Ua Tali Mai “Ē Ua Saunia o Latou Loto”

“Ua talitonu foʻi i latou uma o ē ua saunia o latou loto mo le ola e faavavau.”—GALU. 13:48.

1, 2. Na faapefea ona tali atu uluaʻi Kerisiano i le valoaga a Iesu ia talaʻi atu le tala lelei i le lalolagi atoa?

UA FAAMAUINA i le tusi o Galuega, se tala fiafia i le auala na tali atu ai uluaʻi Kerisiano i le valoaga a Iesu, ina ia talaʻiina atu le tala lelei o le Malo i le lalolagi atoa. (Mata. 24:14) Na faataatia e tagata talaʻi maelega o le Malo se faataʻitaʻiga mo i latou uma o ē o le a mulimuli mai iā i latou. O le iʻuga o le molimau maelega o soo o Iesu i Ierusalema, e faitau afe tagata e aofia ai ma le ‘toʻatele o faitaulaga,’ na lolofi atu i le faapotopotoga i le uluaʻi senituri.—Galu. 2:41; 4:4; 6:7.

² Na fesoasoani misionare o le uluaʻi senituri i le toʻatele, ina ia taliaina le faa-Kerisiano. O se faaaʻoaʻoga, na alu atu Filipo i Samaria, ma e toʻatele ē na uaʻi atu i ana upu. (Galu. 8:5-8) Sa femalagaaʻi solo Paulo ma ana aumea eseese e talaʻi le feʻau faa-Kerisiano i Kuperu, o vaega o Asia Itiiti, Maketonia, Eleni ma Italia. Na talitonu le toʻatele o tagata Iutaia, atoa ma Eleni mai i aai na ia talaʻi ai. (Galu. 14:1; 16:5; 17:4) Na faia e Tito le galuega i Kereta. (Tito 1:5) Sa pisi Peteru i Papelonia, ma i le taimi na ia tusia ai lana tusi pe tusa o le 62-64 T.A., ae ua lauiloa le galuega a Kerisiano i Pono, i Kalatia, i Kapatokia, i Asia ma Pitunia. (1 Pete. 1:1; 5:13) E uiga ese le fiafia o na taimi! Sa maelega Kerisiano i le uluaʻi senituri e talaʻi, lea na faapea mai ai o latou fili, ua latou “faatupu vevesi i le lalolagi atoa.”—Galu. 17:6; 28:22.

3. O ā iʻuga ua maua i aso nei e tagata talaʻi o le Malo mai i la latou galuega talaʻi, ma o le ā sou lagona i ai?

³ Ua faamanuiaina foʻi i aso nei le faapotopotoga Kerisiano i se faatelega mataʻina. Pe e lē faalaeiauina oe pe a e faitau i le lipoti i tausaga taʻitasi o Molimau a Ieova, ma iloa ai iʻuga ua maua i le lalolagi aoao? Pe e lē faafiafiaina oe i le iloaina na faia e tagata talaʻi o le Malo le sili atu i le ono miliona suʻesuʻega faale-Tusi Paia i le tausaga faaleauaunaga e 2007? E lē gata i lea, ua faaalia e le aofaʻiga o ē na auai i le Faamanatuga o le maliu o Iesu Keriso i le tausaga ua teʻa, pe ā ma le sefulu miliona tagata e lē o ni Molimau a Ieova na auai i lenei faamanatuga tāua, e fiafia i le tala lelei. Ua faaalia ai o loo tele pea galuega e ao ona fai.

4. O ai ua tali mai i le feʻau o le Malo?

⁴ I aso nei e faapena foʻi ma le uluaʻi senituri, ua tali atu “i latou uma o ē ua saunia o latou loto,” i le feʻau o le upu moni. (Galu. 13:48) Ua tosina mai e Ieova na tagata i lana faalapotopotoga. (Faitau le Hakai 2:7.) O le ā le uiga e manaʻomia ona tatou faatumauina i le faiva faa-Kerisiano, ina  ia lagolagosua ai i lenei galuega o le aoaoina?

E Lē Faailoga Tagata le Talaʻiga

5. O ai tagata e finagalo malie i ai Ieova?

⁵ Na malamalama Kerisiano o le uluaʻi senituri “e lē faailoga tagata le Atua, ae o lē e mataʻu iā te ia i nuu uma lava, ma fai le amiotonu, e talia e ia.” (Galu. 10:34, 35) O se tasi e manaʻo e iai sa laʻua faiā lelei ma Ieova, e ao ona faatuatua i le taulaga togiola a Iesu. (Ioa. 3:16, 36) Auā o le finagalo o Ieova, “ia faaolaina ituaiga uma o tagata, ma ia oo ina iloa lelei le upu moni.”—1 Timo. 2:3, 4.

6. O le ā le mea e lē tatau ona faia e ē folafola le Malo, ma aiseā?

⁶ E lē o se mea talafeagai i ē folafola le tala lelei, ona faamasinoina tagata e faavae i o latou ituaiga, o tulaga faaletagata, o foliga vaaia, o talaaga tau tapuaʻiga po o isi lava vala. Seʻi tomānatu: Pe e te lē lotofaafetai ea i lē na muamua talanoa atu iā te oe e uiga i upu moni o le Tusi Paia, ona e na te leʻi faaalia le faailoga tagata? Aiseā la e taofia ai oe mai i le taʻuina atu o le feʻau faasaoola i se tasi o lē atonu e faalogo i ai?—Faitau le Mataio 7:12.

7. Aiseā e lē tatau ai ona tatou faamasinoina i latou o tatou talaʻi i ai?

⁷ Ua tofia e Ieova Iesu e fai ma Faamasino, o lea, e leai la sa tatou aiā e faamasino ai isi. E talafeagai lelei lenā manatu, auā e lē pei i tatou o Iesu, e na te silafia mafaufauga ma manatu o le loto. Ae o tatou, e faamasino e ala i le vaai o o tatou mata, po o mea e faalogo ai o tatou taliga.—Isa. 11:1-5; 2 Timo. 4:1.

8, 9. (a) O le ā le ituaiga tagata sa iai muamua Saulo a o leʻi avea ma Kerisiano? (e) O le ā tatou te aʻoaʻoina mai i le mea na tupu iā Paulo?

⁸ Ua avea tagata mai vala eseese o le olaga ma auauna a Ieova. O se tasi o faaaʻoaʻoga mataʻina, o Saulo o Taso, o lē na mulimuli ane taʻua o le aposetolo o Paulo. Sa avea o ia o se faresaio sa matuā tetee i Kerisiano. Sa uunaʻia o ia e sauāina le faapotopotoga Kerisiano, ona sa ia mautinoa e sesē i latou. (Kala. 1:13) I le vaaiga faaletagata, ailoga a mafai ona avea o ia o se Kerisiano. Peitaʻi na silafia e Iesu se mea lelei i le loto o Saulo ma filifilia ai o ia e faataunuu se galuega faapitoa. O le iʻuga, sa avea Saulo o se tasi e sili ona tinoū ma maelega o le faapotopotoga Kerisiano i le uluaʻi senituri.

⁹ O le ā ua tatou aʻoaʻoina mai i le mea na tupu iā Paulo? Atonu e iai ni vaega o tagata e foliga mai e feita i le feʻau o loo tatou faailoa atu i a tatou oganuu. E ui e foliga mai e lē o mautinoa pe avea nisi o i latou ma Kerisiano moni, ae e lē tatau ona tatou fiu ai e talanoa atu iā i latou. O nisi taimi, o le a faalogo mai ē na tatou manatu i ai e matuā lē fiafia. O la tatou galuega, o le talaʻi pea ma le “lē aunoa” i tagata uma.—Faitau le Galuega 5:42.

Faamanuiaga mo Ē e Talaʻi e “Lē Aunoa”

10. Aiseā e lē tatau ai ona tatou faatalatū e talaʻi atu i tagata e foliga mai e sauā? Faamatala se mea na tupu i la outou oganuu.

¹⁰ E mafai ona tatou faia se faaiʻuga sesē i foliga vaaia. O se faaaʻoaʻoga, na amata ona suʻesuʻe e Ikenasio * le Tusi Paia faatasi ma Molimau a Ieova a o iai i le falepuipui i se atunuu o Amerika i Saute. Sa fefefe tagata iā te ia ona o lona uiga sauā. Sa faia e nisi o pagota ni galuega taulima ma faatau atu i isi pagota, ma latou te mananaʻo e alu Ikenasio e ao mai tau o mea a i latou e tuai ona totogi mai. Ae ina ua agaʻigaʻi i luma faaleagaga Ikenasio ma faatatauina mea ua ia aʻoaʻoina, sa avea ai loa lenei tagata na sauā muamua o se tagata e agalelei. E lē o toe fai i ai se isi e alu e ao mai ni aitalafu, ae ua fiafia Ikenasio ona ua suia e upu moni o le Tusi Paia ma le agaga o le Atua ona uiga. Ua ia lotofaafetai foʻi i le lē faailoga tagata o tagata talaʻi o le Malo o ē na faia taumafaiga e suʻesuʻe ma ia.

11. Aiseā tatou te toe asiasi ai pea i tagata?

¹¹ O se tasi o māfuaaga tatou te toe foʻi ai e  asia i latou na talanoa i ai e uiga i le tala lelei, ona e mafai ona suia o latou tulaga ma uiga. Atonu i la tatou uluaʻi asiasiga, na aafia i latou i se gasegase tugā, lē toe faigaluega, po o ua maliu foʻi se tasi e pele. (Faitau le Failauga 9:11.) E ono uunaʻia nisi e mafaufau e faatatau i o latou lumanaʻi ona o mea ua tutupu i le lalolagi. O na suiga e faapogaia ai se tasi o lē na lē fiafia muamua pe tetee foʻi, e tali lelei mai. O lea la, seʻi aua lava neʻi tatou faatalatū e taʻu atu le tala lelei i isi i so o se taimi.

12. E faapefea ona tatou manatu i tagata o tatou talaʻi i ai, ma aiseā?

¹² O le faavasegaina ma le faamasinoina o isi e foliga mai o se vaivaiga faaletagata. Peitaʻi, e silasila Ieova i tagata taʻitoʻatasi. E silasila o ia i uiga lelei o tagata taʻitoʻatasi. (Faitau le 1 Samuelu 16:7.) E ao foʻi ona tatou taumafai e faia faapea i la tatou galuega talaʻi. Ua faaalia i le tele o mea e tutupu ni iʻuga lelei tatou te maua pe afai e saʻo la tatou vaaiga iā i latou uma o tatou talaʻi i ai.

13, 14. (a) Aiseā na sesē ai le manatu o se paeonia i se fafine na ia feiloaʻi i ai i le talaʻiga? (e) O le ā tatou te aʻoaʻoina mai i lea mea na tupu?

¹³ Sa auai Senara, o se tuafafine paeonia, i le galuega talaʻi i se motu o le Karipiane, ma na feiloaʻi ai ma Rtua, o lē e fiafia tele e faamanatu sauniga o faafiafiaga faapitoa. E faalua ona filifilia Ruta e fai ma tausala o lea faafiafiaga. Sa ia faaalia le naunau moni i mea na taʻu atu e Senara, o lea na fuafua ai loa e fai sana suʻesuʻega faale-Tusi Paia. Na faapea mai Senara: “Ina ua ou savali atu i totonu o lona potu mālōlō, na ou vaaia ai se ata telē lava o Ruta, o ia laʻeiina ofu mo lea faafiafiaga, faapea foʻi ma ipu o ona manumalo. Sa sesē loʻu manatu e faapea, ailoga e tumau pea ona fiafia i le upu moni se tasi o loo lauiloa i ni faafiafiaga faapitoa. O lea, na ou lē toe asia ai o ia.”

¹⁴ I se taimi mulimuli ane, na sau Ruta i le Maota o Sauniga, ma ina ua uma le sauniga, na ia fesili atu iā Senara, “Aiseā ua e lē toe sau ai e fai laʻu suʻesuʻega?” Na faatoese atu Senara ma toe faaauau ona fai le suʻesuʻega. Na vave ona agaʻigaʻi i luma Ruta, ua aveese uma ona ata o ana faafiafiaga, amata ona auai i galuega uma a le faapotopotoga ma tuuina atu lona ola iā Ieova. Na iloa mulimuli ane e Senara, sa sesē lona manatu sa iai muamua.

15, 16. (a) O le ā le iʻuga o le molimau atu a se tagata talaʻi i se tasi e la te aiga? (e) Aiseā e lē avea ai le tulaga o iai le olaga o se tasi o lou aiga e faavaivaia ai oe mai i le molimau atu i ai?

¹⁵ E iai foʻi iʻuga lelei e maua e i latou e molimau i aiga e lē tapuaʻi faatasi, e ui lava e foliga mai e lē tali lelei mai i latou. O se faaaʻoaʻoga, o le mea na oo iā Joyce o se tuafafine Kerisiano i Amerika. E masani ona falepuipui ma toe tatala mai i tua le toʻalua o lona uso, talu mai lava lona talavou. Ua taʻua e Jocye: “Na faapea mai tagata ua maʻimau lona olaga, talu ai ua aafia tele o ia i fualaau faasāina, gaoi ma le faia o isi mea leaga. E ui lava i na mea, ae sa ou talanoa pea iā te ia e uiga i upu moni o le Tusi Paia mo le 37  tausaga.” Na tauia le onosaʻi o Joyce e fesoasoani iā te ia ina ua ia suʻesuʻeina le Tusi Paia faatasi ma Molimau a Ieova, ma faia ni suiga mataʻina i lona olaga. Talu ai nei, i le 50 o ona tausaga, na papatisoina ai le toʻalua o le uso o Jocye i se tauaofiaga i Kalifonia i Amerika. Ua faapea mai Joyce: “Na ou tagi ona o loʻu olioli. Ua ou fiafia ona ou te leʻi fiu i aʻu taumafaiga e fesoasoani iā te ia!”

¹⁶ Atonu e te faalotolotolua e talanoa atu i ou aiga e uiga i upu moni o le Tusi Paia ona o o latou talaaga. Ae e leʻi faatalatū Joyce e talanoa atu i le toʻalua o lona uso. E faapefea ona iloa e se tasi le mea o i le loto o le isi tagata? Atonu o loo saʻili ma le faamaoni lenā tagata mo le upu moni. O lea la, seʻi aua lava neʻi faatalatū mai i le avatuina o le avanoa e maua ai le upu moni.—Faitau le Faataoto 3:27.

O se Fesoasoani Aogā mo Suʻesuʻega Faale-Tusi Paia

17, 18. (a) O ā lipoti mai i le lalolagi e faaalia ai le aogā o le tusi O ā Aʻoaʻoga Moni a le Tusi Paia? (e) O ā ni mea na tutupu e faalaeiauina ai ona o lou faaaogāina o lenei tusi?

¹⁷ Ua faaalia i lipoti mai i atunuu o le lalolagi, e toʻatele tagata loto faamaoni ua tali lelei mai i se tusi e aogā mo suʻesuʻega faale-Tusi Paia, O ā Aʻoaʻoga Moni a le Tusi Paia? Na amata e Peni, o se tuafafine paeonia i Amerika, ni suʻesuʻega e faaaogā ai lenei tusi. O le toʻalua o i latou o ni tagata matutua maelega o a la lotu. E leʻi mautinoa e Peni po o le ā se la tali mai i upu moni o le Tusi Paia o loo aumaia i le tusi Aʻoaʻoga a le Tusi Paia. Ae sa ia tusi mai, “Talu ai ona o le manino, malamalamagofie, ma le puupuu o le auala ua aumaia ai faamatalaga, na faigofie ai mo i laʻua ona taliaina upu moni ua la aʻoaʻoina, e aunoa ma se finauga po o le fenuminumiaʻi.”

¹⁸ Na amata ona suʻesuʻe e Pata, o se tagata talaʻi i Peretania le Tusi Paia ma se fafine sulufaʻi mai i se atunuu i Asia. Ona ua ave faamalosia e fitafita fouvale lana tane ma lana fanau tama, na sola ese o ia mai i lona atunuu, ma e leʻi toe vaai lava iā i latou. Na faamataʻuina lona olaga, na susunuina lona fale ma na faamalosia o ia e ni tamāloloa. Ona o nei mea uma, na ia manatu ai ua leai sona faamoemoe i le olaga, o lea na ia mafaufau ai i le tele o taimi e pule i lona ola. Ae peitaʻi, o le suʻesuʻeina o le Tusi Paia na ia maua ai se faamoemoe. Ua tusi mai Pata: “Sa iai se aafiaga iloga i le fafine ona o le faigofie o faamatalaga ma faaaʻoaʻoga i le tusi o le Aʻoaʻoga a le Tusi Paia.” Na vave ona agaʻigaʻi i luma le tagata aʻoga, agavaa e avea ma tagata talaʻi e leʻi papatisoina, ma faaalia lona naunau e papatiso i le fonotaga na sosoo ai. E uiga ese le olioli e maua e ala i le fesoasoani i tagata faamaoni  ia malamalama ma talisapaia le faamoemoe ua ofoina mai e le Tusi Paia!

“Aua Neʻi o Tatou Fiu e Faia le Mea Lelei”

19. Aiseā ua faanatinati ai le galuega talaʻi?

¹⁹ A o faagasolo aso, ua atili ai foʻi ona faanatinati le faatonuga ina ia talaʻi ma fai ma soo. E faitau afe ē o naunau e saʻili i le Atua ua tali mai i la tatou talaʻiga i tausaga uma. Ua “latalata mai le aso tele o Ieova” o lona uiga, o i latou o loo iai pea i le pogisa faaleagaga, e “oo ina fasia.”—Sefa. 1:14; Faata. 24:11.

20. O le ā e ao ona tatou maumauaʻi e fai?

²⁰ O loo mafai pea ona tatou fesoasoani i na tagata. Peitaʻi ina ia faia faapea, e tāua ai le faataʻitaʻi i Kerisiano i le uluaʻi senituri o ē na ‘lē aunoa ona aʻoaʻo ma folafola atu le tala lelei e uiga iā Iesu le Keriso.’ (Galu. 5:42) Ia mulimuli i a latou faaaʻoaʻoga e ala i le finafinau e ui i faigatā, uaʻi atu i le “tomai e aʻoaʻo atu,” ma talaʻi atu i tagata uma e aunoa ma le faailoga tagata! “Aua neʻi o tatou fiu e faia le mea lelei,” auā afai tatou te finafinau, e tatou te selesele ai le anoanoaʻi o faamanuiaga o le faamaoniga a le Atua.—2 Timo. 4:2; faitau le Kalatia 6:9.

[Faaopoopoga i lalo]

E Faapefea Ona E Tali?

• O ai ua tali mai i le tala lelei?

• Aiseā e ao ai ona tatou ʻalofia le faailoga tagata iā i latou o loo talaʻi i ai?

• O ā iʻuga ua maua mai i le tusi, O ā Aʻoaʻoga Moni a le Tusi Paia?

[Fesili mo le Suʻesuʻega]

[Ata i le itulau 13]

E faitau afe tagata loto faamaoni ua tali lelei mai

[Ata i le itulau 15]

O le ā ua tatou aʻoaʻoina mai i suiga na faia e Paulo?

[Ata i le itulau 16]

E lē faailoga tagata i latou e talaʻia le Malo