Ia Saʻili le Taʻitaʻiga a le Atua i Mea Uma

“O lenei Atua, o lo tatou Atua lava ia e faavavau faavavau lava; o ia lava na te taʻitaʻiina i tatou e oo lava i le oti.”—SALA. 48:14.

1, 2. Aiseā e ao ai ona tatou mulimuli i le taʻitaʻiga a Ieova na i lo le faalagolago i lo tatou lava atamai, ma o ā fesili ua lāgā ai?

E FAIGOFIE lava ona faasesēina i tatou e manatu e lelei mea e leai se aogā po o mea e faaleagaina ai. (Faata. 12:11) Pe afai ua tatou matuā mananaʻo lava e fai se mea e lē talafeagai mo se Kerisiano ona faia, e tele lava ina taʻu mai e o tatou loto māfuaaga e fai ai lenā gaoioiga. (Iere. 17:5, 9) O lea la, na faaalia e le faisalamo le atamai, ina ua ia tatalo iā Ieova e faapea: “Ia e aauina [mai] lou malamalama ma lau upu moni, ia la taʻitaʻi mai iā te aʻu.” (Sala. 43:3) Sa faatuatua Tavita iā Ieova ae lē o lona poto e gata mai, ma sa ia faalagolago foʻi i ai mo le taʻitaʻiga. I le pei o le faisalamo, e ao foʻi ona tatou vāai atu i le Atua mo le taʻitaʻiga.

² Ae aiseā e manaʻomia ai ona tatou faatuatua i le taʻitaʻiga a Ieova nai lo o se isi lava taʻitaʻiga? O fea le taimi e tatou te saʻili ai i le taʻitaʻiga a Ieova? O ā uiga e ao ona tatou atiaʻe ina ia maua ai aogā mai le taʻitaʻiga a Ieova, ma o faapefea ona ia taʻitaʻia i tatou i aso nei? O fesili tāua nei o le a talanoaina i lenei mataupu.

Aiseā e Faalagolago ai i le Taʻitaʻiga a Ieova?

3-5. Aiseā e tatou te faalagolago atoatoa ai i le taʻitaʻiga a Ieova?

³ O Ieova o lo tatou tamā o i le lagi. (1 Kori. 8:6) E silafia e ia mea uma e uiga iā i tatou taʻitoʻatasi, ma na te silafia o tatou loto. (1 Samu. 16:7; Faata. 21:2) Na faapea atu le tupu o Tavita i le Atua: “O oe lava ua e silafia loʻu nofo i lalo ma  loʻu tulaʻi i luga; ua e silafia mamao mai oʻu manatunatu. A o leai lava se upu i loʻu gutu, faauta, Ieova e, ua e silafia uma lava.” (Sala. 139:2, 4) Talu ai e silafia lelei e Ieova i tatou, e mautinoa la e silafia e ia le mea e sili ona lelei mo i tatou. E lē gata i lea, e iā Ieova le atamai uma. E silafia mai e ia mea uma, e loloto atu lana silasila nai lo o so o se tagata, ma e na te silafia iʻuga o mea mai lava i le amataga. (Isa. 46:9-11; Roma 11:33) O ia o le “Atua poto e toʻatasi.”—Roma 16:27.

⁴ E lē gata i lea, e alofa Ieova iā i tatou ma e finagalo pea o ia i le mea e sili ona lelei mo i tatou. (Ioa. 3:16; 1 Ioa. 4:8) I le avea ai ma Atua alofa, o loo aao mafola mai o ia iā i tatou. Na tusi le soo o Iakopo e faapea: “O meaalofa lelei uma ma mea uma e atoatoa ona lelei, e mai lugā, auā e sau mai le Tamā o le malamalama.” (Iako. 1:17) O i latou e taʻitaʻia e le Atua, e latou te maua le tele o aogā mai lona aao foaʻi.

⁵ Ma le manatu faaiʻu, e silisili ese Ieova. E tusa ai o lenei mea, na taʻua e le faisalamo: “O lē nofo i le mea lilo o i ai lē Silisili ese, e mau o ia i le paolo o Lē e ona le malosi uma lava. Ou te faapea atu iā Ieova, ‘O loʻu malu o ia ma loʻu ʻolo; o loʻu Atua ou te faatuatua iā te ia.’” (Sala. 91:1, 2) Pe afai tatou te mulimuli i le taʻitaʻiga a Ieova, ua tatou saʻilia la le taʻitaʻiga sili auā e lē mafai ona lē taulau o ia. E oo foʻi i taimi e tatou te fetaiaʻi ai ma teteega, e fesoasoani mai Ieova iā i tatou. E na te lē tuulafoaʻia i tatou. (Sala. 71:4, 5; Faitau le Faataoto 3:19-26.) Ioe, e silafia e Ieova le mea e sili ona lelei mo i tatou, e finagalo o ia i le mea e sili ona lelei mo i tatou, ma e iā te ia le mana e saunia ai le mea e sili ona lelei mo i tatou. O se faiga lē atamai la mo i tatou pe a teena lana taʻitaʻiga. O lea la, o fea le taimi e tatou te manaʻomia ai lenā taʻitaʻiga?

O Afea e Tatou te Manaʻomia ai le Taʻitaʻiga?

6, 7. O fea le taimi e tatou te manaʻomia ai le taʻitaʻiga a Ieova?

⁶ O le mea moni, tatou te manaʻomia le taʻitaʻiga a le Atua i o tatou olaga atoa, mai lava a o talavou seʻia oo ina matutua. Na faapea mai le faisalamo: “O lenei Atua, o lo tatou Atua lava ia e faavavau faavavau lava; o ia lava na te taʻitaʻiina i tatou e oo lava i le oti.” (Sala. 48:14) I le pei o le faisalamo, o Kerisiano atamamai e lē mafai ona muta lo latou saʻili atu i le Atua mo le taʻitaʻiga.

⁷ O le mea mautinoa, e iai taimi e faanatinati ai ona tatou manaʻomia se fesoasoani. O nisi taimi e tatou te feagai ai ma “puapuaga,” atonu ua fesagaʻi ma ni sauāga, se maʻi tigāina, pe vāea faafuaseʻi mai le galuega. (Sala. 69:16, 17) O se faamāfanafanaga i taimi faapena pe a liliu atu iā Ieova, ma talitonu o le a ia faamalosia i tatou ina ia tumau, ma taʻitaʻia i tatou ina ia faia ni filifiliga atamai. (Faitau le Salamo 102:17.) Peitaʻi, e iai foʻi isi tulaga e tatou te manaʻomia ai lana fesoasoani. O se faaaʻoaʻoga, pe a tatou talanoa atu i o tatou tuaoi e faatatau i le tala lelei o le Malo, e tatou te manaʻomia le taʻitaʻiga a Ieova ina ia maua ai ni iʻuga fiafia o la tatou talaʻiga.  Ma o so o se taimi tatou te faia ai se filifiliga—pe i faafiafiaga, o laʻei ma teuga, o aumea, galuega, aʻoaʻoga, po o se isi lava mea—e pau le auala e tatou te gaoioi ai ma le atamai, o lo tatou mulimuli lea i le taʻitaʻiga a Ieova. O le mea moni, e tatou te manaʻomia le taʻitaʻiga i vala uma o o tatou olaga.

Lamatiaga o le Lē Amanaʻia o le Taʻitaʻiga a le Atua

8. O ā āuga o le ʻaina e Eva o le fua o le laau faasāina?

⁸ Ia manatua, e ao ona tatou lotomalilie e mulimuli i le taʻitaʻiga a Ieova. E lē faamalosia i tatou e Ieova e faia faapea pe afai tatou te lē mananaʻo ai. O Eva o le uluaʻi tagata na filifili e lē amanaʻia le taʻitaʻiga a Ieova, ma ua faaalia i lana faaaʻoaʻoga le iʻuga e iʻu iai se filifiliga lē lelei faapena. Seʻi manatu foʻi i āuga o lana mea na fai. Na ʻaina e Eva le fua o le laau faasāina ona sa ia manaʻo ia pei o le “atua o loo iloa le lelei ma le leaga.” (Kene. 3:5) O le faia faapea, ua faaalia ai lona fia manaʻo i le matafaioi a le Atua, e ala i le faia o ana lava filifiliga i le mea lelei ma le mea leaga nai lo o le mulimuli i taʻiala a Ieova. O le faia faapea, na ia teena ai le pule silisili ese a Ieova. Sa manaʻo Eva e pulea e ia ia lava, ma sa saʻilia foʻi e lana tane o Atamu lenā foʻi ala fouvale.—Roma 5:12.

9. Pe afai tatou te teena le taʻitaʻiga a Ieova, e tusa o le ā la tatou mea ua fai, ma aiseā e lē atamai ai lenā faiga?

⁹ Pe afai tatou te lē amanaʻia le taʻitaʻiga a Ieova i aso nei, ua pei i tatou o Eva, ua lē taulau ona amanaʻiaina le pule silisili ese a Ieova. O se faaaʻoaʻoga, seʻi mafaufau i se tagata e fai ma ana masani le matamata i ata ma faamatalaga o faiga matagā faaleituaiga. Pe afai o loo aufaatasi o ia ma le faapotopotoga Kerisiano, ua ia iloa la taʻiala a Ieova e faatatau i lenei mataupu. Afai e lē tatau ona taʻua iā i tatou mea lē mamā, ua sili atu ai la ona leaga le matamata i ai ma ni faanaunauga leaga i faiga lē mamā tau feusuaʻiga. (Efe. 5:3) Ona ua teena e lenā tagata taʻiala a Ieova, e tusa ua ia faafitia le pule silisili ese a Ieova ma teena Lona tulaga ulu. (1 Kori. 11:3) O se faiga lē atamai lenā faiga, auā e pei ona taʻua e Ieremia, “e lē o i le tagata e savali ona faatonuina le mea e ui ai o ia.”—Iere. 10:23.

10. Aiseā e ao ai ona faaaogā i se auala talafeagai lo tatou filifiliga saʻoloto?

¹⁰ Atonu e tetee nisi i upu a Ieremia, ona e manatu e faapea, talu ai na tuu mai e Ieova iā i tatou le filifiliga saʻoloto, e lē tatau la ona ia faitioina i tatou i le faaaogāina o lenā filifiliga saʻoloto. Peitaʻi, aua neʻi galo o le filifiliga saʻoloto e lē gata o se tiute tauave, ae o se meaalofa foʻi. E tatou te tali atu i le Atua i mea tatou te tautatala ai ma mea tatou te faia. (Roma 14:10) Na fetalai Iesu e faapea: “O le tele o mea i le loto e tautala mai ai le gutu.” Na ia toe fetalai foʻi: “E sau mai le loto mafaufauga leaga, le fasioti tagata, mulilua, faitaaga, gaoi, molimau pepelo, ma upuleaga i le Atua.” (Mata. 12:34; 15:19) O lona uiga, e iloa le tulaga o o tatou loto i a tatou upu ma mea e fai. E faaalia ai le tagata moni e iai i tatou. O le māfuaaga lea e saʻili ai e se Kerisiano atamai le taʻitaʻiga a Ieova i mea uma. O le faia faapea, o le a silafia ai e Ieova ‘⁠ua tonu le loto’ o lenā tagata, ma o le a ia “agalelei” atu iā te ia.—Sala. 125:4.

11. O le ā tatou te aʻoaʻoina mai le talafaasolopito o Isaraelu?

¹¹ Manatua le talafaasolopito o Isaraelu. Sa puipuia e Ieova lenā nuu ina ua latou faia filifiliga lelei ma usitai i ana poloaʻiga. (Iosua 24:15, 21, 31) Peitaʻi, sa tele ina latou faaaogā sesē la latou filifiliga saʻoloto. I aso o Ieremia, na fetalai atu Ieova iā i latou e faapea: “Ua latou lē faalogo mai, ma ua lē uaʻi mai o latou taliga, a ua latou savavali i mafaufauga ma le finau vale o latou loto leaga, ua latou tuumuli i tua, a ua lē savavali i luma.” (Iere. 7:24-26) Pagā se tulaga faanoanoa! Tau ina ia aua lava neʻi o tatou teena  le taʻitaʻiga a Ieova ma savavali i o tatou lava tapulaa, ona o le lotomaaa po o le faamalieina foʻi o o tatou lava manaʻoga, ona avea ai lea ma ē “tuumuli i tua, a ua lē savavali i luma”!

O le ā e Manaʻomia Ina ia Utagia ai Fautuaga a le Atua?

12, 13. (a) O le ā le uiga e uunaʻia i tatou e mulimuli i le taʻitaʻiga a Ieova? (e) Aiseā e tāua ai le faatuatua?

¹² O lo tatou alolofa iā Ieova ua uunaʻia ai i tatou e mananaʻo e mulimuli i lana taʻitaʻiga. (1 Ioa. 5:3) Peitaʻi, na taʻua e Paulo se isi mea e tatou te manaʻomia, ina ua ia faapea mai: “Ua tatou savavali ona o le faatuatua, ae lē o mea e vaaia.” (2 Kori. 5:6, 7) Aiseā e tāua ai le faatuatua? Talu ai o loo taʻitaʻi i tatou e Ieova i “ala o le amiotonu,” ae o na ala e lē taʻitaʻia atu ai i le mauaina o le tamaoaiga po o tulaga maualuga i lenei lalolagi. (Sala. 23:3) O le ala lea, e manaʻomia ai lava ona taulaʻi o tatou mata o le faatuatua i taui faaleagaga e maua mai le auauna atu iā Ieova. (Faitau le 2 Korinito 4:17, 18.) Ma e fesoasoani le faatuatua iā i tatou e lotomalilie ai i nai mea manaʻomia i le itu i le tino ua tatou maua.—1 Timo. 6:8.

¹³ Na faaalia mai e Iesu o le tapuaʻiga moni e aofia ai uiga lē manatu faapito, lea foʻi e manaʻomia ai le faatuatua. (Luka 9:23, 24) Ua lotomalilie nisi tagata tapuaʻi faamaoni e tuua nisi mea e fiafia ai, onosai i tulaga mativa, o pulega sauā, o faiga faaituʻau, e oo lava foʻi i sauāga ogaoga. (2 Kori. 11:23-27; Faaa. 3:8-10) Na pau le auala ua mafai ai ona latou faia faapea ma le olioli, ona o le malosi o lo latou faatuatua. (Iako. 1:2, 3) O le faatuatua malosi e mafai ai ona tatou mautinoa, o le mulimuli i le taʻitaʻiga a Ieova o le auala silisili lea ona lelei. O le auala silisili lea mo lo tatou lelei tumau. E tatou te mautinoa e sili mamao atu le taui e maua e i latou o ē tumau ma le faamaoni, na i lo o so o se puapuaga e lē tumau.—Epe. 11:6.

14. Aiseā sa tatau ai iā Akara ona faaalia le lotomaulalo?

¹⁴ Seʻi manatu mai i le manaʻomia tele o le lotomaulalo ina ia mulimuli ai i le taʻitaʻiga a Ieova. Ua faataʻitaʻia mai lenei mea i le mea na tupu i le auauna fafine a Sara, o Akara. Ina ua iloa e Sara e lē mafai ona ia fanauina se tama, ona ia avatu lea o Akara iā Aperaamo, ona tō ai lea o Akara ma ia fanaua ai se tama iā Aperaamo. Ona faasausili lea o Akara i lona matai tamaʻitaʻi e lē fanau. O le iʻuga, na ‘agaleaga Sarai’ iā Akara, ona sola ai lea o ia. Na feiloaʻi Akara ma se agelu a Ieova ma na fai i ai le agelu: “Ia e foʻi atu i lou matai ma e faamaulalo atu iā te ia.” (Kene. 16:2, 6, 8, 9) Atonu sa ono mafai lava ona filifili Akara e mulimuli i se isi taʻitaʻiga. Ae ina ia faia e tusa ai ma le taʻitaʻiga a le agelu, o lea sa tatau ai ona ia lafoaʻi lona uiga faasausili. I le iʻuga, sa faia ma le lotomaulalo e Akara le faatonuga a le agelu, ma na fanau ai ma le saogalemu lana tama o Isamaeli i le fale o lona tamā.

15. Ia faamatala nisi o tulaga atonu e manaʻomia ai ona tatou faaalia le lotomaulalo, ina ia mulimuli ai i le taʻitaʻiga a Ieova i aso nei.

¹⁵ O le mulimuli i le taʻitaʻiga a Ieova e ono uiga i le manaʻomia foʻi iā i tatou ona lotomaulalo. Atonu e tatau i nisi ona talia le manatu e faapea, e inosia e Ieova se ituaiga faafiafiaga o loo latou fiafia i ai. Atonu ua faatigā se Kerisiano i se tasi ma e manaʻomia ona ia faatoese atu. Ia pe atonu foʻi ua ia faia se mea sesē ma e manaʻomia ona ia taʻutino lenā sesē. Ae faapefea pe afai ua faia e se tasi se agasala matuiā? E ao ona ia lotomaulalo ma faailoa atu le agasala i toeaina.  Atonu ua faateʻaina se tasi mai le faapotopotoga. Ina ia toe talia i le faapotopotoga, e tatau ona salamō ma le lotomaulalo ma liliu ese e lē toe faia le agasala. I nei tulaga faapea ma nisi tulaga e tali tutusa, o se faamāfanafanaga upu o loo i le Faataoto 29:23 e faapea: “O le faamaualuga o le tagata e faamaulaloina ai o ia; a o le faamaulalo o le loto e maua ai le viiga.”

O Faapefea Ona Taʻitaʻia i Tatou e Ieova?

16, 17. E faapefea ona tatou maua atoatoa aogā mai le Tusi Paia, le puna o le taʻitaʻiga a le Atua?

¹⁶ O le puna autū o le taʻitaʻiga mai le Atua, o le Tusi Paia, lana Afioga faagaeeina. (Faitau le 2 Timoteo 3:16, 17.) Ina ia maua le tele o aogā mai le Afioga a le Atua, o se mea atamai ona aua neʻi o tatou faatali seʻi tutupu mai faafitauli, ona faatoʻā saʻili lea i le Tusi Paia mo ni upu faalaeiau. Nai lo o lea, ia fai ma a tatou masani le faitau o le Tusi Paia i aso taʻitasi. (Sala. 1:1-3) O le faia faapea o le a tatou iloa lelei ai afioga faagaeeina a le Atua. Ona tutusa ai lea o o tatou manatu ma le finagalo o le Atua, ma o le a tatou nofosauni ai foʻi e faafesagaʻia so o se faafitauli.

¹⁷ E lē gata i lea, e tāua tele ona tatou manatunatu loloto i mea ua tatou faitauina i le Tusi Paia ma tatalo e tusa ai o na mea. A o tatou manatunatu loloto i mau o le Tusi Paia, ia iloilo pe mafai faapefea ona tatou faatatauina na mau i ni tulaga patino. (1 Timo. 4:15) Pe a tatou fesagaʻi ma ni faafitauli matuiā, ia tatalo mo le fesoasoani a Ieova e faasino i tatou i le taʻitaʻiga o loo tatou manaʻomia. O le a fesoasoani mai le agaga paia o Ieova iā i tatou e manatua mataupu silisili aogā mai le Atua, lea sa tatou faitau ai i le Tusi Paia po o lomiga faale-Tusi Paia.—Faitau le Salamo 25:4, 5.

18. I ā auala ua faaaogā ai e Ieova le ʻauuso Kerisiano e taʻitaʻia ai i tatou?

¹⁸ O se tasi o sauniuniga tāua mo i tatou i le saʻilia o le taʻitaʻiga a Ieova, o lo tatou ʻauuso Kerisiano. O se vaega tāua o lenā ʻauuso o le “pologa faamaoni ma le faautauta,” lea o loo fai ma ona sui le Vaega Pule, lea o loo saunia e lē aunoa taumafa faaleagaga e ala mai i lomiga ua lomia ma polokalame mo sauniga ma fonotaga. (Mata. 24:45-47; faatusatusa i le Galuega 15:6, 22-31.) E lē gata i lea, o loo iai foʻi i le ʻauuso Kerisiano tagata malolosi faaleagaga, aemaise lava toeaina, o ē ua agavaa e avatu le fesoasoani ma fautuaga mai le Tusi Paia. (Isa. 32:1) Ua maua foʻi e talavou o loo i aiga Kerisiano se isi sauniuniga tāua. Ua tofia e le Atua o latou mātua talitonu e avea ma pule, ma o loo faalaeiauina pea i latou e saʻili i ai mo le taʻitaʻiga.—Efe. 6:1-3.

19. O ā faamanuiaga e tatou maua pe a faaauau pea ona saʻilia le taʻitaʻiga a Ieova?

¹⁹ Ioe, e eseese auala ua ala mai ai le taʻitaʻiga a Ieova, ma e tatau ona tatou faaaogā lelei na auala. Na faapea mai le tupu o Tavita e faatatau i le taimi na faaalia ai e le nuu o Isaraelu le faatuatua: “Na faatuatua iā te oe o matou tamā; na latou faatuatua, ua e laveaʻi foʻi iā te i latou. Na latou alalaga atu iā te oe, ona laveaʻiina ai lea o i latou; na latou faatuatua iā te oe, ona lē faamāina lea o i latou.” (Sala. 22:3-5) Pe afai tatou te mulimuli ma le lē masalosalo i le taʻitaʻiga a Ieova, o le a ‘⁠lē faamāina foʻi i tatou.’ O le a tatou lē faanoanoa foʻi i lo tatou faamoemoe. Pe afai e ‘⁠tuu atu o tatou ala iā Ieova’ nai lo o le faalagolago i lo tatou lava atamai, o le iʻuga, o le a anoanoaʻi faamanuiaga e tatou te maua e oo lava i le taimi nei. (Sala. 37:5) Pe afai tatou te tutumau ma le faamaoni e usiusitai iā Ieova ma mulimuli i lana taʻitaʻiga, o le a faavavau ona tatou maua na faamanuiaga. Na tusi le tupu o Tavita e faapea: “E fiafia Ieova i le faamasinoga, na te lē tuua foʻi ona tagata amio Atua; e leoleoina i latou e faavavau; . . . E fai lava le nuu mo tagata amiotonu, e nonofo ai pea i latou.”—Sala. 37:28, 29.

Pe Mafai Ona E Faamatala?

• Aiseā e tatou te faalagolago ai i le taʻitaʻiga a Ieova?

• Pe afai tatou te teena le taʻitaʻiga a Ieova, o le ā e faaalia ai?

• O ā nisi o tulaga e manaʻomia ai ona lotomaulalo se Kerisiano?

• O faapefea ona taʻitaʻia i tatou e Ieova i aso nei?

[Fesili mo le Suʻesuʻega]

[Ata i le itulau 8]

Pe e te faalagolago iā Ieova i vala uma o lou olaga?

[Ata i le itulau 9]

Na teena e Eva le pule silisili ese a Ieova

[Ata i le itulau 10]

O le ā le uiga sa manaʻomia e Akara ina ia mulimuli ai i le taʻitaʻiga a le agelu?