E Faafofoga Mai Ieova i la Tatou Alaga
E Faafofoga Mai Ieova i la Tatou Alaga
“O fofoga o Ieova o loo faasaga i ē amiotonu, e liliu mai foʻi ona taliga i a latou alaga.”—SALA. 34:15.
1, 2. (a) O ā ni faalogona o le toʻatele o tagata i aso nei? (e) Aiseā e lē faateʻia ai i tatou i lenā mea?
PO O iai ea se mea o e mafatia ai? E lē na o oe o loo mafatia. E faitau miliona tagata o loo tauivi ma omiga o le olaga i aso taʻitasi i lenei lalolagi amioleaga. Ua tauau ina lē mafai e nisi tagata ona tatali na omiga. Ua tutusa o latou faalogona ma le faisalamo o Tavita, o lē na tusi e faapea: “Ua ou matuā vaivai, ua ou momomo lava; ou te faataiō ona o le ōi o loʻu loto. Ua sapotuvale loʻu fatu mānava, ua teʻa loʻu malosi; o le malamalama foʻi sa i oʻu mata, ua lē iā te aʻu lea.”—Sala. 38:8, 10.
2 Talu ai o i tatou o Kerisiano, e lē faateʻia i tatou i mafatiaga o le olaga. Ua tatou malamalama o “tigā ma puapuaga,” o vaega ia na valoia o le faailoga, o le faatasi mai o Iesu. (Mare. 13:8; Mata. 24:3) O le upu Eleni lea na faaliliuina mai ai le faaupuga “tigā ma puapuaga,” e faasino atu i tigā o le fafine o loo fanau. O upu tonu na e faamatala ai le ogaoga o mafatiaga o tagata i aso nei “e sili ona faigatā”!—2 Timo. 3:1.
E Malamalama Ieova i o Tatou Mafatiaga
3. O le ā ua iloa lelei e tagata o le Atua?
3 Ua iloa lelei e tagata o Ieova, e lē gata e aafia i latou i nei mafatiaga, ae o le a faateteleina foʻi. E lē gata e tauivi auauna a le Atua ma na mafatiaga, ae e latou te fetaiaʻi foʻi ma le “fili, o le Tiapolo” o lē e taumafai malosi e faavaivai lo tatou faatuatua. (1 Pete. 5:8) Ioe, e faigofie tele ona oo iā i tatou faalogona e pei o Tavita, o lē na tusi e faapea: “O le luma ua momomo ai loʻu loto, ua maʻi lava aʻu; ua ou faatalitali foʻi i sē na te faamatalaloto mai, a e leai lava se tasi, ma ni ē faamāfanafana mai, a e leai se isi na ou maua”!—Sala. 69:20.
4. O le ā e faamāfanafanaina ai i tatou pe a tatou aafia i mafatiaga?
4 Po o le uiga ea o le tala a Tavita ua matuā leai lava sona faamoemoe? E leai. Ia mātau isi upu a Tavita i le salamo lava lenā: “Auā o loo faafofoga Ieova i ē matitiva, e lē ʻinoʻino foʻi o ia i ona tagata ua noanoatia.” (Sala. 69:33) Atonu e iai taimi e tatou te lagona ai, e peiseaʻī ua noanoatia i tatou i o tatou lava mafatiaga po o puapuaga. E peiseaʻī e lē malamalama tagata i o tatou tulaga, ma atonu foʻi e lē malamalama. Ae e mafai ona faamāfanafanaina i tatou e pei o Tavita, pe a tatou iloa e malamalama atoatoa Ieova i o tatou mafatiaga.—Sala. 34:15.
5. O le ā na mautinoa i ai le Tupu o Solomona?
5 O le manatu lenā na faamatilatila e Solomona le atalii o Tavita, ina ua faapaia le malumalu i Ierusalema. (Faitau le 2 Nofoaiga a Tupu 6:29-31.) Na ia ʻaiʻoi iā Ieova ina ia faafofoga mai i tatalo a tagata taʻitoʻatasi e lotofaamaoni, o ē e faalatalata atu iā te Ia, e tusa ai ma “lona maʻi, ma lona tigā.” O le ā le tali a le Atua i tatalo a nei tagata taʻitoʻatasi o ē mafatia? Na faailoa mai e Solomona lona mautinoa e faafofoga mai le Atua i a latou tatalo, ma fesoasoani mai foʻi iā i latou. Aiseā? Auā e na te silafia lelei “loto o tagata.”
6. E faapefea ona tatou onosaia popolega, ma aiseā?
6 E mafai foʻi ona tatou faalatalata atu iā Ieova i le tatalo e tusa ai ‘ma o tatou maʻi ma o tatou tigā,’ po o mafatiaga o i tatou taʻitoʻatasi. E tatau ona faamāfanafanaina i tatou pe a tatou iloa e malamalama o ia i o tatou mafatiaga, ma e manatu mamafa mai foʻi o ia iā i tatou. Na faamaonia e le aposetolo o Peteru lenei mea, ina ua ia faapea mai: “Ia taʻu atu o outou popolega uma iā te ia, auā o loo manatu mamafa mai o ia iā te outou.” (1 Pete. 5:7) E tāua tele iā Ieova mea o loo tutupu iā i tatou. Na faamatilatila e Iesu le tausiga alofa a Ieova, ina ua ia faapea mai: “Po ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā. E oo foʻi i o outou lauulu, ua faitaulia uma. O lea la, aua neʻi outou fefefe: E sili atu ona tāua outou nai lo o tamaʻi manulele e tele.”—Mata. 10:29-31.
Ia Faalagolago i le Fesoasoani a Ieova
7. O le ā le fesoasoani e mafai ona tatou mautinoa i ai?
7 E mafai ona tatou mautinoa e naunau Ieova e fesoasoani mai i o tatou puapuaga, ma o le a ia faia foʻi faapea. “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” (Sala. 34:15-18; 46:1) E faapefea ona fesoasoani mai le Atua? Seʻi manatu i le mea ua taʻua i le 1 Korinito 10:13: “Ae e faamaoni le Atua, ma e na te lē tuua outou i se faaosoosoga e sili atu nai lo o le mea tou te mafaia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.” Atonu e faatonutonu e Ieova mea ina ia aveesea ai lo tatou faafitauli, pe e na te foaʻi mai foʻi le malosi ina ia tatou tumau ai. O auala na e lua e fesoasoani mai ai Ieova iā i tatou.
8. E faapefea ona tatou maua le fesoasoani a le Atua?
8 E faapefea ona tatou maua lenā fesoasoani? Ia mātau le mea e tatau ona tatou faia: “Ia taʻu atu o outou popolega uma iā te ia.” O lona uiga, ia tatou tuu atu iā Ieova e na te vaaia o tatou popolega uma. E tatou te taumafai ina ia lē toe popole, ae ia faatalitali ma le onosai iā te ia e na te tausia o tatou manaʻoga. (Mata. 6:25-32) E tāua tele le lotomaulalo ina ia tatou faatalitali ai iā te ia, e tatou te lē faalagolago i so tatou malosi po o so tatou poto. O lo tatou faamaulalo i “lalo o le aao malosi o le Atua,” e tatou te amanaʻia ai lo tatou tulaga faatauvaa. (Faitau le 1 Peteru 5:6.) O le faia faapea, e tatou te onosaia ai mafatiaga ia e lē o taofia e le Atua. Atonu tatou te mananaʻo ia muta loa o tatou mafatiaga, ae e tatou te talitonu ua silafia e Ieova le taimi tonu ma le auala tonu e fesoasoani mai ai iā i tatou.—Sala. 54:7; Isa. 41:10.
9. O ā popolega sa tatau ona tuuina atu e Tavita iā Ieova?
9 Manatua foʻi upu a Tavita o loo tusia i le Salamo 55:22: “Ia e tuuina atu iā Ieova o mea e te popole vale ai; o ia lava na te tausia oe; na te lē tuuna e faavavau le amiotonu ia faagaeetia.” Na matuā mafatia lava Tavita a o ia tusia na upu. (Sala. 55:4) E iai le manatu, na tusia lenei salamo a o faufau lona atalii o Apisaloma e faoa le malo mai iā te ia. E oo foʻi iā Aitofele, o le faufautua a Tavita na sili ona ia faatuatuaina, na ʻau foʻi i le fouvalega a Apisaloma. Na tatau ona sola ese Tavita mai Ierusalema ona na lamatia lona ola. (2 Samu. 15:12-14) E ui lava i na tulaga faigatā, ae na faatuatua pea Tavita i le Atua, ma e leʻi iʻuvale lona faatuatua.
10. O le ā e tatau ona tatou faia pe a mafatia?
10 E tāua tele ona tatou faalatalata atu iā Ieova i le tatalo e pei o Tavita, e faatatau i so o se mea lava e tatou te mafatia ai. Seʻi o tatou vaai po o le ā na fai mai ai le aposetolo o Paulo e tatou te faia e tusa ai ma lenei mea. (Faitau le Filipi 4:6, 7.) O le ā le iʻuga o le tatalo faatauanau faapena? “Ona leoleoina ai lea o o [tatou] loto ma mafaufau i le filemu mai le Atua, lea e silisili i mea uma lava e manatu i ai, e ala iā Keriso Iesu.”
11. E faapefea ona leoleoina o tatou loto ma mafaufau e “le filemu mai le Atua”?
11 Pe e suia ai ea lou tulaga ona o au tatalo? Atonu. Ae e tatau ona tatou iloa, e lē faapea e tali mai Ieova i taimi uma lava i a tatou tatalo, e tusa ai ma lo tatou manaʻo. Peitaʻi, e aogā a tatou tatalo ina ia sagatonu ai o tatou mafaufau, ina neʻi lofitūina i tatou i mafatiaga. E tatou te toʻafilemu ona o “le filemu mai le Atua,” pe a tatou pagatia i mafatiaga. E pei ona tofia ni fitafita e leoleoina se aai ina neʻi osofaʻia, e faapena foʻi ona leoleoina o tatou loto ma mafaufau e “le filemu mai le Atua.” E mafai ai ona foʻia mea e tatou te lē mautonu ai, o popolega, ma manatu faavaivailoto, aemaise ia aua neʻi o tatou māteletele, ae ia gaoioi ma le poto.—Sala. 145:18.
12. Ia faataʻitaʻi mai pe e faapefea ona maua e se tasi le filemu o le mafaufau.
12 E faapefea ona filemu o tatou mafaufau a o tatou tauivi ma mafatiaga? Seʻi manatu i se faataʻitaʻiga e taitutusa ma o tatou tulaga. Atonu o loo iai se tagata faigaluega e ʻinaʻinā lona pule. Ae ua maua e le tagata faigaluega le avanoa e faailoa atu ai ona faalogona i lē e ona le kamupani, o se tagata e agalelei ma magafagafa. Ua faamautinoa mai e lē e ona le kamupani lona malamalama i le mea o tupu, ma ua ia faailoa mai foʻi i le tagata faigaluega ua toeitiiti ona tuli lea o le pule. O ā la ni faalogona o le tagata faigaluega? E tusa lava pe e iai nisi tulaga faigatā e tatau ona ia toe onosaia, ae o le a faaauau pea ona faigaluega auā e talitonu i le tala a lē e ona le kamupani, aemaise ua ia iloa le iʻuga o le pule. E faapena foʻi i tatou, ua tatou iloa e malamalama Ieova i o tatou tulaga, ma ua ia fetalai mai ua toeitiiti “tuuesea . . . le pule o lenei lalolagi.” (Ioa. 12:31) O se faamāfanafanaga lenā mea!
13. O le ā se isi mea e tatau ona tatou faia, e faaopoopo i le tatalo?
13 Pe e lava ea le tau ina tatalo atu iā Ieova i o tatou faafitauli? E leai. E tatau ona tatou gaoioi e tusa ai ma a tatou tatalo. Ina ua aauina atu e le Tupu o Saulo tagata i le fale o Tavita ina ia fasiotia o ia, na tatalo Tavita e faapea: “Loʻu Atua e, ia e laveaʻi mai iā te aʻu i ē ua ita mai iā te aʻu; ia e faamamalu mai iā te aʻu i ē ua laga mai iā te aʻu. Ia e laveaʻi mai iā te aʻu i ē ua fai amio leaga; ia e faaola mai iā te aʻu i tagata ua totolima.” (Sala. 59:1, 2) E lē gata ina tatalo Tavita, ae na faalogo foʻi i lana avā ma gaoioi loa e sola ese. (1 Samu. 19:11, 12) E mafai foʻi ona tatou tatalo ia maua le poto e onosaia ai, pe atonu foʻi e faaleleia ai o tatou tulaga mafatia.—Iako. 1:5.
Le Auala e Maua ai le Malosi e Tumau Ai
14. O le ā e fesoasoani ina ia tatou tumau ai pe a fetaiaʻi ma puapuaga?
14 Atonu e lē aveesea loa i le taimi nei o tatou puapuaga, pe e faaauau foʻi mo sina taimi. Afai o lea, o le ā e fesoasoani iā i tatou ina ia tumau ai? Muamua lava, ia manatua e faaalia lo tatou alofa iā Ieova pe a tatou auauna pea ma le faamaoni iā te ia e ui i tulaga faigatā. (Galu.14:22) Ia manatua le tuuaʻiga a Satani e faatatau iā Iopu: “Ua mataʻu fua ea Iopu i le Atua? ua e lē siʻosiʻomia ea i le aupā o ia, ma lona fale, atoa ma ana mea uma i itu uma? ua e faamanuia le galuega a ona lima, ua e faateleina foʻi ana manu i le fanua. A e peitaʻi ia e aapa atu lou aao, ma e tago atu i ana mea uma, pe na te lē faifai ai ea iā te oe i ou lava luma?” (Iopu 1:9-11) O le faamaoni o Iopu, na faaalia ai le pepelo tele o lenā tuuaʻiga. O lo tatou tutumau e ui i tulaga faigatā, ua tatou faaalia ai foʻi le pepelo o Satani. E iʻu ina malosi ai lo tatou faamoemoe ma lo tatou mautinoa, ona o lo tatou tumau.—Iako. 1:4.
15. O ā ni faaaʻoaʻoga e tatou te maua ai le malosi?
15 Lona lua, ia tatou manatua “o mea lava ia o loo faapuapuagatia ai foʻi lo outou ʻauuso atoa i le lalolagi.” (1 Pete. 5:9) Ioe, “o faaosoosoga e oo iā te outou, e oo foʻi i tagata uma.” (1 Kori. 10:13) E mafai ona e malosi ma maua le lototele, e ala i lou mafaufau loloto i faaaʻoaʻoga a isi, nai lo o le uaʻi i ou lava faafitauli. (1 Tesa. 1:5-7; Epe. 12:1) Ia manatunatu lelei i faaaʻoaʻoga a tagata e te iloa na tutumau faamaoni e ui ina matuā mafatia. Po ua e saʻiliʻili ea i tala o soifuaga ua lomia e faatatau i ē na oo i tulaga faigatā, e pei o le tulaga lea o loo tupu iā te oe? Ioe, e lē taumatea o le a faamalosia ai oe i na tala.
16. E faapefea ona faamalosia i tatou e le Atua pe a fetaiaʻi ma puapuaga?
16 Lona tolu, ia manatua o Ieova o “le Tamā o le alofa mutimutivale, ma le Atua o faamāfanafanaga uma, o lē na te faamāfanafanaina i tatou i o tatou puapuaga uma, ina ia mafai foʻi ona tatou faamāfanafana atu i ē ua oo i ai so o se puapuaga, i le faamāfanafanaga ua faamāfanafanaina ai i tatou e le Atua.” (2 Kori. 1:3, 4) E peiseaʻī o loo tū le Atua i o tatou tafatafa, e faalaeiau ma faamalosiau i tatou i o tatou puapuaga i le taimi nei ma i o “tatou puapuaga uma.” O lea, ua mafai ai foʻi ona tatou faamāfanafana atu i isi i “so o se puapuaga.” Na tofo Paulo i le moni o na upu.—2 Kori. 4:8, 9; 11:23-27.
17. E faapefea ona fesoasoani le Tusi Paia iā i tatou e onosaia ai mafatiaga o le olaga?
17 Lona fā, o loo iā i tatou le Afioga a le Atua lea “e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu, ina ia matuā agavaa ai le tagata o le Atua, e lava saunia mo galuega lelei uma.” (2 Timo. 3:16, 17) O le Afioga a le Atua e tatou te “agavaa” ai ma ‘e saunia ai foʻi i tatou mo galuega lelei uma.’ Ae e fesoasoani foʻi iā i tatou e onosaia mafatiaga o le olaga, auā tatou te “matuā agavaa ai” ma e “lava saunia” ai i tatou. O le upu Eleni ua faaliliuina “lava saunia,” atonu na faaaogā i aso anamua e faasino atu i se vaa ua lava saunia e folau i le vasa. E faapena foʻi ona saunia e Ieova e ala i lana Afioga, mea e tatou te manaʻomia e onosaia ai so o se faafitauli. E mafai la ona tatou faapea atu, “Po o ā lava mea e tutupu, e mafai ona tatou onosaia ona o le fesoasoani mai a le Atua.”
Laveaʻia Mai i Mafatiaga Uma
18. O le ā le mea moni e tatou te taulaʻi i ai ina ia tumau ai ma le faamaoni?
18 Lona lima, ia tatou taulaʻi i le mea moni e faapea, ua toeitiiti ona soloiesea lea e Ieova o mafatiaga uma o tagata. (Sala. 34:19; 37:9-11; 2 Pete. 2:9) Pe a laveaʻi i tatou e le Atua, o lona uiga e laveaʻi i tatou mai mafatiaga i le taimi nei, ae e tatou te maua foʻi le avanoa e ola e faavavau, a lē i le lagi faatasi ma Iesu, po o le parataiso i le lalolagi.
19. E mafai faapefea ona e tumau ma le faamaoni?
19 A o leʻi oo mai lenā taimi, e tatou te onosaia pea mafatiaga o lenei lalolagi amioleaga. E tatou te matuā moomoo i le taimi e muta ai nei puapuaga! (Sala. 55:6-8) Seʻi o tatou manatua, o lo tatou tumau ma le faamaoni e faaalia ai le pepelo o le Tiapolo. Ia tatou maua le malosi e ala i a tatou tatalo ma le ʻauuso Kerisiano, ma ia manatua o loo puapuagatia foʻi o tatou uso e pei o i tatou. Ia faaauau ona tatou matuā agavaa ma lava saunia i le faaaogāina o le Afioga a le Atua. Aua neʻi mou atu lou faatuatua i le tausiga alofa a “le Atua o faamāfanafanaga uma.” Ia manatua “o fofoga o Ieova o loo faasaga i ē amiotonu, e liliu mai foʻi ona taliga i a latou alaga.”—Sala. 34:15.
O le ā Lau Tali?
• O ā ni faalogona o Tavita i ona mafatiaga?
• O le ā le mea mautinoa na faailoa mai e le Tupu o Solomona?
• O le ā e fesoasoani iā i tatou e onosaia ai mafatiaga ia e lē o taofia e Ieova?
[Fesili mo le Suʻesuʻega]
[Ata i le itulau 13]
Na mautinoa e Solomona e fesoasoani mai Ieova i Ona tagata o loo mafatia
[Ata i le itulau 15]
Na taʻu atu e Tavita ona popolega iā Ieova i le tatalo, ona gaoioi lea e tusa ma ana tatalo