Pe E te Vaai i Isi e Pei o Ieova?

“Ia lē fevaevaeaʻi i le tino, ae ia . . . fetausiaʻi ona itutino.”—1 KORI. 12:25.

1. O ā ni ou lagona ina ua e faatoʻā ulu atu i le parataiso faaleagaga?

INA ua tatou faatoʻā ō ese mai lenei lalolagi amioleaga ma aufaatasi atu ma tagata o Ieova, na tatou matuā fiafia ai i le alofa māfana ma lo latou naunau mai. Maʻeu le eseese ma tagata lē migao, faatigāloto, ma fefinauaʻi o loo pulea e Satani! Ua tatou iai i le parataiso faaleagaga ua faatumulia i le filemu ma le autasi.—Isa. 48:17, 18; 60:18; 65:25.

2. (a) O le ā e ono aafia ai la tatou vaai i isi? (e) O le ā e manaʻomia ona tatou faia?

² Peitaʻi a o faagasolo taimi, ua amata ona sesē la tatou vaaiga i o tatou uso ona o o tatou tulaga lē lelei atoatoa. O le lē lelei atoatoa, ua faapogaia ai i tatou e faatelē masei lāiti o o tatou uso, nai lo le vaai i o latou uiga faaleagaga. Ua galo ai ona tatou vāai iā i latou e pei o le silasila a Ieova. Afai o tupu lenei mea, o le taimi la lenei e uaʻi ai i le auala e tatou te vāai ai i isi, ma ia faaōgatusa ma le silasila a Ieova.—Eso. 33:13.

Le Silasila a Ieova i o Tatou Uso

3. O le ā na faatusa i ai e le Tusi Paia le faapotopotoga Kerisiano?

³ E pei ona faamauina i le 1 Korinito 12:2-26, na faatusa e Paulo le faapotopotoga o Kerisiano faauuina i se tino e “tele itutino.” E pei lava ona eseese totoga o le tino, e eseese foʻi sui o le faapotopotoga i o latou uiga ma o latou tomai. Peitaʻi, e talia e Ieova nei tagata eseese uma. E alofa ma e na te talisapaia sui taʻitasi. O lea, ua fautuaina ai foʻi i tatou e Paulo e faapea o sui uma o le faapotopotoga,  e ao ona “fetausiaʻi ona itutino.” Atonu e faigatā lenei tulaga auā e eseese uiga o isi mai i o tatou uiga.

4. Aiseā e ono manaʻomia ai ona fetuutuunaʻi le auala tatou te vāai ai i o tatou uso?

⁴ Atonu e tatou te taulaʻi atu i vaivaiga o o tatou uso. O le faia faapea, e pei o loo tatou matamata atu i le na o se vaega o le ata, ae lē o le ata atoa. Peitaʻi, e silasila Ieova i le ata atoa, lea e aofia ai se tagata ma lona tulaga atoa. Atonu e tatou te mātau na o se mea e tatou te lē fiafia i ai, ae e silasila Ieova i le tagata atoa, e aofia ai uiga lelei uma o lea tagata. O le tele e tatou te taumafai ai e faaaʻoaʻo iā Ieova, o le tele foʻi lea e tatou te faaalia ai le alofa ma le autasi i le faapotopotoga.—Efe. 4:1-3; 5:1, 2.

5. Aiseā e lē talafeagai ai ona faamasinosino atu i isi?

⁵ Na silafia lelei e Iesu le uiga o tagata lē lelei atoatoa, e faamasinosino i isi. Na ia fautua mai: “Aua tou te toe faamasino atu ina neʻi faamasinoina outou.” (Mata. 7:1) Mātau mai, e leʻi tau ina fetalai Iesu: “Aua tou te faamasino atu”; ae sa ia fetalai: “Aua tou te toe faamasino atu.” Na ia silafia ua loa ona iai i le toʻatele o lana ʻaufaalogologo lea masaniga o le faitio i isi. Po o faapena le uiga o iā i tatou? Afai o lea, e ao ona tatou taumafai malosi e suia, ina neʻi faamasinoina i tatou. O le mea moni lava, o ai ea i tatou e faamasinosino atu ai se tasi, o lē ua tofia e Ieova i se tulaga, pe faapea atu ai foʻi e lē tatau ona iai lea tagata i le faapotopotoga? Atonu e iai ni vaivaiga o se uso, ae afai e talia o ia e Ieova, po o se mea talafeagai la mo i tatou le teena o ia? (Ioa. 6:44) Po ua tatou talitonu moni lava o loo taʻitaʻia e Ieova lana faalapotopotoga, ma pe a manaʻomia ona faia ni fetuutuunaʻiga, o le a ia gaoioi lava i lana taimi atofaina?—Faitau le Roma 14:1-4.

6. O le ā le silasila a Ieova i ana auauna?

⁶ O le mea mataʻina e uiga iā Ieova, e na te silafia le tulaga e mafai ona ausia e Kerisiano taʻitoʻatasi, pe a latou oo atu i le lelei atoatoa i le lalolagi fou. E na te silafia foʻi le tele o le agaʻigaʻi i luma faaleagaga ua mafai ona latou faia. O le mea lea, e lē taulaʻi ai o ia i o latou vaivaiga. E tatou te faitau i le Salamo 103:12, e faapea: “E pei ona vāvā mamao o sasaʻe ma sisifo, e faapea lava ona faamamao e ia iā i tatou o a tatou solitulafono.” Maʻeu lo tatou lotofaafetai i lenā tulaga!—Sala. 130:3.

7. O le ā se mea e tatou te aʻoaʻoina mai le silasila a Ieova iā Tavita?

⁷ Ua tatou vāai i faamaoniga mai le Tusi Paia o le matilatila o le uiga lea o Ieova, o le taulaʻi atu i uiga lelei o loo i se tasi. Na faamatalaina e le Atua Tavita o “laʻu auauna o Tavita, o lē na tausi i aʻu poloaʻiga, ma mulimuli mai iā te aʻu, ma lona loto atoa, e fai na o mea e tusa i oʻu luma.” (1 Tu. 14:8) Ua tatou iloa na faia e Tavita ni mea sesē. Peitaʻi, na taulaʻi Ieova i uiga lelei o Tavita, auā sa ia  silafia le faamaoni o lona loto.—1 No. 29:17.

Ia Vaai i Ou Uso e Pei o Ieova

8, 9. (a) O le ā le vala e mafai ai ona tatou pei o Ieova? (e) Ua faataʻitaʻia faapefea lenei tulaga, ma o le ā le lesona mo i tatou?

⁸ E silafia e Ieova mea o i loto o tagata, ae e lē mafai ona tatou iloa. O se māfuaaga lelei lea e ao ai ona tatou lē faamasino atu. E tatou te lē iloa māfuaaga uma lava o gaoioiga a le isi tagata. E ao ona tatou taumafai e faaaʻoaʻo iā Ieova, e ala i le lē taulaʻi atu i tulaga lē lelei atoatoa o tagata lea ua toeitiiti mou ese atu. Pe lē o se sini lelei ea lea e faaaʻoaʻo ai iā te ia i lenei tulaga? O lo tatou faia faapea, o le a saosaolaumea ai i le mauaina o ni faiā filemu ma o tatou uso ma tuafāfine.—Efe. 4:23, 24.

⁹ Ina ia faataʻitaʻi, seʻi mafaufau i se fale ua faasolo ina leaga, ua leai ni alāvai, ua taʻei faamalama, ma ua leaga foʻi le faʻalo ona ua susū. Atonu e manatu le tele o tagata e vāai i ai ua tatau loa ona talepe i lalo, auā e matagā i le vaai. Ae sau loa se tasi e matuā ese le mea o loo ia manatu i ai. Atonu e lē afāina iā te ia faafitauli ua ia vaai i ai, ua ia iloa e malosi le faavae ma e mafai ona toe faaleleia le fale. Ona ia faatau lea o le fale ma toe faia nisi galuega e faaleleia ai mea na leaga, ma ua toe matagofie i le vaai. Mulimuli ane, ua toe fai tala a tagata e faatatau i le matagofie o le fale. Pe e mafai ona pei i tatou o lenei tagata o lē e galue e toe faaleleia pe toe faafou le fale? Nai lo le taulaʻi atu i tulaga lē lelei atoatoa o o tatou uso, pe e tatou te iloa o latou uiga lelei ma manatu e mafai ona latou tuputupu aʻe faaleagaga? O le faia faapea, o le a tatou alolofa ai i o tatou uso ona o o latou uiga matagofie faaleagaga, e pei o le silasila a Ieova.—Faitau le Eperu 6:10.

10. E faapefea ona fesoasoani iā i tatou le fautuaga o loo i le Filipi 2:3, 4?

¹⁰ Na aumaia e Paulo se fautuaga e fesoasoani i a tatou faiā ma tagata uma i le faapotopotoga. Na ia fautuaina Kerisiano: “Ia aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu faapea ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.” (Fili. 2:3, 4) E fesoasoani le lotomaulalo iā i tatou e maua ai se vaaiga paleni i isi. O le naunau fiafia i isi ma le vaai i o latou uiga lelei, e fesoasoani iā i tatou e vāai ai iā i latou e pei o Ieova.

11. O ā suiga ua aafia ai nisi o faapotopotoga?

¹¹ O suiga talu ai nei i le lalolagi ua iʻu ai ina femalagaaʻi solo tagata. Ua nofoia nisi o aai e tagata mai le tele o atunuu eseese. O nisi o tagata e fou mai i o tatou vaipanoa ua fiafia i le upu moni o le Tusi Paia, ma ua latou faatasi ma i tatou e tapuaʻi atu iā Ieova. O i latou nei e “mai i atunuu uma, ma ituaiga, ma nuu, ma gagana.” (Faaa. 7:9) O le iʻuga, ua iai i a tatou faapotopotoga tagata eseese o le lalolagi.

12. O le ā le vaaiga a le tasi i le isi e ao ona tatou tausisia, ma aiseā e ono avea ai o se luʻi i nisi taimi?

¹² I a tatou faapotopotoga, e manaʻomia ona tatou uaʻi atili atu i le tausisia o se vaaiga saʻo, i le auala e vaai ai le tasi i le isi. Ua faamanatu mai ai iā i tatou le fautuaga a Paulo e faaalia le “alofa faamaoni o uso” ma ia “matuā fealofani mai i o outou loto.” (1 Pete. 1:22) O le ati aʻe o le alofa faamaoni ma le fealofani, e ono avea o se luʻi i se siʻomaga e toʻatele ai tagata eseese o le lalolagi. E ono eseese a tatou aganuu ma o tatou uso tapuaʻi, e faapena foʻi i aʻoaʻoga, tamaoaiga, ma talaaga o soifuaga. Po o se luʻi iā te oe le taumafai e malamalama i mafaufauga po o gaoioiga a nisi? E ono faapena foʻi o latou lagona e uiga iā te oe. E ui i lea, ua faatonuina i tatou uma: “Ia alolofa i le ʻauuso atoa.”—1 Pete. 2:17.

13. O ā fetuutuunaʻiga i o tatou mafaufauga e manaʻomia ona faia?

¹³ O se mea talafeagai le faia o ni fetuutuunaʻiga i o tatou mafaufauga, ina ia faalautele  atu le alofa i o tatou uso uma lava. (Faitau le 2 Korinito 6:12, 13.) Po ua tatou fai atu ea, “Ou te lē faailoga tagata, peitaʻi . . . ” ona toe faamanatu lea o ni uiga lē lelei tatou te iloa o loo iai i ni tagata e ese le atunuu e ō mai ai? O faalogona ia e faaalia ai e manaʻomia ona tatou liaʻi ese uiga faailoga tagata ia e teuloto pea i totonu iā i tatou. E tatou te ono fesili ifo iā i tatou, ‘Po o oʻu faia e lē aunoa se taumafaiga ia iloa tagata o se isi aganuu e ese mai i laʻu aganuu? O le faia o se iloiloga a le tagata lava ia, e fesoasoani iā i tatou e faaleleia ai i le taliaina ma le talisapaia o lo tatou ʻauuso i le lalolagi aoao.

14, 15. (a) Aumai ni faaaʻoaʻoga o i latou na fetuutuunaʻi la latou vaaiga i isi. (e) E faapefea ona tatou faaaʻoaʻo iā i latou?

¹⁴ Ua aumaia e le Tusi Paia iā i tatou ni faaaʻoaʻoga lelei o i latou na fetuutuunaʻi, ma o se tasi o i latou o le aposetolo o Peteru. I le avea o se tagata Iutaia, e lē taumatea na ʻalofia e Peteru le ulufale atu i se aiga o se tagata o Nuu Ese. Seʻi mafaufau i ona faalogona ina ua talosagaina o ia e asiasi atu i le fale o Konelio, o le tagata mai i Nuu Ese! Na faia e Peteru ni fetuutuunaʻiga, i le iloa e finagalo le Atua ia avea tagata o atunuu uma ma vaega o le faapotopotoga Kerisiano. (Galu. 10:9-35) Na faia foʻi e Saulo, o lē na avea mulimuli ane ma aposetolo o Paulo ni suiga ma aveesea uiga faailoga tagata. Na ia faailoa mai lona ita tele i Kerisiano lea na ia ‘matuā sauā ai pea i le faapotopotoga a le Atua ma faataugā i ai.’ Peitaʻi, ina ua faasaʻo e le Alii o Iesu ia Paulo, sa ia faia ni suiga tetele ma oo ina ia talia le taʻitaʻiga mai i ē na ia sauāina muamua.—Kala. 1:13-20.

¹⁵ E mautinoa e mafai ona tatou faia ni fetuutuunaʻiga i o tatou uiga, faatasi ai ma le fesoasoani a le agaga paia o Ieova. Pe a tatou iloa o loo iai ni uiga faailoga tagata iā i tatou, seʻi o tatou galulue e aveese ma ia “tausia le autasi o le agaga i le fusi o le filemu.” (Efe. 4:3-6) Ua fautuaina i tatou e le Tusi Paia ina ia “oofu . . . i le alofa, auā o le fusi lea e atoatoa ona autasi ai.”—Kolo. 3:14.

Faaaʻoaʻo iā Ieova i la Tatou Faiva

16. O le ā le finagalo o le Atua i tagata?

¹⁶ Na tusi Paulo: “E lē faailoga tagata le Atua.” (Roma 2:11) E finagalo Ieova ia aofia tagata o atunuu uma i lana faatulagaga mo le tapuaʻiga. (Faitau le 1 Timoteo 2:3, 4.) Ina ia faataunuu lenā fuafuaga, ua ia finagalo ai e folafola atu le “tala lelei e faavavau” i “nuu uma, ma ituaiga uma, ma gagana uma, ma tagata uma.” (Faaa. 14:6) Na fetalai Iesu: “O  le fanua o le lalolagi lea.” (Mata. 13:38) O le ā le tāua o lenā tulaga iā te oe ma lou aiga?

17. E faapefea ona tatou fesoasoani atu i tagata eseese uma?

¹⁷ E lē o tagata uma e mafai ona ō i vaega mamao o le lalolagi e faaoo atu ai le feʻau o le Malo i isi. E ui i lea, e mafai ona tatou avatu lenei feʻau i tagata mai i vaega uma o le lalolagi o loo nonofo i a tatou oganuu. Po o tatou mataala ea i avanoa e molimau atu ai i tagata eseese uma, ae lē tau na o i latou na tatou talaʻi i ai mo le tele o tausaga? Aiseā e lē fai ai ma ou sini le tausolomua e talaʻi atu i isi o ē e leʻi mauaina lelei se molimau?—Roma 15:20, 21.

18. O ā faalogona o Iesu na faaalia i tagata?

¹⁸ Na silafia lelei e Iesu le manaʻomia ona fesoasoani atu i tagata uma. E lē na o le tasi se vaipanoa na talai ai Iesu. Ua taʻu mai i se tala o le Tusi Paia, na ‘malaga o ia i aai ma nuu uma.’ Ina ua “silasila atu o ia i le motu o tagata, ona mutimutivale ai lea o lona alofa iā i latou” ma faailoa atu le manaʻomia ona fesoasoani i ai.—Mata. 9:35-37.

19, 20. O ā nisi auala e tatou te faaatagia atu ai le manatu mai o Ieova ma Iesu mo tagata eseese uma?

¹⁹ O ā nisi auala e mafai ai ona e faaalia lea lava uiga? Ua taumafai nisi e molimau atu i vaega o a latou oganuu e lē galueaʻiina soo. E aofia ai vaipanoa o pisinisi, o paka, o nofoaga e faatali ai taavale ma malaevaalele, po o luma foʻi o fale e faigatā ona maua i ai nisi. Ua taumafai nisi e aʻoaʻo se gagana fou ina ia talaʻi atu ai i tagata ese o loo nonofo i o latou vaipanoa, po o ni vaega foʻi e lē masani ona molimau atu i ai i le taimi ua mavae. O le aʻoaʻoina o le auala e faafeiloaʻi atu ai na tagata i la latou gagana, e faailoa atu ai o loo e naunau tele mo lo latou lelei. Afai e lē mafai ona tatou aʻoaʻoina se isi gagana, pe mafai ona tatou faalaeiauina i latou o loo aʻoaʻoina se isi gagana? E tatou te lē mananaʻo e faavaivaia pe fesiligia foʻi le māfuaaga ua taumafai ai nisi e talaʻi atu i tagata mai i se isi atunuu. E tāua soifua uma i le silafaga a le Atua, ma e tatou te mananaʻo foʻi e vāai i mea i le auala lava lea.—Kolo. 3:10, 11.

²⁰ O le faatāuaina o le silafaga a le Atua i tagata, e uiga atu foʻi i le talaʻi i tagata uma e tusa lava po o ā o latou tulaga. Atonu o nisi e leai ni fale, e lē tumamā, pe ola foʻi i ni olaga e lē mamā. Afai e lē agalelei mai nisi iā i tatou, aua le avea lea ma mea e tatou manatu faatauvaa ai i isi e latou te nuu pe gagana faatasi. Na lē lelei le auala na feutagaʻi ai nisi ma Paulo, ae e na te leʻi faataga lenā mea e taofia ai le talaʻi atu i tagata o lenā vaipanoa. (Galu. 14:5-7, 19-22) Na ia talitonu e iai nisi e talilelei mai.

21. E faapefea i le iloaina o le silafaga a Ieova i isi ona fesoasoani iā te oe?

²¹ Ua tatou matuā manino lelei e manaʻomia se vaaiga saʻo, o le silafaga lea a Ieova, i a tatou feutagaʻiga ma o tatou uso, faapea le ʻauuso i le lalolagi aoao ma tagata i le talaʻiga. O le tele e tatou te faaatagia atu ai le silafaga a Ieova, o le tele foʻi lea o le filemu ma le autasi e iai. Ma o le a sili atu ai ona tatou agavaa e fesoasoani atu i isi e alolofa iā Ieova, le Atua “e lē faailogaina” tagata, ae e naunau alofa i tagata uma, “auā o le galuega a ona aao i latou uma.”—Iopu 34:19.

Pe Mafai Ona E Tali?

• O le ā le vaaiga i o tatou uso e ao ona taumafai e ʻalofia?

• E faapefea ona tatou faaaʻoaʻo iā Ieova i le auala e vaai ai i o tatou uso?

• O ā ni lesona na e aʻoaʻoina mai le auala e tatou te vāai ai i le ʻauuso i le lalolagi?

• E faapefea ona tatou faaaʻoaʻo i le silafaga a Ieova pe a tatou ō i le talaʻiga?

[Fesili mo le Suʻesuʻega]

[Ata i le itulau 26]

E faapefea ona e masani i tagata o isi atunuu?

[Ata i le itulau 28]

O ā auala e mafai ona e faaoo atu ai le tala lelei i nisi tagata?