Faauuga Lona 123 a Kiliata

Ua Faalaeiauina le ʻAufaauu i Kiliata e “Amata Ona Eli”

I LE aso Toonaʻi o Setema 8, 2007, na auai ai le aofia e 6,352 mai atunuu e 41 i le faauuga o le vasega e 123 o le Aʻoga a le Olomatamata o Kiliata. I le 10 i le taeao, na faafeiloaʻi le aofia e le taʻitaʻifono o le polokalame o Anthony Morris, o se sui o le Vaega Pule. Ina ua māeʻa ana upu, na ia valaaulia loa le failauga muamua, o Gary Breaux o le Komiti o le Lālā i le Iunaite i Setete.

Na faamautinoa e le uso o Breaux i le ʻauaʻoʻoga, e lē tāua o latou foliga vaaia, e aupito i matagofie i latou i le silafaga a Ieova pe a latou faia lona finagalo. (Iere. 13:11) Na ia faalaeiauina le ʻaufaauu e tumau i lenā matagofie. Na sosoo ai ma Gerrit Lösch o le Vaega Pule, lea sa ia faamamafaina le talafeagai o le faatalitalia o se taui mai le auaunaga iā Ieova. (Epe. 11:6) Ae e tatau ona uunaʻia le auaunaga ona o le alofa e lē manatu faapito.

Na faalaeiau atili e le ovasia o le Matagaluega o Aʻoga Faatiokarate, o William Samuelson le ʻaufaauu e tumau pea i o latou tofiga tāua o le faasilasilaina o le Tupu ua nofotupu nei, ma ia atagia atu o latou tulaga mamalu e ala i a latou amio. * Na faalaeiau e Sam Roberson o le ovasia fesoasoani o le Matagaluega o Aʻoga Faatiokarate le ʻaufaauu ina ia saʻo la latou vaaiga i isi. O le a faaleleia atili ai e le ʻaufaauu lo latou “alolofa i le ʻauuso atoa.”—1 Pete. 2:17.

Ina ua māeʻa na lauga, sa faatalanoa e Mark Noumair o se faiaʻoga o Kiliata, nisi o le ʻaufaauu e faamatala mai mea na tutupu i le talaʻiga a o faagasolo le aʻoga i Kiliata. Na faaali atu e ē na faalogologo lo latou olioli i le faiva, ma lo latou faanaunauga e fesoasoani i isi. Ona faatalatalanoa lea e Kent Fischer mai le Ofisa o le Lālā i Patterson ni sui o Komiti o Lālā mai atunuu e tolu, ia o loo iai misionare. Na faamautinoa e upu a nei uso le aofia, faapea ai ma mātua o le ʻaufaauu, o loo vaavaaia faalelei ia misionare fou i a latou tofiga. Ona faatalatalanoa lea e Izak Marais o le Vaega mo Faaliliuga, nisi ua leva ona avea ma misionare, ma na faalogologo le ʻaufaauu i le olioli o le a latou mauaina.

O le matua o le lauga autū o le polokalame, “Pe a Māeʻa Ona Outou Faalogologo i Nei Mea Uma—O le ā o le a Outou Faia Nei?,” ma na tauaaoina e Geoffery Jackson o se sui o le Vaega Pule. Sa avea le uso o Jackson ma misionare i le Pasefika i Saute i le pe ā ma le 25 tausaga, ma na ia talanoaina le vaega mulimuli o le Lauga i le Mauga. I lenā lauga, na faamatala ai e Iesu ni tamāloloa e toʻalua na fausiaina ni fale, e faautauta le isi ae valea le  isi. Na faapea mai le failauga, atonu na iai uma nei fale e lua i se nofoaga e tasi. Peitaʻi, o le tamāloa valea na fausia lona fale i luga o le oneone, a o le tamāloa faautauta na ia eli e suʻe se papa e fausia ai le faavae o lona fale. Ina ua agi mai le matagi, na mafai ona faasaoina le fale i luga o le papa, a o le fale i luga o le oneone sa paʻū i lalo.—Mata. 7:24-27; Luka 6:48.

Na faamatala e Iesu le tamāloa valea, e faaata ai i latou o ē tau ina faalogologo i fetalaiga a Iesu. Ae ua pei le tamāloa faautauta o i latou e faalogologo ma faatatau ia fetalaiga a Iesu. Na faapea atu le uso o Jackson i le ʻaufaauu, “Pe a outou faatatauina i le faiva faamisionare mea na outou aʻoaʻoina mai le Tusi Paia, ua pei outou o le tamāloa faautauta.” I le faaiʻuga o lana lauga, na ia faalaeiauina le ʻaufaauu ia “amata ona eli” i la latou faiva faamisionare.

Na faaiʻu le polokalame i le tufatufaina o tipiloma o le ʻaufaauu faatasi ma o latou tofiga, ma na faia e le uso o Morris ni fautuaga faaiʻu. Na ia faalaeiauina le ʻaufaauu ia mulimuli iā Iesu i taimi uma, ma ia faalagolago pea i le malosi mai iā Ieova. Ona faaiʻuina aloaʻia ai lea o le polokalame.

[Faaopoopoga i lalo]

[Pusa i le itulau 31]

FAAMAUMAUGA O LE VASEGA

Aofaʻi o atunuu o loo iai o latou sui: 10

Aofaʻi o atunuu ua tofia i ai: 24

Aofaʻi o ē aʻoʻoga: 56

Faatatauga o tausaga: 33.5

Faatatauga o tausaga i le upu moni: 17.9

Faatatauga o tausaga i le faiva faataimi atoa: 13.8

[Ata i le itulau 32]

Vasega Faauu Lona 123 o le Aʻoga Faale-Tusi Paia a le Olomatamata o Kiliata

I le lisi o i lalo, e amata mai laina i luma ma faasolo i tua, ma o suafa e lisi mai i le agavale e agaʻi i le taumatau.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.