Pe E te Manatua?

Pe na e fiafia i le faitauina o lomiga fou o Le Olomatamata? Seʻi taumafai pe e mafai ona e taliina fesili nei:

• Aiseā e tāua ai le “Feagaiga Tuai”?

O lona Tusitala e lē o se Atua sauā ae o le Atua alofa, o Ieova. Na faaauau ona faaaogā e Iesu ma ona soo Tusitusiga Eperu. O loo iai fautuaga aogā mo aso taʻitasi o le olaga ma le faamoemoe mataʻina mo le lumanaʻi.—9/1, itulau 4-7.

• O le ā le mea ua faaalia ona o le taimi ua alu talu ona agasala Atamu ma Eva?

Pe ā nei ma le 6,000 tausaga ua mavae, ua faaalia ai o Satani o lē e pepelo, auā ua feoti Atamu ma Eva ma le faitau miliona o a la fanau. Ua faaalia mai i le taimi ua alu, e lē mafai ona ola tutoʻatasi tagata mai i le Atua, ma e lē o iā i latou le pule po o le tomai e faatonuina ai o latou ala.—9/15, itulau 6-7.

• Aiseā na lē faitioina ai Iakopo i le faafoliga atu o ia o Esau?

Na iā Iakopo le aiā e maua ai faamanuiaga mai lona tamā, auā na ia faatau mai le tofi o le ulumatua mai iā Esau. Ina ua ia iloa o Iakopo lea ua ia ave i ai le faamanuiaga, e leʻi taumafai Isaako e toe suia lenā tulaga. E ono mafai ona taofia e le Atua lea mea na tupu, peitaʻi ua manino mai ai na finagalo o ia e avatu faamanuiaga iā Iakopo.—10/1, itulau 31.

• E faapefea i le iai o o tatou lotofuatiaifo ona tali atu i le evolusione?

Ua uunaʻia tagata e fesoasoani i isi e ui lava e lamatia ai o latou ola i atunuu ma aganuu uma. O lea uiga o le lē manatu faapito, e lē maua i tagata pe afai o i latou o ni manu ua taumafai e ola i so o se tulaga.—10/15, itulau 20.

• Aiseā ua tatou faapea ai e agamalu le Atua, ma e faapefea ona ia faaalia lea uiga?

I le avea ai o Ia ma Pule Silisili Ese ma o Lē na Foafoaina mea, e lē faapea e lē lelei atoatoa le Atua e pei o i tatou. Ae e tusa ai ma le 2 Samuelu 22:36, e agamalu le Atua e ala i lona amanaʻia o tagata faatauvaa o ē o loo taumafai e faafiafia o ia, ma faasafua atu lona alofa mutimutivale mo i latou. E pei o aapa mai Ieova mai i le lagi ina ia feutagaʻi ma le agalelei ma ē matataʻu i le Atua.—11/1, itulau 4-5.

• E faapefea i taʻega o ipu omea ona faamautinoa faamaumauga a le Tusi Paia?

Na maua e tagata suʻesuʻe i taʻega o ipu omea i Samaria lea e iai igoa o ituaiga e fitu o loo faamauina i le Iosua 17:1-6. O ia ipu omea mai Arata e faamaonia ai faamatalaga e faatatau i aiga ositaulaga, ma e faamaonia ai foʻi le suafa o le Atua. O taʻega o ipu omea mai i Lakisa e faamalamalama ai le tulaga faapolotiki ma fevesiaʻiga na tutupu i Iuta a o leʻi osofaʻia e Papelonia.—11/15, itulau 12-14.

• Aiseā ua faapea mai ai o Luka na tusia le tusi o Galuega?

Ua mafai ona faapea na tusia e Luka nei tusi e lua o le Evagelia a Luka ma le tusi o Galuega a Aposetolo ona na tusi atu ai iā Teofilo. O le faaaogāina o suinauna e pei o le “matou,” “outou,” ma “maʻua,” e faaalia mai ai na aofia Luka i nisi o mea na tutupu. (Galuega 16:8-15)—11/15, itulau 18.

• O le ā le vaaiga a Kerisiano i fanafanaga manu ma fagotaga?

Na faataga e le Atua tagata e tapē ma ʻai manu talu mai lava aso o Noa. Ae o le manaʻomia ona faaalu o le toto o le manu, e faaalia ai e ao ona amanaʻia, o le Atua le puna o le ola. E ao i Kerisiano ona lē tapēina manu ona o se taaloga pe faafiafia ai. E tāua le usitai i tulafono a Kaisara ma manatu i lotofuatiaifo o isi tagata. (Roma 14:13)—12/1, itulau 31.