Taʻuaogāina e Taʻitaʻia i Vaipuna o le Vai o le Ola

“E leoleoina i latou e le Tamaʻi Mamoe . . . ma e na te taʻitaʻia i latou i vaipuna o le vai o le ola.”—FAAA. 7:17.

1. O le ā le taʻu a le Afioga a le Atua o Kerisiano faauuina, ma o le ā le tiute na tuuina mai e Iesu iā i latou?

UA TAʻU e le Afioga a le Atua Kerisiano faauuina, po o ē e vaaia mea uma a Keriso i le lalolagi, o “le pologa faamaoni ma le faautauta.” Ina ua asiasi e Keriso le “pologa” i le 1918, na ia maua mai ai na Kerisiano faauuina i le lalolagi, o loo latou saunia ma le faamaoni meaʻai faaleagaga “i le taimi tatau.” O le mea lea, na fiafia tele Iesu le Matai, e tofia i latou “e vaavaaia ana mea uma.” (Faitau le Mataio 24:45-47.) O le auala lenei ua auauna ai ē faauuina i isi tagata tapuaʻi o Ieova i le lalolagi, a o leʻi maua lo latou tofi i le lagi.

2. Ia faamatala mai po o ā mea a Iesu.

² E pule le matai i ana mea, po o meatotino, ma e na te filifili pe faapefea ona faaaogā na mea. O mea a Iesu Keriso, o le Tupu tofia lea a Ieova, e aofia ai vala uma o le Malo i luga o le lalolagi. E aofia ai “se motu o tagata e toʻatele” na vaaia e le aposetolo o Ioane i le faaaliga. Ua faamatalaina faapenei e Ioane le motu o tagata e toʻatele: “Vaai! o se motu o tagata e toʻatele e lē mafai e se tasi ona faitaulia mai i atunuu uma, ma ituaiga, ma nuu, ma gagana, o loo tutū i luma o le nofoālii ma i luma o le Tamaʻi Mamoe, o loo oofu i ofu talaloa papaʻe; o loo iai foʻi laupama i o latou lima.”—Faaa. 7:9.

3, 4. O ā ni faaeaga mataʻina ua maua e le motu o tagata e toʻatele?

 ³ E pei ona fetalai Iesu, o loo iai foʻi “isi mamoe” i sui o lenā motu o tagata e toʻatele. (Ioa. 10:16) Latou te faamoemoe e ola e faavavau i le parataiso i le lalolagi. Latou te mautinoa o Iesu e “taʻitaʻia i latou i vaipuna o le vai o le ola,” ma e “soloiesea foʻi e le Atua o loimata uma mai o latou mata.” Ona o lea, ua “tatā o latou ofu talaloa, ma faapaʻepaʻeina i le toto o le Tamaʻi Mamoe.” (Faaa. 7:14, 17) Latou te faatuatua i le taulaga a Iesu, o le pogai lea ua ‘papaʻe ai o latou ofu talaloa’ i le silafaga a le Atua. Ua taʻuamiotonuina i latou e fai ma uō a le Atua, e pei lava o Aperaamo.

⁴ E lē gata i lea, i le silafaga a le Atua, e amiotonu le motu o tagata e toʻatele o isi mamoe. E mafai foʻi ona latou faamoemoe e sao mai le puapuaga tele, i le faaumatiaga o le faiga o mea a lenei lalolagi. (Iako. 2:23-26) E mafai ona latou mafuta vavalalata atu iā Ieova, ma e latou te maua foʻi le faamoemoe matagofie e faasaoina faatasi i latou iā Amaketo. (Iako. 4:8; Faaa. 7:15) Latou te lē fia tutoʻatasi, ae latou te naunau e auauna ma gauaʻi i faatonuga a le Tupu i le lagi, faapea ona uso faauuina i le lalolagi.

5. E faapefea ona lagolagosua le motu o tagata e toʻatele i uso faauuina o Keriso?

⁵ Ua fetaiaʻi Kerisiano faauuina ma teteega ogaoga mai le lalolagi a Satani, ma e faaauau pea na teteega. Ae e mafai ona latou faalagolago i le lagolagosua a a latou aumea, o le motu o tagata e toʻatele. E ui lava ua toʻaitiiti le aofaʻi o Kerisiano faauuina, ae ua faatoʻateleina pea le motu o tagata e toʻatele, e faitau selau afe e faaopoopo i tausaga taʻitasi. Ua lē mafai e uso faauuina ona oo atu e vaavaai faapotopotoga Kerisiano uma, pe tusa e 100,000 i le lalolagi aoao. O se tasi la lea o auala e lagolagosua ai isi mamoe i uso faauuina, o le tofia lea o tane ua agavaa o le motu o tagata e toʻatele, e auauna o ni toeaina i faapotopotoga. Latou te fesoasoani e tausia le faitau miliona o Kerisiano ua tuuina atu i “le pologa faamaoni ma le faautauta,” e vaavaaia.

6. Na faapefea ona valoia mai le lagolagoina o Kerisiano faauuina e a latou aumea, o isi mamoe?

 ⁶ Na valoia e le perofeta o Isaia le lagolagoina atoatoa o Kerisiano faauuina e a latou aumea, o isi mamoe. Na ia tusi: “O loo faapea ona fetalai mai o Ieova, O le ʻoa [po o “tagata galulue fua,” NW] o Aikupito, ma mea faatau a Aitiope atoa ma Sepa, o tagata tino eese, latou te ō ane iā te oe, e fai foʻi i latou mou tagata; latou te mulimuli atu iā te oe.” (Isa. 45:14) I se auala faafaatusa, ua mulimuli atu Kerisiano e faamoemoe e ola i le lalolagi, i le taʻitaʻiga a le vasega faauuina ma lona Vaega Pule. Ona o i latou o “tagata galulue fua,” ua matuā lotomalilie ai isi mamoe e faaaogā lo latou malosi ma meafaitino, e lagolago ai le galuega talaʻi i le lalolagi aoao, lea na tofia mai e Keriso i ona soo faauuina i le lalolagi.—Galu. 1:8; Faaa. 12:17.

7. O le ā le mea ua aʻoaʻoina ai nei le motu o tagata e toʻatele?

⁷ A o latou lagolagoina o latou uso faauuina, ua aʻoaʻoina ai le motu o tagata e toʻatele, e fai ma ē e amataina le olaga fou pe a mavae Amaketo. E tatau ona malosi ma mausalī lenā amataga fou, ma o tagata o le a ola ai, e nofosauni e faatino faatonuga a le Matai, ma e iai foʻi o latou tomai e faatino ai. Ua tuuina mai i Kerisiano taʻitoʻatasi le avanoa e faaalia ai, e mafai ona faaaogā o ia e le Tupu o Keriso Iesu. E ala i lona faatuatua ma lona faamaoni i le taimi nei, ua ia faaalia ai o le a ia talileleia faatonuga e tauaao mai e le Tupu i le lalolagi fou.

Ua Faaalia e le Motu o Tagata lo Latou Faatuatua

8, 9. E faapefea ona faaalia e le motu o tagata e toʻatele lo latou faatuatua?

⁸ E eseese auala ua faaalia ai le faatuatua o isi mamoe, o aumea o le faapotopotoga o Kerisiano faauuina. Muamua lava, latou te lagolagosua i le ʻaufaauuina i le folafolaina o le tala lelei o le Malo o le Atua. (Mata. 24:14; 28:19, 20) Lona lua, latou te gauaʻi i faatonuga ua saunia mai e le Vaega Pule.—Epe. 13:17; faitau le Sakaria 8:23.

⁹ Lona tolu, ua lagolagosua sui o le motu o tagata e toʻatele i o latou uso faauuina, e ala i le usiusitaʻi i taʻiala amiotonu a Ieova. Latou te taumafai e atiaʻe le “alofa, olioli, filemu, faapalepale, agalelei, mataalofa, faatuatua, agamalu, ma le amio pulea.” (Kala. 5:22, 23) Ua faalēnaunau le toʻatele o tagata i aso nei i na uiga lelei, a ua mātele i “galuega a le tino.” Ae e taumafai pea sui o le motu o tagata e toʻatele e faamamao mai le “faitaaga, amio lē mamā, amio matagā, ifo i tupua, faiga faataulāitu, feitagaʻi, femisaʻi, lotoleaga, lotoa, finauvale, fevaevaeaʻiga, lotu ua vavae ese, matauʻa, onāga, patī lē taupulea, ma mea faapena.”—Kala. 5:19-21.

10. O le ā ua tinoū ai sui o le motu o tagata e toʻatele?

¹⁰ Ona o i tatou o tagata lē lelei atoatoa, o se luʻitau mo i tatou le faaalia o fua o agaga, ma faamamao mai i galuega a le tino, ma teena omiga mai le lalolagi a Satani. E ui i lea, tatou te tinoū ina ia lē vaivai lo tatou faatuatua po o lo tatou alofa mo Ieova ona o o tatou lava vaivaiga, po o le lē taulau o a tatou taumafaiga, po o le lē atoatoa foʻi o lo tatou malosi. Tatou te iloa e faia lava e Ieova e pei ona ia folafola mai, e na te faasaoina le motu o tagata e toʻatele mai le puapuaga tele.

11. O ā ni togafiti ua faaaogā e Satani a o taumafai e faavaivai le faatuatua o Kerisiano?

¹¹ Tatou te mataala pea auā ua tatou iloa o lo tatou fili moni o le Tiapolo lea, e lē fiugofie o ia. (Faitau le 1 Peteru 5:8.) Ua taumafai o ia e faaaogā tagata ua fulitua i le upu moni ma isi foʻi tagata, e faatalitonu i tatou e pepelo aʻoaʻoga o loo tatou mulimuli i ai. Ae e masani lava ona lē taulau lenā togafiti. E ui lava na tau faifailemū le galuega talaʻi i nisi taimi ona o sauāga, a o le mea e masani ona tupu, e faamalosia ai le faatuatua o ē ua sauāina. E tele ina faaaogā e Satani se togafiti e manatu e atili faavaivaia ai lo tatou faatuatua. E fiafia  tele Satani e taalo i o tatou faalogona o le lotovaivai. Na lapataʻia Kerisiano o le uluaʻi senituri i lenei lamatiaga ina ua taʻu atu iā i latou: “Ia manatunatu lelei [iā Keriso o] lē na tumau e ui i upu faifai a tagata agasala ia na taʻusalaina ai i latou.” Aiseā? “Ina neʻi outou lē lavavā ma faavaivai ai.”—Epe. 12:3.

12. E faapefea i fautuaga a le Tusi Paia ona faamalosia ai se tasi ua lotovaivai?

¹² Pe na iai ea se taimi na e tau faavaivai ai i le auaunaga? Pe na iai ea se taimi na e manatu ai ua lē taulau au taumafaiga? Afai o lea, aua le tuuina se avanoa iā Satani e faaaogā ai na manatu faalotovaivai, e faalavelavea ai oe i le auaunaga iā Ieova. O le suʻesuʻe loloto i le Tusi Paia, tatalo faatauanau, auai e lē aunoa i sauniga, ma le auaufaatasi ma Kerisiano moni, e faamalosia ai oe ma e te lē “faavaivai ai.” Ua folafola mai Ieova e na te fesoasoani i ē e auauna iā te ia ina ia faafouina lo latou malosi, ma e maufaatuatuaina lana folafolaga. (Faitau le Isaia 40:30, 31.) Ia taulaʻi lau vaai i le galuega o le Malo. Ia ʻalofia le alu uma o le taimi i mea e faalavelave mai, ae ia taulaʻi atu i le fesoasoani i isi. Ona faamalosia lea o oe e te tumau, e ui i le lotovaivai.—Kala. 6:1, 2.

Sao Mai le Puapuaga e Oo i le Lalolagi Fou

13. O le ā le galuega o le a faia e i latou e sao mai iā Amaketo?

¹³ Pe a mavae Amaketo, e matuā toʻatele lava tagata amiolētonu e toetutū mai, e tatau ona aʻoaʻoina i ala o Ieova. (Galu. 24:15) E tatau ona latou malamalama e tusa o le taulaga a Iesu; ma e tatau foʻi ona aʻoaʻoina i latou ina ia faatuatua i lenā taulaga, ina ia maua mai ai aogā. E tatau ona lafoaʻia o latou talitonuga sesē faalotu na iai muamua, ma fulitua i o latou olaga tuai. E tatau ona aʻoaʻo i latou ia oofu i le tagata fou lea e mātaulia ai Kerisiano moni. (Efe. 4:22-24; Kolo. 3:9, 10) E matuā tele lava galuega e fai e le motu o tagata e toʻatele o le a faasaoina atu i lenā taimi. Maʻeu le olioli o le a iai, a o faia galuega faapena mo Ieova, e aunoa ma omiga ma faatosinaga a lenei lalolagi amioleaga!

14, 15. Faamatala mai talanoaga o le a faia i le va o ē sao mai le puapuaga tele ma ē amiotonu e toe faatutūina.

¹⁴ O auauna faamaoni a Ieova na maliliu a o leʻi faia le faiva a Iesu i le lalolagi, e tele foʻi mea e latou te aʻoaʻoina i lenā taimi. O le a latou aʻoaʻoina po o ai le Mesia na folafola mai,  o lē na latou faatalitali i ai ae e leʻi vāai i ai. A o latou soifua, na faaalia lo latou naunau e faatonuina i latou e Ieova. Maʻeu le olioli ma se faaeaga e fesoasoani atu iā i latou ia, o se faaaʻoaʻoga, e faamatala atu iā Tanielu le faataunuuga o valoaga na ia tusia, ae e leʻi malamalama i ai!—Tani. 12:8, 9.

¹⁵ E ui lava o le a iloa e tagata e toetutū mai le tele o mea mai iā i tatou, ae e tele foʻi a tatou fesili e fai atu iā i latou. E mafai ona latou faamatala uma mai iā i tatou mea ua taʻua i le Tusi Paia, ae e lē o auʻiliʻili maia. Seʻi manatu i le ofoofogia o le iloa o faamatalaga patino e faatatau iā Iesu mai lona tausoga o Ioane le Papatiso! O mea e tatou te aʻoaʻoina mai i na molimau faamaoni, e mautinoa lava e tuputupu aʻe ai lo tatou talisapaia o le Afioga a le Atua, e sili atu i lo o le taimi nei. O auauna faamaoni a Ieova ua maliliu, e aofia ai nisi o le motu o tagata e toʻatele e feoti i aso o le iʻuga, o le a latou maua “se toetū e sili atu ona lelei.” Na amata la latou auaunaga iā Ieova i le lalolagi na pulea e Satani. Ae maʻeu lo latou olioli e faaauau la latou auaunaga i tulaga sologa lelei o le lalolagi fou!—Epe. 11:35; 1 Ioa. 5:19.

16. E faapefea ona faagasolo le Aso Faamasino e tusa ai ma valoaga?

¹⁶ A o faagasolo le Aso Faamasino, o le a tatalaina tusi tāʻai. O nei tusi tāʻai ma le Tusi Paia, e faavae aʻe ai le faamasinoga o ē ola pe e faamata ua taʻuaogāina i latou e maua le ola e faavavau. (Faitau le Faaaliga 20:12, 13.) I le faaiʻuga o le Aso Faamasino, ua telē le avanoa e maua e tagata taʻitoʻatasi e faaalia ai po o fea le itu e na te lagolagoina o le finauga o le pule silisili ese i le aoao o mea. Pe e na te lagolagoina le Malo o le Atua ma lotomalie e taʻitaʻia o ia e le Tamaʻi Mamoe i “vaipuna o le vai o le ola”? Pe e tetee o ia, e lē manaʻo e gauaʻi atu i le Malo o le Atua? (Faaa. 7:17; Isa. 65:20) E oo ane i lenā taimi, ua maua e tagata uma i le lalolagi le avanoa e fai ai sa latou lava filifiliga, e aunoa ma le aafia i le agasala po o tagata amioleaga. E leai se tasi e mafai ona toe fesiligia le tonu o le faamasinoga faaiʻu a Ieova. E na o ē amioleaga o le a faaumatia e faavavau.—Faaa. 20:14, 15.

17, 18. O le ā le mea o loo faatalitali ma le olioli i ai Kerisiano faauuina ma isi mamoe i le Aso Faamasino?

¹⁷ Ua matuā tulimataʻi e Kerisiano faauuina i aso nei, le taimi e latou te pule ai i le Aso Faamasino, auā ua taʻuaogāina i latou e maua le Malo. Maʻeu se faaeaga ofoofogia mo i latou! O lenā faamoemoe ua uunaʻia ai i latou e mulimuli i le fautuaga a Peteru i o latou uso o le uluaʻi senituri: “Ia outou saga finafinau ai ina ia faamautinoa le valaauina ma le filifilia o outou; auā a faaauau ona outou faia nei mea, e tou te lē paʻuʻū lava. O le mea moni, o le a faataga outou e ulufale atu ma le mamalu i le malo e faavavau o lo tatou Alii ma le Faaola o Iesu Keriso.”—2 Pete. 1:10, 11.

¹⁸ Ua olioli faatasi isi mamoe ma o latou uso faauuina. Latou te maumauaʻi e lagolagosua iā i latou. Ona o i latou o uō a le Atua i aso nei, ua uunaʻia i latou e tuu atoatoa lo latou malosi i le auaunaga i le Atua. A o faagasolo le Aso Faamasino, e faafiafiaina i latou e lagolagosua ma o latou lotoatoa faatulagaga a le Atua, a o taʻitaʻia i latou e Iesu i vaipuna o le vai o le ola. Ona taʻuaogāina lea o i latou e fai ma auauna a Ieova i le lalolagi e oo i le faavavau!—Roma 8:20, 21; Faaa. 21:1-7.

Pe E te Manatua?

• O ā ua aofia ai i mea a Iesu?

• E faapefea ona lagolagosua le motu o tagata e toʻatele i o latou uso faauuina?

• O ā faaeaga o loo olioli ai le motu o tagata e toʻatele, ma o ā mea o faamoemoe i ai?

• O le ā sou manatu i le Aso Faamasino?

[Fesili mo le Suʻesuʻega]

[Ata i le itulau 25]

Ua tatā ofu o le motu o tagata e toʻatele, ma faapaʻepaʻeina i le toto o le Tamaʻi Mamoe

[Ata i le itulau 27]

O le ā se mea e te fia iloa mai i ē faamaoni ua toe faatutūina?