Po ua E Nofosauni mo le Aso o Ieova?

“O loo latalata mai le aso tele o Ieova, e lata mai lava, o loo matuā tele vave mai lava.”—SEFANAIA 1:14.

1-3. (a) O le ā o taʻua i le Tusi Paia e uiga i le aso o Ieova? (e) O lē fea “aso o Ieova” o loo tatou sagaʻi atu i ai?

O LE aso o Ieova e lē o se aso e 24 itula le umi. O se taimi e fai sina umi atu i lo lenā, a o faagasolo le faamasinoga a le Atua i tagata amioleaga. Ua tatau ona matataʻu i latou e lē o auauna i le Atua i lenā aso o le pogisa, le toʻatamaʻi, le toʻasā, le puapuaga, ma le faatafunaga. (Isaia 13:9; Amosa 5:18-20; Sefanaia 1:15) Ua faapea mai le valoaga a Ioelu: “Aue, le aso e! auā ua latalata mai le aso o Ieova, e oo mai e pei o se malaia ai Lē e ona le malosi uma lava” (Ioelu 1:15) Peitaʻi, a o faagasolo lenā aso tele, o le a laveaʻi e le Atua i latou “ua tonu o latou loto.”—Salamo 7:10.

² O loo faasino atu le faaupuga “aso o Ieova” i le faaoo mai o faamasinoga a le Atua i taimi eseese. O se faaaʻoaʻoga, na oo ane le “aso o Ieova” i tagata na nonofo i Ierusalema, ina ua ia faaaogā Papelonia e faaumatia i latou i le 607 T.L.M. (Sefanaia 1:4-7) E tai faapena foʻi le faaooina atu o iʻuga faafaamasinoga a le Atua i le 70 T.A., ina ua ia faaaogā ʻautau a Roma e faaoo atu lana faamasinoga i le aai o Iutaia lea na teena lona Alo. (Tanielu 9:24-27; Ioane 19:15) Ua valoia foʻi i le Tusi Paia se “aso o Ieova” pe a oo i le taimi o le a ia ‘tau ai ma nuu uma.’ (Sakaria 14:1-3) I le faagaeeina e le agaga paia, na faafesootaʻi atu e Paulo lenā aso i le faatasi mai o Keriso, lea na amata ina ua nofotupu Iesu o se Tupu i le lagi i le 1914. (2 Tesalonia 2:1, 2) Talu ai ona ua toe o se aga ona oo mai lea o le aso o Ieova, o loo talafeagai lelei ai le mau o le tausaga a Molimau a Ieova mo le 2007. Ua faitauina mai le Sefanaia 1:14 e faapea: “O loo latalata mai le aso tele o Ieova.”

³ A o latalata mai le aso tele o le Atua, o le taimi la lenei e te nofosauni ai. E faapefea ona e sauni mo lenā aso? O ā nisi laasaga e manaʻomia ona e faia ina ia nofosauni ai mo le aso Ieova?

Ia E Nofosauni

4. O le ā le tofotofoga tele sa sauniuni i ai Iesu?

⁴ I lana valoaga e faatatau i le iʻuga o le faiga o mea, na fetalai atu ai Iesu i ona soo e faapea: “Ia outou nofo sauni.” (Mataio 24:44) Ina ua fai atu e Iesu lenā faamatalaga, sa nofosauni o ia mo se tofotofoga tele, o lona maliu lea e avea ma taulaga togiola. (Mataio 20:28) O le ā tatou te aʻoaʻoina mai le auala na sauniunia ai Iesu?

5, 6. (a) Ua faapefea ona aogā iā i tatou le alofa i le Atua ma tagata ina ia sauniuni ai mo le aso o Ieova? (e) O le ā le faaaʻoaʻoga na faataatia e Iesu e tusa ai ma le alofa i tuaoi?

⁵ Na alofa ma le loto atoa Iesu iā Ieova ma Ana tapulaa amiotonu. Ua faapea mai le Eperu 1:9 e uiga iā Iesu: “Ua e fiafia i le amiotonu, a ua e ʻinoʻino i le amio leaga; o le mea lea, ua faauuina ai oe e le Atua, o lou lava Atua i le suāuu o le olioli e sili i ē tou te faatasi.” Na tumau faamaoni Iesu i lona Tamā i le lagi, ona o lona alofa iā te ia. Pe afai e iai so tatou alofa faapena mo le Atua ma ola e ōgatusa ma ana tapulaa, o le a ia puipuia i tatou. (Salamo 31:23) O le a aogā lenā alofa ma le usiusitai iā i tatou, e nofosauni ai mo le aso tele o Ieova.

⁶ Sa avea le alofa i tagata o se vala mataʻina o uiga o Iesu. O le mea moni, ‘na mutimuti  vale lona alofa iā te i latou, ona ua lailoa i latou ma tuulafoaʻiina, e pei o mamoe e leai so latou leoleo.’ (Mataio 9:36) O le māfuaaga lenā na talaʻi atu ai e Iesu le tala lelei i tagata, e pei foʻi ona uunaʻia i tatou e le alofa e faalauiloa atu le feʻau o le Malo i o tatou tuaoi. O le alofa i le Atua ma tuaoi, o le a tatou maelega ai pea o ni Kerisiano ma o le a aogā e saunia ai i tatou mo le aso tele o Ieova.—Mataio 22:37-39.

7. Aiseā tatou te olioli ai a o faatalitali i le aso o Ieova?

⁷ Sa fiafia Iesu e fai le finagalo o Ieova. (Salamo 40:8) Pe afai e iā i tatou lea foʻi uiga, o le a tatou olioli la i le faatinoina o le auaunaga paia i le Atua. I le pei o Iesu, o le a avea i tatou ma ē foaʻi ma le lē manatu faapito, ma o le a faafiafiaina moni i tatou i lenei tulaga. (Galuega 20:35) Ioe, “o le fiafia iā Ieova o lo [tatou] malosi lea.” O lenā olioli o le a saunia lelei ai i tatou mo le aso tele o Ieova.—Neemia 8:10.

8. Aiseā e ao ai ona tatou faalatalata atu iā Ieova i le tatalo?

⁸ Sa fesoasoani iā Iesu le tatalo faatauanau e nofosauni ai mo tofotofoga o le faatuatua. Sa ia tatalo ina ua papatisoina o ia e Ioane. Na tatalo Iesu i le pō atoa a o leʻi filifilia ona aposetolo. (Luka 6:12-16) Ma o ai se e lē faagaeetia i tatalo mai le loto a Iesu, i le pō mulimuli a o leʻi maliu? (Mareko 14:32-42; Ioane 17:1-26) Po o oe o se tagata e masani ona tatalo, e pei ona sa faia e Iesu? Ia faalatalata atu iā Ieova e lē aunoa, aua le faatopelauina ona fai au tatalo, ia saʻili le taʻitaʻiga a le agaga paia, ma ia nofosauni e talia lenā taʻitaʻiga pe afai ua manino lea tulaga iā te oe. E tāua tele se faiā malosi ma lo tatou Tamā o i le lagi i nei taimi faigatā, a o lata tele mai le aso tele o le Atua. O lea la, seʻi aua lava neʻi faatalatū e faalatalata atu pea iā Ieova i le tatalo.—Iakopo 4:8.

9. Aiseā e tāua ai ona manatu mamafa i le faapaiaina o le suafa o Ieova?

⁹ Sa fesoasoani foʻi iā Iesu le manatu mamafa i le faapaiaina o le suafa o Ieova, e nofosauni ai mo tofotofoga na ia fesagaʻia. O lea na ia aʻoaʻo ai ona soo ina ia faaaofia i a latou tatalo i le Atua le talosaga lenei: “Ia paia lou suafa.” (Mataio 6:9) Pe afai tatou te matuā naunau e faapaia le suafa o Ieova, pe faamamalu, o le a tatou taumafai e ʻalofia le faia o so o se mea e faalumaina ai lona suafa. O le iʻuga, o le a lelei ai ona sauniunia i tatou mo le aso tele o Ieova.

O ā ni Suiga e Ao Ona Fai?

10. Aiseā e tatau ai ona iloilo o tatou olaga?

¹⁰ Afai o taeao e oo mai ai le aso o Ieova, po ua e nofosauni ea mo lenā aso? E ao iā i tatou taʻitoʻatasi ona iloilo o tatou olaga po o iai ni mea o faia po o ni uiga e manaʻomia ona suia. Pe a fua i le puupuu ma le lē mautonu o le olaga o loo ola ai nei le tagata, o lea e manaʻomia ai e i tatou ona mataala faaleagaga i aso taʻitasi. (Failauga 9:11, 12; Iakopo 4:13-15) O lea la, seʻi o tatou iloilo nisi vala o le olaga e manaʻomia ona tatou tagaʻi i ai.

11. O le ā lou sini i lau faitauga Tusi Paia?

 ¹¹ O se tasi o vala tāua, o le fautuaga a le “auauna faamaoni” ia faitau le Tusi Paia i aso taʻitasi. (Mataio 24:45) Atonu e fai ma ou sini le faitau o le Tusi Paia mai le Kenese e oo i le Faaaliga e faatasi i le tausaga, ma faaalu se taimi e mafaufau loloto ai. O le a mafai ona e faitauina mataupu e 1,189 o le Tusi Paia i le tausaga e tasi, pe afai e te faitauina ni mataupu se fā i le aso. Sa tatau i tupu taʻitasi o Isaraelu ona faitau i Tulafono a Ieova i ‘aso uma o o latou olaga.’ E foliga mai sa faia faapena e Iosua. (Teuteronome 17:14-20; Iosua 1:7, 8) E tāua tele la mo toeaiina o le faapotopotoga ona faitau le Afioga a le Atua i aso taʻitasi, auā o le a fesoasoani lenā iā i latou e faailoa atu “mataupu e ola ai.”—Tito 2:1.

12. O le ā e ao ona uunaʻia oe e fai a o latalata mai le aso o Ieova?

¹² O le latalata mai o le aso o Ieova, e ao ona uunaʻia ai oe e auai e lē aunoa ma faia se sao atoatoa e tusa ma le mea e mafaia i sauniga faa-Kerisiano. (Eperu 10:24, 25) O le faia faapea o le a fesoasoani iā te oe e faaleleia ai ou tomai o se tagata talaʻi o le Malo, o lē saʻili ia maua i latou ua saunia mo le ola e faavavau, ma fesoasoani i ai. (Galuega 13:48) Atonu e tele nisi auala e tou te galulue ai ma le faapotopotoga, e ala i le fesoasoani i tagata matutua ma faalaeiau ē talavou. E telē le faamalieina e maua mai i nei taumafaiga!

O Lau Faiā ma Isi

13. O ā fesili e ao ona tatou fesili ifo ai iā i tatou lava, e faatatau i le ofuina o le tagata fou?

¹³ A o matuā lalata mai le aso o Ieova, po o manaʻomia ona e faia se taumafaiga sili atu ina ia ‘ofu i le tagata fou ua faia e foliga i le Atua, i le amiotonu ma le amio lelei e faamaoni’? (Efeso 4:20-24) A o e atiina aʻe uiga faale-Atua, o le a mātauina e isi o loo e ‘savali i la le agaga’ o le Atua ma faaalia ona fua. (Kalatia 5:16, 22-25) Pe mafai ona e taʻua ni gaoioiga e faaalia ai ua oofu oe ma le lou aiga i le tagata fou? (Kolose 3:9, 10) O se faaaʻoaʻoga, po o iloa oe o sē e agalelei i uso talitonu ma isi? (Kalatia 6:10) O le a fesoasoani iā te oe le suʻesuʻeina e lē aunoa o le Tusi Paia e atiina aʻe ai uiga faale-Atua, lea o le a saunia ai oe mo le aso o Ieova.

14. Aiseā e ao ai i se tagata ona tatalo mo le agaga paia a o galue e atiina aʻe le pulea o ia lava?

¹⁴ Ae ā pe afai e te itagofie ma ua e iloa e manaʻomia ona e pulea oe lava? O lenā uiga o se vaega o fua o le agaga, lea e mafai ona atiina aʻe e le agaga paia o le Atua i totonu iā te oe. O lea la, ia tatalo mo le agaga paia, e tusa ai ma upu a Iesu e faapea: “Ia outou ōle atu, ona foaʻiina mai lea iā te outou; ia outou saʻili, ona outou maua lea; ia outou tuʻituʻi atu, ona toina mai lea iā te outou. . . . O outou e leaga, afai ua iloa e outou ona avatu o mea lelei mā a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ōle atu iā te ia”?—Luka 11:9-13.

15. O le ā e ao ona fai pe afai o iai se faafitauli i le lua va ma se uso talitonu?

¹⁵ Seʻi faapea o loo iai se faafitauli i le lua va ma se isi uso talitonu. I lenā tulaga, ia taumafai malosi e toe faaleleia le lua faiā, ina ia tausia pea le filemu ma le autasi o le faapotopotoga. (Salamo 133:1-3) Ia faatatau le fautuaga a Iesu o loo i le Mataio 5:23, 24 po o le Mataio 18:15-17. Afai e goto le lā o e ita pea, ia vave ona e gaoioi e faasaʻo le mataupu. E manaʻomia ai lou faamagalo atu. Na tusi Paulo e faapea: “Ia outou feagaleleiaʻi, ia femutimutivaleaʻi lo outou alofa, ia fefaamagaloaʻi outou, faapei ona faamagaloina outou e le Atua iā Keriso.”—Efeso 4:25, 26, 32.

16. I ā auala e manaʻomia ai le alofa i le faaipoipoga?

¹⁶ E manaʻomia e paaga faaipoipo uma ona alofa faapelepele, ma e iai foʻi taimi e manaʻomia ai ona fefaamagaloaʻi. Afai e te manaʻo e faaalia le alofa ma le agalelei i lau paaga faaipoipo, ia taumafai e ausia lenei sini e ala i le fesoasoani a le Atua ma lana Afioga. E ao ona e taumafai e usitaia le manatu o loo i le 1 Korinito 7:1-5, ina ia faaleleia ai le lua faiā ma ʻalofia ai le lē faamaoni. E mautinoa e  manaʻomia e se tane ma se avā ona ‘femutimutivaleaʻi le alofa’ i lenei vala o le olaga.

17. O ā laasaga e ao ona fai pe afai ua faia e se tasi se agasala matuiā?

¹⁷ Ae faapefea pe afai ua e faia se agasala matuiā? Ia taumafai e faasaʻo le tulaga ua tupu i le vave e mafai ai. Ia saʻili se fesoasoani mai toeaiina Kerisiano. O le a fesoasoani a latou tatalo ma fautuaga e toe faaleleia ai lou itu faaleagaga. (Iakopo 5:13-16) Ia tatalo iā Ieova ma se uiga salamō. O lou lē taulau e faia faapea, o le a iʻu ai ina e lagona le nofosala ma se lotofuatiaifo ua ōia. O le mea lenā na tupu iā Tavita, peitaʻi maʻeu se tulaga lelei na iai o le mauaina o se mapusaga ina ua uma ona ia taʻutino atu iā Ieova lana agasala! Na tusi Tavita e faapea: “Amuia le tagata ua faamagaloina lona solitulafono, ma ua ufitia lana agasala. Amuia le tagata e lē taʻusalaina e Ieova, e leai foʻi se ʻoleʻolegia i lona loto.” (Salamo 32:1-5) E faamagalo e Ieova i latou e agasala ae salamō moni.—Salamo 103:8-14; Faataoto 28:13.

Tumau Ona Lē Avea ma Vaega o le Lalolagi

18. O le ā lau vaaiga e tatau ona iai i le lalolagi?

¹⁸ O loo e taulaʻi atu ma le mautinoa i le lalolagi fou matagofie na folafola mai e lo tatou Tamā i le lagi. O lea la, o le ā lau vaaiga i le lalolagi o tagata amiolētonu ua liliu ese mai le Atua? E leʻi manumalo le “alii o lenei lalolagi” o Satani iā Iesu Keriso. (Ioane 12:31; 14:30) E mautinoa e te lē manaʻo foʻi e manumalo le Tiapolo ma lana lalolagi iā te oe. O lea, ia manatua upu a le aposetolo o Ioane e faapea: “Aua tou te mananaʻo i le lalolagi, po o mea o iai i le lalolagi.” O se auala atamai lenā auā “e mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:15-17.

19. O ā sini ua uunaʻia talavou Kerisiano ia faatutū?

¹⁹ Po o e fesoasoani i lau fanau ina ia ‘leoleo i latou iā te i latou, ina neʻi pisia mai le lalolagi’? (Iakopo 1:27) E pei lava ona taumafai se tagata puʻe manu e maileia manulele, ua faapena foʻi ona manaʻo Satani e maileia lau fanau e ala i kalapu eseese ma isi faalapotopotoga, lea ua fuafua ina ia faaaofia ai talavou i le lalolagi a Satani. Peitaʻi ua avea auauna a Ieova ma vaega o le faalapotopotoga e tasi, lea o le a faasaoina mai le iʻuga o lenei faiga amioleaga o mea. O lea e ao ai ona faalaeiau talavou Kerisiano ina ia tele mea e fai, pe ‘ia alualu lo latou faamalosi i le galuega a le alii.’ (1 Korinito 15:58) E manaʻomia ona fesoasoani mātua e tapuaʻi i le Atua i a latou fanau, ina ia faatutū ni sini o le a maua ai le fiafia ma se olaga tauia, lea e faamamaluina ai le Atua ma fesoasoani iā i latou e nofosauni ai mo le aso o Ieova.

Ia Tepa Taulaʻi i le Aso Tele o Ieova

20. Aiseā e ao ai ona manatua pea i o tatou mafaufau le ola e faavavau?

²⁰ O le a e faatalitali ma le toʻafilemu i le aso o Ieova, pe afai e manatua pea i lou mafaufau le ola e faavavau. (Iuta 20, 21) E te taulaʻi atu i le ola e faavavau i le Parataiso, ma le faamoemoe ia toe faafoʻisia lou malosi e pei o se talavou, ma saʻilia sini aogā ma aʻoaʻo atili e uiga iā Ieova. O le a faaauau ona e aʻoaʻoina e faatatau i le Atua, ona o loo iloa e tagata, na o “mea aupito mai ia a ona ala,” ua latou aʻoaʻoina. (Iopu 26:14) Maʻeu se faamoemoe pupula!

21, 22. O ā fetufaaʻiga o le a tou talanoaina faatasi ma i latou o le a toe tutū mai?

²¹ I le Parataiso, o le a faailoa mai e i latou  ua toe tutū mai faamatalaga e faatatau i mea ua mavae e tatou te leʻi malamalama lelei i ai. O le a faamatala e Enoka pe na faapefea ona ia lototele e folafola le feʻau a Ieova i tagata amioleaga. (Iuta 14, 15) O le a faamatala foʻi e Noa le taimi na ia fauina ai le vaa. O le a faaalia e Aperaamo ma Sara o la lagona ina ua tuua mea lelei a Uro, ae nonofo i ni faleʻie. Ia manatu a o faamatala mai e Eseta pe na faapefea ona ia laveaʻia lona nuu, ma faalēaogāina le faufauga a Hamanu ina ia fasiotia i latou. (Eseta 7:1-6) Faaāta i lou mafaufau a o faamatala mai e Iona le taimi na iai o ia i le manava o le iʻa i aso e tolu, ma, pe a o faamatala mai foʻi e Ioane le Papatiso ona lagona ina ua ia papatisoina Iesu. (Luka 3:21, 22; 7:28) E anoanoaʻi mea ofoofogia o le a aʻoaʻoina.

²² A o faagasolo le Pulega a Keriso i le Afe o Tausaga, e ono faaeaina oe e fesoasoani iā i latou ua toe tutū mai ina ia maua le “poto i le Atua.” (Faataoto 2:1-6) I aso nei, o se fiafiaga le vaai atu ua ave i fale e tagata le poto o Ieova ma ola e talafeagai ai! Ae manatu i lou olioli i le lumanaʻi, pe a faamanuia Ieova i au taumafaiga ina ia aʻoaʻo tagata mai vaitaimi ua mavae, ma latou tali mai ma le loto talisapaia!

23. O le ā e ao ona tatou maumauaʻi e fai?

²³ Ona o lo tatou tulaga lē lelei atoatoa, e lē mafai ai ona tatou talaina uma atu le tele o aogā ua tatou maua ona o le avea ma ni tagata o Ieova. (Salamo 40:5) E sili ona tatou loto faafetai ona o sauniuniga faaleagaga a le Atua. (Isaia 48:17, 18) Po o le ā lava lo tatou tulaga, seʻi o tatou tuuina atu le auaunaga paia ma le lotoatoa, a o tatou faatalitali atu i le aso tele o Ieova.

E Faapefea Ona E Tali?

• O le ā le “aso o Ieova”?

• E faapefea ona faamaonia ua e nofosauni mo le aso o Ieova?

• O ā suiga e manaʻomia ona tatou faia, a o matuā lata tele mai le aso tele o le Atua?

• O le ā o loo e tulimataʻi e fai pe a māeʻa le aso o Ieova?

[Fesili mo le Suʻesuʻega]

[Ata i le itulau 12]

Na nofosauni Iesu mo tofotofoga

[Ata i le itulau 15]

O se faaeaga le fesoasoani i ē toe tutū mai ia maua le poto o Ieova!