerisiano. Ua latou mautinoa o le a e tosina ma e fiafia i lenā siʻomaga.—Roma 15:7.

[Ata i le itulau 5]

Na timaʻi atu Paulo i Kerisiano i Kolose ina ia oofu i le alofa mutimutivale

[Ata i le itulau 7]

Ina ua silafia e Iesu mea na manaʻomia e isi, o lona alofa mutimutivale na ia saʻilia ai se auala e fesoasoani atu ai