Talaʻi Atu le Tala Lelei i Mauga o Andes

E TOʻASEFULU valu i matou, o loo taooto i se fola palapalā. Ua matou faapupuu i o matou taga e momoe ai i le maalilili, a o matou faalogologo i le mamafa o le timuga o loo paʻū i luga o apa o le fale. Ona o le faalētonu o le tamaʻi fale lea e matou te malu ai, na matou taumānatu ai po o matou tagata muamua ua nonofo i lea fale.

E toʻa 18 le matou ʻaumalaga. Aiseā ua matou malaga mai ai i lenei vaipanoa? Ona o lo matou faanaunauga e tusa ai ma le poloaʻiga a Iesu, e talaʻi le tala lelei “i tuluʻiga uma o le lalolagi.” (Galu. 1:8; Mata. 24:14) O lea na matou ō atu ai e talaʻi i se vaipanoa mamao ese i Andes, i Polivia.

Faigāmalaga Fitā

O le faafitauli muamua, o le malaga atu lea i le nofoaga na matou faamoemoe e talaʻi ai. Na matou iloa ai, e lē iloa tonu po ā taimi e feoaʻi ai pasi mo vaipanoa maotua. E lē gata i lea, ina ua sau le pasi, ona matou iloa ai foʻi lea e lē o se pasi telē e pei ona matou manatu ai, ma o nisi o i matou e leʻi iai ni o matou nofoa. Ae peitaʻi, na matou taunuu i le nofoaga na matou faamoemoe atu i ai.

O lo matou faamoemoe, o le malaga atu lea i nuu i luga o mauga o  Andes i Polivia. O lea, ina ua matou taunuu, na alu le matou savaliga i auala malifa o le mauga, e mulimuli le isi i tua o le isi, e tofu i matou ma le avega e ave.

E ui e foliga mai e laiti nuu ae e vavamamao fale ma e umi se taimi e asia ai nuu taʻitasi. E tusa po o le ā le mamao matou te savavali ai, e iai lava se isi fale e vāai atu i ai. Sa fai ma matou fesēsēaʻi ona o le tele o magāala.

“Aiseā Tou te Leʻi ō Mai ai Muamua?”

Na maofa se tasi tinā i le mamao na matou savavali ai, ma na malie o ia e matou te faaaogā lana umukuka ma fafie e fai ai la matou ʻaiga o le aoauli. Ina ua iloa e se tasi tamāloa le aʻoaʻoga a le Tusi Paia e faatatau i se isi pe a oti, na ia fesili mai, “Aiseā tou te leʻi ō mai ai muamua?” Na fiafia tele o ia, o lea ina ua matou tuua lona nuu, na sau o ia e momoli i matou ma fai mai ni ana fesili. Na faaalia e se isi tamāloa e leʻi faalogo lava i Molimau a Ieova le fiafia i a matou lomiga. Na ia faafetai mai mo le asiasi atu ma ia tuuina mai iā i matou le ki o lona tamaʻi fale e matou te momoe ai.

I se tasi pō pogisa na matou faatūina ai o matou faleʻie i le mea e tele ai loi lapopoʻa. Na ʻai i matou e loi ona ua avea i matou ma faasoesā, ae na lē mafai ona matou ō i se isi mea ona ua matou lē lavavā. O le mea e lelei ai, e leʻi umi ae lē toe ūina i matou e loi.

Na tigā o matou tua ma ivi auā na matou moemoe i luga o le palapala ae na iʻu ina masani ai. Na galo tigā uma ina matou vaaia i le taeao vanu matagofie a o faagasolosolo malie aʻe ao, ma le  matagofie o tumutumu mauga o loo toʻa ai le aisa. E pau le mea e faalogoina o le vaitafe ma pese a manulele.

Ina ua uma ona matou taeele i le vaitafe, na matou talanoa faatasi le mau mai i le Tusi Paia, fai le mālū o le taeao ma agaʻi mālie atu i isi nuu maugā. Na aogā lo matou tautigā. Na matou feiloaʻi i se fafine matua, na tagi ina ua ia iloaina le suafa o le Atua lea o loo i le Tusi Paia, o Ieova. Na ootia ona faalogona. Ua mafai nei ona ia faaaogā le suafa o le Atua i ana tatalo!

Na faapea mai se tamā matua, ua manatua o ia e le Atua, ma na ia usu se pese e faapea na auina atu i matou e agelu. O se isi tamāloa e matuā maʻi ma e lē mafai ona alu ese mai i lona fale, na ia faapea mai iā i matou e leai ma se isi o lona nuu e alu atu e asi o ia. Na ofo o ia ona matou te ō mai mai i La Paz. A o le isi tamāloa na ofo ona o le asiasi atu o Molimau a Ieova i fale o aiga, auā o isi lotu e valaau tagata i le logo.

E leai ma se fale i lenā vaipanoa e iai se eletise, o lea e momoe tagata pe a pogisa ma e feala pe a oso aʻe le lā. O lea la, ina ia maua tagata i fale, e amata la matou talaʻiga i le ono i le taeao, a leai, e lē maua atu tagata auā e usu uma i faatoʻaga. O isi o ē o loo galulue sa fiafia e faalogo i la matou feʻau mai i le Afioga a le Atua, ma ua aogā foʻi seʻi mālōlō ai nai povi mai i le suaina o le fanua. O le toʻatele o tagata na maua i le fale na latou fofola paʻu mamoe matou te nonofo ai, ma valaau le aiga atoa e ō mai e faalogologo. Ona o le talisapaia o lomiga faale-Tusi Paia na matou avatu i isi faifaatoʻaga na latou foaʻi mai ai ni taga saga tetelē.

“O Loo Tou Manatua Pea Aʻu”

Ioe, e manaʻomia ona asia pea tagata ina ia agaʻigaʻi i luma lo latou malamalama i le Tusi Paia. Ma e toʻatele na fai mai matou te toe foʻi atu e aʻoaʻo atili i latou. Ona o lea talosaga, ua matou toe faia ai nisi asiasiga i lea vaega o Polivia.

I se isi malaga, na fiafia se tinā matua ina ua matou toe foʻi atu ma faapea mai: “E pei outou o laʻu fanau. O loo tou manatua pea aʻu.” Na faafetai mai se tamāloa ma valaaulia i matou e nonofo i lona fale i se isi taimi matou te toe asiasi atu ai. Ae o le faamanuiaga sili o a matou taumafaiga, ona ua matou logotala e tusa o se fafine na matou talaʻi muamua i ai, ua nofo nei o ia i le taulaga ma ua ia talaʻiina le tala lelei.

I le aso mulimuli o la matou malaga muamua na leai ai se karasini o la matou ogaumu ma ua lē toe tele ni a matou meaʻai o totoe. Na matou aoina mai ni fafie e tafu ai le afi auā la matou meaʻai mulimuli, ma toe agaʻi atu i le taulaga. Na mamao le mea sa matou iai mai i le taulaga e faatali ai le pasi. Na matou taunuu ua pogisa.

Toe Foʻi Atu i Aiga

Na iai faafitauli ina ua matou toe foʻi, ona na pē le pasi. Mulimuli ane, na maua sa matou lifi i se loli e tumu i tagata. Na maua ai foʻi le avanoa e talaʻi atu ai i le pasese, o ē na fia iloa, pe aiseā na matou afea ai lea vaipanoa. E ui e matamumuli i latou, ae sa foliga fiafia.

Na matou taunuu i aiga ina ua mavae le iva itula o tiʻetiʻe i tua o lea loli, ma ua matou sūsū ma maalilili. Na tele aogā o lea malaga i le loli. Ona na mafai ai ona matou faia ni faamaumauga mo se suʻesuʻega faale-Tusi Paia ma se fafine e nofo i le taulaga.

O se matuā faaeaga le talaʻiina o le tala lelei i tagata i ia vaipanoa maotua. Na matou talaʻi i nuu e fā ma le tele o isi tamaʻi nuu. E matou te manatua pea upu nei: “E matuā matagofie i luga o mauga o vae o lē ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga.”—Isa. 52:7; Roma 10:15.

[Ata i le itulau 17]

Sauni e talaʻi le tala lelei