Faaipoipoga ma le Tausia A‘e o Fanau i le Taimi Lenei o le I‘uga
Faaipoipoga ma le Tausia Aʻe o Fanau i le Taimi Lenei o le Iʻuga
“Ua itiiti le taimi o totoe.”—1 KORI. 7:29.
1. (a) O ā suiga ua iai i le taimi lenei, e aofia ai i mea “e sili ona faigatā”? (e) Aiseā tatou te manatu mamafa ai i suiga i tapulaa tau amio i totonu o aiga?
NA VALOʻlA mai i le Afioga a le Atua o le a faailogaina ona “pō o le iʻuga” i taua, mafuiʻe, oge, ma faamaʻi. (Tani. 8:17, 19; Luka 21:10, 11) Na lapataʻi mai foʻi le Tusi Paia i lenei taimi faigatā o le talafaasolopito o tagata, o le a avea ma vaitaimi o suiga tetele i tulaga o mea i le lautele. O fevesiaʻiga o le olaga faaleaiga, o se tasi o mea “e sili ona faigatā” i nei “aso e gata ai.” (2 Timo. 3:1-4) Aiseā e tatou te manatu mamafa ai i na suiga? Ona ua matuā taatele ma e malosi foʻi, e ono taaʻina ai le auala e vaai ai Kerisiano i faaipoipoga ma le tausia aʻe o fanau. I le ā le auala?
2. O le ā le vaaiga masani a le lalolagi e faatatau i faaipoipoga ma talagā faaipoipoga?
2 I aso nei, ua faigofie lava ma ua taatele tatalagā faaipoipoga, ma ua faatupulaʻia lea tulaga i le tele o atunuu. Ae peitaʻi, e ao ona manino i o tatou mafaufau e matuā ese lava le silasila a Ieova le Atua i faaipoipoga ma talagā faaipoipoga, na i lo le tulaga masani e pei ona taliaina e le toʻatele i le lalolagi. O le ā la le silasila a Ieova?
3. O le ā le silasila a Ieova ma Iesu i faaipoipoga?
3 E faatalitalia e Ieova i latou ua faaipoipo e tumau ona faamaoni i la latou tautoga o le faaipoipoga. Ina ua ia tuufaatasia le uluaʻi tamaloa ma le fafine i le faaipoipoga, na fetalai Ieova e ao i ‘le tane faatasi ma lana avā; ona avea ma tino e tasi.’ Na toe taʻua e Iesu Keriso mulimuli ane lenā lava faamatalaga ma faaopoopo mai: “O ē ua faatasia e le Atua, aua neʻi tuueseeseina e se tagata.” Na fetalai atili Iesu: “Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.” (Kene. 2:24; Mata. 19:3-6, 9) O lea la, o le silasila a Ieova ma Iesu i faaipoipoga, o se aufaatasiga mo le olaga atoa lea e faatoʻā muta pe a maliu se tasi o le paaga. (1 Kori. 7:39) Talu ai o le faaipoipoga o se faatulagaga paia, e lē tatau la ona manatu māmā i le tatalaina o se faaipoipoga. O le mea moni, ua taʻua i le Afioga a le Atua e ʻinoʻino Ieova i talagā faaipoipoga e leai sona faavae faale-Tusi Paia. *—Faitau le Malaki 2:13-16; 3:6.
Faaipoipoga ma Tiute Tauave
4. Aiseā ua salamō ai nisi o Kerisiano talavou i le vave faaipoipo a o laiti pea?
4 Ua faatumulia lenei lalolagi lē amioatua i mea e fesootaʻi atu i feusuaʻiga. I aso taʻitasi, e tau ai le vaai i mea e ono faagaeeina ai o tatou faalogona i feusuaʻiga. E lē tatau ona tatou manatu māmā i aafiaga iā i tatou, aemaise lava nai a tatou fanau i le faapotopotoga. E faapefea ona tali atu talavou Kerisiano i lenei taaʻiga lē lelei, lea e faagaee ai faanaunauga i feusuaʻiga e tusa lava pe latou te tetee atu i ai? Ua taumafai nisi e taulimaina lea tulaga e ala i le vave faaipoipo a o laiti pea. I lenā tulaga, ua latou faamoemoe e ʻalofia ai le aafia i feusuaʻiga lē mamā. Peitaʻi o isi, e leʻi umi lava ona faaipoipo, ae toe faanoanoa i le filifiliga na fai. Aiseā? Ona o le taimi lava e uma ai le talutalu fou o le faaipoipoga, ae la iloa ane, e toetoe lava o mea uma i le olaga i aso faisoo e eseese ai i laʻua. E manino la, ua fesagaʻi na ulugalii ma luʻi e sili ona faigatā.
5. O le ā e fesoasoani i ulugalii ina ia faamaoni pea i a latou tautoga o le faaipoipoga? (Tagaʻi i le faaopoopoga i lalo.)
5 O le faaipoipo atu i se tasi, e tusa lava po o se Kerisiano, a e iʻu ane e matuā ese lava mai i le mea na e faatalitalia, e mautinoa lava le faigatā tele. (1 Kori. 7:28) Ae peitaʻi, po o le ā lava le faigatā o le tulaga e iai, ua iloa e Kerisiano moni o talagā faaipoipoga e aunoa ma se māfuaaga faale-Tusi Paia, e lē o se vaifofō lelei lea i faafitauli o se faaipoipoga lē fiafia. O le mea lea, o i latou e taumafai malosi e faatumauina a latou faaipoipoga ona e latou te mananaʻo e faamaoni i a latou tautoga o le faaipoipoga, e talafeagai i ai le faaaloalo ma le fesoasoani alofa mai le faapotopotoga Kerisiano. *
6. E faapefea ona manatu talavou Kerisiano i faaipoipoga?
6 Po o oe o se talavou ma e te leʻi faaipoipo foʻi? Afai o le tulaga lenā, e faapefea ona e manatu i faaipoipoga? E te mafai ona ʻalofia le tele o faanoanoaga pe a e faatali seʻia e matua i tausaga, i le mafaufau, ma matua faaleagaga ma ua e sauni e faaipoipo, a o leʻi amata ona iai se faauōga ma se Kerisiano o le isi itupā. O le mea moni, e lē o faatulaga mai e le Tusi Paia le matua e faaipoipo ai. * Ae peitaʻi, ua faaalia e le Tusi Paia e sili atu ona lelei pe a faatali seʻia teʻa tausaga o le olaga, lea e malolosi ai faalogona mo feusuaʻiga. (1 Kori. 7:36) Aiseā? Aua o faalogona malolosi i feusuaʻiga e mafai ona faasesēina ai se faaiʻuga lelei, ma faapogai ai oe e faia ni faaiʻuga lē saʻo lea e oo atu ai i faanoanoaga mulimuli ane ai. Ia manatua, o fautuaga atamai a Ieova i faaipoipoga o loo i le Tusi Paia e mo lou lelei ma lou fiafia.—Faitau le Isaia 48:17, 18.
Tiute Tauave a Mātua
7. O ā nisi o mea ua oo i ulugalii talavou, ma e faapefea ona oo ai tulaga faigatā i le faaipoipoga?
7 O nisi o ulugalii e faaipoipo laiti e oo ina avea ma mātua ae o lea lava e laiti tele. E leʻi lava le taimi e iloa lelei ai e le tasi le isi ae o lea o le a fanau mai le pepe, lea e manaʻomia ona uaʻi atu i ai i le 24 itula o le aso. Pe a oo ina fanau mai le pepe ma manaʻomia le uaʻi atoatoa atu i ai a le tinā, e ono lagona ai e le tane talavou lea le fuā. E lē gata i lea, o le lē lelei o se moe i le pō e oo ai ina mafatia faalogona lea e oo ai ina faigatā le mafutaga a le ulugalii. Ua oo ina iloa e le ulugalii talavou lenei, ua lē o toe tele so la saʻolotoga o iai. Ua lē o toe mafai nei ona ō i mea sa masani ona ō i ai, ma faia ni mea sa mafai ona la faia muamua. E faapefea ona la vaai i le suiga ua tulaʻi mai?
8. E faapefea ona vaai i le tausia o fanau, ma aiseā?
8 E pei lava ona avea le faaipoipoga o se tiute tauave, e ao foʻi ona vaai i le tausia aʻe o fanau o se tiute tauave ma o se tofiga mamalu mai le Atua. Po o ā lava ni fetuutuunaʻiga e fai e se ulugalii Kerisiano ona ua iai se pepe, e tatau lava ona fai le mea sili e la te mafai e ola ai ia ōgatasi ma lea tulaga, i se auala e iloa ai lo la manatu mamafa i lo la tiute. Ona na tuuina atu e Ieova i tagata le tulaga e mafai ai ona faia ni fanau, e manaʻomia la e mātua ona vaai i le pepe fou o se ‘tofi mai iā Ieova.’ (Sala. 127:3) O le a taumafai le tinā ma le tamā Kerisiano e fai lo la tiute tauave o ni “mātua e tusa ma le finagalo o le Alii.”—Efe. 6:1.
9. (a) O le ā e aofia ai i le tausia aʻe o se tamaitiiti? (e) O le ā e mafai ona fai e le tane e fesoasoani ai i lana avā ina ia tumau ona malosi faaleagaga?
9 O le tausia aʻe o se tamaitiiti, e aofia ai tausaga e tele o se olaga faataulagaina. E tele se taimi ma le malosi o mātua e faaalu ai. E manaʻomia ona malamalama se tane Kerisiano o le tele o tausaga pe a mavae le fanau mai se tamaitiiti, e faalavelavea ai le uaʻi atu o lana avā i sauniga ma itiiti foʻi le avanoa e fai ai ni ana suʻesuʻega totino ma mafaufau loloto i ai. E mafai ona aafia ai lona tulaga lelei faaleagaga. O le tiute tauave o le tausia faamaoni o fanau, e manaʻomia ai ona faia e le tane mea uma e na te mafaia e fesoasoani ai i le tausia o le tamaitiiti. E mafai ona taumafai ia maua e lana avā mea o loo ia misia i sauniga, e ala i le talanoaina ma ia o nisi o vaega o le polokalame pe a oo i le fale. E mafai foʻi ona ia fesoasoani i le tausia o le pepe, ina ia tuu atu le avanoa i lana avā e faia ai sona sao uigā i le talaʻia o le Malo.—Faitau le Filipi 2:3, 4.
10, 11. (a) E faapefea ona tausia aʻe fanau i “apoapoaʻiga a Ieova”? (e) Aiseā ua tatau ai le faamālō i le toʻatele o mātua Kerisiano?
10 O mātua e naunau i lo la tiute tauave, e sili atu mea e la te saunia mo le tamaitiiti nai lo meaʻai, lavalava, fale, ma le tausia o le soifua mālōlōina. Aemaise lava i lenei taimi faigatā o le iʻuga, e manaʻomia ona aʻoaʻoina fanau mai lava o laiti i mataupu silisili tau amio e ola ai. E ao ona tausia aʻe fanau “i aʻoaʻiga ma apoapoaʻiga a Ieova.” (Efe. 6:4) O nei “apoapoaʻiga” e aofia ai le tamau o manatu o Ieova i le mafaufau o se tamaitiiti, mai lava i lona laitiiti seʻia oo i vaitaimi faigatā ua avea ai o ia ma talavou.—2 Timo. 3:14, 15.
11 Ina ua taʻu atu e Iesu i ona soo e ao ona latou “ō atu e fai tagata o nuu uma lava ma soo,” e mautinoa lava sa i lona finagalo e ao i mātua ona fesoasoani i a latou fanau e avea ma soo. (Mata. 28:19, 20) E faigatā ona faia lenā mea ona o omiga o loo avatu e le lalolagi i talavou. O le mea lea, o mātua ua taulau i le tausia aʻe o a latou fanau e avea ma Kerisiano tuuina atu, ua tatau i ai le faamālō a tagata uma i le faapotopotoga. Ua latou “manumalo” i taaʻiga a le lalolagi i lo latou faatuatua ma le faamaoni i le avea o ni mātua e tausisi i o latou tiute tauave.—1 Ioa. 5:4.
Nofofua po o le Lē Faia o ni Fanau Ona o se Fuafuaga Tāua
12. Aiseā e filifili ai nisi o Kerisiano e nofofua mo se taimi?
12 Ona ua “itiiti le taimi o totoe” ma ua “suia le tulaga o mea a lenei lalolagi,” ua uunaʻia ai i tatou e le Afioga a le Atua ina ia iloilo itu e lelei ai le nofofua. (1 Kori. 7:29-31) Ua filifili nisi o Kerisiano e nofofua pea i le olaga, po o le nofofua foʻi mo ni tausaga a o leʻi faaipoipo. E faamālō iā i latou ona e latou te leʻi faaaogāina le nofofua e saʻili ai ni o latou lava lelei. E toʻatele ua nofofua pea ina ia auauna ai iā Ieova ma “leai se mea e faalavelavea ai.” (Faitau le 1 Korinito 7:32-35.) Ua auauna nisi o Kerisiano nofofua e avea o ni paeonia, po o le galulue foʻi i Peteli. O nisi ua latou saʻili e faalautele atu le faaaogāina o i latou i le faalapotopotoga a Ieova, i le agavaa e auai i le Aʻoga mo Toleniga i le Faiva. O le mea moni, o i latou na auauna o ni faifeʻau faataimi atoa mo se taimi a o nofofua, ona filifili lea e faaipoipo mulimuli ane, e masani lava ona lagona o loo aogā i a latou faaipoipoga lesona tāua na latou aʻoaʻoina i na uluaʻi tausaga.
13. Aiseā ua filifili ai nisi ulugalii Kerisiano e lē faia ni fanau?
13 I nisi o vaega o le lalolagi, ua iai foʻi se isi suiga ua tupu i olaga i aiga—ua tele ulugalii ua filifili e lē faia ni fanau. Ua faia faapea e nisi ona e mananaʻo e faasao le tupe; ua faia e isi ona e latou te mananaʻo e aua neʻi faalavelavea i le saʻilia o se galuega e tele ai tupe. E iai foʻi ulugalii Kerisiano ua lē faia ni fanau. Ae peitaʻi, e masani ona latou faia faapea, ina ia lē faalavelavea ai le auauna atu iā Ieova. E lē faapea ai, ua lē fiafia nei ulugalii i le olaga e pei ona masani ai faaipoipoga. O loo latou fiafia, peitaʻi ua latou loto malilie e faamuamua manaʻoga o le Malo i lo o nisi o faamanuiaga e maua i le faaipoipoga. (1 Kori. 7:3-5) O nisi o na ulugalii o loo auauna iā Ieova, atoa ma o latou uso i le galuega matagaluega ma le itumalo, po o le galuega i Peteli. Ua auauna nisi o ni paeonia po o ni misionare. O le a lē faagaloina e Ieova la latou galuega ma lo latou alofa na faaalia i lona suafa.—Epe. 6:10.
‘Puapuaga i le Tino’
14, 15. O le ā le “puapuaga i o latou tino” e oo i mātua Kerisiano?
14 Na taʻu atu e le aposetolo o Paulo i Kerisiano ua faaipoipo e “oo puapuaga i o latou tino.” (1 Kori. 7:28) E ono aofia ai faafitauli i le soifua mālōlōina o le ulugalii, o le la fanau, po o ō la mātua ua matutua. E ono aofia ai foʻi faigatā ma tigā o le tausia aʻe o le la fanau. E pei ona taʻua i le amataga o lenei mataupu, na valoia i le Tusi Paia, o “aso e gata ai” e “oo mai ai aso e sili ona faigatā.” O nisi o mea e sili ona faigatā, o fanau e “faalogogatā i mātua.”—2 Timo. 3:1-3.
15 O le tausia aʻe o fanau o se luʻi e matuā faigatā i mātua Kerisiano. E lē o puipuia i tatou mai aafiaga leaga o “aso e sili ona faigatā.” O lea la, e ao i mātua Kerisiano ona tau pea le taua agaʻi i taaʻiga leaga o loo aumaia e le “faiga o mea a lenei lalolagi” i a latou fanau. (Efe. 2:2, 3) Ma e lē o taimi uma e tatou te manumalo ai! Pe a lē toe auauna iā Ieova se atalii po o se afafine i se aiga Kerisiano, e mautinoa o se “puapuaga i le tino” lea mea mo mātua na taumafai e tausi aʻe o ia i le upu moni a le Atua.—Faata. 17:25.
“E Tupu le Puapuaga Tele”
16. O le ā le “puapuaga” lea na valoia e Iesu?
16 So o se “puapuaga” lava e fesootaʻi atu i le faaipoipoga ma le tausia aʻe o fanau, o le a sili mamao atu ai le isi puapuaga i lona telē. O lana valoaga i lona faatasi mai ma le iʻuga o le faiga o mea, na taʻua ai e Iesu: “E tupu le puapuaga tele lea e leai sona tusa talu le amataga o le lalolagi, e oo mai lava i aso nei, ma e lē toe tupu foʻi se mea faapea.” (Mata. 24:3, 21) Na faaalia mulimuli ane e Iesu o le a faasaoina se motu o tagata e toʻatele i lenei “puapuaga tele.” Ae peitaʻi, o le a faaauau pea ona tau le faiga o mea a Satani faasaga i Molimau fifilemu a Ieova. E mautinoa, o le a avea ma taimi e sili ona faigatā mo i tatou uma lava—tagata matutua faapea ma tamaiti.
17. (a) Aiseā e tatou te fesagaʻia ai ma le mautinoa le lumanaʻi? (e) O le ā e tatau ona taaʻina ai la tatou vaai i faaipoipoga ma le tausia aʻe o fanau?
17 Ia mātau le mea lenei, e lē tatau ona tatou soona fefefe i mea o le a tutupu i le lumanaʻi. O mātua o loo faamaoni iā Ieova e faamoemoe o le a puipuia i latou faatasi ai ma a latou fanau iti. (Faitau le Isaia 26:20, 21; Sefa. 2:2, 3; 1 Kori. 7:14) O le mea e ao ona fai, ia tatou mataala i aso faigatā o loo tatou ola ai nei, ma ia taaʻina e lenā mataala le auala e tatou mafaufau ai i faaipoipoga ma le tausia aʻe o fanau i lenei taimi o le iʻuga. (2 Pete. 3:10-13) O le faia faapea, pe e tatou te nofofua pe faaipoipo, pe iai pe leai ni fanau—o le a tatou avatu le mamalu ma le viiga iā Ieova ma le faapotopotoga Kerisiano.
[Faaopoopoga i lalo]
^ pala. 3 Tagaʻi i le tusi, Live With Jehovah’s Day in Mind i lalo o le tamaʻi ulutala “He Has Hated a Divorcing,” i le itulau 125.
^ pala. 5 O i latou o loo feagai ma faafitauli i le faaipoipoga, o le a faalaeiauina i latou i le toe tagaʻi i mataupu e uiga i faaipoipoga o loo maua i Le Olomatamata o Setema 15, 2003, ma le Ala Mai! o Aperila-Iuni, 2001.
^ pala. 6 Tagaʻi i le mataupu e 30, “Po ua Talafeagai Ona Ou Faaipoipo?” i le tusi, Fesili ua Fesili Mai ai Talavou—Tali e Aogā.
Se Autaluga
• Aiseā e lē tatau ai ona faanatinati se Kerisiano talavou e faaipoipo?
• O le ā e aofia ai i le tausia aʻe o se fanau?
• Aiseā ua nofofua ai le toʻatele o Kerisiano, ma pe afai foʻi ua faaipoipo, aiseā ua lē faia ai ni fanau?
• O ā “puapuaga” e ono oo i mātua Kerisiano?
[Fesili mo le Suʻesuʻega]
[Ata i le itulau 17]
Aiseā e atamai ai mo Kerisiano talavou ona faatali seʻi matutua ona faaipoipo lea?
[Ata i le itulau 18]
E telē se mea e mafai ona fai e se tane e fesoasoani ai i lana avā ina ia faia se sao uigā i gaoioiga faa-Kerisiano
[Ata i le itulau 19]
Aiseā ua filifili ai nisi o ulugalii Kerisiano e lē faia ni fanau?