Po o Iai Sau Faufautua mo Mea Faaleagaga?

NA AVEA Usia ma tupu o le malo i saute o Iuta, ina ua 16 ona tausaga. O lona nofoaiga e mai le 829 T.L.M seʻia oo i le 778 T.L.M., ma e silia ma le 50 tausaga le umi. Mai lava i lona talavou, na “ia faia le amiotonu i luma o Ieova.” O ai na fesoasoani iā Usia ina ia mulimuli i le ala amiotonu? Na taʻua e faamaumauga o le talafaasolopito e faapea: “Ua ia [Usia] saʻili atu i le Atua i ona pō o Sakaria o lē sa poto i faaaliga mai le Atua; o aso foʻi na ia saʻili atu ai iā Ieova sa faamanuia o ia e le Atua.”—2 Nofoaiga a Tupu 26:1, 4, 5.

E lē tele ni mea o taʻua mai e le Tusi Paia e faatatau iā Sakaria, le faufautua a le tupu. Ae i le avea ai ma “lē sa poto i faaaliga mai le Atua,” na telē se aafiaga na maua e le tupu talavou mai iā Sakaria ina ia faia le mea ua tonu. Na faamatala e le The Expositors Bible e faapea o Sakaria, “o se tagata e iloa lelei le Tusi Paia, e malamalama tele i mea faaleagaga, ma e tautala o ia ma le poto.” Na taʻua foʻi e se tagata poto o le Tusi Paia e faatatau iā Sakaria: “O ia o se tagata sa lelei i valoaga ma . . . o lē sa poto ma faamaoni, sa amiotonu, ma e foliga mai na telē se aafiaga o Usia mai iā te ia.”

O le mulimuli o Usia i se ala faamaoni, sa ia maua ai le tele o faamanuiaga ma na “matuā faamalosi lava” auā na “fesoasoani mai foʻi le Atua iā te ia.” Sa faalagolago le taulau o taumafaiga a Usia, i lona saʻilia o se ala amiotonu “i ona pō o Sakaria.” (2 Nofoaiga a Tupu 26:6-8) Ae ina ua taulau manuia Usia, na ia tuulafoaʻi aʻoaʻoga a lana faufautua o Sakaria. Sa taʻua e faapea, “ona faamaualugaina lea o lona loto, e iʻu ai i lona malaia; auā ua ia agasala atu iā Ieova.” Na taia o ia i se maʻi o le paʻu o le tino ona o se mea na ia faia na iloa ai lona uiga faamaualuga, ma na lē atoatoa ai lona malosi, ma lē mafai ai ona faatino uma ona tiute o se tupu.—2 Nofoaiga a Tupu 26:16-21.

Po o iai se tasi o avea ma ou faufautua, po o sē e fesoasoani iā te oe e “saʻili atu i le Atua”? E mafai ona iai sou faufautua e tusa lava pe e te laʻitiiti pe e te matua, po o oe o se tama po o se teine. Ia e talisapaia lau faufautua, auā o ana fautuaga e fesoasoani iā te oe e faaauau ai pea i le faia o le mea tonu i le silafaga a Ieova. Ia faalogo ma uaʻi totoʻa i fautuaga o loo aumaia e lenā Kerisiano taʻumatuaina. Seʻi aua lava neʻi manatu māmā i fautuaga poto mai i ē e pei o Sakaria, “o lē sa poto i faaaliga mai le Atua.”—Faataoto 1:5; 12:15; 19:20.