Pe E te Manatua?
Pe E te Manatua?
Pe na e fiafia i le faitauina o lomiga fou o Le Olomatamata? Ia, seʻi taumafai pe e mafai ona e taliina fesili o loo mulimuli mai:
• O anafea na asiasi atu ai tagata e saʻilia faailoga i fetu iā Iesu?
Ua faapea mai se tasi lomiga o le Tusi Paia: “E leʻi asiasi atu Makoi iā Iesu i le falepovi i le pō na fanau ai, e pei ona sa faia e leoleo mamoe. Na latou asiasi atu i ni masina mulimuli ane.” O le taimi lenā ua avea Iesu ma “tamaitiiti” ma o loo iai i totonu o se fale. (Mata. 2:7-11) Pe ana asiasi atu le ʻau Makoi iā Iesu i le pō na fanau ai ma avatu i ai auro ma meaalofa taugatā, semanū e lē avatua e Maria ni tamaʻi lupe e lua i le 40 aso mulimuli ane ai.—1/1, itulau e 31.
• O le ā e mafai ona fai e le toʻatele ina ia faatamaoaiga ai o latou olaga?
Atonu e fesili faapea se tasi, ‘Pe mafai ona fetuutuunaʻi loʻu tulaga ma faafaigofie loʻu olaga?’ O le mea lenā sa fai e Amy. Sa tamaoaiga o ia ae na te leʻi maua ai le fiafia. Sa ia iloaina o le tausisi atu i se galuega i lenei lalolagi, na toetoe lava a ia alu ese ai mai le faatuatua. Sa ia filifili loa e faamuamua manaʻoga o le Malo ma mafai ai ona paeonia mo sina taimi. Ua faapea mai Amy, “O lenei ua ou lagona le faamalieina lea ou te leʻi mauaina muamua” a o saʻilia sini faalelalolagi.—1/15, itulau e 19.
• O le ā e mafai ona fesoasoani i nisi tinā ina ia maua ai le faamalieina?
O le toʻatele o tinā e faigaluega. Ua faia faapea e nisi ina ia mafai ona maua ai mea e manaʻomia e le aiga, ae o isi e faigaluega ina ia maua ni a latou lava tupe pe ina ia faatau ai foʻi mea taugatā. Ae o isi, ona o le fiafia tele i a latou galuega. O loo faia e tinā Kerisiano se matafaioi tāua i le aiga—aemaise lava a o laʻitiiti se tamaitiiti. O isi ua filifili e faaitiitia le taimi e faigaluega ai pe lē toe faigaluega foʻi, ina ia uaʻi atoatoa atu i le aiga, ma e sili ona maua ai le faamalieina.—2/1, itulau e 28-31.
• O fea le “tupulaga” sa faasino i ai fetalaiga a Iesu lea o loo faamauina i le Mataio 24:34?
Sa masani ona faaaogā e Iesu le upu “tupulaga” i se auala lē lelei pe a talanoa atu pe tautala e faatatau i tagata amioleaga. Peitaʻi na te leʻi faia faapea ina ua talanoa atu i ona soo, o ē ua toeitiiti ona faauuina lea i le agaga paia. O i latou o tagata o le a sili ona malamalama i le uiga o le manatu o loo i le Mataio 24:32, 33. O lona uiga, e foliga mai sa faasino atu Iesu i ona soo faauuina e lē gata i le uluaʻi senituri, ae faapea foʻi le faatatauga faaonapō nei o ana fetalaiga.—2/15, itulau e 23-4.
• Na faapefea ona avea le Tulafono ma taʻitaʻitama, e pei ona taʻua i le Kalatia 3:24?
Sa masani ona avea se taʻitaʻitama i aso anamua o se pologa maufaatuatuaina, ma o sē na te vaaia le saogalemu o le tamaitiiti ma faamautinoa ua fai e le tamaitiiti mea e manaʻo i ai lona tamā. I se auala faapena, sa puipuia e le Tulafono tagata Iutaia mai taaʻiga leaga, e pei o le faaipoipo i tagata e lē tapuaʻi iā Ieova. Peitaʻi, i le pei o le tagata taʻitaʻitama, sa aogā foʻi le Tulafono mo se taimi lē tumau, seʻia oo ina maliu mai Keriso.—3/1, itulau e 18-21.
• E tusa ai ma le Iakopo 3:17, o ā uiga e ao ona tatou faaalia?
O le naunau i le mamā, e manaʻomia ai ona tatou vave teena mea leaga. (Kene. 39:7-9) E ao foʻi ona tatou tausia le filemu, e ala i le ʻalofia o le fia malosi po o le faia o mea e saveʻu ai le filemu. O se mea lelei la iā i tatou taʻitoʻatasi ona fesili ifo iā te ia lava: ‘Po o iloa aʻu o sē faatupuina le filemu, po sē e saveʻuina le filemu? Pe masani ona iai ni matou feeseeseaʻiga ma isi? Pe ou te itaita gofie, pe faatigā atu i isi? Pe ou te nofosauni e faamagalo atu, ma ou te lē tautū e fai lava le mea ou te manaʻo ai?’—3/15, itulau e 24-5.
• Aiseā na faasolosolo ai ona faamālōlō e Iesu se tamāloa tauaso? (Mareko 8:22-26)
E lē o aumaia e le Tusi Paia se faamalamalamaga maʻoti. Peitaʻi, e mafai ona faapea atu, i lenei mea na tupu, e ala i le faasolosolo ona faamālōlōina e Iesu o le tamāloa, ua tuu atu ai e Iesu se taimi e fetuunaʻi mai ai i le tulaga fou lea ua iai, o lea ua pupula. O loo aliali mai ai le alofa ma le manatu mamafa o Iesu i le tamāloa tauaso.—4/1, itu. 21.