Pe a Lūlūina Kerisiano e Pei o Saito

A O LEʻI maliu Iesu, na ia lapataʻia ona soo e faapea: “Vaai! ua manaʻo Satani e lūlū iā te outou e pei o saito.” (Luka 22:31) O le ā sa ia uiga i ai?

I aso o Iesu, sa tele le taimi ma taumafaiga e fai pe a seleseleina le saito. Muamua, e ao mai e le ʻauselesaito ia lālā saito mai i le fanua. E latou te sasaina lālā i se mea malō pe faaaogā ni manu e tosoina le mea e soli ai saito i luga o lālā, ina ia gaui ai ma faaninii. O le faiga lenei e tuueseese ai le saito mai i lālā saito. Ona togi lea e le ʻaufaifaatoʻaga o nei mea uma i le ea. E toʻulu ifo aano po o fatu saito i le mea e soli ai saito, ae lelea ese le aputi o saito i le savili. A māeʻa loa, ona lūlū lea ma le faaeteete o fatu saito ina ia aveese mai ai mea e lē aogā.

E moni upu a Iesu, auā na osofaʻia e Satani soo o Iesu i lenā taimi, ma ua ia osofaʻia foʻi i tatou i aso nei. (Efe. 6:11) E moni e lē o faigatā uma e tatou te fesagaʻia i le olaga e pogai mai iā Satani. (Fai. 9:11) Peitaʻi, ua naunau pea Satani e faaaogā so o se auala ua ia maua e gausia ai lo tatou faamaoni. O se faaaʻoaʻoga, e na te ono faaosoosoina i tatou e mulimuli atu i se olaga matapeʻapeʻa i meafaitino, pe ia filifilia ni faafiafiaga e lē lelei, pe auai foʻi i amioga lē mamā faaleituaiga. E na te ono faaaogāina foʻi uō i le aʻoga, o galuega, ma tauaiga e lē talitonu, e faaosoosoina ai i tatou e saʻili mea uma ua ofo mai e lenei lalolagi i aʻoga ma galuega. I le ma lea, e na te faaaogā foʻi sauāga tuusaʻo e taumafai ai e gausia lo tatou faamaoni i le Atua. Ioe, e tele isi auala e faaaogā e Satani e lūlūina ai i tatou i se tulaga faafaatusa.

E mafai faapefea ona tatou tetee atu i lenei fili malosi? E lē mafai ona tatou tetee atu i so tatou lava malosi. E sili atu le malosi o Satani nai lo o tatou; peitaʻi, ua tatou iloa e sili atu le malosi e lē mafaatusalia o Ieova nai lo o Satani. Pe afai e tatou te matuā talitonu iā Ieova, tatalo ma le faamaoni mo le poto ma le lototele e tumau ai, ma faalagolago atoatoa i lana taʻitaʻiga, o le a ia faamalosia i tatou e tetee atu i osofaʻiga a Satani.—Sala. 25:4, 5.

Pe a fesagaʻia tofotofoga, e manaʻomia ona iā i tatou le tomai e ‘iloa ai le mea saʻo ma le mea sesē’ ma ʻalofia ai le taʻitaʻisesēina i togafiti a Satani. (Epe. 5:13, 14) E fesoasoani Ieova iā i tatou ina ia maua lenā malosi. E ao la ona tatou piiama atu i le ala saʻo, e tusa lava po o ā mea e tulaʻi mai. Pe a tatou mulimuli i le taʻitaʻiga a Ieova, e mautinoa foʻi e na te lagolagoina lo tatou maumauaʻi ma le lototele e faia le mea ua tonu.—Efe. 6:10.

E taumafai Satani e lūlūina i tatou e pei o saito. Ae o le malosi mai iā Ieova, e tatou te tutumau e tetee atu ai iā te ia ma mausalī ai i le faatuatua. (1 Pete. 5:9) Ioe, ua faamautinoa mai e le Afioga a Ieova iā i tatou: “Ia tetee atu i le Tiapolo, ona sola ese ai lea o ia mai iā te outou.”—Iako. 4:7.