O le ā le Uiga o le Faatasi Mai o Iesu iā te Oe?

“O le ā foʻi le faailoga o lou faatasi mai, ma le iʻuga o faiga o mea a le lalolagi?”—MATA. 24:3.

1. O le ā le fesili faatupu naunau na fesiligia ai e le ʻauaposetolo Iesu?

I LE pe ā ma le lua afe tausaga ua mavae, sa fesili atu ai ni soo e toʻafā o Iesu iā te ia, a o latou talatalanoa ma lo latou Matai i le Mauga o Olive. Na latou fesili atu e faapea: “Pe e oo afea ia mea, ma o le ā foʻi le faailoga o lou faatasi mai, ma le iʻuga o faiga o mea a le lalolagi?” (Mata. 24:3) I lenā fesili, e lua ni faamatalaga mataʻina na faaaogā e le ʻauaposetolo, o “lou faatasi mai,” ma le “iʻuga o faiga o mea a le lalolagi.” O le ā le uiga o na faamatalaga?

2. O le ā le uiga o le upu “iʻuga” e tusa ai ma upu Eleni?

² I le Mataio 24:3, o loo taʻua ai le “iʻuga o faiga o mea a le lalolagi.” O le ā le uiga o le upu “iʻuga”? O le upu Eleni (syn·te·leiʹa) “iʻuga,” o loo faasino lea i le vaitaimi faaiʻu o se mea. A o le isi upu Eleni (te’los) e fesootaʻi i ai, o lona uiga, ua uma se mea. Seʻi faataʻitaʻi le eseesega o nei upu: Seʻi faapea o loo fai se lauga i le Maota o Sauniga. A oo i le vaega faaiʻu o le lauga, e faaalu se taimi e toe faamanatu ai mea na talanoaina ma le auala e faatatauina ai. Ae a uma loa le lauga, o lona uiga ua savali ese le failauga mai le pulelaa. E tusa ma le Tusi Paia, e faapena foʻi le “iʻuga o le faiga o mea a le lalolagi,” o loo faatatau ma e aofia ai le vaitaimi faaiʻu o lenei faiga o mea, faatasi ma le taimi ua uma ai.

3. O ā nisi o mea e tutupu i le faatasi mai o Iesu?

³ Ae faapefea le “faatasi mai” lea na fesili i ai le ʻauaposetolo? O le faaliliuga lenei o le upu Eleni pa·rou·siʹa. * O le pa·rou·siʹa, po o le faatasi mai o le Keriso, na amata ina ua avea Iesu ma Tupu i le lagi i le 1914, ma faaauau mai ai ma aofia ai ma le “puapuaga tele,” lea o le a faaumatia ai ē amioleaga. (Mata. 24:21) E tele mea eseese e tutupu i le faatasi mai o Iesu, e aofia ai “aso e gata ai” o  lenei faiga leaga o mea, o le aoaoina o ē ua filifilia, ma le toe faatutūina o i latou i le olaga i le lagi. (2 Timo. 3:1; 1 Kori. 15:23; 1 Tesa. 4:15-17; 2 Tesa. 2:1) E mafai ona faapea atu, o le vaitaimi faaiʻu o lenei faiga o mea a le lalolagi, e ōgatusa ma le vaitaimi o loo taʻua o le faatasi mai o le Keriso (pa·rou·siʹa).

Se Vaitaimi e Umi

4. E faapefea ona taitutusa le faatasi mai o Iesu ma mea na tutupu i aso Noa?

⁴ E tusa ma le uiga o le upu pa·rou·siʹa, o loo faasino atu i se vaitaimi faaumiumi, ma e ōgatusa ma fetalaiga a Iesu e tusa ma lona faatasi mai. (Faitau le Mataio 24:37-39.) Seʻi mātau, e leʻi faatusaina e Iesu lona faatasi mai i le vaitaimi puupuu lea na tupu ai le Lolo i aso o Noa. Nai lo lea, na ia faatusaina lona faatasi mai i le vaitaimi umi a o leʻi oo ina tupu le Lolo. E aofia i lea vaitaimi umi le fausiaina e Noa o le vaa ma le faia o le galuega talaʻi, seʻia oo lava i le vaitaimi na tupu ai le Lolo. E tele tausaga o tupu lenei mea. E faapena foʻi le faatasi mai o Keriso, e aofia ai mea e tutupu i lenā vaitaimi a o faasolo atu i le puapuaga tele, ma e aofia ai foʻi ma le puapuaga tele.—2 Tesa. 1:6-9.

5. E faapefea i faamatalaga o loo i le mataupu e 6 o le tusi o Faaaliga ona faaalia mai ai, e umi le vaitaimi e faatasi mai ai Iesu?

⁵ O loo manino mai i isi valoaga o le Tusi Paia, e umi le vaitaimi lea e faasino atu i le faatasi mai o le Keriso, ae lē faatatau na o lona afio mai e faaumatia ē amioleaga. I le tusi o Faaaliga, o loo faaata mai ai Iesu o loo tiʻetiʻe i le solofanua paʻepaʻe ma ua tuu atu iā te ia le pale. (Faitau le Faaaliga 6:1-8.) I le māeʻa faapaleina o Iesu e fai ma Tupu i le 1914, o loo taʻua o ia o loo “alu atu ina ia manumalo, ma e oo ina manumalo aʻiaʻi.” Na faapea atili mai le mau, na mulimuli atu iā te ia le ʻautiʻetiʻe solofanua o loo tiʻetiʻe i solofanua e eseese lanu. O loo faaata faavaloaga mai ai taua, oge, ma faamaʻi, lea ua tutupu uma i lenei vaitaimi umi lea ua taʻua o “aso e gata ai.” Ua tatou vaaia le faataunuuga o lenā valoaga i o tatou aso.

6. E fesoasoani faapefea le mataupu e 12 o le tusi o Faaaliga ina ia tatou malamalama ai i le faatasi mai o Keriso?

⁶ O loo taʻua i le mataupu e 12 o le tusi o Faaaliga nisi faamatalaga faaopoopo e faasino atu i le faavaeina o le Malo o le Atua i le lagi. E tatou te faitau ai i le taua na faia i le lagi. O Mekaeli, po o Iesu Keriso i lona tulaga i le lagi, ma ana agelu o loo faasagatau i le Tiapolo ma ana temoni. O le iʻuga, na lafoina mai Satani ma ana ʻau i le lalolagi. Na faapea atili mai le tala, mai lenā taimi, ua lotoa tele le Tiapolo, auā “ua na iloa ua puupuu lona taimi.” (Faitau le Faaaliga 12:7-12.) O lea la, o le faavaeina o le Malo o Keriso i le lagi, o le a sosoo mai ai ma se vaitaimi e tumu i mafatiaga mo le lalolagi ma ona tagata.

7. O le ā le manatu o loo taʻua i le Salamo e 2, ma o ā ni avanoa ua maua ai?

⁷ O loo tusia faavaloaga i le salamo e lua le avea o Iesu ma Tupu i le Mauga o Siona i le lagi. (Faitau le Salamo 2:5-9; 110:1, 2.) Peitaʻi, o loo taʻua foʻi i lenei salamo le vaitaimi o le a maua ai e taʻitaʻi o le lalolagi faatasi ai ma o latou tagata, le avanoa e gauaʻi atu ai i le pule a Keriso. O loo fautuaina i latou ia “atamamai” ma ia latou talia le “aʻoaʻoina” o i latou. Ioe, i lenā taimi o le a “fiafia foʻi i latou uma o ē faatuatua iā te ia [Atua],” e ala i le auauna iā Ieova ma lana Tupu tofia. O lea la, ua tuuina mai e Iesu le avanoa e faia ai ni suiga a o faagasolo le taimi o lona faatasi mai.—Sala. 2:10-12.

 Ia Mātauina le Faailoga

8, 9. O ai o le a mātauina le faailoga o le faatasi mai o le Keriso, ma malamalama i lona uiga?

⁸ Ina ua fesiligia e le ʻau Faresaio le taimi e oo mai ai le Malo, na tali atu Iesu o le a “lē oo mai le malo o le Atua i se auala mataʻina,” i la latou vaai. (Luka 17:20, 21) O lona uiga, e lē mafai ona malamalama i ai ē lē talitonu. E lē mafai ona latou malamalama, ona latou te leʻi amanaʻia Iesu e avea ma o latou Tupu i le lumanaʻi. O ai la e mafai ona latou mātauina le faailoga o le faatasi mai o Keriso ma malamalama i lona uiga?

⁹ Na faapea atili atu Iesu i ona soo, o le a manino iā i latou le faailoga e “pei ona emo mai o le uila, ma susulu atu mai le tasi itulagi i le isi itulagi.” (Faitau le Luka 17:24-29.) E lelei foʻi ona mātauina, o loo taʻua i le Mataio 24:23-27 lea lava vala i le taimi o le faailoga o le faatasi mai o le Keriso.

Le Tupulaga o le a Iloaina le Faailoga

10, 11. (a) O le ā le faamalamalamaga muamua o le “tupulaga” lea o loo taʻua i le Mataio 24:34? (e) E lē taumatea, o ai sa malamalama ai soo o Iesu o le a aofia ai i lenā “tupulaga”?

¹⁰ I le taimi ua mavae, na faamalamalama ai e lenei mekasini e faapea, i le uluaʻi senituri, o “lenei tupulaga” lea o loo taʻua i le Mataio 24:34, e uiga atu i le “tupulaga na soifua i se vaitaimi faapitoa o tagata Iutaia lē talitonu.” * E ono talafeagai lenei faamatalaga ona o isi taimi e faaaogā ai e Iesu le upu “tupulaga,” e leʻi logolelei i le faalogo, ma o le tele o taimi na faaaogā ai e Iesu upu e pei o le “leaga,” e faamatala ai le tupulaga. (Mata. 12:39; 17:17; Mare. 8:38) O lea la, o le malamalamaga sa iai muamua e tusa o le faataunuuga i aso nei, na faasino atu Iesu i le “tupulaga” amioleaga o ē lē talitonu, o ē o le a vāai i mea e tutupu i le vaitaimi faaiʻu o le faiga o mea a le lalolagi, faapea foʻi ma le taimi e uma ai.

¹¹ E moni na faasino atu Iesu i tagata amioleaga o ona aso i lona faasino i ia “tupulaga” i se auala lē lelei. Ae po o faatatau moni le Mataio 24:34 i le tupulaga amioleaga o lenā vaitaimi? Manatua foʻi na ō atu ona soo e toʻafā, “na o i latou,” iā Iesu. (Mata. 24:3) Ona e leʻi faaaogā e Iesu ni upu faamatala lē logoleleia a o ia fetalai atu iā i latou e tusa ma “lenei tupulaga,” e lē taumatea na malamalama le ʻauaposetolo ma isi soo, o le a avea i latou ma vaega o le “tupulaga,” lea o le a lē mavae atu “seʻia taunuu nei mea uma.”

12. O ai o loo faasino i ai isi fuaiupu o le mataupu e tusa o le faaaogāina e Iesu o le upu “tupulaga”?

¹² O ā faamaoniga e faavae ai la tatou faaiʻuga? E ala i le iloiloina o isi foʻi fuaiupu ia o loo muamua ai. Na faapea mai Iesu i le  Mataio 24:32, 33: “Ia outou iloa lenei mea mai le talafaatusa i le laau o le mati: Pe a faatoʻā tutupu ona lālā fou ma oso mai ai foʻi ma ona lau, ona outou iloa ai lea ua latalata le tau māfanafana. E faapea foʻi outou, pe a outou vaaia nei mea uma, ia outou iloa ua i faitotoʻa o ia.” (Faatusatusa i le Mareko 13:28-30; Luka 21:30-32.) Ona tatou faitau loa lea i le Mataio 24:34: “E moni ou te fai atu iā te outou, e lē mavae atu lenei tupulaga seʻia taunuu nei mea uma.”

13, 14. Aiseā e mafai ai ona tatou faapea atu, e lē taumatea o le “tupulaga” lea na faasino i ai Iesu, o ona soo?

¹³ Na faapea mai Iesu, o ona soo ia ua toeitiiti faauuina i le agaga paia, o le a mafai ona latou malamalama i “nei mea uma” pe a oo ina tutupu. E lē taumatea la, o loo faasino atu Iesu i ona soo i lona faapea: “E lē mavae atu lenei tupulaga seʻia taunuu nei mea uma.”

¹⁴ E ese mai i ē lē talitonu, o le a vāai soo o Iesu i le faailoga, ma e latou te malamalama foʻi i lona uiga. O le a latou “aʻoaʻoina” mea mai vala eseese o lenā faailoga ma “iloa” ai o latou uiga moni. O le a latou matuā talisapaia lava, “ua i faitotoʻa o ia.” E moni e itiiti faataunuuga o fetalaiga a Iesu na iloa e tagata Iutaia lē talitonu ma Kerisiano faauuina faamaoni i le uluaʻi senituri, ae na o ona soo faauuina lava i na taimi e mafai ona aʻoaʻoina se mea mai mea na tutupu, ma e ono malamalama i uiga o mea na latou vaaia.

15. (a) O ai e faia aʻe ai le “tupulaga” o loo soifua i aso nei, lea na faasino i ai Iesu? (e) Aiseā e lē mafai ai ona tatou fuaina le umi o le vaitaimi o “lenei tupulaga”? (Tagaʻi i le pusa i le itulau e 25.)

¹⁵ O ē e leai so latou malamalama faaleagaga i aso nei, ua latou manatu e lē o vaaia i se “auala mataʻina,” le faailoga o le faatasi mai o Iesu. Ua latou manatu e leai se suiga o mea mai taimi ua teʻa. (2 Pete. 3:4) Peitaʻi, o uso faauuina faamaoni o Keriso, o le vasega e pei o Ioane i aso nei, ua pei o se uila emo le manino o lenei faailoga iā i latou, ma ua latou malamalama i lona uiga moni. I le avea o se vasega, ua faia aʻe e nei tagata faauuina o loo soifua i aso nei lea “tupulaga,” o ē lē oo i ai le oti “seʻia taunuu nei mea uma.” * Ua faailoa mai e lenei manatu, e iai uso faauuina o Keriso o le a soifua pea i le lalolagi pe  a amata le puapuaga tele lea na valoia mai.

“Ia Faaauau Ona Mataala”

16. O le ā e ao ona faia e soo uma o Keriso?

¹⁶ E lē lava le tau ina iloa o le faailoga. Na faapea mai Iesu: “O aʻu upu ou te fai atu ai iā te outou, ou te fai atu ai foʻi i tagata uma, Ia faaauau ona mataala.” (Mare. 13:37) Po o oe o se tasi o le vaega faauuina, po o isi mamoe, e tāua lea manatu mo i tatou uma. Ua sili atu nei i le 90 tausaga talu ona avea Iesu ma Tupu i le lagi i le 1914. E ui e tele ni luʻi, ae tatau lava ona tatou sauniuni ma faaauau ona mataala. O lo tatou malamalama o lea ua faatasi mai lē vaaia o Keriso i lona Malo, o le a fesoasoani ai iā i tatou e faia faapea. E tatou te mataala ai foʻi, e tusa o le lata o lona afio mai e faaumatia ona fili i ‘le itula tatou te lē manatunatu ai.’—Luka 12:40.

17. O ā ni faalogona e tatau ona iā i tatou ona o le malamalamaga e tusa o le faatasi mai o Keriso, ma o le ā e ao ona tatou finafinau e fai?

¹⁷ O le a fesoasoani le malamalamaga i le faatasi mai o Keriso e faatupu ai o tatou lagona faanatinati e gaoioi ai. Ua tatou iloa ua faatasi mai Iesu ma ua avea o ia ma Tupu lē vaaia i le lagi i le 1914. Ua toeitiiti ona ia afio mai lea e faaumatia ē amioleaga, ma faia ni suiga tetele i le lalolagi aoao. O lea la, ia tatou maumauaʻi e fai se sao maelega i le galuega lea na valoia e Iesu ina ua ia fetalai mai: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga [telos].”—Mata. 24:14.

[Faaopoopoga i lalo]

O le ā Lau Tali?

• E faapefea ona tatou iloa e umi le vaitaimi o le faatasi mai o Iesu?

• O ai e mātauina le faailoga o le faatasi mai Iesu, ma malamalama i lona uiga?

• O ai e faia aʻe ai le tupulaga i aso nei lea o loo taʻua i le Mataio 24:34?

• Aiseā e lē mafai ai ona tatou fuafuaina le umi o le vaitaimi o “lenei tupulaga”?

[Fesili mo le Suʻesuʻega]

[Pusa i le itulau 25]

Pe e Mafai ona Tatou Fuaina le Umi o le Vaitaimi o “Lenei Tupulaga”?

E masani ona faasino atu le upu “tupulaga” i tagata e eseese o latou matutua lea e soifua i se vaitaimi patino. O se faaaʻoaʻoga, o loo faapea mai le Esoto 1:6: “Ua oti foʻi Iosefa, ma ona uso uma, atoa ma lea lava tupulaga uma.” Sa eseese uma le matutua o Iosefa ma ona uso, ae sa tutusa i latou ona o mea na tutupu i lo latou vaitaimi. E aofia i lenā “tupulaga” nisi o uso o Iosefa, o ē na fananau muamua iā te ia, ma o nisi o ona uso, sa umi atu ona soifua iā te ia. (Kene. 50:24) O isi o lenā “tupulaga,” e pei o Peniamina, sa fananau mulimuli iā Iosefa, ma atonu na soifua pea i latou ina ua mavae le maliu o Iosefa.

O le faaaogāina la o le upu “tupulaga” e faasino atu i tagata o loo soifua i se vaitaimi patino, e lē mafai ona faapea atu po o le ā tonu le umi o lenā vaitaimi, ae e iai le taimi e iʻu ai, ma e lē matuā umi tele. O lea la, i le faaaogāina o le faaupuga o “lenei tupulaga” e pei ona tusia i le Mataio 24:34, e leʻi tuuina e Iesu se faamatalaga ina ia iloa ai e ona soo le iʻuga o “aso e gata ai.” Nai lo lea, na faamamafa e Iesu le manatu o le a latou lē iloa “lea aso ma le itula.”—2 Timo. 3:1; Mata. 24:36.

[Ata i le itulau 22, 23]

Ina ua avea Iesu ma tupu i le 1914, o loo taʻua o ia ua “alu atu ina ia manumalo”

[Ata i le itulau 24]

“E lē mavae atu lenei tupulaga seʻia taunuu nei mea uma”