Ia Ua‘i Atu i Lou “Tomai e A‘oa‘o Atu”
Ia Uaʻi Atu i Lou “Tomai e Aʻoaʻo Atu”
“Ia talaʻi atu le upu, . . . ia aʻoaʻi atu, ia matuā faatonu atu, ia apoapoaʻi atu ma le faapalepale ma le tomai e aʻoaʻo atu.”—2 TIMO. 4:2.
1. O le ā na faatonuina e Iesu ona soo e fai, ma o le ā le faaaʻoaʻoga na ia faataatia?
E UI ina ofoofogia faamālōlōga sa faia e Iesu i le lalolagi, ae sa sili ona iloa o ia o se faiaʻoga, nai lo o sē e faia faamālōlōga po o sē e fai vavega. (Mare. 12:19; 13:1) O le galuega sili ona tāua a Iesu, o le folafolaina lea o le tala lelei o le Malo o le Atua, ma e faapena foʻi i ona soo i aso nei. Ua faatonuina Kerisiano ina ia faia pea le galuega o le fai ma soo e ala i le aʻoaʻoina o tagata, ina ia tausi i mea uma ua poloaʻi mai ai Iesu.—Mata. 28:19, 20.
2. O le ā e manaʻomia ona fai ina ia faataunuu ai la tatou tofiga o le talaʻi atu?
2 Ina ia faataunuuina le poloaʻiga o le fai ma soo, e tatou te taumafai pea e faaleleia lo tatou tomai o le aʻoaʻo atu. Na faamamafa e Paulo le tāua o lenei tomai ina ua ia tusi atu i lana aumea talaʻi o Timoteo. Na ia faapea atu: “Ia uaʻi totoʻa iā te oe lava ma lau aʻoaʻo atu. Ia e tumau ai i nei mea, auā o le faia faapea e te faaolaina ai oe lava atoa ma i latou o faalogo iā te oe.” (1 Timo. 4:16) O le ituaiga o aʻoaʻo atu o loo mafaufau i ai Paulo, e lē na o le faailoa atu o le poto. O auauna Kerisiano tomai, e latou te pāʻia loto o tagata ma uunaʻia i latou e faia ni suiga i o latou olaga. E manaʻomia le atamai e faia ai faapea. E faapefea la ona tatou atiaʻe le “tomai e aʻoaʻo atu” pe a folafola atu le tala lelei o le Malo o le Atua?—2 Timo. 4:2.
Faateleina le “Tomai e Aʻoaʻo Atu”
3, 4. (a) E mafai faapefea ona faaleleia le “tomai e aʻoaʻo atu”? (e) E faapefea ona aogā le Aʻoga o le Faiva Faatiokarate iā i tatou ia avea ma faiaʻoga tomai?
3 Ua faamatalaina e se tasi lomifefiloi le “tomai,” o le “atamai lea e maua mai e ala i suʻesuʻega, faataʻitaʻi po o le mātauina foʻi o mea.” E manaʻomia ona tatou uaʻi atu i nei vala e tolu ina ia avea ai i tatou o ni faiaʻoga agavaa o le tala lelei. E pau le auala tatou te maua ai se malamalamaga saʻo o le mataupu, o le suʻesuʻe lea faatasi ma le tatalo. (Faitau le Salamo 119:27, 34.) O le mātau lelei o tagata talaʻi ua iai le poto masani a o latou aʻoaʻo atu, e aogā lea iā i tatou e faaaʻoaʻo i a latou auala ma faataʻitaʻi i ai. O le toʻaga pea e faatatau mea ua tatou aʻoaʻoina, e fesoasoani iā i tatou e faaleleia ai o tatou tomai.—Luka 6:40; 1 Timo. 4:13-15.
4 O Ieova o lo tatou Aʻoaʻo Silisili. E ala i lana faalapotopotoga vaaia, ua ia saunia ai faatonuga mo ana auauna i le lalolagi i le auala e ao ona faataunuu ai la latou talaʻiga. (Isa. 30:20, 21) E tusa ai ma lenei tulaga, ua faia ai e faapotopotoga uma i vaiaso taʻitasi le Aʻoga o le Faiva Faatiokarate, lea ua fuafua e fesoasoani iā i latou uma ua auai, ina ia avea ma ē tomai e folafola le Malo o le Atua. O le tusi aʻoga autū o lenei aʻoga, o le Tusi Paia. Ua taʻu mai e le Afioga a Ieova le mea e aʻoaʻo atu. E lē gata i lea, ua faailoa mai foʻi auala e aogā ma talafeagai e aʻoaʻo atu ai. Ua faamanatu mai pea e le Aʻoga o le Faiva Faatiokarate iā i tatou, e mafai ona avea atili i tatou o ni faiaʻoga tomai pe afai e faavae la tatou aʻoaʻo atu i le Afioga a le Atua, ia lelei ona faaaogā fesili, ia aʻoaʻo atu i se auala faigofie ma ia naunau moni i isi. Seʻi o tatou iloiloina nei manatu taʻitasi. Ona tatou talanoa lea i le auala e pāʻia ai le loto o le tagata aʻoga.
Ia Faavae Lau Aʻoaʻo Atu i le Afioga a le Atua
5. O le ā e ao ona fai ma faavae o la tatou aʻoaʻo atu, ma aiseā?
5 Na faavae aʻoaʻoga a Iesu, o le faiaʻoga silisili o tagata uma, i le Tusi Paia. (Mata. 21:13; Ioa. 6:45; 8:17) E leʻi fetalai o ia i ona lava manatu, ae o manatu o Lē na auina mai o ia. (Ioa. 7:16-18) O le faaaʻoaʻoga lenā o loo tatou mulimuli ai. O lea la, po o le ā lava tatou te fai atu ai i le talaʻiga i le fale le fale po o suʻesuʻega faale-Tusi Paia, e ao ona faavae i le Afioga a le Atua. (2 Timo. 3:16, 17) E lē taitai ona tutusa a tatou faamatalaga atamamai i le aogā ma le mana o le Tusi Paia. E faigofie ona talitonu le tagata pe a faitau i le Tusi Paia. Po o le ā lava se manatu o tatou taumafai e fesoasoani atu i se tagata aʻoga ia malamalama i ai, o le auala sili o le tuu atu iā te ia e faitau mai i le Tusi Paia e faatatau i se manatu.—Faitau le Eperu 4:12.
6. E faapefea ona mautinoa e le faiaʻoga ua malamalama moni le tagata aʻoga i le manatu o loo talanoaina?
6 E lē uiga ai faapea, ua lē manaʻomia ai e se faiaʻoga Kerisiano ona sauniuni mo se suʻesuʻega faale-Tusi Paia. Peitaʻi, e manaʻomia se iloiloga ma le faaeteete po o ā mau faasino e filifili e faitau mai i le Tusi Paia e le faiaʻoga po o le tagata aʻoga, a o faia le suʻesuʻega. E masani lava, o se mea lelei le faitau na o mau o loo lagolagoina ai lo tatou talitonuga. E tāua foʻi le fesoasoani i le tagata aʻoga ina ia malamalama i mau o loo ia faitauina.—1 Kori. 14:8, 9.
Ia Lelei Ona Faaaogā Fesili
7. Aiseā ua avea ai le faaaogāina o fesili o se auala lelei e aʻoaʻo atu ai?
7 O le lelei ona faaaogā o fesili, e faatupu manatu ma e fesoasoani i le faiaʻoga ia pāʻia le loto o le tagata aʻoga. O lea, nai lo le faamatala atu i lau tagata aʻoga o mau, ia fai atu iā te ia e faamatala mai iā te oe. O nisi taimi, atonu e manaʻomia ai se fesili faaopoopo po o nisi fesili ina ia fesoasoani i lau tagata aʻoga ia malamalama ai. Pe afai e te faaaogāina fesili e aʻoaʻo ai lau tagata aʻoga, o lona uiga ua e fesoasoani iā te ia e malamalama i le māfuaaga ua aumaia ai se manatu, ma ia talia ai lea talitonuga.—Mata. 17:24-26; Luka 10:36, 37.
8. E mafai faapefea ona tatou iloa mea o i le loto o le tagata aʻoga?
8 O le auala e faia ai suʻesuʻega i a tatou lomiga, e faafesili ma tali. E lē taumatea, o le tele o tagata o loo tou suʻesuʻe i le Tusi Paia, o le a vave ona tali i fesili ua lomia, e faaaogā ai faamatalaga o i palakalafa. Ae o le faiaʻoga faautauta e lē manaʻo i le na o le mauaina o le tali saʻo. O se faaaʻoaʻoga, atonu e saʻo ona faamatalaina e le tagata aʻoga le mea ua fai mai ai le Tusi Paia e uiga i le faitaaga. (1 Kori. 6:18) Ae peitaʻi, o le faia o fesili faatupu manatu, e faaalia ai po o talitonu moni le tagata aʻoga i mea o loo ia aʻoaʻoina. E ono fesili atu le faiaʻoga: “Aiseā ua taʻusalaina ai e le Tusi Paia feusuaʻiga lē mamā i fafo atu o le faaipoipoga? O le ā sou manatu e faatatau i lenei faasāsāaga ua aumaia e le Atua? Pe e te manatu e iai ni aogā i le ola e tusa ai ma tapulaa tau amio a le Atua?” O tali i na fesili e mafai ona faaalia ai le mea o i le loto o le tagata aʻoga.—Faitau le Mataio 16:13-17.
Ia Faafaigofie
9. O le ā e ao ona tatou manatua pe a faamalamalama ni faamatalaga o i le Tusi Paia?
9 O le tele o upu moni o i le Afioga a le Atua, e faigofie. Ae atonu ua avea aʻoaʻoga a lotu sesē ma mea ua fenuminumiaʻi ai tagata o loo tatou suʻesuʻe faatasi i le Tusi Paia. O la tatou matafaioi la o ni faiaʻoga, o le faafaigofie lea o aʻoaʻoga a le Tusi Paia ina ia malamalama ai. O faiaʻoga tomai, latou te faamatalaina mea i se auala faigofie, manino ma saʻo lelei. Pe a tatou mulimuli i lenei taʻiala, o le a tatou lē faia ai le upu moni ma mea e faigatā ona malamalama i ai. Ia ʻalofia le faamatalaina o mea e lē manaʻomia. E lē manaʻomia fua ona faamatalaina vala uma o se mau o loo tatou faitauina. Ia uaʻi atu i le mea tāua o loo faamalamalama ai le manatu o loo talanoaina. O le a oo ina malamalama le tagata aʻoga i upu moni loloto o le Tusi Paia, a o agaʻigaʻi i luma lona malamalama.—Epe. 5:13, 14.
10. O ā vala e fua i ai le telē o le mataupu o le a talanoaina i le suʻesuʻega?
10 O le ā le telē o le mataupu e ao ona tatou talanoaina i se suʻesuʻega? E manaʻomia le faautauta i lenei tulaga. E eseese tomai ma tulaga o le tagata aʻoga ma le faiaʻoga, peitaʻi e ao ona manatua o lo tatou sini o ni faiaʻoga, o le fesoasoani lea i tagata aʻoga ina ia mausalī le faatuatua. Ia lava le taimi e tuu iā te ia e faitau ai, ina ia malamalama ma talia upu moni o loo aʻoaʻo mai i le Afioga a le Atua. Aua neʻi tele naʻuā ni faamatalaga neʻi lē malamalama ai o ia. Ae i le taimi e tasi, ia agaʻigaʻi pea i luma le suʻesuʻega. Pe a malamalama le tagata aʻoga i le manatu tāua, ona see loa lea i le isi manatu.—Kolo. 2:6, 7
11. O le ā se lesona tau i le aʻoaʻo atu ua tatou aʻoaʻoina mai iā Paulo?
11 Sa taʻu atu e Paulo le feʻau o le tala lelei i se auala faigofie, pe a talanoa i ē fou. E ui sa lelei ana aʻoaʻoga, ae na ia ʻalofia le faaaogāina o se gagana faigatā. (Faitau le 1 Korinito 2:1, 2.) O le faigofie o upu moni o le Tusi Paia, e tosina ma faamalieina ai tagata loto faamaoni. E lē tau manaʻomia ona maualuluga ni aʻoaʻoga a se tasi ina ia malamalama ai.—Mata. 11:25; Galu. 4:13; 1 Kori. 1:26, 27.
Fesoasoani i Tagata Aʻoga e Talisapaia Mea ua Aʻoaʻoina
12, 13. O le ā e ono uunaʻia ai se tagata aʻoga e gaoioi e tusa ma mea ua ia aʻoaʻoina? Ia faataʻitaʻi.
12 Ina ia aogā la tatou aʻoaʻo atu, e manaʻomia ona pāʻia le loto o le tagata aʻoga. E ao ona malamalama le tagata aʻoga i le auala e faatatauina ai faamatalaga iā te ia lava, le auala e aogā ai iā te ia, ma le auala e faaleleia ai lona olaga pe a mulimuli i taʻitaʻiga a le Tusi Paia.—Isa. 48:17, 18.
13 O se faaaʻoaʻoga, atonu tatou te talanoaina le Eperu 10:24, 25, lea e faalaeiau ai Kerisiano ina ia faapotopoto faatasi ma uso talitonu mo faalaeiauga faale-Tusi Paia ma aufaatasiga alofa. Pe afai e leʻi auai le tagata aʻoga i sauniga a le faapotopotoga, ia faamatala puupuu i ai le auala e faia ai, ma mea o loo talanoaina ai. E tatou te ono taʻu i ai o sauniga a le faapotopotoga o se vaega o la tatou tapuaʻiga, ma e aogā iā i tatou taʻitoʻatasi. Ona valaaulia loa lea o le tagata aʻoga e auai i sauniga. O lona faatatauina o faatonuga a le Tusi Paia, e ao ona uunaʻia ona o lona faanaunauga e usiusitai iā Ieova, ae lē o le faafiafiaina o le tagata o loo la suʻesuʻe.—Kala. 6:4, 5.
14, 15. (a) O le ā e aʻoaʻoina e se tagata aʻoga o le Tusi Paia e faatatau iā Ieova? (e) E aogā faapefea i se tagata aʻoga o le Tusi Paia le iloaina o uiga o Ieova?
14 O le aogā autū e maua e tagata aʻoga mai i le suʻesuʻeina o le Tusi Paia ma faatatauina o ona taʻiala, o lo latou iloa lea ma alolofa iā Ieova. (Isa. 42:8) E lē gata o ia o le Tamā alofa, o Lē na faia mea uma, ma o Lē e pule i le aoao o mea, ae ua ia faailoa mai foʻi ona uiga ma lona tomai iā i latou e alolofa ma auauna iā te ia. (Faitau le Esoto 34:6, 7.) Ina o le a taʻitaʻia ese e Mose le nuu o Isaraelu mai i le faaaunuua i Aikupito, na faailoa atu e Ieova o ia lava e ala i le faaaogāina o le faaupuga lenei: “E avea aʻu ma lē ou te loto i ai.” (Eso. 3:13-15, NW) O lona uiga, ina ia faataunuu lona finagalo i ona tagata ua filifilia, e mafai ona avea Ieova ma so o se tulaga e talafeagai ma ia. O le iʻuga, na iloa e tagata Isaraelu Ieova o Sē faasaoina i latou, o le Toa, o Lē tausia i latou, o Lē faataunuuina folafolaga, ma o Lē fesoasoani atu i isi auala.—Eso. 15:2, 3; 16:2-5; Iosua 23:14.
15 Atonu e leʻi tutupu i olaga o a tatou tagata aʻoga ni fesoasoani faavavega mai iā Ieova e pei o lea na oo iā Mose. Ae peitaʻi, a o tuputupu aʻe le faatuatua o a tatou tagata aʻoga, ma talisapaia mea ua aʻoaʻoina ma amata ona latou faatatauina, e lē taumatea o le a latou iloa le manaʻomia o le faalagolago iā Ieova mo le lototele, le poto ma le taʻitaʻiga. A o latou faia faapea, o le a latou iloa ai foʻi Ieova i lana matafaioi o se Faufautua poto ma maufaatuatuaina, o se Leoleo ma o Sē na te tausia ma le agalelei o latou manaʻoga uma.—Sala. 55:22; 63:7; Faata. 3:5, 6.
Ia Faaalia le Naunau
16. Aiseā e lē avea ai le tomai e aʻoaʻo atu ma vala e sili ona tāua i le faia o i tatou ma ni faiaʻoga lelei?
16 Aua e te lotovaivai pe afai ua e manatu e te lē o agavaa i le aʻoaʻo atu e pei o le mea o e manaʻo ai. O loo vaavaaia e Ieova ma Iesu le galuega tau aʻoaʻo atu o loo faia i le lalolagi aoao i aso nei. (Galu. 1:7, 8; Faaa. 14:6) E mafai ona la lagolagoina a tatou taumafaiga ina ia avea a tatou upu o ni aafiaga lelei i se tagata loto faamaoni. (Ioa. 6:44) O lea, e ui e lē tele se tomai o se faiaʻoga, ae e telē le aogā o lona naunau alofa i lana tagata aʻoga. Na faaalia e Paulo lona malamalama lelei, e tāua tele le alofa iā i latou o loo aʻoaʻoina.—Faitau le 1 Tesalonia 2:7, 8.
17. E faapefea ona tatou faaalia le naunau moni i tagata aʻoga?
17 I se tulaga talitutusa, e mafai ona tatou faaalia le naunau moni i tagata aʻoga taʻitoʻatasi e ala i le iloa lelei o ia. A o tatou talanoa ma ia i taʻiala o le Tusi Paia, o le a tatou iloa ai lona tulaga. E tatou te ono mātauina ai ua ola o ia e talafeagai ma nisi o manatu na ia aʻoaʻoina mai i le Tusi Paia. Ae e manaʻomia pea ona ia faia ni fetuunaʻiga i nisi vala. O le fesoasoani i le tagata aʻoga e iloa le auala e na te faatatauina ai mea ua aʻoaʻoina mai i le suʻesuʻeina o le Tusi Paia, ua mafai ona tatou fesoasoani ma le alofa iā te ia e avea o se soo moni o Keriso.
18. Aiseā e tāua ai ona tatou tatalo faatasi ma tagata aʻoga, ma tatalo foʻi mo i latou?
18 O le mea e sili ona tāua, e mafai ona tatou tatalo faatasi ma o tatou tagata aʻoga, ma tatalo foʻi mo i latou. E ao ona manino o ia, e tatou te mananaʻo e fesoasoani iā te ia ina ia matuā iloa Lē na faia o ia, faalatalata atu iā te Ia, ma maua aogā mai i Lana taʻitaʻiga. (Faitau le Salamo 25:4, 5.) Pe a tatou tatalo mo le fesoasoani a Ieova i taumafaiga a le tagata aʻoga e faaaogā mea ua ia aʻoaʻoina, o le a fesoasoani lea i le tagata aʻoga e iloa ai le tāua o le avea ma ‘sē usiusitai i le upu.’ (Iako. 1:22) Pe a faalogologo le tagata aʻoga i a tatou tatalo faamaoni, e na te aʻoaʻoina foʻi le auala e tatalo ai. Maʻeu le olioli o le fesoasoani i tagata aʻoga e atiaʻe la latou mafutaga ma Ieova!
19. O le ā o le a iloiloina i le suʻesuʻega o loo sosoo mai?
19 E matuā faalaeiauina le iloa, e sili atu i le ono ma le ʻafa miliona Molimau i le lalolagi aoao o loo pisi i le atiina aʻe o le “tomai e aʻoaʻo atu.” O lo latou sini o le fesoasoani i tagata loto faamaoni e mātauina mea uma ua faatonuina mai e Iesu. O ā ni iʻuga ua maua e ala i la tatou galuega talaʻi? O le a iloiloina le tali o lenei fesili i le suʻesuʻega o loo sosoo mai.
Pe E te Manatua?
• Aiseā e manaʻomia ai ona atiaʻe e Kerisiano le “tomai e aʻoaʻo atu”?
• O le faaaogāina o ā auala e mafai ai ona lelei la tatou aʻoaʻo atu?
• E ui ina lē tele sou tomai e aʻoaʻo atu, ae o le ā se vala o le a telē sona aogā?
[Fesili mo le Suʻesuʻega]
[Ata i le itulau 9]
Po ua e auai i le Aʻoga o le Faiva Faatiokarate?
[Ata i le itulau 10]
Aiseā e tāua ai le valaaulia o lau tagata aʻoga e faitau mai i le Tusi Paia?
[Ata i le itulau 12]
Ia tatalo faatasi ma lau tagata aʻoga, ma tatalo foʻi mo ia